நான் தரிசனம் செய்த கோவில்கள் :: நெல்லைத்தமிழன்

 

(006) கும்பகோணம் – இராமஸ்வாமி கோவில் – பகுதி 2

நாங்கள் (அல்லது நான்) கும்பகோணம் செல்லும்போது பெரும்பாலும் ஆண்டவன் ஆஸ்ரமத்தில் தங்குவோம். அங்கு இடம் கிடைக்காதபோது தனியார் விடுதிகளில் தங்குவோம். குறைந்தபட்சம் இரண்டு நாட்களாவது அங்கு தங்கி, கும்பகோணம் மற்றும் சுற்றுவட்டாரக் கோவில்களில் தரிசனம் செய்வோம்.

நடந்துசெல்லும் தூரத்திலேயே நிறைய கோவில்கள் உண்டு. அதிலும் இராமஸ்வாமி கோவிலுக்கோ (பெரியகடை வீதியின் ஒரு முனையில்) அல்லது சக்ரபாணி கோவிலுக்கோ (அது இன்னொரு முனை) சென்றுவிட்டு, கடைவீதி வழியாக மெதுவாக கடைகளையும், இடையில் வரும் கோவில்களிலும் தரிசனம் செய்துகொண்டு, இன்னொரு முனைக்கு வருவோம்.

கடைகளில் விற்பவைகளோ அல்லது வீதிகளில் விற்கும் பழங்கள் போன்றவையோ விலை மலிவுதான். அதுவும்தவிர, ஈயச் சொம்பு, பித்தளைப் பொருட்கள், விளக்குகள் போன்றவை வாங்கச் சிறந்த கடைகள் அங்கு உண்டு.

எனக்கு, கும்பகோணத்தில் வாழ்ந்து, அதைச் சுற்றியுள்ள கோவில்களுக்கு நிறைய முறை சென்று தரிசனம் செய்யணும், அந்த ஊர்ச் சூழ்நிலையில் வாழ்வது, சிறிது மேம்பட்ட கிராம வாழ்க்கையாக, ஆன்மீகத்துக்கு நெருக்கமான வாழ்க்கையாக இருக்கும் என்று எண்ணம். நம் நண்பர்கள் முனைவர் ஜம்புலிங்கம் சார், ஆன்மீகச் செல்வர் துரை செல்வராஜு சார், கரந்தை ஜெயக்குமார் சார் எல்லோரும் அந்தப் பகுதியைச் சேர்ந்தவர்கள்தாமே. (கொடுத்துவைத்தவர்கள் என்று மனதுக்குத் தோன்றும். ஆனால் அவர்களால் கோவில்கள், வரலாற்று முக்கியத்துவமுள்ள இடங்கள் என்று தொடர்ந்து போய்வர முடிகிறதா இல்லை வீடு அவர்களைக் கட்டிப்போட்டுள்ளதா என்று தெரியவில்லை).  நாம் விரும்பும் ஊரில், வீடு வாங்குவதைவிட, சில வருடங்களுக்குப் பிறகு, அந்த ஊரில் வாடகைக்கு வீடு எடுத்துச் சில மாதங்கள் தங்கியிருக்கலாம் என்று நினைத்திருக்கிறோம். அதன் பிறகு ஸ்ரீரங்கத்தில் அது போல…. அது சரி.. நினைப்பதெல்லாம் நடந்துவிட்டால் தெய்வம் ஏதுமில்லை என்று கவிஞன் சொல்லியிருக்கானே… பார்க்கலாம்.

கோவிலைத் தொடர்ந்து சிந்தனை சொந்த வாழ்க்கை, விருப்பம் பக்கம் திரும்பிவிட்டதே!  சரி சரி.. இன்னொரு பதிவில் மீண்டும் சந்திப்போம். அது சரி… கும்பகோணம் பக்கம் சென்றுவிட்டு, அதுவும் பொன்னியின் செல்வன் படத்தைத் தொடர்ந்து சோழர்கள் வரலாறு, ராஜராஜ சோழன் என்று அதகளப்பட்டுக் கொண்டிருக்கும் இந்த நேரத்தில் தஞ்சை பெருவுடையார் கோவில் படங்கள் கிடையாதா என்பவர்களுக்கு…. அவையும் வரும். அதற்கு முன்னோட்டமாக இதோ சில படங்கள்.

மீண்டும் சந்திப்போம்.

 = = = = = = =