வெல்லும் வார்த்தையும் கொல்லும் வார்த்தையும்

ஜி எம் பி ஸார் ஒரு பதிவு  எழுதி இருந்தார்.  அதில் கீழ்க்கண்டவாறு ஒரு பின்னூட்டம் இட்டிருந்தேன்.  

"சொல்முகூர்த்தம் பலிக்கும் என்பார்கள். அதனால்தான் சில சமயம் அபசகுன வார்த்தைகளைப் பேசக்கூடாது என்பார்கள். பலித்துவிடும் என்பார்கள். பகுத்தறிவில் நம்பிக்கை வாய்ந்த கே ஆர் ராமசாமி கடைசியாய்ப் (அது கடைசி என்று அப்போது அவர் உணர்ந்திருக்கவில்லை) பாடிய பாடல்வரிகள் அப்படி அபசகுனமாய்த்தான் அமைந்திருந்தன என்று வாலி புத்தகத்தில் படித்திருக்கிறேன். சில வார்த்தைகள் வெல்லும். சில வார்த்தைகள் கொல்லும்"

இதில் நான் சொல்லியிருக்கும் சம்பவம் வாலி எழுதிய புத்தகத்தில் படித்ததாய்  நினைத்துக் கொண்டிருந்தேன்.  அவரும் இதைப் பற்றிக் குறிப்பிட்டிருக்கிறார் என்றுதான் நினைவு.  இரண்டு நாட்களுக்கு முன்னால் யதேச்சையாய் சோ கேள்வி பதில் புத்தகம் எடுத்துக் புரட்டியபோது இதே போன்ற ஒரு கேள்விக்கு சோவின் பதில் படித்தபோது இந்த சப்ஜெக்ட் என்று தெரிந்ததும் அதை எடுத்து இங்கே பகிர்கிறேன்.

-----------------------------------------------------------------------------------------------------------------------------------

....அதனாலேயொரு பூஜைபோடாமல் ஒரு படம் ஆரம்பிக்க மாட்டார்கள்.  எடுத்த உடனே முதல் காட்சி "ஆண்டவன் காப்பாத்துவான்" இந்த மாதிரி எல்லாம் வார்த்தை வரும்.  இந்த பகுத்தறிவாளர்கள் எல்லாம் படம் எடுப்பாங்க.  அவங்க படத்துலயெல்லாம் ஆண்டவன்னு சொன்னா தப்பாச்சே..  'வெற்றி!  வெற்றி!" ன்னு சொல்வான் ஒருத்தன்.  எடுத்த உடனே அந்த மாதிரி ஒரு காட்சி எடுத்துப்பாங்க!  ஏன்னா அவங்க வெளியே காண்பித்துக் கொள்ள முடியாது!  அதனால இப்படி எடுத்துப்பாங்க! 

"...   இதுல கெட்டதைச் சொல்லக் கூடாது என்பதற்கு உதாரணம் சொல்றேன்.  பீம்சிங் பெரிய டைரக்ட்டர்.  "செந்தாமரை" ன்னு ஒரு படம் நின்னு, நின்னு, நின்னே போச்சு அவருக்கு.  

கிட்டத்தட்ட ஏழு வருஷம் எடுத்தாங்க.  அவர் சொல்லலை எனக்கு.  அவரோட அசிஸ்டன்ட் டைரக்டர் சடகோபன், திருமலை மகாலிங்கம்னு ரெண்டு பேர்...  அவங்க சொன்னாங்க எனக்கு!  

கே ஆர் ராமசாமி நடிகர் அதுல!  அவருக்கு ஒரு பாட்டு எழுதி இருக்காங்க!  'பாடமாட்டேன்!  இனி பாடமாட்டேன்!"  இவங்க எல்லாம் சொன்னாங்களாம் 'இது வேண்டாம்.  இந்தப் பாட்டு பல்லவி வேண்டாம்.  மாற்றுவோம்!  இது என்ன நன்னாவே இல்லை!  கெடுதல் இது! வேண்டாம்! ன்னு சொல்லி இருக்காங்க.  

அவர் என்ன சொல்லியிருக்கார், "அதெல்லாம் இல்லை!  நான் பகுத்தறிவுவாதி!  எனக்கு இதிலெல்லாம் நம்பிக்கைக்கு கிடையாது.  நான் பாடறேன்!  இப்படியே இருக்கட்டும் பல்லவி!  'பாடமாட்டேன், இனி படமாட்டேன்ன்னு பாடினார்!  அதுதான் அவர் பாடின கடைசிப் பாட்டாம் சினிமாவில்!  சொன்னாங்க!  முன்னாடி அவரு கேட்கலை.  இதனால்தான் அது நடந்ததா?    இல்லைன்னா அவர் சினிமால அப்புறம் நிறைய பாடியிருக்க மாட்டாரா என்று கேட்கலாம்.  ஆனால் இவங்க ஏற்கெனவே எச்சரிக்கை பண்ணதுக்கும் இதுக்கும் சரியா இருந்தது.

தங்கவேலு நடிகர்.  அவச்சொல் பேசவே கூடாதென்பதில் அவர் ரொம்ப நேர்மை!  ஒரு சினிமால எல்லோரும் என்னைத் திட்டிண்டிருப்பாங்க...  ஒரு அதிகப்ரசங்கி கேரக்டர் அப்படீங்கறதால...  இவருக்கு ஒரு டயலாக் "நீ உருப்படடமப் போயிடுவ!  நீ நாசமாய் போயிடுவ"!  

இவர் டயலாக் எழுதியவரைக் கூப்பிட்டார்.  

"இது எழுதினாதான் படம் ஓடுமா?நான் இதெல்லாம் சொல்ல மாட்டேன் எந்த நேரத்துலயும்..  எதையும்...  எவன் சொல்றது!  என்ன அடுக்குமோன்னு!  அதெல்லாம் சொல்லக்கூடாது!   அதெல்லாம் மாற்றுங்கள்.  இப்படித்தான் திட்டணுமா ஒருத்தனை?  ஏதோ மடையன், முட்டாள் என்று திட்டச் சொல்லுங்க!  சொல்லிட்டுப் போறேன்.  உருப்பட மாட்டே, நாசமாய் போ ன்னு இதெல்லாம் சொல்ல மாட்டேன்!  எந்த நேரத்துல எவன் சொல் பலிக்கும் என்று சொல்ல முடியாது..."  அப்படீன்னு பிடிவாதம் பிடிச்சாரு அவரு. அப்போ அவர் ஒரு நிகழ்ச்சி சொன்னார்.

என் எஸ் கே பெரிய தர்மாத்மான்னு ஒரு பெயர் உண்டு.  இவர் அப்போ என் எஸ் கேயோட ஒரு கோஷ்டி மாதிரி நடித்துக் கொண்டிருந்தார்.  தங்கவேலுக்கு அப்போ பணக்கஷ்டம்.  என் எஸ் கே கிட்ட போய்ப் பணம் கேட்டாராம்!  அவர் தன் பாக்கெட்டில் கைவிட்டு  "இந்தா!  என் கிட்ட இருக்கற லக்ஷ்மியை உன் கிட்டக் கொடுத்தேன்!  வச்சுக்கோ! - அப்படீன்னாராம்.  

இவருக்கு 'திக்கு' ன்னுத்தாம்.  'என்ன இந்த மாதிரி சொல்றார்?  லக்ஷ்மியைக் கொடுத்தேன்னு சொல்லலாமா?  அவர் சொன்னார், 'அன்றையிலிருந்து அவருக்கு மார்க்கெட் இறங்கிற்று; எனக்கு மேலே ஏறிகிட்டே போச்சு!'  இந்த மாதிரியெல்லாம் பேசவே கூடாது! அப்படிங்கற நம்பிக்கை ரொம்பப் பேர்க்கு இருக்கு.  இவங்க எல்லாம் பிரபலமானவர்கள் என்பதற்காக இந்த உதாரணங்களை சொன்னேன்.  நிஜ வாழ்க்கையிலேயே இந்த மாதிரி நிறைய உண்டு.

-------------------------------------------------------------------------------------------------------------------------------------------

எனக்கும் இது மாதிரி  சில அனுபவங்கள் உண்டு.  அவை எல்லாம் சிறிய அனுபவங்கள்.  எனினும் நான் பேசும்போது முடிந்தவரை மிகவும் ஜாக்கிரதையாகவே பேசுவது வழக்கம்.

உங்களுக்கும் அனுபவங்கள் இல்லாமலா இருக்கும்?

====================================================================================================

நேற்று அனுஷ் பிறந்தநாள் பற்றி கே ஜி ஜி குறிப்பிட்டிருந்தார்.  எனக்கு முகநூலிலும் இரண்டு மூன்று வருடங்கள் முன்பு ஞாபகப்படுத்தியவர் அவர்தான்!

கோவை ஆவியும் சும்மா இருந்ததில்லை!

அப்புறம் நான் எப்படி சும்மா இருக்க முடியும் நீங்களே சொல்லுங்கள்!

=================================================================================================

வெளி நாட்டிலிருந்தெல்லாம் பாராட்டினார்களாம்...  

==============================================================================================