நான் தரிசனம் செய்த கோவில்கள் :: நெல்லைத்தமிழன்

(006) கும்பகோணம் – இராமஸ்வாமி கோவில் – பகுதி 1

எங்கள் பிளாக் ஆசிரியர் குழுவுக்கும் எங்கள் பிளாக் வாசகர்களுக்கும் இனிய தீபாவளி நல்வாழ்த்துகள். 

சென்ற ஞாயிறு பதிவின் தொடர்ச்சிதான் இன்றும் வந்திருக்கவேண்டும். ஆனால், தீபாவளி என்பதால் 'கோவில் பதிவு ஒன்று வெளியிடலாமா' என்று கௌதமன் அவர்களைக் கேட்டுக்கொண்டேன். சரி, அனுப்புங்கள் என்று சொன்னதால் இந்தப் பதிவை அனுப்புகிறேன்.  இந்த நாளில், இறைவன் நம் எல்லோருக்கும் அருள் புரிவானாகுக.

கும்பகோணத்தில் இருக்கும் புகழ்பெற்ற கோவில் இராமஸ்வாமி கோவில். இதைத் தென்னக அயோத்தி என்று அழைக்கின்றனர்.  கும்பகோணத்தில், வைணவர்களுக்கான கோவில்களில் முக்கியமானது ஆதி வராஹர் கோவில், சார்ங்கபாணி கோவில் (ஆராவமுதன் கோவில்), சக்ரபாணி கோவில், இராமஸ்வாமி கோவில் மற்றும் திருமழிசையாழ்வார் திருவரசு. இது தவிர, பெரிய கடைவீதியில், ஆஞ்சநேயர் கோவில், தசாவதார கோவில், ராஜகோபாலஸ்வாமி கோவில் என்று நிறைய இருக்கிறது.

இது தவிர, சைவர்களுக்கான கோவில்கள் ஏராளமாக இருக்கிறது. நான் இங்குக் குறிப்பிடுவது, கும்பகோணம் நகரம் மட்டும்தான். சுற்றுவட்டாரத்தில் ஏகப்பட்ட கோவில்கள், வைணவ திவ்யதேசங்கள், வரலாற்றுச் சிறப்பு மிக்க இடங்கள், அரசியல்வாதிகள் சென்று பிரபலப்படுத்திய இடங்கள் என்று நிறைய இருக்கின்றன. “நான் சென்ற கோவில்கள்” என்ற தலைப்பில் எழுத ஆரம்பித்த எனக்கு, நிறைய கோவில்களில் ‘சிற்பங்கள்’ குறிப்பிடும்படியாக இல்லை, கோவில் மூர்த்தங்கள் மற்றும் சன்னிதிகள்தாம் இருக்கின்றன என்பதை நான் எடுத்த புகைப்படங்கள் நினைவுபடுத்தும். எனக்கோ, கோவில் தலவரலாறு, பாடல் பெற்ற தலமாக இருந்தால் அதற்குரிய ஓர் பாசுரம் என்று எழுதுவதற்கு ஆசைதான், ஆனால் அதற்கான தளம் இதுவல்ல. மற்றும் ஆன்மீகத் தலங்களின் புராணக் கதைகளிலும் எனக்கு அதிக ஆர்வம் இல்லை. இதற்கான காரணம் என்னவாக இருக்கும்?

கொஞ்சம் யோசித்துப் பார்த்தால், தஞ்சைப் பெரிய கோயிலில் நடக்கும்போது, சிற்பங்களைப் புகைப்படம் எடுக்கும்போது, கல்வெட்டுகளைப் பார்க்கும்போது, சிலர் சொல்லும் செய்திகளைக் கேட்கும்போது, இந்த இடத்தில்தான் ராஜராஜசோழன் நடந்து நிர்வாகம் செய்திருக்கிறான், இங்கு கருவூர்த்தேவர் மற்றும் வரலாற்றுப் பாத்திரங்கள் உயிருடன் நடமாடிய இடம் என்ற எண்ணம் வந்து சிலிர்க்கும். அதே நேரத்தில், இங்குதான் மது கைடபர்கள் தவம் புரிந்தார்கள், இந்தக் கோவிலில் நாராயணனை அர்ஜுனன் பிரதிட்டை செய்தான் என்றெல்லாம் படிக்கும்போதோ கேட்கும்போதோ கொஞ்சம் ஒன்ற இயலவில்லை. இது வெறும் நம்பிக்கை சார்ந்தது மட்டுமல்ல. நம் தாத்தா பாட்டி என்னும்போது நமக்கு இருக்கும் நெருக்கம், பூட்டன்/பூட்டி அவர்கள் சம்பந்தமான கதைகள் போன்றவற்றில், நெருக்கம் இருக்காது. அதுவும், இன்னும் முந்தைக்கும் முந்தைய தலைமுறை என்றால், மனதளவில் உணர்வு பூர்வமான நெருக்கம் இருக்காது. அதனால் பல்லாயிரம் ஆண்டுகளுக்கு முந்தைய நிகழ்வு எனும்போது நம் நம்பிக்கையும் குறைகிறது என்றே எண்ணத் தோன்றுகிறது.

நான் என் சிறுவயதில் பார்த்தது, நான் வாழ்ந்த விதம், அப்போதைய காலகட்டம் போன்றவற்றையே எனக்கு அடுத்த தலைமுறையால் கற்பனை செய்ய முடியவில்லை. அதற்கும் இரண்டு தலைமுறைக்கு முன்பாக எப்படி என் பூர்வீக கிராமத்தில் வாழ்ந்தார்கள் என்பதை என்னால் கற்பனை செய்யமுடியவில்லை. காலம் பின்னோக்கிப் பின்னோக்கிச் செல்ல, நம் நம்பிக்கையின், நெருக்கத்தின் அளவும் குறைகிறது என்றே நினைக்கிறேன்.

இன்றைய பதிவிலும் அதைத் தொடர்ந்த அடுத்த பதிவிலும் இராமஸ்வாமி கோவிலின் சிற்பங்கள் படங்கள்தாம். ஒவ்வொரு சிற்பமும் தூண்களில் செதுக்கப்பட்ட புடைப்புச் சிற்பம். செதுக்கும்போது இவற்றில் சிறிது தவறு செய்திருந்தாலும் தூணின் முழு அழகும் கெட்டுவிடும்.

இந்தக் கோவில் 16ம் நூற்றாண்டில், தஞ்சை அச்சுத நாயக்கரால் கட்டப்பட்ட து. (தஞ்சை அரசராக இவர் 1614லிலிருந்து 26 வருடங்கள் இருந்தார்). அச்சுத நாயக்கர் ராம பக்தர். தாராசுரத்தில் ஒரு திருக்குளத்தைத் தோண்டும்போது கிடைத்த இராமர், சீதை விக்ரஹங்களை வைத்து இராமருக்கு இந்தக் கோவில் கட்டினார். கோவில் கட்டுமானத்தை மேற்பார்வையிட்டவர், அவருடைய முதலமைச்சரான கோவிந்த தீக்ஷிதர். அவர்தான், இந்தக் கோவிலுக்கும் சக்ரபாணி கோவிலுக்கும் இடையில் பெரிய கடைவீதியை நிர்மாணித்தவர்.

கர்பக்ரஹத்தில், ராமர், சீதை இருவரும் அமர்ந்த நிலையில் காட்சி தருகின்றனர் (கல்யாண திருக்கோலம்). அவர்களுடன், சத்ருக் ன ன், குடை பிடித்த நிலையில் பரதன் மற்றும் லக்ஷ்மணன் காட்சி தருகின்றனர். ஆஞ்சநேயர் அமர்ந்த நிலையில், வீணை வாசிக்கும் நிலையில் காட்சி தருகிறார். அவர் இராம கதையை வாசிப்பதாக தரிசனம் தருகிறார். 

இராமஸ்வாமி கோவிலின் மீதி சிற்பங்களை அடுத்த வாரம் பார்ப்போம்.

 = = = =

கீழே உள்ளது தஞ்சை அரண்மனையில் உள்ள அருங்காட்சியகத்தில் இருந்த நடராஜர் பஞ்சலோகச் சிலைகள். 

உலோகத்தில் சிலைகள் செய்யும் திறன் தமிழகத்தில் பலப் பல நூற்றாண்டுகளாக வளர்ச்சி பெற்றுவந்துள்ளது என்பதற்கு ஆதாரமானவை. அவற்றையும் இத்திருநாளில் கண்டுகளிப்போம். 

ஆறு நடராஜர் சிலைகளை (அந்த அருங்காட்சியகத்தில் இருந்த பல சிலைகளில் சில) கீழே காணலாம். ஒவ்வொன்றும் ஒவ்வொருவிதம். அதிலும் தாழ்சடையானைச் சடையில்லாமல் செய்த சிற்பமும், முக்கால் சந்திர வட்டப் பிரபையில் செய்திருந்த திருக்கோலமும் என்னை மிகவும் கவர்ந்தன.

இந்த நாள் நம் அனைவருக்கும் இனிய நாளாக அமையட்டும்.

(அடுத்த வாரம் : கும்பகோணம் இராமஸ்வாமி கோவில் - பகுதி இரண்டு.) 

= = = =  =