உங்களால மறக்கமுடியாத நபர் யார்? ஏன்?

 

 நெல்லைத்தமிழன் : 

1. வாழ்வின் குறிக்கோள் என்ன? அர்த்தம் என்ன? 

$ இப்படி கேள்வி கேட்டு என்னைப் பெரிய ஞானி ஆக்குவது உங்கள் குறிக்கோள் என்று தெரிகிறது. 

 # அறத்தின் வழி நின்று பொருள் ஈட்டி,  ஈகை முதலிய  நற்செயல்களால் பலன் சம்பாதித்து இறுதியில் இறைவனை அடைவது.

& நாமும் சந்தோஷமாக இருப்பது, மற்றவர்களுக்கும் நம்மால் முடிந்தவரை சந்தோஷத்தைக் கொடுப்பது - இதுதான் என்  குறிக்கோள். வாழ்வின் அர்த்தம் எல்லாம் தேடி பிடிக்கமுடியாது. அது எப்போதும் மாறிக்கொண்டே இருக்கின்ற ஒன்று. 

2. உங்களால மறக்கமுடியாத நபர் யார்? ஏன்?

$ முதலில் மறக்க முயற்சித்தால்தான் கண்டுகொள்ள இயலும் 

# என்னால் முற்றிலும் மறக்க முடியாத நபர் நானே தான். காரணம் ஈகோ என்று சொல்லப்படும் அகம்.

& அப்படி ஒரு நபரை மட்டும் குறிப்பிட்டுச் சொல்ல இயலாது. நூற்றுக்கணக்கில் உள்ளனர். யாரிடமிருந்தெல்லாம் நான் விஷயங்கள் கற்றுக்கொண்டேனோ அவர்கள் எல்லோருமே மறக்கமுடியாத நபர்கள்தான்.  

3. மாறிவரும் காலங்களிலும் எப்போது தூங்கச் செல்வது, எழுவது உத்தமம்?  

$ தூக்கம் வரும்போது தூங்குவது; தூங்கி முடித்த பின் எழுவது இரண்டும் உத்தமம் 

# என்னதான் காலம் மாறினாலும்,  நம் உத்தியோகத்திற்கு பொருத்தமாக இருக்கவேண்டும் என்ற ஒரு காரணம் தவிர, வேறு எந்த காரணத்தை முன்னிட்டும் காலம் தாழ்த்தி தூங்கச் செல்வதும், காலம் தாழ்த்தி எழுவதும்  நலம் தரும் செயல் அல்ல என்பது என் அபிப்பிராயம்.

& என்னுடைய பதினைந்தாவது வயதிலிருந்து, காலையில் பிரம்ம முகூர்த்தத்தில் எழுந்துவிடுவது என்பது, படித்த பள்ளியின் வகுப்புகள் ஆரம்பமாகும் நேரம் காரணமாகவும், அதற்குப்பின் வேலை பார்த்த தொழிலகத்தின் வேலை நேர காரணமாகவும் அமைந்துவிட்டது. ஓய்வு பெற்ற பிறகும் அதே பழக்கம் தொடர்கிறது. உறங்குவது முன்பு எல்லாம் இரவு பத்து மணிக்கு. இப்போது - நேரம் கிடைக்கும்போதெல்லாம் !! 

4. நம் சமூக அமைப்பு ஏன் பெண்களுக்கு மிக அதிகப் பளுவும் ஆண்களுக்கு நிறையச் சலுகைகளும் தரும்படியாக கட்டமைக்கப்பட்டிருக்கு?

$ அப்படியா? பின் ஏன்  ஆக்கல்,அழித்தல்,காத்தல் இவை அனைத்தையும் ஆண் கடவுளர் எடுத்துக் கொண்டார்கள் என்பது இப்போதல்லவா புரிகிறது! 

# படைப்பில் பெண் என்பவள் ஆணைவிட உடல் அளவில் இளைத்தவள் என்பதால் பெண்ணுக்கு ஆண்தான் பாதுகாப்பு - பெண்ணின் நல வாழ்வுக்கு ஆண் பொறுப்பு என்று ஆகிவிட்டது. இந்தக் கடமையை சரிவர நிறைவேற்ற வேண்டுமானால் ஆணுக்கு நல்ல ஆரோக்கியமும் சம்பாதிக்கும் திறனும் இருக்க வேண்டும்.  எனவே வீடு தொடர்பான சகல பொறுப்புகளும் ஆண் செய்ய இயலாது போய்விடுவதால் அந்த முழுச் சுமையும் பெண்ணின் தலையில் விழுவது ஒரு காரணமாக இருக்கலாம்.

5. எந்தப் பாலிசியையும் விடாமல் பின்பற்றினால் வாழ்க்கை நமக்கு மட்டுமில்லாமல் நம்மைச் சேர்ந்தவர்களுக்கும் கஷ்டமாயிடுமா?

$ Take it easy policy கூடவா?

# வாழ்க்கை சரிவர நடக்க பாலிசி அவசியமே தவிர பாலிசிகளுக்காக வாழ்க்கையை செப்பனிட முடியாது.  விடாமல் பின்பற்றுவது என்று சொல்லும்போதே அதை விடவேண்டிய தேவை வருகிறது என்று ஆகிறது அல்லவா ?

( நெ த - கேட்டுக்கொண்டபடி, அவருடைய மீதி கேள்விகள், அதற்கான எங்கள் பதில்கள் அடுத்த வாரம் வெளியாகும். ) 

ஜெயக்குமார் சந்திரசேகர் : 

உத்தரபிரதேசத்தில் இருந்து அழைப்பு. வேதாளம் தேர்தல் வேலைகளுக்காக உத்தரபிரதேசம் சென்று விட்டது. போவதற்கு முன் "நான் கோண்டுவிடம் சொல்லிவிட்டுப் போகிறேன். இந்த வாரக் கேள்விகளை அவன் கேட்பான்" என்று சொல்லிவிட்டு போனது. 

& வேதாளம், உ பி தேர்தல் முடிவு குறித்து தன்னுடைய கருத்து கணிப்பை எனக்கு மார்ச் 10 ஆம் தேதிக்கு முன்பாக அனுப்பிவைத்தால்தான் நான் நம்புவேன். இல்லையேல் வேதாளத்தின் தலை - - - - - ??!!!

ஸ்ரீரங்கத்து கோவிந்து என்கிற கோண்டு என்னிடம் வந்து "மாமா இந்தக் கேள்விகளுக்கு எல்லாம் விடை தெரிஞ்சுக்கணும் என்ற அவசியமில்லை. ஆனால் தெரிஞ்சு கொண்டால் நல்லதுதானே?" என்று கமலகாசன் பாணியில் கேட்க , " சரி கேள்வி எப்படி?"  என்று கேட்டேன்.

& ஹி ஹி - இதை நான் நம்பமாட்டேன் - கமலஹாசன் பாணி என்றால், கேள்வி என்ன என்பது அவருக்கும் புரியாது; நமக்கும் புரியாது!!

"சயன்ஸ் கேள்விகள் தான்" என்றான்.

"ஐய்யோ சயின்ஸ் எனக்கு தெரியாதே. வேணும் என்றால் கோபால் (COBOL) பற்றி கேளேன்." என்றேன் நான். "சரி அப்போ எ பி ஆசிரியர்களிடம் கேட்டு சொல்லுங்களேன்" என்றான். "OK" 

& (// வேணும் என்றால் கோபால் (COBOL) பற்றி கேளேன்//.) சயின்ஸ் கேள்விகளுக்கு கோபால(னி)ன் வாரிசுகள் பதில் சொல்கிறோம். (எங்கள் அப்பா கோபாலன் )

இதோ கேள்விகள். 

1. மஞ்சள் மஞ்சள் நிறம். சுண்ணாம்பு வெள்ளை நிறம். இரண்டையும் கரைத்தால் சிவப்பு நிறம். ஏன்? எப்படி? 

# எல்லாவற்றையும் ஏன் எப்படி என்று கேட்க இயலாது. அது அப்படித்தான் என்பதே பதிலாக இருக்கும்.  வண்ணங்கள் ரசாயனங்களால் உண்டாகும் போது ரசாயனக் கலவைகள் பிரத்யேகமான வட்டங்களைத் தோற்றுவிக்கும். 

& மஞ்சளில் - டார்ட்டாரிக் அமிலம் உள்ளது. சுண்ணாம்பில் கால்ஷியம் ஹைடிராக்ஸைட் உள்ளது. இவை இரண்டும் சேரும்போது இரசாயன எதிர்வினையாக அவற்றிலிருந்து சிவப்பு நிறம் வெளியே தெரிகின்றது. 

2. வெற்றிலை பச்சை. பாக்கு பாக்கு நிறம். இரண்டையும் மென்றால் சிவப்பு நிறம். ஏன்? எப்படி?

 # முன் சொன்னதே பதில். 

& சில பெயர் மாற்றங்களுடன், இதற்கும் அதே பதில்தான். 

3. களிமண் மண் நிறம். மணல் மணல் நிறம். இரண்டையும் சேர்த்து செங்கல், சட்டி போன்றவற்றை சுட்டு எடுத்தால் சிவப்பு நிறம். ஏன்? எப்படி? 

# அதே கேள்வியின் வேறு அவதாரம். சுமார் அப்பா +  ஜீனியஸ் அம்மாவுக்கு மக்குப் பிள்ளை பிறக்கிறதே அது போல. 

& அதுதான் அக்கினியின் மகிமை. வேறு எந்தப் பொருளையும் அக்கினியில் இட்டால் அவை சம்பலாகிவிடும். ஆனால் - மண் மட்டும் அக்கினியால் நிறம் மாறுமே தவிர, அழியாது. 

("என்ன இது நான் கம்யூனிஸ்ட் ராஜ்யத்தில் இருப்பதால் இப்படி சிவப்புக் கேள்விகளாக கேட்கிறாயா? " என்றேன் நான்) 

"சரி பச்சை நிறத்தில் ஒரு கேள்வி" 

4. உணவு உற்பத்தியின் முதற்படி தாவரங்கள். தாவரங்கள் ஒளிச்சேர்க்கை (photo synthesis) மூலம் தங்களுக்கும் மற்றவர்க்கும் உணவு உற்பத்தி செய்கின்றன. இதற்கு பச்சையம் தேவை ஏன்? 

# பச்சையம் தான் தாவர உணவின் அஸ்திவாரம் என்பதால்தான்.

"சிவப்பு போனால் பச்சையா?" நான்.

" சரி பிடியுங்கள்  நிறமல்லாத கேள்வி."

5. மணலில் தயாரிக்கப்படும் கண்ணாடி ஏன் ஒளி புகும் தன்மையுள்ள நிறமற்றதாகி விடுகிறது? 

# மண்ணாங்கட்டிகளுக்கும் தெளிவு பிறக்க வழி உண்டு என்பதை நமக்கு உணர்த்தத் தான்.

பொதுவாக, ஒரு பொருளின் பகுதிகளைக் கூட்டுவதால் மட்டும் அதைப் பெற இயலாது (A thing is not the sum of its parts) என்பதை  நாம் நினைவில் கொள்ள வேண்டும்.

போதுமடா சாமி. இப்பவே கண்ணைக்கட்டுது என்கிறீர்களா?

அதுதான் முதலிலேயே சொல்லி விட்டாயிற்றே. பதில் சொல்லா விட்டாலும் பரவா  இல்லை. 

இந்தக் கேள்விகளை வாசகர்கள் பக்கமும் கொஞ்சம் எறிந்து பாருங்களேன். யாரேனும் நல்ல விடை கொடுக்கக்கூடும்.

& வாசகர்களே ! மேலே இருப்பவற்றைப் படித்த பிறகு இதுவரை நீங்கள் யாராவது தெளிவாக இருந்தீர்கள் என்றால், மேற்கண்ட ஐந்து கேள்விகளுக்கு உங்கள் பதிலை சொல்லுங்கள். 

பானுமதி வெங்கடேஸ்வரன்: 

உங்கள் குழந்தைகள் சிறுவர்களாக இருந்து பொழுது அவர்களை எதற்காகவாவது அடித்திருக்கிறீர்களா?

# ஓரிரு முறை அடித்ததுண்டு.  ரொம்பக் கடுமையாக  அடித்ததில்லை. அடித்ததற்கான காரணம் நினைவில் இல்லை.

& அடித்தது உண்டு. அப்புறம் மனைவி என்னிடம் விடுத்த வேண்டுகோளை ஏற்று, அந்த நாளிலிருந்து அடிப்பதை நிறுத்திவிட்டேன். 

இப்போது கூட சினிமாகாரர்களை மக்கள் முன்மாதிரியாக கொண்டிருக்கிறீர்களா?

# துரதிருஷ்ட வசமாக சினிமாக்காரர்கள் பழக்கி வைத்திருப்பது, மக்கள் யாரோ ஒருவரை கண்மூடித்தனமாக ஆராதிப்பதுதான்.  இப்போது சினிமாக் காரர்கள் அந்த ஆராதனைக்கு உள்ளாகவில்லை என்பது சரியாக இருக்கலாம்.

& எந்த சினிமாக்காரரையும் முன்மாதிரியாக எப்பொழுதுமே கொண்டதில்லை. யாரோ எழுதிய வசனத்தை, யாரோ எழுதி யாரோ இசையமைத்த பாடல்களுக்கு வாயசைப்பவரை எதற்காக கொண்டாடுவது? 

= = = = =

படம் பார்த்து கருத்து எழுதுங்கள் :

1) 

2) 

3) 

( மூன்றாவது படத்தில் ஒளிந்திருக்கும் எண் எது?) 

= = = = =

எல்லோருக்கும் இனிய குடியரசு தின வாழ்த்துகள். 

= = = = =