நேரம்!

 சிலருடன் எப்போதும் உறவு நன்றாய் இருக்காது!  சிலருடனான உறவு திடீரென சீர்கெடும்.  

என் தவறு எதுவுமில்லாமலேயே நான் தவறாக நினைக்கப்பட்ட ஒரு சமீபத்தைய சம்பவம்.

ஏதோ ஒருவகையில் ஏதோ ஒரு காரணத்தால் நமக்கு சிலரைப் பிடிக்காது போவது போலவே நம்மையும் சிலருக்கு பிடிக்காது போகும் சந்தர்ப்பங்கள் உண்டு.  சில சமயம் நாம் அதை சீர் செய்து கொள்ள முயற்சிப்போம்.  சிலசமயம் இயலாத காரியம் என்று தெரிந்தாலோ, அல்லது சொல்லியும் புரிந்து கொள்ள மாட்டார்கள், பயன் ஒன்றும் விளையப் போவது இல்லை என்று நினைத்தாலோ அதைப்பற்றி கவலைப்படாமல் விட்டு விடுவோம்.  

சிலருக்கு நாம் முடிந்தவரை உதவியும், நன்மையுமே செய்தும் கூட நம்மைக் கண்டால் அவர்களுக்கு ஆகாது.  அது ஏனென்றே தெரியாது.  எனக்கு இந்த அனுபவம் உண்டு.  அதனால் சொல்கிறேன்.  அதுவும் அடிக்கடி அல்லது தினசரி சந்திக்கும் நபர்களாய் இருந்தால் ரொம்பவே சங்கடம்.

உங்களுக்கும் இந்த அனுபவம் இருக்கும் .

நமக்குத் பிடிக்காதவரைப் பற்றி பேசுவோமே தவிர, நம்மைப் பிடிக்காதவர்கள் பற்றி பேசமாட்டோம்.  ஒன்று கௌரவம் தடுக்கும்  அல்லது நாமே அறியாமல் அல்லது கவலைப்படாமல் இருப்போம்.  நாம் நமக்கு நெருங்கியவர்கள் என்று நினைத்துப் பழகும் எவ்வளவு பேர்கள் நம்மிடம் போலியாக, வேண்டா வெறுப்பாகப் பழகுகிறார்களோ என்கிற எண்ணம் அவ்வப்போது எனக்கு வரும்.

நான் எல்லோரிடமும் உண்மையாகத்தான் இருக்கிறேன் என்று சொல்லலாம்.  அவர்களுக்கு அது தெரிய வேண்டுமே..  அவர்களுக்கு நம்மை எந்த காரணத்துக்காக பிடிக்காமல் போனதோ...  நம்மிடம் சொல்லவா போகிறார்கள்?  எனக்குப் பிடிக்காதவர்களிடமிருந்து முடிந்தவரை ஒதுங்கி விடுகிறேன்.

இந்த விஷயத்தில் மிகப்பழைய சம்பவமும் ஒன்று உண்டு.  அலுவலக சங்கடங்களில் இதெல்லாம் சகஜம் என்றாலும் இவற்றை எல்லாம் தாண்டி வருவது சற்றே சங்கடத்தைத்தரும் நேரங்கள்.  90 களில் நடந்த ஒரு சம்பவம்.

ஒரு பெண்மணி அவருக்கு அலுவலகத்தில் நேரும் எல்லா சங்கடங்களுக்கும் நான்தான் காரணம் என்று சந்தேகப்பட்டார்.   அதை அருகிலிருந்த சிலர்  ஊதி பெரிதாக்கினார்கள்.  இத்தனைக்கும் என்னிடமும் பாஸிடமும் நன்றாய்ப் பழகிக் கொண்டிருந்தவர் / கொண்டிருப்பவர்தான்.  

என் அப்பா அடிக்கடி சொல்வார், ஒரே இடத்தில் பல வருடங்கள் இருந்தால் அது பல்வகைப்பட்ட பொறாமைகளுக்கு வழி வகுக்கும் என்று.  அந்த வகையில் சிலர் இந்த சந்தர்ப்பத்தைப் பயன்படுத்தி என் பெயரைக் கெடுத்தார்கள்.

அதில் நான் மிகவும் உதவி செய்த இரு நபர்களும் அடக்கம்.  ஒருபக்கம் என்னிடமிருந்து உதவி. இன்னொரு பக்கம் இப்படி..  அவர்கள் மனதில் என்னவோ..

மக்கள் ஏன் இப்படி இருக்கிறார்கள் என்று வேதனையுடன் நினைத்துக் கொண்டிருக்கிறேன்.

"ச்சே...   இவர்கள் எல்லாம் ஏன் இப்படி இருக்காங்க ஸ்ரீராம்.."

இவர்கள் பேச்சைக்கேட்டு அந்தப் பெண்ணும் உறுதியாக நான்தான் எல்லாவற்றுக்கும் காரணம் என்று நம்பத் தொடங்கி விட்டார். 

இதனால் எனக்கு அவரால் தொல்லை எதுவுமில்லை.  அவரால் எதுவும் என்னைச் செய்ய முடியாது - என் அமைதியை, நிமமதியைக் கெடுப்பதைத் தவிர! சண்டையும் ஏற்படவில்லை என்றாலும், அவரின் திடீர் பாராமுகம் கஷ்டப்படுத்தியது.  அவரிடம் ஏகப்பட்ட ப்ளஸ்கள் உண்டு.  அயரா உழைப்பாளி.  யாருக்காவது உதவி என்றால் முன்னே நிற்பார்.  நன்றாய் சிரிக்க சிரிக்கப் பேசுபவர், திடீரென முகத்தைத் திருப்பிக் கொண்டு போவது புதிராய் இருந்தது.  முதலில் கவனிக்கவில்லை.  சில நாட்கள் கழித்துதான் கவனித்தேன். 

அவரிடம் விளக்கம் கேட்க முயன்ற முயற்சிகள் தோல்வி அடைந்தன.  விஷயம் என்ன என்று ஒரு மாதிரி காதுக்கு வந்தது.  மனதில் இந்த விஷயம் ஊவா முள்ளாய் உறுத்திக்கொண்டே இருந்தது. 

நாம் தவேறேதும் செய்து அதன் பொருட்டு இதெல்லாம் நடந்தால் நம்மை இந்த அளவு அது பாதிக்காது.  உள்ளுக்குள் உறுத்தலுடன் தட்டி விட்டுக் கொண்டு போய்விடுவோம்!

"தப்பாய் புரிஞ்சிக்கிட்டிருக்கறவங்களுக்கு உண்மையை எப்படிப் புரிய வைப்பது?"

இங்கு அப்படியும் இல்லையே...  என்ன செய்வது என்று யோசித்து ஒரு முடிவுக்கு வந்தேன்.  இது மாதிரி விஷயங்களை சட்சட்டென பைசல் செய்தால்தான் நான் நிம்மதியாக இருக்க முடியும்!

ஒருநாள் மாலை என் பாஸை அழைத்துக் கொண்டு அவர் வீட்டுக்கே சென்று விட்டேன்.  என்னைக் கொஞ்ச நேரம் காத்திருக்கச் சொன்னார் அவர் வீட்டில் வேலை செய்யும் பெண்.  வரவேற்பறையில் அமர்ந்தோம்.

பின்னர் வெளியே வந்த அலுவலகப் பெண் நேரடியாய் பேச்சைத் தொங்கினார்.

"ஒரு மாசமா தினமும் உங்களை 'கவனிக்கும்'படி முட்டி போட்டு நானும் என் மகனும் ரெண்டு வேளை ஜீசஸ் கிட்ட பிரார்த்தனை செய்து கொண்டிருக்கிறோம்...  என் தேவன் உங்களை சும்மா விடமாட்டார்.." என்றார்!

நான் சொல்ல வந்ததை ஒத்திப்போட்டு, "ஒரு மாதமாகவா?" என்றேன்.

"ஆமாம்..  காலைலயும்  ஒண்ணும் சாப்பிடாம  ஒரு மணி நேரம் ஜெபம் செய்வோம்.  அப்புறம்தான் சாப்பிடுவோம்"

"ஏன்?  இதற்கு நீங்கள் நேராய் என்னிடம் வந்து விளக்கம் கேட்டிருக்கலாமே..  இவ்வளவு நாள் பழகியதில் நீங்கள் என்னை புரிந்து கொண்டது இவ்வளவுதானா?"

"அதெல்லாம் ஜீஸஸ்க்கு தெரியும்,  அவர் பார்த்துக்குவார்"  அவர் என் கண்களை பார்க்காமல் வேண்டா வெறுப்பாக தரையைப் பார்த்தபடியேதான் பேசிக் கொண்டிருந்தார்.

"பழி வாங்குவதற்குதான் கடவுள் என்றால், அது கடவுளே அல்ல.  உங்கள் தேவன் உங்களுக்காக என்னை பழி வாங்க வருவாரேயானால், இந்த ஒரு மாதத்தில் இந்நேரம் நான் பாதிக்கப்பட்டிருக்க வேண்டும்.  நான் அவ்வளவு சக்தி வாய்ந்த ஆளா?  இல்லை, உங்கள் கடவுளுக்குத்தான் பலமில்லையா?  நான் ஏன் பாதிக்கப்படவில்லை?  உங்கள் கடவுள், என் கடவுள்  என்பதை எல்லாம் விடுங்கள்.  மேலே தனித்தனி அறைகளில், பங்களாக்களில் உங்கள் கடவுள், என் கடவுள் என்றெல்லாம் தங்கி இருந்து என் ஆள், உன் ஆள் என்று பாகுபாடு பார்ப்பதாய் நான் நினைக்கவில்லை.   ஒருவருக்கு கெடுதல் செய்யும் ஆள் நான் இல்லை என்பதை இவ்வளவு நாள் பழக்கத்தில் நீங்கள் புரிந்து கொள்ளவில்லை என்பது வருத்தமே..  அப்படி கெடுதல் செய்திருந்தால், பாதிக்கப்பட்டவரின் வயிற்றெரிச்சலே கஷ்டம் கொடுத்தவரை படுத்தி தண்டனை கொடுத்துவிடும்.  நான் இதுவரை நன்றாகத்தான் இருக்கிறேன் என்பதைப் பாருங்கள்.  உங்களிடம் என்னைப்பற்றி யாராவது தவறாகச் சொல்லி இருந்தால், என்னிடம் அவர்கள் யாரென்று சொல்லவேண்டாம், அவர்கள் யார், அவர்கள் குணம் என்ன என்று யோசித்துப் பாருங்கள்.. நீங்கள் தவறான ஆளை துரத்திக் கொண்டு இருக்கிறீர்கள்.  உங்கள் உண்மையான எதிரிகள் யாரென்று எனக்குத் தெரியாது, அவர்கள் உங்களை திசை திருப்பி விட்டு அவர்கள் இன்னமும் உங்களுக்குத் தொல்லை தரத் தயாராய் இருக்கக் கூடும்.  எனவே கவனமாக இருங்கள்.  சமீபத்தில்தான் உங்கள் கோபம் பற்றி நான் அறிந்தேன்.  உங்களை அலுவலகத்திலேயே வைத்து, இது சம்பந்தமாய் பேச முயன்றும் முடியவில்லை.  மேலும் அங்கு பேசுவதை விட இங்கு பேசுவது எளிதாக இருக்கும் என்று தோன்றியது.  நான் குற்றமற்றவன் என்று சொல்லவே நான் என் மனைவியுடன் இங்கே வந்தேன்.  உதவி செய்ய முடியாவிட்டாலும் யாருக்கும் கெடுதல் செய்யக்கூடாது என்பது என் அடிப்படைக் கொள்கை.  தனியாக வந்தால் அதுவும் ஏதாவது கதை கட்டப்பட்டு சிரமப்படுத்தலாம் என்பதாலேயே மனைவியுடன் வந்தேன்.  நான் சொல்ல வேண்டியதை  உங்களிடம் சொல்லி விட்டேன்.  எப்படி விசாரித்து அறிவீர்களோ, அது உங்கள் பாடு.  விசாரித்துத் தெரிந்து கொள்ளுங்கள்.  என்னைப் பற்றி சொன்னவர்களிடம் நான் எங்கேயும் வந்து பதில் சொல்லத் தயார்.  உங்களிடம் சொல்லவேண்டும் என்று நினைத்த்தை சொல்லிவிட்டேன்.  என் மனதில் இனி பாரம் இருக்காது.  நீங்கள் சுதாரித்துக் கொள்வது இனி உங்கள் பாடு.  இனி நான் எதுவும் விளக்கம் கொடுக்க மாட்டேன்.  வருகிறோம்" என்று சொல்லி விட்டு வந்து விட்டேன்.

"மை காட்...   அப்புறம் என்னதான் ஆச்சு?"

பதில் சொல்லாமல் அமர்ந்திருந்தார்.  அருகில் அவர் டீனேஜ் மகனும் அமர்ந்திருந்தான். இவர்களுடன் இன்னொரு பழைய கூத்து ஒன்றும் உண்டு.  அது அவருக்கும் நினைவுக்கு வந்திருக்கும்.  எனக்கும் நினைவுக்கு வந்தது.  எனக்கும் அல்ல, எங்களுக்கும்...  திரும்புகையில் சரியாக பாஸும் அதை நினைவு படுத்தினார்.  

அடுத்த இரண்டு நாட்களிலேயே உண்மையாய் தொல்லை தருபவர்கள் யாரென்பதைக் கண்டுபிடித்து விட்டார்.  என்னிடமும் சாதாரணமாக பேசத் தொடங்கினார்.  தொல்லை தந்தவர்கள் யார், என்ன செய்தீர்கள் என்று நானும் கேட்கவில்லை. அவராக சொல்ல வந்தபோதும் தேவையில்லை என்று தடுத்து விட்டேன்.

இப்போதும் அவர் என் நல்ல நண்பிகளில் ஒருவர்.  நல்ல இடத்தில் பணிபுரியும் அவர், சமீபத்தில் கூட என் நண்பர் ஒருவருக்கு உதவி கேட்டபோது செய்து கொடுத்தார். 

என்ன ஒன்று, அவ்வப்போது தன் மதம்தான் உயர்ந்தது என்று வாதத்துக்கு வருவார்.  நான் வாதிடுவதில்லை.  அவர் எதிர்பார்ப்பது போல மாறுவதுமில்லை!!

தற்போதைய சங்கடத்துக்கு வருகிறேன். 

சரிதான்...   அது அடுத்த வாரமா?  இதே வழக்கமாய் போச்சு இவன் கிட்ட..."

==========================================================================================================

'தமிழ்த்தாய் வாழ்த்து' எழுதிய மனோன்மணீயம் சுந்தரனாரின் பேரன் முனைவர் மோதிலால் நேரு: 

"மனோன்மணீயம் சுந்தரனார் மலையாளி என்றும், அவர் எழுதிய பாடலைத் தமிழ்த்தாய் வாழ்த்தாகப் பாடலாமா என்றும் சிலர் கேள்வி எழுப்புகின்றனர். இன்றைய கேரளாவில் உள்ள ஆலப்புழையில் மனோன்மணீயம் சுந்தரனார் பிறந்ததால், அவரை மலையாளி என்று சொல்கின்றனர். 

முன்னர் மலையாள நாடு என்று சொல்லப்படும் கேரளா, சேர நாடாகத் தானே இருந்தது. அப்படியானால் சேர மன்னர்கள் தமிழர்கள் இல்லையா?ஐரோப்பிய கல்வெட்டு ஆராய்ச்சியாளர்களான முனைவர் பெர்னல், முனைவர் நெல்சன் உள்ளிட்ட ஆய்வாளர்கள், தமிழர் நாகரிகம் என்ற ஒரு நாகரிகம் இருந்தது என்ற உண்மையை மறைத்ததுடன், நம் இலக்கியங்களின் சிறப்பையும், இயற்றப்பட்ட காலத்தையும் குறைவாக மதிப்பிட்டு, தங்கள் கருத்துகளை ஆங்கிலத்தில் உலக அளவில் ஆவணப்படுத்தி விட்டனர். 

இதை மறுத்துத் தன் ஆராய்ச்சி முடிவுகளை தக்க சான்றுகளுடன், அவர்களது மொழியான ஆங்கிலத்திலேயே எழுதி, தமிழின் தொன்மையையும், தமிழர்களின் நாகரிகத்தையும் உலகத்துக்கு பறை சாற்றியவர் சுந்தரனார் தான்.கன்னடம், தெலுங்கு, மலையாளம் போன்ற மொழிகள் தமிழில் இருந்து தோன்றியவை என்பதால் தான், எல்லா மொழிகளையும் உள்ளடக்கி, கிரீடமாகத் தமிழ் இருப்பதை உணர்த்தவே, 'தெக்கணமும் அதிற் சிறந்த திராவிட நல் திருநாடும்' என்று பாடினார் சுந்தரனார்.

மற்ற மொழிக்காரர்கள் திராவிடம் என்ற சொல்லைப் பயன்படுத்துவதில்லை. காரணம், அவர்களின் மொழிக்குக் கருப்பையாக தமிழ்தான் இருந்தது என்பதை ஒப்புக் கொள்வதில் அவர்களுக்கு சங்கடமும், மனத் தடையும் இருக்கிறது. தமிழும், அதன் வழியாக உருவான பிற மொழிகளும் கிளைத்த நாடு என்பதால், இதைத் திராவிட நல்நாடு என்று சுந்தரனார் தெளிவாகக் குறிப்பிட்டிருக்கிறார்.

அன்றைய தமிழக முதல்வர் கருணாநிதி, 1970 மார்ச் 11ல் நடந்த திரைப்படத் துறை சாதனையாளர்களுக்குப் பரிசு வழங்கும் விழாவில் தான், 'தமிழக அரசு நிகழ்ச்சிகளின் துவக்கத்தில் இறைவணக்கம் பாடுவது போல், தமிழ்த்தாய் வாழ்த்தாக, 'நீராரும் கடலுடுத்த' பாடல் இருக்கும்' என்று அறிவித்தார். இந்த முடிவை கருணாநிதி எடுத்தபோது அவர் சந்தித்த சவால்கள் அதிகம். அவை எல்லாவற்றையும் தாண்டி, என் தாத்தாவின் பாடல் தமிழ்த்தாய் வாழ்த்தாக அரங்கேறியது, எங்கள் குடும்பத்தினருக்குப் பெருமை!"

-தினமலர் பகிர்வு! -

==============================================================================================================

கவிதை நேரம்!

வாழ்க்கைப் புதிரின் வார்த்தைக் கட்டங்கள் 

எழுத்துகளை இடம் மாற்றி நகர்த்தி 

புதிய வார்த்தைகள் அமைக்கிறேன் 

வார்த்தைகளை மாற்றி மாற்றி 

புதிய வரிகளை கோர்க்கிறேன் 

இடம் நகர்த்த வெற்றிடம் ஒன்றோடு 

வெறும் கட்டம் ஒன்றும் போனஸ் 

வேண்டிய எழுத்தை 

வேண்டியபோது சேர்த்துக் கொள்ளலாம்.

=====================================================================================

மீசை வைப்பது அவ்வளவு பெரிய குத்தமாய்ய்யா....!  தேவகோட்டையார்தான் இவர்களை காக்கவேண்டும்!

                              பெரிய மீசை வைத்த போலீஸ்காரர் 'சஸ்பெண்ட்'

போபால்-மத்திய பிரதேசத்தின் போபாலில் சைக்கிள் கைப்பிடியான, 'ஹேண்டில்பார்' போல், பெரிய மீசை வளர்த்த போலீஸ்காரர் மீது ஒழுங்கு நடவடிக்கை எடுக்கப்பட்டு, அதிரடியாக 'சஸ்பெண்ட்' செய்யப்பட்டு உள்ளார். மத்திய பிரதேசத்தில் உள்ள போபால் காவல் துறையில் மோசடி தடுப்பு பிரிவு மற்றும் கண்காணிப்பு பிரிவில் பணியாற்றியவர் கான்ஸ்டபிள் ராகேஷ் ராணா. இவர் அதிக அளவில் முடி வளர்த்து, கடா மீசை வைத்திருந்தார். சீருடை பணியாளர் விதிகளுக்கு உட்பட்டு அவற்றை ஒழுங்குப் படுத்தும்படி உயர் அதிகாரிகள் உத்தர விட்டனர். ஆனாலும் அவர் மீசையின் அளவை குறைக்காமல் பிடிவாதம் செய்து வந்தார். இதையடுத்து அவர் 'சஸ்பெண்ட்' செய்யப்பட்டார். ''மீசை, என் சுயமரியாதை சம்பந்தப்பட்டது என்பதால் சஸ்பெண்ட் ஆனாலும் சமரசம் செய்துகொள்ள மாட்டேன்,'' என, ராகேஷ் ராணா கூறி உள்ளார்.

==========================================================================================================

மதன் ஜோக்ஸ்...   'ஸ்டார் ஹோட்டல்' என்ற தலைப்பில் அவர் வரைந்தவை!

இப்போ என்னென்ன பெயர்கள் வைப்பார்கள்?

"அட ஏம்ப்பா பயமுறுத்தறே...!!"

"இங்கிருந்தா...?  குதிச்சிட்டாலும்...!"

பார்த்து..   பள்ளத்துல விழுந்து கீழே உள்ள ரூம்ல போய் விழுந்துடாம...!

அடடே...   புதுசா இருக்கே!

மூழ்கிட்டாருப்பா....!