வெப்பத்தைத் தாங்கும் தடுப்பூசிகள் மற்றும் நான் படிச்ச புத்தகம்

 கேரளாவில் கொல்லம் அருகில் உள்ள சாஸ்தாம்கோட்டை

டி.பி கல்லூரியில் மூன்றாம் ஆண்டு பி.காம் படித்துக் கொண்டிருக்கிறார்,
ஆலிஃப் முகமது. இவர் ஒரு மாற்றுத்திறனாளி. அவருடைய வகுப்புத்
தோழிகள் ஆர்யா, அர்ச்சனா இருவரும் அவரைத் தூக்கிக் கொண்டு
சென்ற காணொளி சமூக வலைத்தளப் பக்கங்களில் வைரலாகப் பரவி
வருகிறது.

‘‘பிறந்ததில் இருந்தே இப்படித்தான் இருக்கிறேன். ஆர்யா, அர்ச்சனா

மட்டும் இல்லை... என்னுடன் படிக்கும் எல்லாருமே என்னைத் தூக்கிட்டு
போவாங்க. நான் எங்கேயாச்சும் போகணும்னு சொன்னாப்போதும்
ஆண், பெண் பேதம் இல்லாம உடனே என்னைத் தூக்கிட்டு போயிடுவாங்க.

மார்ச் 24ம் தேதி அப்படித்தான் என்னை ஆர்யாவும், அர்ச்சனாவும் தூக்கினாங்க.
அவங்க தூக்கினதை சும்மா வீடியோ எடுத்து சோஷியல் மீடியாவில்
பதிவிட்டோம். அந்த வீடியோ இந்த அளவுக்கு வைரல் ஆகும்னு கொஞ்சமும்
எதிர்பார்க்கலை.

என்னை மாதிரியான மாற்றுத்திறனாளிகள் வீட்டுக்குள்ளேயே
முடங்கியிருக்கக் கூடாது. அவங்க எல்லாருக்கும் நான் ஒரு முன்மாதிரியாக
இருக்கணும்னு விரும்புறேன். என் நண்பர்கள் எனக்கு மிகப்பெரிய சப்போர்ட்.
அதுதவிர காலேஜிலும் எனக்கு முழு ஒத்துழைப்பு கொடுக்குறாங்க.

அந்த வீடியோ வைரலானதைப் பார்த்துட்டு என் நண்பர்களும், ஆசிரியர்களும்,
பெற்றோர்களும் அடைஞ்ச சந்தோஷத்துக்கு எல்லையே இல்லை...’’ என்கிறார்
ஆலிஃப் முகமது.

நன்றி- குங்குமம் டீம்  (நன்றி ஜெயக்குமார் ஸார்)

00000000000000000000000000000000000000000000000000000000000000000000000000000000000000000000000000000000000000000

திருச்சி: துளசியின் மருத்துவ குணங்கள் பாரம்பரிய மருத்துவ நிபுணர்களால் அடிக்கடி பாராட்டப்படுகிறது. இப்போது, தாவரத்திலிருந்து ஒரு குறிப்பிட்ட மூலக்கூறைப் பிரித்தெடுத்து, அதன் பெருக்கத்தைத் தடுக்க புற்றுநோய் உயிரணுக்களுக்கு அறிமுகப்படுத்தும் செயல்முறை ஜெர்மன் அரசாங்கத்திடமிருந்து காப்புரிமையைப் பெற்றுள்ளது.  திருச்சியில் உள்ள செயின்ட் ஜோசப் கல்லூரியின் தாவரவியல் துறையின் டாக்டர் செந்தில் குமாரின் வழிகாட்டுதலின் கீழ், ஆராய்ச்சி அறிஞர் ஆஷா மோனிகா இந்த ஆய்வை மேற்கொண்டார்.  "துளசியிலிருந்து ஒரு மூலக்கூறைப் பிரித்தெடுத்து, மார்பகப் புற்றுநோய் செல் லைனரில் அறிமுகப்படுத்தினோம். அந்த மூலக்கூறு மார்பகப் புற்றுநோய் உயிரணுக்களின் வளர்ச்சியைத் தடுத்து நிறுத்தியது என்று எங்கள் ஆராய்ச்சி கண்டறிந்தது. எங்கள் அரசாங்கத்திடம் அனுமதி பெற்ற பிறகு, நாங்கள் காப்புரிமைக்காகப் பணியைச் சமர்ப்பித்தோம். நாங்கள் மகிழ்ச்சியடைகிறோம். ஆய்வு ஜெர்மனி அரசிடம் இருந்து காப்புரிமை பெற்றது" என்று டாக்டர் செந்தில் குமார் கூறினார்.  ஆய்வின் அடுத்த கட்டங்களை விளக்கிய ஆஷா மோனிகா, “அடுத்த கட்டத்தில், தமிழகத்தின் பல்வேறு மாவட்டங்களில் விளையும் செடியில் இருந்து ஒரே மூலக்கூறைச் சேகரிப்போம். வெவ்வேறு மாவட்டங்களில் விளையும் தாவரத்தின் மூலக்கூறுகள் ஒரே மாதிரியான மூலக்கூறைத் தருகின்றனவா என்பதை ஆய்வு செய்வோம். சில நேரங்களில், அதே மூலக்கூறு வேறொரு மாவட்டத்தில் உள்ள ஆலையில் இருந்து சேகரித்தால் நல்ல பலன் கிடைக்கும்."  மார்பக புற்றுநோய்க்கான மருந்துகளை மலிவான விலையில் தயாரிக்க இந்த ஆய்வு உதவும் என்று டாக்டர் செந்தில் குமார் நம்பிக்கை தெரிவித்தார். "துளசி ஒரு பொதுவான தாவரமாகும், அதை நாம் பெரும்பாலான இடங்களில் காணலாம். பல தலைமுறைகளாக இதைப் பயன்படுத்துகிறோம். மார்பக புற்றுநோய்க்கான மலிவான மருந்து ஆய்வில் வரும் என்று நம்புகிறேன். அதைச் சாத்தியமாக்க நாங்கள் எங்களால் முடிந்தவரை முயற்சி செய்கிறோம். நமது விவசாயிகளுக்கும் பெரும் உதவியாக இருக்கும்," என்றார்.  கல்லூரி முதல்வர் டாக்டர் எம்.ஆரோக்கியசாமி சேவியர் எஸ்.ஜே., இப்பணியைப் பாராட்டி, மேலும் இதுபோன்ற ஆராய்ச்சிகளை மேற்கொள்ள நிறுவனம் நடவடிக்கை எடுத்து வருகிறது என்றார். "கடந்த நான்கு மாதங்களில், எங்கள் கல்லூரி சுமார் மூன்று காப்புரிமைகளைப் பெற்றுள்ளது. எங்கள் ஆராய்ச்சியின் முக்கிய நோக்கம் சாமானிய மக்களின் முன்னேற்றத்தை உறுதி செய்வதாகும். துளசி குறித்த தற்போதைய ஆய்வு எதிர்காலத்தில் புற்றுநோயாளிகளுக்கு உதவும் என்று நாங்கள் நம்புகிறோம்," என்று அவர் கூறினார்.  தலைப்பு: திருச்சியில் உள்ள செயின்ட் ஜோசப் கல்லூரி வளாகத்தில் ஆஷா மோனிகா மற்றும் டாக்டர் செந்தில் குமார் ஆகியோர் காப்புரிமை சான்றிதழை செயின்ட் ஜோசப் கல்லூரி முதல்வர் டாக்டர் எம் ஆரோக்கியசாமி சேவியர் எஸ்.ஜே.யிடம் வழங்கினர்.  (நன்றி ஜெயக்குமார் ஸார்)

-----------------------------------------------------------------------------------------------------------------------------------------------------------------------------------

புதுடில்லி :கொரோனாவுக்கு எதிராக தற்போது பயன்பாட்டில் உள்ள தடுப்பூசிகள், குளிரூட்டப்பட்ட பெட்டியில் பாதுகாக்கப்படும் நிலையில், வெப்பத்தை தாங்கக் கூடிய புதிய தடுப்பூசியை தயாரிக்கும் முயற்சியில் இந்திய நிறுவனம் ஈடுபட்டுள்ளது.  கொரோனாவுக்கு எதிராக தற்போது உலகெங்கும் பல தடுப்பூசிகள் பயன்படுத்தப்படுகின்றன.

இந்த தடுப்பூசிகளை, குளிரூட்டப்பட்ட பெட்டியில் பாதுகாப்பாக வைத்திருக்க வேண்டும். இதனால் கூடுதல் செலவுகள் ஏற்படுகிறது. இந்நிலையில், கர்நாடக மாநிலம் பெங்களூரைச் சேர்ந்த இந்திய அறிவியல் மையமும், 'மின்வாக்ஸ்' என்ற உயிரிதொழில்நுட்ப நிறுவனமும் இணைந்து புதிய தடுப்பூசியை தயாரிக்கும் முயற்சியில் ஈடுபட்டுள்ளன.இந்த தடுப்பூசியை, 37 டிகிரி செல்ஷியஸ் வெப்பநிலையில், நான்கு வாரங்கள் வரையிலும், 100 டிகிரி செல்ஷியஸ் வெப்பநிலையில், 90 நிமிடங்கள் வரையிலும் வைத்திருக்க முடியும்.தற்போது, இந்த தடுப்பூசி எலிகளுக்கு செலுத்தப்பட்டு பரிசோதனை செய்யப்படுகிறது. இது, டெல்டா, ஒமைக்ரான் வகை உருமாறிய கொரோனாவுக்கு எதிராக மிகச் சிறந்த பலனை அளித்துள்ளதாக மின்வாக்ஸ் நிறுவனம் கூறியுள்ளது.

---------------------------------------------------------------------------------------------------------------------------------------------------------------------------

ஸ்ரீநகர்: இந்திய ராணுவ அதிகாரி லெப்டினன்ட் ஜெனரல் டிபி பாண்டே ரம்ஜான் மாதத்தில் மத வேறுபாடுகளின்றி தனது படைப்பிரிவினருடன் தொழுகை நடத்தினார். அப்புகைப்படம் சமூக வலைத்தளத்தில் அதிகம் பேரால் பகிரப்பட்டது.

நாடு முழுவதும் முஸ்லிம்கள் ரம்ஜான் மாதத்தை கடைப்பிடிக்கின்றனர். இந்நிலையில் ராணுவத்தினர் மதநல்லிணக்கத்தை போற்றும் வகையில் மத வேறுபாடுடின்றி தொழுகை நடத்திய புகைப்படம் சமூக ஊடகங்களில் பரவி பாராட்டுக்களை பெற்றது. ராணுவத்தில் படை வீரரிலிருந்து அதிகாரிகள் நிலை வரை முஸ்லிம்கள் ஏராளமானோர் பணியாற்றுகின்றனர்.

தொழுகை நடத்திய புகைப்படத்தின் சிறப்பு என்னவெனில் அதனை ஏற்பாடு செய்தவர் 15வது படைப்பிரிவின் தளபதி லெப்டினன்ட் ஜெனரல் பாண்டே. அவருடன் சீக்கியர் ஒருவரும், மேலும் பல ஹிந்துக்களும் தொழுகையில் ஈடுபட்டனர்.  காஷ்மீரில் மத மோதல்கள் அதிகம். அங்கு ராணுவம் அனைவருக்குமானது என்பதை வெளிப்படுத்தும் நோக்கில் இதனை செய்துள்ளனர். இதனை பலரும் வரவேற்று கருத்துக்கள் பதிவிட்டனர்.

“மதத்தின் பெயரால் பிளவை உருவாக்க முயற்சிக்கும் கூறுகளுக்கு மதநல்லிணக்க செய்தி இது. இது தான் நமது இந்தியா. அதை எண்ணி பெருமை கொள்வோம்.” என ஒருவர் குறிப்பிட்டுள்ளார். மற்றொரு நபர், ”இந்திய இராணுவத்தில் உள்ள மதச்சார்பற்ற மரபிற்கு சல்யூட்.” என கூறினார்.

==================================================================================================

நான் படிச்ச புத்தகம்

ஜீவி 

பிரபஞ்சம் என்பது நாம் சர்வ சாதாரணமாக அடிக்கடி உபயோகப்படுத்தும் வார்த்தை தான்.

 

வானவெளியில் சஞ்சரிக்கிற கோடிக்கணக்கான நட்சத்திரங்களும் கிரகங்களும் உள்ளடங்கியது தான் இந்தப் பிரபஞ்சம். சூரியன் ஒரு மிகச் சிறிய நட்சத்திரம். சூரியனைச் சுற்றி வருகின்ற கிரகங்கள், அந்த கிரங்களில் ஒன்றான  கடுகு போன்ற பூமி --  இதெல்லாம் கூட நமக்குத் தெரிந்தவை தான்.

நாம் கூட இந்தப் பிரபஞ்ச இயக்கத்தின் அங்கம் தான் என்று சொன்னால் லேசான சுவாரஸ்யம் சிலருக்கு தட்டுப்படலாம்.  இந்தப் புத்தகத்தைத் தொடர்ந்து வாசிப்பதற்கு குறைபட்ச தகுதி இது தான்.  அந்தத் தகுதி உங்களில் நிச்சயம் ஆனவர்கள் மட்டும் மேற்கொண்டு அது தொடர்பாகத் தெரிந்து கொள்வதற்காக வாசியுங்கள். வாசித்ததின் அடிப்படையில்  உங்களவில் புதிதாக உணர்ந்த உள்ளுணர்வுகளை மற்றவர்களிடமும் பகிர்ந்து சந்தோஷப்படுங்கள். 

பூமி தன்னைத் தானே சுற்றிக் கொண்டு சூரியனையும் சுற்றி வருகிறது என்பது நமது ஆறாவது வகுப்பில் படித்த பாடம்.  வானவெளி எங்கும் நட்சத்திரங்களும், கிரகங்களும் தங்கள் வழியில் முறையாக பயணித்துக் கொண்டு தான் இருக்கின்றன. பிரபஞ்சம் முழுவதையும் ஒரு காந்தசக்தி இயங்கி, இந்த ஒழுங்கு முறையை ஒரு கட்டுப்பாட்டிற்குள் வைத்திருக்கிறது. பிரபஞ்சத்தின் அங்கமான மனிதனுள்ளும் ஒரு ஒப்பற்ற காந்தசக்தி பொதிந்துள்ளது என்றும் அதை எப்படி உபயோகமாக பயன்படுத்திக் கொள்வது என்பதை உயிரோட்டமாக விவரிப்பதே இந்த நூலின் உள்ளடக்கம்.   

இதயத்தின் அயர்வில்லாத தொடர்ச்சியான இயக்கம் ஒரு ஆச்சரியம் என்றால் நரம்பு மண்டலத்தின் செயல்பாடுகள், அதனை இயக்கும் மூளையில் உருவாகும் மின் தூண்டல்கள் இன்னொரு பிரமிப்பு.

பிரபஞ்ச காந்த மண்டலத்தோடு நம் மூளையும் இணைக்கப் பட்டிருப்பது தான் அடிப்படையான உயிர் சக்தியின் செயல்பாடுகளின் ஆதார விஷயம்.  நம் உயிர் இயக்கமே ஒப்பற்ற சக்தியை உள்ளடக்கிய காந்த இயக்கம் தான்.  இதயத் துடிப்பு, இரத்த ஓட்டம் போன்றவை ஒரு வகையான காந்த இயக்கத்தால் தான் செயல்பட்டுக் கொண்டிருக்கின்றன. நரம்பு மண்டலமே ஒரு காந்தப் பிரதேசமாக உடலெங்கும் வியாபித்திருக்கிறது. நம்மில் பிரபஞ்ச  சக்தியின் வெளிப்பாடு தான் இது. சொல்லப் போனால் உடலின் செயல்பாடே காந்த அதிர்வுகளால் தான் நடைபெறுவதாகக் கருதலாம்.

இரண்டு விஷயங்கள். ஒன்று : நம் உடலமைப்பில் இயற்கையாகவே அமைந்துள்ள காந்த சக்தி..  மற்றொன்று : நம்மைச் சுற்றிலும் உள்ள பிரபஞ்சத்தில் செயல்பட்டுக் கொண்டிருக்கிற காந்த சக்தி.  இந்த இரண்டும் ஒன்றுக்கொன்று தொடர்பு கொண்டிருப்பது தான் நம் இயக்கத்தின் ஆதார சக்தி.

பேரா சைகாலஜி (Para - Psychology) பற்றித் தெரிந்தவர்களுக்குத் தெரியும். உலகத்திலுள்ள அத்தனையும் ஒன்றோடு ஒன்று இணைக்கப்பட்டிருக்கின்றன. உயிர்ப் பொருட்களும் சரி, ஜடப்பொருட்களும் சரி இந்த இணைப்பில் அடக்கம். இந்த இணைப்பு மின் காந்த அலைகளால் ஏற்படுகிறது. ஒரு அகண்ட காந்த வெளியில் குட்டியூண்டு உயிர் சுமந்த பிறவிகளாய் மிதந்து கொண்டிருக்கிறோம்.

பிரபஞ்ச சக்தியை நம்மில் உள்ளடக்கமாகக் கொண்ட காந்தம் நாம் என்பதோடு பிரபஞ்சம் என்கிற காந்தவெளியோடு நாம் இணைக்கப் பட்டிருக்கிறோம் என்பதை மறந்து விடக்கூடாது. 

பிரபஞ்ச காந்த வெளியில் மகத்தான சக்தியும் நமக்குத் தேவையான சிந்தனைகளுக்கு உந்து சக்தி கொடுக்கக் கூடிய ஆற்றலும் (Energy) நிரம்பிக் கிடக்கின்றன.   எது நடக்க வேண்டும் என்று நாம் உறுதியாக எண்ணுகிறோமோ, அது தொடர்பான எண்ண அலைகள் பிரபஞ்ச காந்த சக்தியோடு இணைப்பு கொண்டு விடுகின்றன. இதன் விளைவாக நாம் விரும்புகிற காந்தச் சூழ்நிலை நம்மைச் சுற்றி உருவாகி விடுகிறது. 

எவரெடி செல்லை நினைவில் கொள்ளுங்கள். பாட்டரி செல்லில் அடைக்கப் பட்டுள்ள ரசாயனப் பொருள்களின் மாற்றம் மின்சார சக்தியாக வெளிப்படுவது போலத் தான் இதுவும்.  மூளையில் உள்ள செல்களில் ஏற்படுகிற ரசாயன மாற்றம், எண்ணங்கள் என்ற காந்த அலைகளாக வெளிப்படுகின்றன. மூளையை தலைமை பீடமாகக் கொண்டுள்ள நரம்பு மண்டலம் அனுப்புகிற தகவல்கள் பூராவும் மின் உந்துதலாகவே வெளிப்படுகின்றன. ஆக நம்மில் உருவாகும் எண்ணங்கள் காந்த அதிர்வுகளாகின்றன. நம்முடைய எண்ணங்க்ளுக்கு நம்பிக்கை என்னும் கவசம் கிடைத்து வலுப்பெறும் போது காந்தசக்தியும் மிகுதியாகி பிரபஞ்ச காந்த வெளியில் அதற்கான அதிர்வுகள் ஏற்படுகின்றன. இது தான் எண்ணியர் திண்ணியராகப் பெறின் எண்ணியது நம் கைவசப்படும் சூத்திரம்.

தகுந்த பயிற்சியில்லாமல் எந்தச் செயல்பாடின் வெற்றியும் இல்லை. நம்மிடம் காந்த சக்தி இருக்கிறது. அந்த காந்த சக்தியை உபயோகப்படுத்தி பிரபஞ்ச காந்த சக்தியில் நமக்கு சாதகமான அதிர்வுகளை நேர்மறைச் சிந்தனைகள் உதவியுடன் நம்மால் ஏற்படுத்த முடியும். எண்ணங்கள் மூலமாகத் தான் நம்முடைய காந்தசக்தியை நாம் பயன்படுத்துகிறோம். நம்முடைய எண்ணங்கள் வலுவுள்ளதாகவும் ஆக்கபூர்வமாகவும் அமைகின்ற பொழுது நம் செயல் வெற்றிக்கான சாதக சூழ்நிலை உருவாகிறது.  இது தான் தாத்பரியமே.

எதிர்மறை எண்ணங்களைப் பற்றி ஒன்று சொல்ல வேண்டும். எதிர்மறை எண்ணங்கள் ஒரு பக்கம் ஆக்கபூர்வ எண்ணங்கள் தோன்றாமல் சமன்படுத்தி விடுவதோடு இன்னொரு பக்கம் நம்மைச் சுற்றி நாமே எதிர்மறை காந்த அலைகள் உருவாக வழிகோலுகின்றன.

ஆழ்மனத்தில் எதிர்மறை எண்ணங்கள் படிந்து விடுவதால் ஆக்கபூர்வ சிந்தனை தடைபட்டுப் போய்விடுகிறது என்பது மனவியல் நிபுணர்களின் கருத்து. ஆழ்மனப் பதிவுகள்,  நினைவு மனத்தின் கவனத்திற்கு வருவதில்லை என்பதினால் ஹிப்னாடிச உறக்கத்தின் மூலமாகத் தான் தகுந்த சஜஷன் மூலம் அந்த எதிர்மறைப் பதிவுகளை அப்புறப்படுத்த முடியும் என்கிறார்கள்.

நம்மில் படிந்திருக்கும் காந்த அலைகளைத் தவிர நம்மைத் தாக்கும் காந்த அலைகளும் உண்டு. நம் காந்த சக்கியை நம் மனோசக்தியாக உருவெடுக்கச் செய்யும் வழிமுறைகளும் உண்டு.

நம் எண்ணங்கள் தான் நம் உடல் தோற்றத்திற்கான வடிவமைப்பையும் கொடுக்கிறது போன்ற தகவல்களை நூலாசிரியர் விவரிப்பதை வாசிக்க வாசிக்க வியப்பு தான் விஞ்சுகிறது.

விருப்பமுள்ளவர்கள் முழு நூலையும் வாசித்துப் பலனடையலாம்.

எனக்கென்னவோ தொன்ம காலத்து முனிவர்கள் பிரபஞ்ச காந்த சக்தியை தம்மில் அடக்கிக் கொள்ள மேற்கொண்ட முயற்சிகளைத் தாம் தவமியற்றினார்கள் என்று நாம் சொல்வதாக எண்ணம். 

நூல் விவரம்:

உங்கள் காந்த சக்தியை பயன்படுத்துவது எப்படி?

ஆசிரியர்:  J.S. ஏப்ரகாம்

நர்மதா பதிப்பகம்

16/7,  ராஜாபாதர் தெரு,

பாண்டிபஜார்,  

சென்னை -- 17