புதன் 191211 :: சினிமாவுக்குச் சென்று தூங்கும் குழுமத்தில் நீங்களும் உண்டா?

கீதா சாம்பசிவம் : 

                

(இந்தக் கேள்வியைக் கேட்கலாமா வேண்டாமா எனப் பலத்த சிந்தனை/ ஆனாலும் இது பொதுவாகக் கேட்பது தான். யாரையும் குறிப்பிட்டுச் சொல்லுவது இல்லை.)
               
பெண்கள் எப்படி உடை அணிந்தாலும் ஆண்களுக்கு அவர்களிடம் ஈர்ப்பு வருவதை ஒத்துக்கலாம். ஆனால் அந்த ஈர்ப்பு பலாத்காரம் செய்வது, கொல்வது வரை போவது சமீப காலங்களில் அதிகரித்து வருவது ஏன்?

# ஈர்ப்பு கொடூரமாக மாறுவது மாபெரும் சோகம். அது ஏன் என்பது குற்றம் புரிவோரின் வளர்ப்பு, பின்னணி, அறிவு,  புலன் இன்ப நாட்டத்தின் தீவிரம் ஆகியவற்றைச் சார்ந்திருக்கும்.  பிள்ளைப் பிராயத்தில் நல்ல பின்னணி மிக முக்கியம்.

"போட்டுத் தள்ளிடுவாங்க" எனும் பயம் உண்டாக்கப் பட்டுள்ளதை வரவேற்பதா என்று புரியவில்லை.

                  

தான் பாட்டுக்குத் தன் வேலையைப் பார்த்துக்கொண்டு செல்லும் பெண்ணிடம் கூட பலாத்காரம் செய்து அவளை எரித்துக்கொல்லும்வரை போகும் ஆண்கள் உண்மையில் மனிதர்களா?

               
# இவ்வகை நபர்கள் விலங்கினும் இழிந்தவர்கள்.

//மேலுள்ள கேள்வியைக் கொஞ்சம் திருத்திக் கேட்டிருக்கேன்! // கோயில் சிலைகளில் ஆண், பெண் இணைந்திருப்பதைக் காட்டுவது ஆன்மிகத்தின் அடிப்படையே என்பதைப் புரிந்து கொள்ளாமல் அனைவருக்கும் ஆபாசமாகத் தோன்றுவது ஏன்? ஏன் இங்கே அனைவரும் வந்து போகும் இடங்களில் இவைகள் வைக்கப்பட்டுள்ளன என்பதன் தாத்பரியத்தை அறிந்து கொள்ளாமல் நம் வசதிக்கு ஏற்பப் பேசுவது சரியா? நம் முன்னோர்கள் இவற்றின் உண்மையான தாத்பரியத்தைப் புரிந்து கொள்ளாமலா வைத்திருப்பார்கள்?

# Explicit சிலைகள் எனக்கு உறுத்தவே செய்கின்றன. தாத்பரியம் தத்துவம் எனக்குப் பிடிபடவில்லை.

          

             
கோயில்களின் கட்டுமானத்தின் அடிப்படையைப் புரிந்து கொண்டு எல்லோரும் தரிசிக்க இயலாது. ஆனால் இத்தகைய சிலைகள் ஏன் வைக்கப்பட்டுள்ளன என்பது குறித்து யாரிடமாவது கேட்டுத் தெரிந்து கொள்ளலாம் அல்லவா? அதை விடுத்து ஆபாசத்தை மட்டுமே முன்னிறுத்துவது ஏன்?

# பார்க்க ஆபாசமாக இருப்பதை மறுப்பதற்கில்லை.

             

சங்கத்தமிழ், சிலப்பதிகாரக் காலத் தமிழ், பக்தி காலத்தின் தேவார, திருவாசகங்களின், பிரபந்தங்களின் தமிழ் இவற்றில் நிறைய வேறுபாடு காண முடியும். ஆனாலும் நம்மால் புரிந்து கொள்ள முடிகிறது என்பது எதைக் காட்டுகிறது?

# பழைய இலக்கியங்கள் எல்லாம் புரிந்து கொள்ள எளியனவல்ல. காலாகாலமாக செய்யுள் தமிழ் தனித்தன்மையதாய் இருந்திருக்கிறது.

 
வடமொழி ஆதிக்கம், ஆரியப் படையெடுப்பு என்றெல்லாம் சொன்ன காலத்தில் தமிழில் ஏற்பட்டிருந்த மறுமலர்ச்சி இப்போது நிலைத்து இருக்கிறதா?

# சமீப காலமாக தமிழ் மறுமலர்ச்சி என் கண்ணில் படவில்லை. அது என் தவறினால் கூட இருக்கலாம்.

கம்பரும் சரி, வில்லிபுத்தூராரும் சரி, சம்ஸ்கிருதம் படித்தே முறையே ராமாயணம், மஹாபாரதம் எழுதினார்கள். அப்படி இருக்கையில் சம்ஸ்கிருதம் வந்து தமிழை அழித்துவிடும் என்று சொல்லுவது சரியா?
சம்ஸ்கிருத வெறுப்பு இடையில் வந்தது தான் அல்லவா? ஏனில் ஸ்தபதிகளும், சிற்பிகளும், மருத்துவர்களும், நடனக்கலை ஆசிரியர்களும் கட்டாயம் சம்ஸ்கிருதம் படித்தே ஆகவேண்டும். அப்படி இருக்கையில் அதனால் தமிழ் அழிந்து விடும் என நம்ப வைப்பது சரியா?
         

# மொழி ஆதிக்கம் வேறு பயன்பாடு வேறு. வடமொழி ஆதிக்கம் என்பது ஒரு மாயை.

             

தமிழில் ஆங்கிலம் கலக்காமல் பேசுபவர்களை விரல் விட்டு எண்ணி விடலாம். ஆங்கிலத்தை ஏன் யாருமே எதிர்ப்பதே இல்லை? அது நம் நாட்டு மொழியா?

# ஆங்கிலக் கலப்பை எதிர்ப்போர் எப்போதும் உண்டு. அது கிட்டத்தட்ட நம் நாட்டு மொழி அந்தஸ்துடன்தான் இருக்கிறது.
            

நெல்லைத்தமிழன் : 

                     

1. 60 வயது தாண்டியவர்கள் செய்யக்கூடாதது என்ன என்ன? - 

# 30 வயதுக்காரராக எண்ணிக் கொள்ளக் கூடாது. 

&கடந்த காலங்களை எண்ணி சந்தோஷமோ அல்லது துக்கமோ படாமல் நிகழ்காலத்தில் சந்தோஷமாக. நிம்மதியாக வாழ வேண்டும். 

2. நெட் ஃப்ளிக்ஸ், ஹாட் ஸ்டார்.... போன்ற பல வாய்ப்புகள் இருக்கும்போது  இந்தியாவில் மிகவும் செலவு பிடிக்கும் படியாக ஏன் திரை அரங்கத்தில் படம் பார்க்கணும்? 

 # "என்ன இருந்தாலும் தியேட்டரில் பார்ப்பது மாதிரி ஆகாது" எனப் பரவலாகப் பேசப்படுவதைக் கேட்டதில்லையா ? இது ஒரு அன்வைண்டிங்.

& என்னதான் வீட்டில் சௌகரியமாக அமர்ந்து கிரிக்கட் பார்க்க முடியும் என்றாலும், ஸ்டேடியத்தில் சென்று பார்க்க எக்கச்சக்க செலவு செய்து பார்க்கின்ற ஒரு த்ரில் வராது என்று சொல்பவர்களும் உண்டுதானே! 

என்னுடைய அலுவலக நண்பர் ஒருவர் அந்தக்காலத்தில், இசைவிழா சீசனில் என்னோடு சேர்ந்து நிறைய சபாக் கச்சேரிகளுக்கு வருவார். காசெட் சங்கீதம் கேட்பது அவருக்குப் பிடிக்காது. 'ஏன்' என்று கேட்டேன். 
அவர் சொன்ன பதில்: 
கச்சேரி என்றால், சும்மா பாட்டுக் கேட்பது இல்லை. 
கச்சேரி ஆரம்பிப்பதற்கு முன்பு நமக்காக ரிசர்வ் செய்துள்ள இருக்கையில் அமர்ந்து அதன் ஏ சி குளிரை அனுபவிக்கணும். அப்படியே சுற்றிலும் பார்த்து, நம்மைப்போல இந்த பாடகருக்கு எவ்வளவு ரசிகர்கள் இருக்கிறார்கள் என்று பார்த்து சந்தோஷப்படணும். அப்படியே சுற்றிலும் உள்ள ரெட்டை சடை, பாவாடை தாவணிகளை பார்த்து ஜொள்ளு விடணும். கச்சேரி ஆரம்பிப்பதற்கு முன்னால வயலின்காரர், மிருதங்கக்காரர், தம்பூரா ஸ்ருதி சப்தம் எல்லாவற்றையும் கேட்டு ஆனந்திக்கணும். ஆலாபனையின் போது பாடகர் பாடும் இராகத்தைக் கண்டுபிடித்து சந்தோஷப்படணும். முழுக் கச்சேரியையும் கேட்டு, மங்களம் பாடி முடித்தபின், எழுந்து நின்று கை தட்டணும். வெளியே வந்து சூடாக ஒரு ஸ்ட்ராங் காபி - பித்தளை டம்ளர் / டபரா செட்டில் வாங்கி, ஆற்றிக் குடிக்கணும். இப்படி எல்லாம் செஞ்சாதான் அது ஒரு முழுமையான அனுபவம். 

இவை யாவுமே, தியேட்டரில் பார்க்கும் பட அனுபவம் கிரிக்கட் பார்க்கும் அனுபவம் எல்லாவற்றுக்கும் பொருந்தும். ஆனால் இவற்றை ரசிக்க இருபது முதல் நாற்பது வயதுக்குள் இருந்தால் உத்தமம்!  

3. ஸ்கைப் போன்ற வழிமுறைகள் இருக்கும்போது நேரில் ஒருவர் வீட்டிற்குச் சென்று சந்திப்பது எந்த விதத்தில் வித்தியாசமானது? 

 # பாடி லாங்வேஜ் ஸ்கைப்பில் மிஸ்ஸிங்.   

& ஸ்கைப், வாட்ஸ்அப் வீடியோ கால் எல்லாமே குறைந்தபட்சம் ஒருநாள் / அதிகபட்சம் ஒருமாதம் நினைவில் இருக்கும். ஆனால், நேரில் நடக்கும் சந்திப்புகளை வாழ்நாள் முழுவதும் மறக்கமுடியாது. (எப்போ வருகிறீர்கள்?) 

4. எபி ஏன் அவர்களது வாசகர் சந்திப்பை நடத்துவதில்லை?

# பல சமயம் அநாமதேயம் சௌகரியமானது.

& ஆரம்பகாலத்தில் நாங்கள் கொஞ்சம் முயன்று பார்த்தோம். அலைபேசியில் எங்களைத் தொடர்புகொண்டு பேசலாம் என்று சொல்லியிருந்தோம். ஒன்றிரண்டு வாசகர்கள் தொடர்புகொண்டு பேசினார்கள். 
அப்புறம் ஒரு ஜனவரி ஒன்றாம் தேதி சந்திப்புக்கு ஏற்பாடு செய்தோம். 
2011 என்று நினைக்கிறேன். அப்போது பதிவர் + முகநூல் நண்பர்கள் என்று சொல்லியிருந்தேன். சந்திப்புக்கு, நண்பர்கள் பால கணேஷ், கோவை ஆவி, தீபக் ராம், 'திராவிட மாயை' எழுதிய சுப்பு மணியன் (மேலும் ஒருவர் - பெயர் மறைந்துவிட்டது!) ஆகியோர் வந்தனர். சுமார் இரண்டு மணி நேரம் பேசிக் கொண்டிருந்துவிட்டுப் பிரிந்து சென்றனர். 

வாசகர் சந்திப்புக்கு வருகின்ற வருடம் ஏதேனும் வழி கிடைக்கிறதா என்று பார்ப்போம். 

5. Buy 1 Get 2, 70% விலை குறைப்பு - இதிலெல்லாம் உங்களுக்கு நம்பிக்கை இருக்கா?

# அதில் உள்ள உண்மை சாதாரண விலை அநியாயமாக மிகைப் படுத்தப் பட்டது என்பதே.

& நம்பிக்கை இல்லை. ஆனால், எப்படியோ நான் ரிலையன்ஸ் ஃப்ரெஷ் கடையில் சோன் பப்டி வாங்கும் சமயங்களில் மட்டும் Buy 1, get one free ஆஃபரில்தான் எப்பொழுதும் வாங்கியிருக்கிறேன்! 

6. பதிவுக்கு பின்னூட்டம் இடும் அனைவரும் இடுகையை படிக்குறார்கள் என நினைக்கிறீர்களா?

# அது கருத்தில் பிரதிபலிக்கும் ஆகையால் ஐயத்திற்கிடமில்லை.

& ஹி ஹி ! என்னங்க உங்களுக்குத் தெரியாதா! 

பானுமதி வெங்கடேஸ்வரன்: 

சினிமாவுக்குச் சென்று தூங்கும் குழுமத்தில் நீங்களும் உண்டா?

# இரண்டொரு முறை உண்டு.

& உண்டு. 
           
நாகையில் சுமதி என் சுந்தரி படத்தை இரண்டாம் முறை பார்ப்பதற்கு, செகண்ட் ஷோ காண அண்ணன் கூப்பிட்டதால் சென்றேன். படத்தின் ஆரம்பக் காட்சிகளையும் பாட்டு காட்சிகளையும், நாகேஷ் காமெடியும் மட்டும் பார்த்துவிட்டு, மீதி நேரங்களில் தூங்கினேன். 

அலுவலக டூர் நாட்களில் ஒருமுறை ஹோசூர் தொழிற்சாலைக்குப் போயிருந்தேன். வந்த வேலை இரண்டு மூன்று நாட்களில் முடிந்தது. ஹோட்டலில் தங்குகின்ற செலவைக் குறைக்க ( தங்க ஆரம்பித்த நேரத்திலிருந்து ஒவ்வொரு  இருபத்து நான்கு மணி நேரமும் ஒருநாள் என்ற  கணக்கு ஆனால், மாலை ஆறுமணிக்கு மேலே தங்கினால் ஒருநாள் கணக்கு ஆகிவிடும்.) மாலை மூன்றரை மணிக்கே அறையைக் காலி செய்து  பேருந்து  நிலையத்திற்கு வந்தேன். ஆனால், இரவு பத்துமணி பேருந்து பயனத்துக்குதான் டிக்கெட் கிடைத்தது. என்ன செய்வது? 
பக்கத்திலிருந்த ஹோட்டலுக்குப் போய் நிதானமாக டிபன் சாப்பிட்டு, காபி சாப்பிட்டு, நிதானமாக பணம் கொடுத்து வெளியே வந்தாலும் மணி நாலே முக்கால்தான் ஆகியிருந்தது. 

பேருந்து நிலையத்தி சுற்றிச் சுற்றி வந்து கால்கள் வலித்தன. மேலும் வெளிப்பிரகார சுற்று செய்யும்போது ஒரு தியேட்டர் கண்ணில்பட்டது. 

ரிக்-ஷா மாமா என்ற படம். 

சந்தோஷமாக  டிக்கெட் வாங்கி, உள்ளே சென்று உட்கார்ந்து நன்றாகத் தூங்கினேன். படம் முடிந்து எல்லோரும் வெளியே சென்றபின் கடைசி ஆளாக வெளியே வந்து, ஓட்டலில் சப்பாத்தி சாப்பிட்டு, பேருந்தில் ஏறி உட்கார்ந்து, தூக்கத்தை பயணத்தின்போது தொடர்ந்தேன். 

மதுரை மீனாட்சி லட்டு ப்ரசாதம் கிடைத்ததா?

# இன்னும் இல்லை. 

& இல்லையே! எங்கே கொடுக்கிறார்கள்? 

பெண் வேடம் போட்ட நடிகர்களில் யாருக்கு அது கச்சிதமாக பொருந்தியதாக நினைக்கிறீர்கள்?

 # யாருக்கும் இல்லை. போனால் போகிறது என்று பார்த்தால் சோ & கமல் சண்முகி.

& என் வோட்டு கமல் & பிரசாந்த். 

 ==================================================

அவல், பொரி & கடலை 

சென்ற வாரம் கேட்டிருந்த படம் இதுதான் : 

பூன்ஜி 

எனக்கொரு டவுட்டு. இந்த 'மூஞ்சி'யை எல்லாம் பார்க்க, 'பூன்ஜி' படத்துக்கு அப்போ எத்தனைப் பேர் போயிருப்பாங்க? 

இதை எழுதிய எழுத்தாளர் யார்? 

காரின் விலை இவ்வளவு குறைந்து இருந்த நாட்களில், ரேடியோவின் விலை என்னவாக இருந்திருக்கும்? 

எல்லோரும் பதில் சொல்லுங்க / எழுதுங்க. 

யார் சொல்வது சரியாக இருக்கிறது என்று பார்ப்போம். 

கொக்கி : 

ஆரம்பிச்சுட்டோம்; முடிங்க 

====================================================

மீண்டும் சந்திப்போம்! 

====================================================