வெள்ளி வீடியோ : பயத்தில் மனது தவிக்கின்றது... இருந்தும் விருந்தை நினைக்கின்றது

 இந்த ஆல்பத்திலிருந்து சில பாடல்களை ஏற்கெனவே பகிர்ந்தாயிற்று.  இன்று இன்னுமொரு பாடல்.  இன்று ஸ்ரீ கிருஷ்ண ஜெயந்தியை முன்னிட்டு..

ஆல்பம் வெளியான ஆண்டு 1997 என்றுதான் போட்டிருக்கிறது.  அதற்கு முன்னரே இந்தப் பாடல்கள் ஒலித்துள்ளனவா என்பது நினைவில்லை.

கண்ணதாசன் பாடல்.  எம் எஸ் விஸ்வநாதன் இசை.  எஸ் பி பி குரலில் இனிய தனிப்பாடல்!

இந்த ஆல்பத்தில் இடம்பெற்ற பாடல்களில் முதல் இடத்துக்கு இந்தப் பாடலும், புல்லாங்குழல் கொடுத்த மூங்கில்களே பாடலும் போட்டியிட்டன.  அவரவர் ரசிகர்கள் 'அதற்குதான் முதலிடம்' என்று சொல்லிக்கொண்டார்கள்!

என்னைப் பொறுத்தவரை...  

ஆயர்பாடி மாளிகையில் தாய் மடியில் கன்றினைப்போல்

மாயக்கண்ணன் தூங்குகின்றான் தாலேலோ

அவன் வாய் நிறைய மண்ணை உண்டுமண்டலத்தை காட்டியதில்

ஓய்வெடுத்து தூங்குகின்றான் ஆராரோ

ஓய்வெடுத்து தூங்குகின்றான் ஆராரோ

பின்னலிட்ட கோபியரின் கன்னத்திலே

கன்னமிட்டுமன்னவன் போல் லீலை செய்தான் தாலேலோ

பின்னலிட்ட கோபியரின் கன்னத்திலே கன்னமிட்டு

மன்னவன் போல் லீலை செய்தான் தாலேலோ

அந்த மந்திரத்தில் அவன் உறங்க

மயக்கத்திலே இவன் உறங்க

மண்டலமே உறங்குதம்மா ஆராரோ

மண்டலமே உறங்குதம்மா ஆராரோ

நாகபடம் மீதில் அவன் நர்த்தனங்கள் ஆடியதில்

தாகமெல்லாம் தீர்த்துகொண்டான் தாலேலோ

அவன் மோகநிலை கூட ஒரு யோகநிலை போலிருக்கும்

யாரவனை தூங்கவிட்டார் ஆராரோ

யாரவனை தூங்கவிட்டார் ஆராரோ

கண்ணனவன் தூங்கிவிட்டால் காசினியே தூங்கிவிடும்

அன்னையரே துயிலெழுப்ப வாரீரோ

அவன் பொன்னழகை காண்பதர்க்கும் போதை முத்தம் பெறுவதற்கும்

கன்னியரே கோபியரே வாரீரோ

கன்னியரே கோபியரே வாரீரோ

======================================================================================================================

கௌரவம் திரைப்படம் வெளிவந்த ஆண்டு 1975 ஆம் வருடத்துக்கு இரண்டு வருடங்களுக்கு முன்!

வியட்நாம் வீடு சுந்தரம் எழுதிய 'கண்ணன் வந்தான்' என்கிற நாடகம் பின்னர் திரைப்படமாக எடுக்கப்பட்டது.  பாரிஸ்டர் ரஜினிகாந்தும் கண்ணனும் வெவ்வேறு ஆட்கள் என்பது போலவே வேறுபாடு காட்டியிருப்பார் நடிகர் திலகம்.வொய் ஜி மகேந்திரன் சிவாஜியுடன் நடித்த முதல் படம்.

மலையாளத்தைத் தாய் மொழியாகக் கொண்ட உஷா நந்தினி என்றொரு நடிகையிருந்தார்.  மனிதனும் தெய்வமாகலாம், பொன்னூஞ்சல், ராஜபாட்டை ரங்கதுரை, என்னைப்போல் ஒருவன்  மற்றும் இன்று பகிரும் கெளரவம் போன்ற படங்களில் சிவாஜியுடன் இணைந்து நடித்திருக்கிறார்!

தெய்வ மகன் படத்தில் மூன்றாவது சிவாஜிக்கான உடல்மொழியை இயக்குனர் ஸ்ரீதரிடமிருந்து எடுத்தது போல சிவாஜி இந்தப் படத்தில் பைப் பிடிக்கும் ஸ்டைலை அப்போதைய தொழிலதிபர் டி எஸ் கிருஷ்ணன் அவர்களை பார்த்து செய்தாராம்.  அதுபோலவே தலை அலங்காரம் இன்னொரு தொழிலதிபர் (இந்தியா சிமெண்ட்ஸ்) டி எஸ் நாராயணசாமியைப் பார்த்து.

மறக்க முடியாத படங்களில் ஒன்று.  இப்போதும் நான் ரசிக்கும் காட்சிகள்..கண்ணதாசன் பாடல்களுக்கு இசை மெல்லிசை மன்னர்.  இந்தப் பாடலில் எஸ் பி பி சுசீலா குரலுடன் இணைந்து இழைந்திருக்கிறார்.

யமுனா நதி இங்கே

ராதை முகம் இங்கே

கண்ணன் போவதெங்கே

கொஞ்சும் மணி இங்கே

கோவை கிளி இங்கே

மன்னன் போவதெங்கே

நினைக்கும் நினைப்போ புரிகின்றது

சிரிக்கும் சிரிப்போ அழைக்கின்றது

நினைக்கும் நினைப்போ புரிகின்றது

சிரிக்கும் சிரிப்போ அழைக்கின்றது

கண்ணனின் ஆசைகள் காற்றினில் போவதோ

சொல்லடி என் பைங்கிளி

ஜொலிக்கும் உடம்பு கொதிக்கின்றது

அணைத்தும் மயக்கம் பிறக்கின்றது

ஜொலிக்கும் உடம்பு கொதிக்கின்றது

அணைத்தும் மயக்கம் பிறக்கின்றது

ராதையின் பார்வையில் போதையும் இல்லையோ

பாருங்களேன் கண்களை

பயத்தில் மனது தவிக்கின்றது

இருந்தும் விருந்தை நினைக்கின்றது

கொடுத்தால் பயமும் குறைகின்றது

எடுத்தால் சுகமும் வருகின்றது

மாலைகளானதும் நீ சொல்லும் நாடகம்

காத்திருப்பேன் மன்னவா