'திங்க'க் கிழமை – தீபாவளி ஸ்பெஷல் ஹார்லிக்ஸ் மைசூர்பாக் – நெல்லைத்தமிழன் ரெஸிபி

 

என்னடா இது… இந்த ஸ்வீட் எப்போதும் செய்வதுதானே, இதில் என்ன ஸ்பெஷல் இருக்கிறது என்று நினைக்கவேண்டாம்.  புத்தாண்டில், எங்கள் பிளாக்கில் இனிப்பு செய்முறை பகிரவில்லை. தீபாவளிக்கும் அப்படி ஆகிவிடக்கூடாதே என்றுதான் ஸ்ரீராமிடம், இந்தத் திங்கட் கிழமைக்கு இனிப்பு செய்முறையா என்று கேட்டேன். இல்லையென்றால் நான் கடைசி நிமிட த்தில் அனுப்பினால் வெளியிடமுடியுமா என்று கேட்டேன்.  ஸ்ரீராம் யோசித்துவிட்டுப் பிறகு சரி என்று சொன்னார். அதனால் இன்று உட்கார்ந்து தட்டச்சு செய்து அனுப்புகிறேன்.

அது சரி… விழாக்காலம், விசேஷ நாள் என்றால் இனிப்புதான் வெளியிடவேண்டுமா, மசால் வடை போன்ற கார வகைகள் கூடாதா? என்று கேட்டால், எல்லோரும் ‘இனிய தீபாவளி நல்வாழ்த்துகள்’ என்றுதானே சொல்கிறார்கள். அதனால் இனிப்புப் பதிவுதான் சரியாக இருக்கும் என்பது என் எண்ணம்.

நான் ரோஸ் மைதா இனிப்பு செய்தேன். அது மைசூர்பாக் போன்று அழகாக துண்டம் துண்டமாக வந்திருக்கவேண்டும். ஆனால் கொஞ்சம் அல்வா பதத்திற்கு வந்துவிட்டது. அதாவது துண்டமாக வந்தது ஆனால் வாயிலிட்டால் கெட்டியான அல்வா போன்று வந்தது. எல்லோருக்கும் பிடித்திருந்தது. ஆனால் நல்ல துண்டங்களாக வந்திருந்தால் மிக நன்றாக இருந்திருக்கும்.  

என் பெண், நேற்று ஹார்லிக்ஸ் மைசூர்பாக் செய்தாள். அது ரொம்ப நன்றாக வந்திருந்தது. இன்று காலையில் சோன்பப்டி செய்தாள். நாங்கள் வெளியில் சென்றுவிட்டு வந்தபோது, அதன் சிறு துண்டைத் தந்தாள். நன்றாக வந்திருந்தது, ஆனால் துண்டம் துண்டமாக வரவில்லை. தனியாக அதனை நன்றாக இழுக்கமுடியவில்லை என்றாள்.  

என் மாமனார், வெளியில் எங்குமே சாப்பிட மாட்டார். என்னிடம் (எங்களிடம்) சோன்ப ப்டி சாப்பிடவேண்டும் என்று நிறைய தடவை சொன்னார். அப்போதெல்லாம் நான் செய்ய முயற்சிக்கவில்லை. இன்று அவள் செய்திருந்தைச் சாப்பிட்டபோது எனக்கு அவர் நினைவுதான் வந்தது. என் மனைவி, ஒக்கோரை எனப்படும் இனிப்பு செய்தாள்.  இன்று எதைப் பகிர்வது என்று யோசித்து, என் பெண் செய்திருந்த ஹார்லிக்ஸ் மைசூர்பாக் மிக அருமையாக வந்திருந்ததால், அதனையே பகிர்கிறேன். மற்றவை மெதுவாக வெளிவரும்.

சில நாட்கள் முன்பு, என் பெண், மினி பிட்சா செய்தாள். அது பார்க்க மிக அழகாகவும் ருசியாகவும் இருந்தது.  அதனை ஒரு நாள் பகிர்கிறேன். அவள் அவனில், நிறைய bake செய்வாள். (வெண்ணெய் போன்றவற்றைச் சேர்ப்பதில் எந்தக் குறையும் வைக்கமாட்டாள். அப்படீன்னாக்க, என் ஹெல்த்துக்கு அவை டேஞ்சர் என்ற எண்ணம் எனக்கு உண்டு). அவள் செய்த தேங்காய் பன் மிக மிக ருசியாக இருந்தது. அவளிடம் படங்கள் வாங்கி (ஆரம்பத்திலிருந்து படங்கள் எடுத்திருப்பாளா என்பது சந்தேகம்தான்), அவற்றையும் பிறகு பகிரலாம் என்று நினைத்திருக்கிறேன்.

என் பெண்ணுக்கு என்னிடம் ஒரு மிகப் பெரிய குறை உண்டு. நான் அவளை, அவள் திறமைகளைப் போதுமான அளவு அப்ரிஷியேட் செய்வதில்லை என்று. எந்த goalஐ அவள் அடைந்தாலும், ‘அது என்னாச்சு’ என்று இன்னொன்றைப் பற்றியே நான் பேசுகிறேன் என்று அவளுக்குக் குறை.  ஒரு நாள், கண்ணில் நீர்த்துளிகளோடு என்னிடம் இதைப்பற்றிச் சொன்னாள். நான் சொன்னேன்..' I may be wrong, ஆனால் இதைத்தான் நான் என் அப்பாவிடம் கற்றுக்கொண்டிருக்கிறேன். நம் குழந்தைகளை நாம் எப்போதும் பாராட்டி, சிலாகித்துப் பேசக்கூடாது என்று. நம் achievementனால நமக்குப் பெருமிதம் அளவுக்கு அதிகமாக வந்துவிடக்கூடாது என்பதற்காகவே, உன்  திறமைகளைக் கண்டு, ரொம்ப simpleஆக, அது என் ஜீன், என் அம்மாவின் ஜீன் என்றெல்லாம் சொல்லிவிடுவேன். அதை என்னால் மாற்றிக்கொள்ள முடியாது. ஆனால் நீ ரொம்பத் திறமைசாலி, am proud of you all the time, ஆனால் அதனைக் காட்டிக்கொள்ள மாட்டேன்' என்று சொல்லிவிட்டேன்.  

அவள் வரைந்து தந்த கிருஷ்ணன் படம்தான், என்னுடைய deity. அதாவது தினமும் விஷ்ணு சஹஸ்ரநாம ம் சொல்லி முடிக்கும்போது, அந்த உருவம்தான் என் மனதிலிறுத்துவேன்.

நெய் ஹார்லிக்ஸ் மைசூர்பாக் செய்முறை

தேவையானவை

கடலை மாவு 100 கிராம்

ஹார்லிக்ஸ் பவுடர் 45 கிராம்

ஜீனி/சர்க்கரை 250 கிராம்

நெய் 200 கிராம்

 செய்முறை

ஒரு தட்டில் நெய் தடவி (அல்லது பட்டர் பேப்பர் விரித்து) தயாராக வைத்துக் கொள்ளவும்.

கடலைமாவை, ஒரு கடாயில் சிவப்பாகாமல் வறுத்துக்கொள்ளவும். இது அதன் பச்சை வாசனை போவதற்கு.

இதனுடன், ஹார்லிக்ஸ் பவுடர், நெய் கலந்து நன்றாகக் கலக்கிவைத்துக்கொள்ளவும்.

அடுப்பின் ஒரு கடாயில், ஜீனி, அத்துடன் அதே அளவு தண்ணீர் சேர்த்துக் கொதிக்கவைக்கவும். ஓரிழை பதத்திற்கு வந்ததும் கடலைமாவு/நெய்/ஹார்லிக்ஸ் கலவையைக் கொட்டிக் கிளறவும்.

தணலை மெதுவாக எரியவிட்டு, கிளறவும். சிறிது நேரத்தில், கடாயின் பக்கவாட்டில் ஒட்டாமல் வரும்.

உடனே இதனை, நெய் தடவிய தட்டில் கொட்டவும். சிறிது ஆறியபிறகு கத்தியால் துண்டுகளாகக் கட் செய்யவும்.

சிறிது நேரம் கழித்து, துண்டுகளைத் தனித்தனியாக எடுக்க முடியும். நெய் ஹார்லிக்ஸ் மைசூர்பாக் தயார்.

அவள் செய்த உடனேயே அவள் பாட்டியின் வீட்டுக்குச் (அடுத்த பில்டிங்தான்) சென்று, அதையும், நான் செய்த ரோஸ் மைதா ஸ்வீட்டையும் கொடுத்துவிட்டு வந்தாள். பக்கத்திலிருக்கும் என் மனைவியின் அக்கா வீட்டிற்கும் சென்று அங்கும் கொடுத்துவிட்டு வந்தாள். அவள் இனிப்பு, கேக் வகைகள் நன்றாகச் செய்வதில் எனக்குப் பெருமிதம்தான்.

ஹார்லிக்ஸ் மைசூர்பாக் இதுவரை செய்துபார்த்ததில்லை என்றால், கண்டிப்பாகச் செய்துபாருங்கள். நன்றாகவே இருக்கும்.

இந்த நாள் உங்கள் அனைவருக்கும் இனிய நாளாக அமையட்டும். அனைவருக்கும் தீபாவளி நல் வாழ்த்துகள்.

= = = = = =

= = = = = = = = =