"திங்க"க்கிழமை : நிலக்கடலை / வேர்க்கடலை மசாலாக்கறி - கீதா ரெங்கன் ரெஸிப்பி

 நிலக்கடலை/வேர்க்கடலை மசாலா கறி

ஒரு தவறு நேர்ந்துவிட்டது. நிலக்கடலை மசாலா கிரேவி என்று இரு ரெசிப்பி வைத்திருந்தேன். அதில் ஒன்று முன்னர் வந்த வட இந்தியாவில் செய்வது போன்ற ரெசிப்பி. இது கொஞ்சம் வேறு டக்கென்று செய்யும் ரெசிப்பி. இதற்கான படங்கள் அனுப்புவதற்குப் பதில் தெரியாமல் முன்னர் வந்த ரெசிப்பி படங்கள்  அனுப்பிவிட்டேன். அதைக் கோடிட்டுக் காட்டிய பானுக்காவிற்கு மிக்க மிக்க நன்றி. எனக்குக் குழப்பம் என்னடா இது இரு ரெசிப்பி அனுப்பிருந்தேனே என்று. அதன் பின் பார்த்த பிறகுதான் என் தவறு தெரிந்தது அதே படங்கள் என்று. எனவே இங்கு கடைக்குச் சென்று சாமான் வாங்கி வந்து டக்கென்று இப்போது அதே ரெசிப்பி வேர்ட் டாக்குமென்டாக இருந்ததால் அதை அப்படியே செய்து, என் லேப்டாப்பை தண்ணீருக்குப் பயந்து லாஃப்டில் வைத்திருப்பதால், அருகில் இருக்கும் பெண்ணிடம் இருக்கும் லேப்டாப்பில் படங்களை ஜஸ்ட் கொலாஜ் செய்து இதை ஸ்ரீராமிடம் பேசி அனுப்புகிறேன். 

ஸாரி ஸாரி ப்ளீஸ் மன்னிச்சுக்கோங்க.

ஸ்ரீராம் ப்ளீஸ் உங்களுக்கும் வெரி ஸாரி சொல்லிக் கொள்கிறேன் தொந்தரவிற்கு.

எபி 'திங்க' ரசிகப் பெருமக்கள் அனைவருக்கும் எங்கள் அன்பான வணக்கம்.  இன்னும் பல செய்முறைகள் இருக்கின்றன. படங்கள் கோர்த்து எழுதி ஸ்பாஆஆஆ. அதனால் செய்முறை சொல்லிவிட்டுக் கடந்துவிடுகிறேன். எங்கள் வீட்டில் நிலக்கடலை எல்லோருக்கும் மிகவும் பிடிக்கும். சும்மாவே வெந்து உப்பு போட்டு அல்லது அதோடு காய்கள் கலந்து பீச் சுண்டல் போல சலாட் போலவும் செய்து சாப்பிடுவதுண்டு. அப்படி ஒரு முறை கொஞ்சம் அதிகமாக இருந்ததை இப்படிச் செய்தேன். 

செய்முறை

இதற்குத் தேவையானவை :

நிலக்கடலை – 100 கி வேக வைத்து எடுத்துக் கொள்ளவும். அதில் 4 டேபிள் ஸ்பூன் தனியாக எடுத்து வைக்கவும்

பெரிய வெங்காயம் – 1 பொடியாகக் கட் செய்து கொள்ளவும்

சின்ன வெங்காயம் – 10-12 உரித்துச் சிறிய துண்டுகளாகக் கட் செய்து கொள்ளவும்.

பூண்டு – சிறியது என்றால் 2, பெரியது என்றால் 1  பொடியாகக் கட் செய்துக்கோங்க

கடுகு – 1 ஸ்பூன்

ஜீரகம் – 1 ஸ்பூன்

பட்டை – சிறியதாக 2, 3 துண்டுகள்

ஏலக்காய் – 1

கிராம்பு -1

பிரிஞ்சி இலை -1

பச்சை மிளகாய் – 2 கீறி வைத்துக் கொள்ளவும்

புளி – கெட்டியாகக் கரைத்தது 1 ஸ்பூன் அல்லது புளி பேஸ்ட் – 1 ஸ்பூன்

இஞ்சி – சிறிய துண்டு கட் செய்து கொள்ளவும்

சுக்குப் பொடி – 1 ஸ்பூன்

மஞ்சள் தூள் – ½ ஸ்பூன்

கொத்தமல்லிப் பொடி + மிளகாய் தூள் – சேர்த்து 1 ஸ்பூன்

நெய் – 1 டேபிள் ஸ்பூன்

எண்ணை – 1 டேபிள் ஸ்பூன்

உப்பு தேவையானது

வாணலியில் நெய் விட்டு கடுகு தாளித்து, கடுகு வெடிக்கும் போது ஜீரகம் தாளித்து, மசாலாப் பொருட்கள் போட்டு வறுபட்டதும், பச்சை மிளகாய், பூண்டு, வெங்காயம் எல்லாம் போட்டு வதக்கவும். அடுத்து இஞ்சி, சுக்குப் பொடி, மஞ்சள் தூள், தனியா + மிளகாய்த் தூள் கலந்தது போட்டு நன்றாகச் சுருள வதங்கியதும், அதில் 4 டேபிள் ஸ்பூன் எடுத்துக் கொண்டு அதை தனியாக எடுத்து வைத்திருக்கும் வெந்த கடலை 4 டேபிள் ஸ்பூனுடன் சேர்த்து மையாக அரைத்துக் கொண்டு அரைத்து வைக்கவும்.

வாணலியில் வதங்கும் மசாலாப் பொருளுடன் வெந்த கடலையை அதோடு இருக்கும் தண்ணீருடன் சேர்த்து, கெட்டிப் புளிக்கரைசல் சேர்த்து, அரைத்த விழுதையும் சேர்த்து, தேவையான உப்பையும் போட்டுக் கொதிக்க வைக்கவும். நன்றாகக் கொதித்து கொஞ்சம் சேர்ந்துக் கெட்டியாகக் குழம்பு போன்று வந்ததும் கிரேவி ரெடி.

நன்றி நவிலல்! எபி ஆசிரியர்களுக்கும், ரசிகப்பெருமக்களுக்கும் ஹிஹிஹி!!!! மிக்க மிக்க நன்றி.  மீண்டும் எல்லோரிடமும் மன்னிப்பு கேட்டுக் கொள்கிறேன்.