சமீபத்தில் படித்த புத்தகம் எது?

 

எல்லோருக்கும் இனிய விநாயகர் சதுர்த்தி வாழ்த்துகள் 

= = = = = =

பானுமதி வெங்கடேஸ்வரன்: 

முகநூலில் அவ்வப்பொழுது 'Coolers challenge', 'green challenge', 'yellow challenge' என்றெல்லாம் வருகிறது. ஆனால் அவைகளில் பெண்கள்தான் கலந்து கொள்கிறார்கள். ஏன் ஆண்கள் கலந்து கொள்வதில்லை?

# ஏதோ பெண்கள் குழுவில் தொடங்கியதாக இருக்கலாம். ஊடகங்கள் வழியே பெண்கள் அவர்கள் நண்பர்களுக்கு அனுப்பியதாக இருக்கலாம்.  வெறும் யூகம்தான். 

& ஒரு ஆணாக இதற்கு பதில் சொல்கிறேன். இதெல்லாம் ஏதோ 'பொழுது போகாத பொம்முக்கள்' சமாச்சாரம் என்று நினைப்பதால் பேசாமல் கடந்து போய்விடுவேன்! 

சமீபத்தில் படித்த புத்தகம் எது?

# The Awakening of the Mind - J கிருஷ்ணமூர்த்தி. 

திருமந்திரம் - சுருக்கமான விளக்கத்துடன் . பாலசுப்ரமணியன் என்பவர் எழுதிய நூல்.

& என்னுடைய பேரன் எழுதிய " The deep thoughts of Cricket " என்னும் புத்தகம். 

எந்த திரைப்படத்தையாவது ஒரு முறைக்கு மேல் திரையரங்கம் சென்று பார்த்திருக்கிறீர்களா? எது அப்படி பார்க்க வைத்தது?

# வாழ்க்கை , மனோகரா கல்யாணம் பண்ணியும் பிரம்மச்சாரி போன்ற படங்களை இரண்டு மூன்று முறை கூட பார்த்திருக்கிறேன். 

வேலைக்குப்போன புதிதில் சம்பாதிக்கும் சந்தோஷம் காரணமாக அலிபாபாவும் 40 திருடர்களும் படத்தை சுமார் 6 தடவை பார்த்திருக்கிறேன். 

ROMAN  HOLIDAY படத்தை நன்றாக இருக்கிறது என்று தொடர்ந்து இரண்டு ஆட்டங்கள் பார்த்தேன். Ben  Hur கூட இரண்டு முறை.

& 'சுமதி என் சுந்தரி' படம். இரண்டாவது முறையாக - அண்ணன் வற்புறுத்தலால் ! 

கீதா சாம்பசிவம் :

அடுத்தடுத்து இளம் மாணவ, மாணவிகள் தற்கொலை செய்து கொண்டே போவது ஏன்? எங்கே தப்பு? என்ன செய்யலாம்?

# இது ஒரு சிக்கலான பிரச்சினை.  தற்கொலை என்பது ஒரு மனக்கோளாறு.  இது பெற்றோர், ஆசிரியர், தோழியர், இதர மாணவ மாணவிகள் இவர்கள் நடந்து கொள்ளும் முறை காரணமாக மன அழுத்தம் ஏற்பட்டதனால் கூட இருக்கும்.  ஆக இந்த நபர்கள் பொறுப்புடன் அன்புடன் கருணையுடன் நடந்து கொண்டால் இது போன்ற விபரீதங்கள் தவிர்க்கப்படலாம் .  இது எல்லாமே சரியாக இருந்தால் கூட ஒருவரது மன உளைச்சல் கூட இந்த எண்ணத்தைத் தோற்றுவிக்கலாம்.

& சில விஷயங்கள் நம் கட்டுப்பாட்டில் உள்ளவை; சில நம் கட்டுப்பாட்டில் இல்லாதவை. ஊரில் / உலகில் நிகழும் தற்கொலை போன்றவை நம்முடைய கட்டுப்பாட்டில் இல்லாத விஷயங்கள். 'ஏன் நடந்தது ' என்று ஆராய்ந்து - அந்த சூழ்நிலை நம்முடைய சொந்த பந்தங்களுக்குள் வராமல் இருக்க என்ன முயற்சி எடுக்கலாமோ அதை மட்டும் எடுத்துக் கொள்வது ஒன்றுதான் நாம் செய்யக்கூடியது. 

நெல்லைத்தமிழன் : 

தேவலோக ரம்பை', 'மஹாலக்ஷ்மி' போலவே இருக்காள் என்றெல்லாம் சொல்றாங்களே... இவங்க எப்பயாச்சும் ரம்பை, மஹாலக்ஷ்மிலாம் பார்த்திருக்காங்களா?

# "இன்னொரு தடவை தப்பு பண்ணினா கொன்னுடுவேன் " என்று சொல்பவர்கள் தூக்கில் போடுவார்களா விஷம் கொடுப்பார்களா ? சம்பிரதாயமாக அழுத்தம் கொடுப்பதற்குப் பேசப்படுவதை ரொம்ப உரைத்துப் பார்க்கக்கூடாது.

& ரவி வர்மா படங்களில் பார்த்திருப்பார்கள். ஏ பி நாகராஜன் படங்களில் அவர்களின் நடை, உடை, பாவனா (ஹி ஹி - பாவனை ) பார்த்திருப்பார்கள். அவ்வளவுதான்! 

ஒவ்வொரு பருவத்தில் இருக்கும்போதும் அடுத்த பருவத்தின் கஷ்டத்தை, நாம் அனுபவிக்கும் வரை உணர அல்லது அதை எதிர்பார்த்துத் திட்டமிடுவது போன்றவை முடிவதில்லையே? (உதாரணம்.. இளமை ஆக்கிரமித்திருக்கும்போது, பொறுப்போடு இருக்கும் அப்பாவின் பருவம், அதற்கு அடுத்த ஓய்வு பெற்றவரின் நிலை, முதியவரின் நிலை என்று) இதன் காரணம் என்ன?

# நம் குறுகிய பார்வைதான். அவை குறித்து ஆழமாக சிந்திக்கத் திறனோ தேவையோ இல்லாததும் கூட.

& அந்தந்த பருவத்தில் அந்தந்த உணர்வுகள் / அனுபவங்கள் பெறுவது இயற்கைதான். வயதுக்கு மீறிய முதிர்ச்சி காட்டுவது / எதிர்பார்ப்பது தேவையே இல்லை - என்பதுதான் என் கருத்து. 

செல்லங்களை வளர்ப்பவர்கள் அன்புக்கு ஏங்குகிறவர்களா? அல்லது அவைகளை வளர்ப்பதினால் நமக்குப் பொறுப்பு குறைவு என்று நினைப்பவர்களா? (அதற்குப் பதில் ஒரு அநாதைக் குழந்தையை வளர்த்தால் அது பெரும் பொறுப்பாகிவிடும். செல்லத்திற்கு நோய் வந்துவிட்டாலோ இல்லை அதனை விட்டுவிட்டு வேறு தேசம் போகவேண்டியிருந்தாலோ சுலபமாகக் கழற்றிவிட்டுவிடலாம் என்று நினைப்பார்களோ?)

#  ஏக்கம் எதுவும் இராது.  'உயிர்களிடத்தில் அன்பு வேண்டும்' என்று பாரதியார் பாடவில்லையா ? அந்த உணர்வு மிக்கவர்களாக இருக்கக்கூடும்.

நாம் செல்லப்பிராணிகளை வளர்க்கவில்லை என்பதால் , அவற்றை வளர்ப்பவர்கள் வேறு ஏதோ சில காரணங்களுக்காக அல்லது குறைபாடுகள் காரணமாக வளர்க்கிறார்கள் என்று சொல்வது தவறு இல்லையா ?

& செல்லப் பிராணிகள் வளர்ப்பு - வளர்ப்பவர்களின் அன்றாட அலப்பறைகள் எல்லாம் எனக்கும் ஒவ்வாமை (allergy) செல்லப் பிராணிகள் வளர்ப்பவர்கள் வீட்டுக்கு செல்வதைக் கூட இயன்றவரையில் தவிர்த்துவிடுவேன்.  

தலைநகரைத் தவிர பிற இடங்களில் ஓலா, ஊபர் போன்றவை வளராததன் காரணம் என்ன?

# கிராக்கி (தேவை) போதுமான அளவிற்கு அங்கு இல்லை என்பதுதான்.

& தலைநகரங்களில்தான் மக்கள் காலில் கஞ்சி கொட்டிக் கொண்டவர்கள் போல ஓடிக்கொண்டே இருக்கிறார்கள். அவர்களுக்கு ஓலா ஊபர் எல்லாம் தேவை. மற்ற இடங்களில் மக்களுக்கு பேருந்து போதும். செலவும் கம்மி.  

அடுத்த நாட்டு வீரன்/வீராங்கனையை தங்கள் நாட்டுக்குக் குடியேற வைத்து, ஒலிம்பிக் போன்ற விளையாட்டுகளில் பதக்கம் பெற்று, தங்கள் நாட்டின் திறமை என்று சொல்லிக்கொள்வது கேலிக்குரியதாக இல்லையா?

# தங்கள் நாட்டின் சாதனை என்று யாரும் சொல்லிக் கொள்வதாகத் தெரியவில்லை.

& கேலிக்குரியதுதான். 

'உயிர்க்கொலை' என்பதன் விளக்கம் என்ன? சமீபத்தைய பதிவினால் எனக்கு ஏற்பட்ட மனக்குழப்பம். நடக்கும்போது எறும்புகள் சாகலாம். வீட்டில் கொசுக்கள், பூச்சிகள் போன்றவைகளைக் கொல்வது... இதற்கும் மனிதனைக் கொல்வதற்கும் என்ன வித்தியாசம்?

# இந்த குழப்பம் எனக்கும் ஏற்படுவது உண்டு. எல்லா உயிருக்கும் அன்பு செய்தல் என்பது ஒரு சிறந்த அறம் என்று சொல்லப்பட்டு இருக்கிறது . இது நம் மனதில்  பதியும்போது , சிறு சிறு உயிர்களை நாம் கொல்ல நேர்வது ஒரு குற்ற உணர்ச்சியை  ஏற்படுத்துவது உண்மைதான். உணவு, தற்பாதுகாப்பு இந்த இரண்டு காரணங்களுக்காக உயிர்களைக் கொல்வது குற்றமில்லை என்ற ஒரு கருத்து பரவலாக இருக்கிறது. எனவே தேவையில்லாமல் ஒரு ஜந்துவை கொல்லும்போது அதை உயிர்க் கொலை என்று சொல்கிறோம் . அறியாமல் நடப்பதற்கு நாம் வருந்த வேண்டிய அவசியம் இல்லை என்பதும் ஒரு கோட்பாடு. 

மேலை நாட்டில் ப்ரெட்தான் சாப்பிடறாங்க. அப்புறம் நம்ம குழந்தைகள் சாப்பிட்டா மாத்திரம் நாம் ஏன் அலறுகிறோம்? அவங்க, எதுக்கு குளம் வெட்டி குழம்பு சாதம் சாப்பிடுவது? என்று நினைக்கலாமில்லையா?

# அந்தந்த நாட்டுக்கு உண்டான சம்பிரதாய உணவுகள்தான் ஆரோக்கியமானவை என்று கருதப்படுகிறது.  எனவே மேலைநாட்டு வழக்கமான ரொட்டியை முக்கிய உணவாக எடுத்துக் கொள்வது  ஆட்சேபத்துக்குரியது  என்று சொல்லலாம் . குழம்பு, ரசம், மோர்க் குழம்பு போன்றவை நம் நாட்டின் தனித்துவம் வாய்ந்த உணவு வகைகள். இவை மறந்து போகப் படக்கூடாது என்று நினைப்பதில் நியாயம் இருக்கிறது.. 

சமீபத்தில் (இன்று) தில்லியில் இரட்டை கோபுரம் ஒன்றை வெடி வைத்துத் தகர்த்தார்களே (14 மாடிக்கு பெர்மிஷன் வாங்கிவிட்டு 40 மாடிகள் கட்டினார்கள் என்று). அதனை ஏன் கட்டும்போதே மாநகராட்சி அல்லது பொதுப்பணித்துறை ஊழியர்கள் கண்காணிக்கவில்லை? இடிப்பதற்கும், கோர்ட் நடவடிக்கைகளுக்கு ஆன செலவுகளுக்கும் ஏன் அவர்களிடமிருந்து வசூலிக்கக்கூடாது?

# இந்த ஐயம் எனக்கும் நிறையவே உண்டு. 

இந்த வகை அத்து மீறல்கள் நடக்கின்றனவா என்று கவனிக்க ஒரு அமைப்பு இருக்கிறதா என்று தெரியவில்லை. 

செல்வாக்கு மிக்க பெரும்புள்ளிகள் நிறுவனமாக இருந்தால் அதை கண்காணிக்க அலுவலர்கள் அச்சப் படுவதும் இருக்கக் கூடும்.

ஒரு வேளை "இந்த மோசடி ஆசாமிங்களுக்கு சரியான சமயத்தில் ஆப்பு வைக்க வேண்டும்" என்று முடிவு செய்து எவ்வளவுதான் மேலே போகிறார்கள் என்று பார்த்துக் கொண்டு இருப்பார்கள் போலும். 

"சரியான சமயத்தில் வசூல் செய்ய வாய்ப்பு " என்று காத்திருக்கும் அவலம் நடந்திராதென நம்புவோம். 

இந்த விதி மீறலை கவனித்து வழக்குப் போட்டது யார் - எப்போது என்று பார்த்தால் சில விளக்கங்கள் கிடைக்கலாம்.

The court had said the construction of Supertech's twin 40-storey towers having 915 flats and 21 shops was done in collusion with the Noida Authority.

இது செய்தியாக வந்தது. இந்த அதாரிடிக்களை என்ன செய்வார்கள் என்று தெரியவில்லை.

& ஹி ஹி - என்னங்க நீங்க பச்சைப் புள்ளையா இருக்கீங்க! கட்டிடம் கட்டப் பட்டது உத்தரப் பிரதேசத்தில் முந்தைய முலாயம் சிங் / மாயாவதி / அகிலேஷ் ஆட்சி காலங்களில். ஆட்சியாளர்களுக்கும் - மாநகராட்சி / பொதுப்பணித்துறை ஆட்களுக்கும் கோடி கோடியாகக் கொட்டிக் கொடுத்துத்தான் உரிமையாளர் கட்டியிருப்பார்.  இப்போது இடிப்பதற்கான செலவும் கட்டிட உரிமையாளர் தலையில்தான். எனவே கவலை வேண்டாம். இழப்பு எல்லாமே பேராசை கொண்ட கட்டிட உரிமையாளருடையவை. வரும் காலத்தில் இந்த வகை மீறல்கள் செய்வோர் இதிலிருந்து பாடம் கற்றுக்கொள்வார்கள். 

சமீபத்தைய 40வது வருட திருவல்லிக்கேணி ஹ்யுமர் க்ளப்பில், 'உங்களனைவரையும் மிகுந்த மகிழ்ச்சியோடும் மிகுந்த சந்தோஷத்தோடும் வரவேற்கிறோம்' என்றார்கள் (யூடியூப் பார்த்தேன்). மகிழ்ச்சியும் சந்தோஷமும் வெவ்வேறா?

# இல்லை.  ஹியூமர் கிளப் பொறுப்பாளர்கள் அவ்வளவு இலக்கண சுத்தமாகப் பேசுவார்கள் என்று எதிர்பார்க்கக் கூடாது.

& சந்தோஷம் = விஷயம் 

        மகிழ்ச்சி  = விடயம். 

= = = = =

வாசகர்களுக்கு வேண்டுகோள் :

உங்கள் வீட்டு, தெரு , ஊரில் இன்று நடக்கும் விநாயகர் சதுர்த்தி பூஜை + கொண்டாட்டங்களை படம் / வீடியோ எடுத்து, 

9840937420 என்ற வாட்ஸ் அப் எண்ணுக்கு அனுப்புங்கள். 

அவைகளை எங்கள் Blog / மின்நிலா பதிவுகளில் வெளியிடுகிறோம். 

நன்றி. 

= = = = = =

** சென்ற வார எங்கள் கேள்விகளுக்கான சரியான பதில்கள் - அடுத்த வாரம் சொல்கிறோம். சில பதில்களுக்கு கருத்துகள் பகுதியிலேயே சரியா தவறா என்று சொல்லியுள்ளோம். 

= = = = = = =