'திங்க'க்கிழமை : மைசூர்பா – நெல்லைத் தமிழன்

செப்டம்பர்ல வாட்சப்லதான் ஸ்ரீகிருஷ்ணா ஸ்வீட்ஸ்ல மைசூர்பா, ஏதோ ஒரு விழாவுக்காக, Buy 1 Get 1 என்று போட்டிருந்தார்கள். என் மனைவி இதில் ஆர்வம் காட்டலை. என்னிடம், நீங்க வாங்கினா நிறைய வாங்குவீங்க, அப்புறம் தேவையில்லாமல் நாம உட்கார்ந்து சாப்பிடணும். இது எதுக்கு வேண்டாத வேலை. என்ன விலையோ அதைக் கொடுத்து 2-3 பீஸ் மட்டும் வாங்கிச் சாப்பிட்டாப் போறாதா என்றாள். நாமதான் ‘மனைவி சொல்லே மந்திரம்’ என்பதை இந்தக் காதில் வாங்கி அந்தக் காதில் விடும் வம்சமாச்சே. சாவகாசமா காலை 9 ½ க்கு பக்கத்தில் இருக்கும் ஸ்ரீகிருஷ்ணா ஸ்வீட்ஸுக்குப் போனால், தெருவில் பெரிய வரிசை. அதனால் ஸ்ரீகிருஷ்ணா ஸ்வீட்ஸில், அதிக பட்சம் ஒருவருக்கு ½ கிலோ என்று ஆரம்பித்து (1/2 கிலோ வாங்கினால் ½ கிலோ இலவசம். ஆனா ½ கிலோ மைசூர்பா 340 ரூபாய்) பிறகு ஒருத்தருக்கு 300 கிராம் என்று குறைத்துவிட்டார்கள். ஸ்டாக் வரலையாம். இதனைக் கேட்ட எனக்கு, மைசூர்பாவுக்காக கியூவில் நிற்பதா என்று தன்மானம் அதிகமாக, பேசாமல் வீடு வந்து சேர்ந்துவிட்டேன்.

இந்த மைசூர்பா என்ன கம்ப சூத்திரமா? நாமே செய்துபார்க்கலாம் என்று தோன்றியது.  உடனே செய்தும்விட்டேன்.  அந்த சந்தோஷத்தில் ஸ்ரீராமிடம், தீபாவளிக்கு அருகில் வரும் திங்கக் கிழமையில் வெளியிடுவதானால் உடனே எழுதி அனுப்புகிறேன் என்று சொன்னேன். ஸ்ரீராமோ, 25 நவம்பர் ஸ்லாட்தான் இருக்கு என்றார்.எனக்கு  உடனே எழுதி அனுப்பும் ஆர்வம் போய்விட்டது.

இன்று இரவு பிரயாணம் செல்கிறேன்.   அடுத்து வரும் திங்கக் கிழமைக்காக இதனை எழுதி அனுப்புகிறேன்.

தேவையானவை

கடலை மாவு – 1 கப்

ஜீனி (வெள்ளைச் சர்க்கரை) – 1 ¼ கப்

நெய் – 1 ¼ கப் – இதனை பாதிப் பாதியாகப் பிரித்து வைத்துக்கொள்ளுங்கள்.

நல்ல டிரேயில் பட்டர் பேப்பரை வைத்துக்கொள்ளுங்கள். மைசூர்பா பதம் வந்ததும் உடனே இந்த டிரேயில்தான் கொட்டவேண்டும்.  பட்டர் பேப்பர் இருந்தால் கட் செய்வது மிகச் சுலபம். இல்லாதவர்கள், டிரேயில் நன்கு நெய்யைத் தடவி வைத்துக்கொள்ளுங்கள். டிரே அளவு முக்கியம். எவ்வளவு செய்யப்போகிறோமோ அதற்கு ஏற்ற டிரே வேண்டும்.

செய்முறை

மைசூர்பாக்குக்கு எல்லா வேலையையும் குறைந்த தணலில் செய்யணும்.

முதல்ல கடாய்ல சிறிது நெய் விட்டுக்கொண்டு (2 ஸ்பூன்) கடலை மாவை வறுத்துக்கொள்ளவும். பச்சை வாசனை போகணும்.

நெய்யை உருக வைத்த பிறகு இரு பகுதியாகப் பிரித்துக்கொள்ளவும்.

ஒரு பகுதியை பாத்திரத்தில் கொட்டி அதில் வறுத்த கடலை மாவைச் சேர்த்து கட்டி இல்லாமல் நன்கு கலந்துகொள்ளவும். இது கிட்டத்தட்ட தோசை மாவு பதத்தில் இருக்கும்.

கடாயில் ஜீனியைக் கொட்டி சிறிது தண்ணீர் விட்டு கொதிக்க வைக்கவும். ஞாபகம் இருக்கட்டும், குறைந்த தணலில்தான் அடுப்பு இருக்கணும். ஒரு கம்பிப் பாகுப்பதம். இதுல ரொம்ப மெனெக்கிடவேண்டாம். அதிகமா பாகா ஜீனியைக் கிளறிடக்கூடாது. அவ்ளோதான். நான் கரண்டினால பாகை எடுத்துவிடும்போது கொஞ்சம் பிசுபிசுப்பு தெரிந்தாலே அது ஒரு கம்பிப் பாகு என்று தெரிந்துகொண்டுவிடுவேன்.

இப்போ நெய்யில் கலந்து தோசைமாவு பதத்தில் வைத்திருக்கும் கடலைமாவுக் கலவையை கடாயில் கொட்டிக் கிளறவும். குறைந்த தணலில்.

அவ்வப்போது நெய்ப் பாத்திரத்திலிருந்து ஓரிரண்டு ஸ்பூன் நெய்யை விடவும்.

கடாயில் ஒட்டாமல் கலவை வந்தால் சரியான பதம் வந்துவிட்டது என்று தெரிந்துகொள்ளலாம்.

அடுப்பை அணைத்துவிட்டு, மைசூர்பாக் கலவையை டிரேயில் கொட்டி, சிறிது நேரம் கழித்து துண்டாக வெட்டிக்கொள்ளலாம்.

ரொம்ப சுவையான ரெசிப்பி இது. நார்மல் மைசூர்பாக்கு மாதிரி கட்டியாக இருக்காது. பல்லைப் பதம் பார்க்காது.

எனக்கு ஸ்ரீகிருஷ்ணாவின் செய்முறை விகிதம் தெரியும். ஆனால், நான் செய்யும்போது வழியுமளவு நெய்யை உபயோகப்படுத்தலை. கொஞ்சம் குறைவாகவே உபயோகித்தேன். பலர் எண்ணெய், நெய் கலந்தும் செய்வார்கள். அதுக்கு முழு நெய்யை உபயோகித்தால் உடலுக்கு நல்லது என்பது என் எண்ணம்.

நல்லா வந்தது என்ற நம்பிக்கை வந்ததும், ஆர்வக் கோளாறில், ¾ பங்கு நெய்யும், ¼  பங்கு கடலை எண்ணையையும் உபயோகித்து மைசூர்பா  12 பீஸ் மட்டும் வரும்படி, என் அம்மாவைப் பார்க்கப்போகும் அன்று அவசர அவசரமாகச் செய்தேன். (நெய் ஸ்டாக் இல்லை. கடைக்குப் போய் வாங்கி வரும் அளவு நேரம் இல்லை. கிளம்ப 2 மணி நேரம் இருக்கும்போதுதான் இந்த எண்ணம் வந்தது. ஆர்வக்கோளாறுக்குக் காரணம், நானே செய்துகொண்டு போகணும், அம்மாவுக்கு, தன் பையன் செய்து கொடுத்தது என்ற சந்தோஷம் வரணும் என்பதுதான்). மிக அருமையாக வந்தது. அம்மாவுக்குக் கொண்டுபோய்க் கொடுத்தேன். இரவு என் பெண் ஆபீஸிலிருந்து வந்ததும் பெருமை அடித்துக்கொண்டு, இருந்த 2 துண்டுகளில் ஒன்று கொடுத்தேன். அவள், என்னப்பா ஒரே கடலை எண்ணெய் வாசனை அடிக்குது, நெய்யிலேயே பண்ணலையா.. யக் என்று இருக்கு என்றாள். நெய் போதுமான அளவு இல்லைனா, சூர்யகாந்தி எண்ணெயும் சேர்த்திருந்தால் அவ்வளவு தெரிந்திருக்காதே, கடலை எண்ணெய் ரொம்ப ஓவர் பவரிங்க் ஆக இருக்கு என்றாள். அப்போதுதான் என் வாசனை அறியும் திறன் தற்காலிகமாக மறைந்தது என்னைக் கவிழ்த்துவிட்டுவிட்டதே என்று தோன்றியது.  அம்மா என்ன நினைத்திருப்பாளோ…

என் மாமனார் இங்கு வந்திருந்தபோது அவருக்கு நெய்யில் செய்துகொடுத்தேன். நன்றாக இருந்தது என்றார்.  நீங்களும் இதனைச் செய்துபாருங்கள்.

குறிப்பு: இந்தச் செய்முறையைப் படித்து என்ன என்ன பின்னூட்டங்கள் வரும் என்று ஊகித்து, அதில் இரண்டு மூன்றை எழுதியிருக்கிறேன். யார் இந்த மாதிரி பின்னூட்டம் இடுவாங்க என்று கண்டுபிடிக்கவேண்டியது உங்க வேலை. ஹா ஹா.

அட… இந்தச் சுண்டைக்காய் செய்முறையை எல்லாம் தி.பதிவாக எழுதி அனுப்பலாமா? இதுவரை எனக்குத் தெரியாமல் போய்விட்டதே. அனைவருக்கும் காலை/மாலை/இரவு வணக்கம். இப்போ போயிட்டு காலைல, அதாவது உங்களுக்கு இரவு நேரத்துல வருகிறேன்.

காலை வணக்கம்.

மிகினும் குறையினும் நோய்செய்யும் நூலோர்
வளிமுதலா எண்ணிய மூன்று

வாழிய நலம்

சூப்பர்.

அன்புடன்

நெல்லைத்தமிழன்