வெள்ளி வீடியோ : எத்தனை சொல்லி இத்தனை அழகை நான் பாடுவேன்...

 இன்றைய தனிப்பாடல் முதலில்.

இந்தப் பாடலை நான் முதலில் என் பள்ளிப் பருவத்தில் கேட்டேன். கிறித்துவப் பள்ளியில் படித்ததால் அதன் வழக்கங்களும், பாடல்களும் சிறு வயதிலேயே அறிமுகமாகி இருந்தன.  

'எல்லாம் ஏசுவே', 'ஆண்டவனின் திரு சன்னதியில்', 'கேளுங்கள் தரப்படும்' போன்ற தோத்திரப்ப பாடல்களுக்கு நடுவே அந்நாளில் வானொலியில் கேட்ட இந்தப் பாடல் என் மனதில் நின்ற பாடல்களில் ஒன்று என்பதற்கு அந்தப் பாடலைப் பாடிய குரலும் காரணம்.

பள்ளியை விட்டு வந்த பிகு நீண்ட நாட்கள் மறந்திருந்த இந்தப் பாடல் சில வருடங்களுக்கு முன்னர் மறுபடி நினைவுக்கு வந்தது.  பல இடங்களிலும் தேடியும் கிடைக்கவில்லை.  யு டியூபில் எவ்வளவு தேடினாலும் கிட்டவில்லை.  பேஸ்புக்கில் எல்லாம் அறிவித்து தேடிப் பார்த்திருக்கிறேன்.  சில கிறித்துவ நண்பர்ளுக்கு இந்தப் பாடல் அறிமுகமே ஆகி இருக்கவில்லை என்பதும் வியப்பு.  ஒரே ஒரு நண்பன் மட்டும் இதை சிலுவைப் பாடல் என்றான்.

சில இடங்களில் எஸ் பி பி இல்லாமல் யாரோ பாடிய பாடல் கிடைத்தது.  எனக்கு வேண்டியது எஸ் பி பி குரலில்.  அது இப்போது கிடைத்தது.

சமீபத்தில்தான் இந்தப் பாடல் கிடைத்தது.  இன்றைய புனித வெள்ளியை முன்னிட்டு அந்தப் பாடலை இங்கு பகிர்கிறேன்.

1975 ல் வெளியான இந்தப் பாடலை எழுதி இசை அமைத்தவர் டாக்டர் Y. டேவிட் தயானந்தன் என்கிறது யு டியூப் பக்கம்.  பாடல் இசையில் கொஞ்சம் ரீமிக்ஸ் செய்யப்பட்டிருந்தாலும் ஒரிஜினல் டியூன் மாறவில்லை.

வானாதி வானங்களில்

காணாத விண்ணொளியில்

வெள்ளிரத பவனியிலே

கள்ளமின்றி வந்தாயோ கண்ணே

தாலாட்டும் புல்லணையில்

கண் தேடும் அழகன்றோ

என்றும் நீங்காத பனிமழையில்

நீர் தாங்காத குளிரன்றோ

தூக்காத வன் சிலுவை

நீ தூக்கி சுமப்பாயோ

கறை காணாத உன் ரத்தத்தால்

எம்மை கழுவிட வந்தாயோ

1976 ல் வெளிவந்த திரைப்படம் பயணம். 

வியட்நாம் வீடு சுந்தரம் இயக்கத்தில் மேஜர், விஜயகுமார், ஸ்ரீகாந்த், படாபட் நடித்த படத்துக்கு இசை எம் எஸ் விஸ்வநாதன்.  பாடல்கள் கண்ணதாசன்.

பயணத்தில் இடம்பெறும் நிகழ்ச்சிகள்தான் கதை என்று நினைக்கிறேன்.

இந்தப் படத்தில் இடம்பெற்ற நல்லதொரு பாடல் எஸ் பி பி குரலில் வரும் இந்தப் பாடல்.  படத்தில் ஸ்ரீகாந்த் பாடுவதாக வரும் பாடல்.  ஸ்ரீகாந்த் படத்தில் வில்லன் என்று நினைக்கிறேன்.

பாடலின் பெரிய ஸ்பெஷல் எஸ்பி பி.  "எத்தனை சொல்லி இத்தனை அழகை நான் பாடுவேன்" என்கிற வரியில் அவர் குரலைக் கேட்கவேண்டுமே..

தென்றலுக்கு என்றும் வயது பதினாறேயன்றோ 

செவ்வானத்தின் வண்ண நிலாவும் பின்னவள்தானன்றோ 

வெள்ளித்தேரில் உள்ள சிலைக்கு எந்நாள் திருநாளோ 

மின்னல்மேனி மேகக்குழலாள் தன்னை அறிவாளோ 

வெள்ளித்தேரில் உள்ள சிலைக்கு எந்நாள் திருநாளோ 

மின்னல்மேனி மேகக்குழலாள் தன்னை அறிவாளோ 

பால்வண்ணப் பூமுல்லை பார்த்தால் போதாதோ 

பாலைவனத்தில் காவிரியாறு பைரவி பாடாதோ 

கம்பன் வந்தால் காவியம் பாட கற்பனை ஒருகோடி 

கண்ணன் கண்டா ராதை கூட ஈடில்லடி 

தத்தித்தாவும் சித்திரமுத்துச் சிப்பியில் விளையாடி 

தழுவப்போகும் தலைவன் யாரோ காதல் உறவாடி 

பட்டுச்சேலை கட்டும் சோலை வாடுது கண்பட்டு 

பன்னீர் சொம்பும் முன்னால் நின்று வாவென்றது 

பட்டுச்சேலை கட்டும் சோலை வாடுது கண்பட்டு 

பன்னீர் சொம்பும் முன்னால் நின்று வாவென்றது 

எத்தனை சொல்லி இத்தனை அழகை நான் பாடுவேன் 

இன்பத்தமிழில் உள்ளதை எல்லாம் அள்ளித்தருகின்றேன்.