திங்கக்கிழமை : அழல் அமுதகம் - கீதா சாம்பசிவம்

 எல்லோரும் என்ன என்னமோ குறிப்புக்கள் எல்லாம் எழுதறாங்க. நெல்லைத்தமிழர் பாரம்பரியச் சமையலில் இறங்கிட்டார்.

யார் என்ன எழுதினாலும் எங்கள் ப்ளாகும் அதை வெளியிட்டு விடுகிறது. இஃகி,இஃகி,இஃகி!

ஆகவே நான் இப்போ முக்கியமான சமையல் குறிப்பு ஒண்ணைச் சொல்லித் தரப்போறேன். இதுக்கு வேண்டிய சாமான்கள் அதிகமெல்லாம் இல்லை, ஜென்டில் விமென் அன்ட் மென்! இரண்டே இரண்டு தான் தேவை.

ஒண்ணு ஒரு பிடி வைச்ச வால் பாத்திரம். இடுக்கி பயன்படுத்தாமல் வெந்நீரை இந்தக் கைப்பிடி கொண்டு எடுக்கலாம். அதுக்காக. இல்லை, சாதாரணப் பாத்திரம் தான் இருக்குனா அதையே எடுத்துக்கோங்க. ஆனால் இதைக் கீழே இறக்க இடுக்கிக் கட்டாயம் வேணும். அதையும் தயாரா வைச்சுக்கோங்க. அடுத்துத் தேவையானது சுத்தமான குடிநீர். பலரும் அக்வா கார்ட் தண்ணீரோ, மினரல் வாட்டர் வரும் கான் தண்ணீரோ சூடு  பண்ணிச் சாப்பிடக் கூடாதுனு சொல்றாங்க. ஆகவே கார்ப்பரேஷன் தண்ணீர் விநியோகம் செய்தால் அந்தத் தண்ணீரை எடுத்துக்கோங்க. 

இப்போ அடுத்துச் செய்ய வேண்டியது கவனமாக எடுத்துக் கொண்ட நீரைப் பாத்திரத்தில் விட வேண்டும். கீழே சிந்திடாதீங்க. துடைக்கற வேலை வேறே வந்துடும். இப்போத் தண்ணீரும், பாத்திரமும் அடுப்பில்  ஏற்றத் தயார் நிலையில் காத்திருக்கு இல்லையா? அடுத்து அடுப்பை மூட்டணும். ஒரு சிலர் முதலிலேயே அடுப்பை மூட்டிட்டுப் பாத்திரம் எங்கே, தண்ணீர் எங்கேனு தேடுவாங்க. நாம தான் மு.ஜா.மு. அக்கா ஆச்சே! எல்லாம் தயாராக வைச்சிருப்போம். அடுப்பைப் பற்ற வைச்சதும். தண்ணீரோடு உள்ள பாத்திரத்தை அடுப்பில் வைக்கவும். நல்லாக் கொதிக்கட்டும். முத்துக் கொதினு உள்ளே முத்து முத்தாக வரும். சூடு போறும்னா அப்போவே வெந்நீரை எடுத்துடலாம். இல்லைனா இன்னும் கொஞ்சம் கொதிக்க விடலாம். பின்னர் பாத்திரத்தை கவனமாகக் கீழே இறக்கி ஒரு தம்பளர்/டபரா எடுத்துக் கொண்டு தம்பளரில் வெந்நீரை விட்டு இதை இதுவரை வேடிக்கை பார்த்தவங்களுக்குக் குடிக்கக் கொடுக்கவும். வெந்நீர் குடிப்பது தொண்டைக்கு இதம் மட்டுமல்ல/ வயிற்றுத் தொந்திரவு உள்ளவங்களுக்கு ஜீரணம் ஆகவும், உடல் இளைக்கவும் அடிக்கடி வெந்நீர் குடிக்கலாம். ஆகவே இதன் முக்கியத்துவம் புரிந்து கொள்ள வேண்டும் நண்பர்களே/நண்பிகளே!

இந்த வெந்நீரை வைச்சு எத்தனை வேலை செய்யலாம் தெரியுமோ? அப்படியே ஆத்திக் குடிக்கலாம். கொத்துமல்லிக் காஃபி போடலாம். தேநீர் தயாரிக்கலாம். இன்ஸ்டன்ட் காஃபிப் பவுடர் இருந்தால் காஃபி டிகாக்‌ஷ்ன் தயார் செய்து பாலோடு சேர்த்துக் காஃபி குடிக்கலாம். கபசுரக்குடிநீர்ப் பவுடரைப் போட்டுக் கஷாயம் தயாரிக்கலாம். பருப்பு வேக வைத்தால் வெந்நீரை விடலாம். புளி கரைக்க/ஊற வைக்கப் பயன்படுத்தலாம். காய்கள் சீக்கிரம் வேகவும் தக்காளியைத் தோல் உரிக்கவும் பயன்படுத்தலாம். இன்னும் நிறைய இருக்கு. இப்போதைக்கு இது போதும். 

ஆகவே நண்பர்களே, நண்பிகளே, வெந்நீர் போடுவது என்பது சமையலில் முக்கியமான ஒரு தயாரிப்பு. அதைத் தெரிந்து வைத்துக் கொண்டீர்களானால் உங்களுக்கு அதை வைத்துப் பல தயாரிப்புக்கள்/சமையல்கள் தயார் பண்ணலாம்.

பைதபை தண்ணீருக்கு வேறு பெயர்கள் உண்டு தெரியுமோ...   தலைப்புக்கு காரணம் சொல்லவேண்டுமல்லோ...

தண்ணீரின் வேறு பெயர்கள் : 

அப்பு அம்  அம்பணம்  அம்பு  அமுதகம்  அமுது  அயம்  அரி  அலம்  அலர்  அளகம்  அளறு  அறல்  அனலாற்றி  ஆப்பு  ஆபம்  ஆருவம்    ஆலம்  ஆழி  இதடி  இதம்  இரை  உதகம்  உதம் உதுக்கம்  உந்தி  உலம் உவரி ஓமி கஞ்சம் கம் கமலம் கருப்புரம் கவந்தம் காலாயம் கீரம் குசம் கையம் கோ கோமலம் சடாக்காரி சம்பரம் சரம் சரலகம் சலம் சலிலம் சிந்து சிவம் சீதம் சூமம் செம்மல் தகடி தாமரம் தாரம் தோணி தோயம் நலிதம் நளினம் நாரம் நீசகம் நீரம் நீவரம் நெருப்புக்கிரை பயசம் பயசு பயம் பயன் பாணி பாணிதம் பாதம் பாயம் பாவனி பீவை புணம் புயல் புனல் புனை பூதம் பேயம் பேரை மது மாபகம் மாரி மேகம் மை யா வசி வயம் வருணம் வலாகம் வளம் வாணி வாள் வாசம் வாயம் வார் வார்த்தரம் வாரி வாருவகை விடம் வேது  என்று பல வார்த்தை உண்டாம்.  இணையம் சொல்கிறது!