"காம்பா.. நீயா?"

 பரபரப்பின்றி அமைதியாகக் காணப்பட்டது

நைரோபி நேஷனல் பார்க். வாசல் கதவு திறந்திருந்தாலும் காவலுக்கென்று எல்லாம் பெரிய அளவில் கவலைப்பட்டு நிற்க ஆளில்லை போலும்.  யார் வேண்டுமானாலும் உள்ளே வரலாம் என்கிற மறைமுக செய்தி தாங்கி காணப்பட்டது அதன் வாசல்.

கொஞ்ச நேரத்தில் சிறிய சலசலப்பு.  கொஞ்ச தூரத்தில் மரங்களுக்கிடையிலிருந்து தோன்றியது ஒரு யானை.  அதைத் தொடர்ந்து வேறு சில யானைகளும் வர, அமைதியாக வந்த அவை காப்பக வாசலருகே வந்ததும் நின்று விட்டன.

முதலில் இது ஒரு விஷயமாக படவில்லை அங்கிருந்த ஆட்களுக்கு.  நேரம் செல்லச் செல்ல அவை அசையாமல் எதற்கோ காத்திருப்பது போல நின்றிருக்க, ஓரிருவராக கூடத் தொடங்கினார்கள்.

செய்தி மெல்லப் பரவியது.

உள்ளே அமர்ந்திருந்த அந்த வயதான மாது டாப்னேயின் காதுகளுக்கும் சென்று அடைந்தது செய்தி.

அந்தக் காப்பகத்தில் உள்ள வனவிலங்குகளைக் காண வந்திருந்தார் அவர்.  விலங்குகள் மேல் நிறைய பாசம் கொண்டவர்.  அவைகளுக்கு ஏதாவது நல்லது செய்ய வேண்டும் என்ற எண்ணம் கொண்டவர்.

சிறு வயதிலிருந்தே இந்த எண்ணம் மனதில் தலைதூக்கி இருந்ததால் தனக்கு கிடைத்த மருத்துவப் படிப்பைக் கூட துறந்து வனவிலங்குகள் சேவையில் ஆழ்ந்தவர் அவர்.  அங்கேயே விலங்குகளுக்கு சேவை செய்யும்  வாலிபர் ஒருவரை மணந்து, பின்னர் அவரை விவாகரத்து செய்துவிட்டு அவர் முதலாளி ஷெல்ட்ரிக்கை மணந்து  17 வருடங்கள் இருவரும் விலங்குகளுக்காக அன்புடன் சேவை செய்தனர்.  1977 ல் கணவர் மறைந்தாலும் இவரின் சேவை நிற்கவில்லை.

அனாதையாக்கப்பட்ட விலங்குகளை பராமரித்து வனத்துக்குள் விடும் சேவையை அன்புடன் செய்து வந்தார்.  குறிப்பாக யானைகள்.

அதில் ஒரு முறை வந்தொரு கைவிடப்பட்ட யானைக்கு காம்பா என்று பெயரிட்டு அன்புடன் வளர்த்து வந்தார்.  தாய் தந்தை இருவரையும் இழந்துவிட்ட அதுவும் இதுவரை பழகிய யானைகளிலேயே இவரிடம் அதிகம் அன்பு காட்டிய செல்லமாக இருந்தது.  கதைகள் எல்லாம் படித்துக் காட்டி தூங்க வைப்பார் டாப்னே.  என்ன வளர்த்தாலும், உரிய வயது வந்ததும் அதையும் வனத்துக்குள் அனுப்பிதானே ஆகவேண்டும்?  

இப்போதெல்லாம் வயதாகி விட்டதால் ஈடுபாடு இருந்தாலும் அவ்வளவு வேகமாக சேவைசெய்ய முடிவதில்லை.  பல வருடங்கள் கழிந்து விட்ட நிலையில் இங்குள்ள விலங்குகளை பார்க்க வந்திருந்தார் அவர்.

சில நாட்களாக இங்கேயே தங்கி அங்கு இருந்த விலங்குகளுடன் பழகி, பேசி பொழுதைக் கழித்து வந்தார்.

இந்த நேரத்தில்தான் வெளியில் ஒரு யானை குடும்பம் நிற்கிறது ஏனென்று தெரியவில்லை என்று ஊழியர்கள் சொல்லி அழைத்ததும் அவற்றைப் பார்க்கக் கிளம்பினார்.  அவரால் என்ன ஏது என்று உணர்ந்து சொல்ல முடியும்.

வெளியில் வந்து பார்த்தவர் யானைக் கூட்டத்தைப் பார்த்தார்.  அருகில் சென்றார்.  அதன் தலைவன் போலிருந்த பெரிய யானையைப் பார்த்தார்.  அதன் அருகில் நம்பிச் சென்றார்.

அதுவும் இவர் அருகில் வருவதைப் பார்த்ததும் மெல்ல நகர்ந்து அருகில் வந்தது.  அதன் அசைவுகளிலிருந்து அதற்கு மனிதர்கள் புதிதல்ல என்று தோன்றியது டாப்னேவுக்கு.

அதன் துதிக்கையை மெல்லத் தொட்டு தடவியவாறு இருந்தவருக்கு திடீரென ஒரு உள்ளுணர்வு தோன்ற "காம்பா..  நீயா?" என்றார் ஆச்சர்யத்துடன்.

அதுவும் இவரைத் தொட்டு, உரசியபடி அருகில் நின்றிருந்தது. ஆம், காம்பாதான்.   கொஞ்ச நேரம் கழித்து அந்தக் குடும்பம் மெல்ல மீண்டும் திரும்பி வனத்துக்குள் சென்று மறைந்தது.

இது மாதிரி எத்தனை சம்பவங்கள்...

சமீபத்தில் தமிழகத்தில் தயாரான எலிபன்ட் விஸ்பரர்ஸ் குறும்படத்துக்கு ஆஸ்கார் விருது கிடைத்ததை படித்திருப்பீர்கள்.  அதற்கு முன்பே ஒரு எலிபன்ட் விஸ்பரர் பிரபலம்.  கூகிளிட்டு பார்த்தால் தெரியும்.  லாரன்ஸ் ஆண்டனி.  படிக்காதவர்கள் இவரைப்பற்றி கூகுள் செய்து கட்டாயம் படித்துப் பாருங்கள்.

அவர் மரணமடைந்த நாளில் எங்கிருந்து வந்ததென தெரியாமல் ஒரு யானைக்கூட்டம் பல கிலோமீட்டருக்கு அப்பாலிருந்து ஒழுங்கான வரிசை முறையில் வந்து அவருக்கு அஞ்சலி செலுத்தி விட்டுப் போன செய்தியும் அறிந்திருப்பீர்கள்.  ஜெமோ கூட இதை வைத்துதான் 'யானை டாக்டர்' எழுதினார்.

தன்னை வளர்த்த தாய் இங்கு வந்திருக்கிறார் என்பதை பல கிலோமீட்டர்களுக்கு அப்பால் இருந்த காம்பா எப்படி அறிந்தது?  குடும்பத்துடன் வந்து பார்த்து மரியாதை செய்து விட்டு போகவேண்டும் என்று எப்படி யானைகளுக்கு தோன்றுகிறது?  பார்க்காமல் இருந்திருந்தால் டாப்னே கோபித்துக் கொள்ளப்போகிறாரா, வருத்தப்படப் போகிறாரா?  காம்பா இருக்கும் இடம் கூட டாப்னேவுக்கு தெரியாது.  கிட்டத்தட்ட அதை மறந்தே விட்டிருந்தார். 

கள்ளக்காதலுக்காகவும், பணத்துக்காகவும் தாயை, தந்தையை, கணவனை, மனைவியை கொடூரமாகக் கொலை செய்யும் ஆறறிவு படைத்த மனிதர்கள் நடுவே ஐந்தறிவு என்று சொல்லப்படும் விலங்குகளின் குணங்கள் ஆச்சர்யப்படுத்துபவைதானே?  இதேபோல தன்னை வளர்த்தவர்களை இனம் கண்டு அடையாளம் கண்டு செல்லம் கொஞ்சும் சிங்கம், புலிகளை பற்றியும் நாம் இணையத்தில் படித்திருக்கிறோம்தானே?

வருடா வருடம் சரியாக லாரன்ஸ் மறைந்த நாளில்  மரியாதை தெரிவிக்கவும், அவரை நினைவு கூரவும் வரும் யானைக் கூட்டங்களின் அன்பை என்னவென்று சொல்ல...

=============================================================================================================

வந்த கவிதை... 

ஆதரவாய் இருந்த மரம் வெட்டித்                  

தள்ளப்பட்டது

சாலை விரிவாக்கமாம்..

அடுத்திருந்த பள்ளத்தில்

அமிச்சர் எதையோ நட்டார்

கட்சிக் கொடிகள் புடைசூழ..

சிரித்துக் கொண்டிருந்த

சிறுசெடி செல்பியானது 

சில பெண்களுடன்..

***

வறண்டு கிடந்த பூமி

வானத்தைப் பார்த்து சிரித்தது

நீயும் மலடாகிப் போனாயே..

காற்றுக்குக் கோபம் வந்தது

இருங்கடா இதோ வர்றேன்..

சிலநொடிகளில்

முறிந்து விழுந்தது

செயற்கை சினையூட்டல்

மையத்தின் விளம்பரப் பலகை..

===============================================================================================

படித்ததை பகிர்வது....

  மூங்கில் அரிசி பற்றி தெரியுமா உங்களுக்கு :-

+++++++++++++++++++++++++++++++++++++

40 வருடங்களுக்கு ஒரு முறை பூக்கும். மூங்கில் பூவிற்குள் அரிசி இருக்கும். இந்த அரிசி பார்ப்பதற்கு கோதுமை போல் இருக்கும். பின்னர் மூங்கில் பட்டுவிடும்.

மூங்கில் அரிசி பற்றி நம்மில் பலபேர் கேள்விப்பற்றிருப்போம், சில பேர் மட்டும் தான் பார்த்திருப்போம், அதில் ஒரு சிலர் மட்டுமே அதை ருசித்திருப்போம்.அந்த ஒரு சிலரில் நாமும் என்பதில் மகிழ்ச்சி.

காடுகளில் வாழும் பழங்குடி மக்களின் உடல் ஆரோக்கியமாக இருப்பதற்கு காரணமான உணவு வகையில் இந்த மூங்கில் அரிசியும் முக்கியமான ஒன்று.

மூங்கிலரிசியைச் சமைத்து சாப்பிட்டு வர உடல் இறுகி உடல் திடம் பெரும்.உடலில் நோய் எதிர்ப்பு சக்தியை உருவாக்குவதால் நோய்கள் நம்மை அண்டாது.

சர்க்கரை நோயால் கட்டான உடலை இழந்தவர்கள் கூட சீரான உடலமைப்பை பெற மூங்கில் அரிசி உதவும்.மக்கட்பேறு உருவாக்குவதில் கூட முக்கிய பங்கு வகிக்கிறது.பழங்குடி மற்றும் மலைவாழ் மக்களில் மக்கட்பேறு இல்லாமல் யாரும் இருக்க மாட்டார்கள் இதற்கு மூங்கில்அரிசியும் ஒரு காரணம் .

மூட்டுவலியை குணமாக்கும் மூங்கில் அரிசி கஞ்சி

பத்துப் படிகள் ஏறினாலே, மூச்சு வாங்குகிறது; முட்டி வலிக்கிறது. ஆனால், நம் முன்னோர்கள், பல மைல் தூரங்களை நடை பயணமாகவே கடந்தவர்கள். உரமேறிய அந்த உடல்வாகிற்கான அடிப்படைக் காரணம் சத்துமிக்க உணவுப் பழக்கம்தான். மறந்துபோன அந்த மருத்துவ உணவு

மூங்கில் அரிசிக் கஞ்சி ;

தேவையானவை: மூங்கில் அரிசி, நொய் அரிசி – தலா 150 கிராம், சீரகம், ஓமம் – தலா அரைத் தேக்கரண்டி, பூண்டு – 6 பல், சுக்கு – ஒரு துண்டு, நல்லெண்ணெய் – ஒரு தேக்கரண்டி, உப்பு – தேவைக்கு.

செய்முறை: மூங்கில் அரிசி, நொய் அரிசி, சுக்கு ஆகியவற்றைத் தனித்தனியே ஒன்றிரண்டாகப் பொடித்து எடுக்கவும். பொடித்த சுக்குடன் சீரகம், ஓமம் சேர்த்து வெறும் வாணலியில் சிவக்க வறுக்கவும். அதில், நல்லெண்ணெய் ஊற்றி, பொடியாக அரிந்த பூண்டைப் போட்டு வதக்கவும். நன்கு வதங்கியதும் தேவையான அளவு தண்ணீர் ஊற்றிக் கொதிக்கவிடவும். முதல் கொதி வந்ததும் மூங்கில் அரிசியை அதில் கொட்டவும். அடுத்த கொதி வந்ததும் நொய் அரிசியையும் அதில் போட்டுக் கொதிக்கவிடவும். நன்றாகக் கொதித்து கஞ்சி பதம் வந்ததும், தேவையான அளவுக்கு உப்பு சேர்த்து இறக்கவும்.

மருத்துவப் பயன்: மூட்டு வலி, மூட்டில் நீர் கோத்துக்கொள்ளுதல், முதுகெலும்பு வலி, இடுப்பு வலி, கழுத்து வலி, உடல் பலவீனம் போன்ற பிரச்னைகளுக்கு நிவாரணம் அளிக்கும். உடலில் உள்ள சுண்ணாம்புச் சத்துக் குறைபாட்டைப் போக்கும்

மூங்கில் அரிசியின் பயன்கள் :

மூங்கில் அரிசி நார்ச்சத்து மிக்கது.

உடல் வலிமை பெறும்.

சர்க்கரை அளவை குறைக்கும்.

எலும்பை உறுதியாக்கும்.

நரம்புத் தளர்ச்சியை சீர் செய்யும்.

அரிசிகளில் சிலவகை இதோ உங்களுக்காக;

கருங்குருவை:

விரண தோல் நோய்களையும், குறிப்பிட்ட விஷத்தையும் போக்கும். யோக சக்தியையும் தரும்.

மாப்பிள்ளை சம்பா:

இது புரதம், நார், தாது, உப்புச்சத்து நிறைந்தது. இதன் நீராகாரத்தை சாப்பிட்டால் நரம்புகள் வலுப்படும். ஆண்மைத் தன்மை அதிகரிக்கும்.

கைகுத்தல் புழுங்கல் அரிசி:

low glycemic தன்மை கொண்டது. அது இரத்ததில், சர்க்கரை அளவினை மெதுவாக ஏற்றி சர்க்கரை நோயாளிக்கு திடீர் சர்க்கரை உயர்வைத் (hyper glycemia) தடுக்கும். குழந்தைகள், வாத இருப்பவர்கள், அரும்பத்தியம் இருப்பவர்களுக்கு உதவும்.

காட்டுயானம்:

ஆன்டி ஆக்ஸிடென்ட் குணங்களால் இதய வியாதிகளுக்கு அற்புதமான மருந்தாகும். டைப் 2 சக்கரை வியாதி நோயாளிகளுக்கு உகந்தது.

அன்னமழகி:

மிகவும் இனிப்பு சுவையுள்ள‌ அன்னமழகி அரிசி சகல சுரங்களையும், பித்த வெப்பத்தையும் போக்க கூடியது. உடலுக்கு சுகத்தை கொடுக்கும்.

இலுப்பைப் பூச்சம்பா:

பித்தத்தினால் விளையும் சிற்சில ரோகம், சிரஸ்தாபம், உபசர்க்கதாகம், உஷ்ணம் ஆகியவற்றை உண்டாக்கும்.

கல்லுண்டைச்சம்பா:

இதை உண்பவர்களுக்கு மல்யுத்தக்காரரும் எதிர்க்க இயலாத தோள் வலிமையை தரும். மிகுந்த வார்த்தை வளமும் உண்டாக்கும்.

காடைச்சம்பா:

இந்த அரிசி பிரமேக சுரமும், குறிப்பிட்ட நோய்களையும் நீக்கும். விந்து விருத்தியும், அதிக பலமும் உண்டாகும்.

காளான் சம்பா:

உடலுக்கு மலை போன்ற உறுதியையும், சுகத்தையும் தரும். சில வாத ரோகத்தையும் குறைக்கும்.

கிச்சிலிச்சம்பா:

பலம், உற்சாகம், உடல் பளபளப்பு ஆகியவற்றை உண்டாக்கும். தேறாத உடல் தேறும்.

குறுஞ்சம்பா:

பித்தம், கரப்பான் நீங்க விந்து விருத்தியை உண்டாக்கும். வாத நோயைநீக்கும்.

கைவரை சம்பா:

உடலுக்கு அதிக வலிமையும், சுகமும் உண்டாக்கும். இதில் சிறிது பித்தமும் அதிகரிக்கும்.

சீதாபோகம்:

உடல் பலம், தேக பளபளப்பு, விந்து விருத்தி உண்டாகும். அஜீரணத்தை குறைக்கும்.

புழுகுச்சம்பா:

இந்த அரிசியை உண்பவர்களுக்கு வனப்பும், அமைதியும், பசியையும், பலமும் உண்டாக்கும். தாகம் நீங்கும்.

மணக்கத்தை:

தோல் நோய்கள் அனைத்தையும் போக்கும். புண்கள், ரணங்கள் ஆகியவற்றை குறைக்கும்.

மணிச்சம்பா:

அளவுக்கு அதிகமாக சிறுநீரை குறைக்கும். குழந்தை, முதியவர்களுக்கு அதிகசுகத்தை உண்டாக்கும்.

மல்லிகை சம்பா:

நாவிற்கு மிகவும் ருசியானது. தேகத்திற்கு சுகத்தையும், உறுதியையும் தரும். கரப்பான், பிரமோகம், உடல் வெப்பம் ஆகியவற்றை போக்கும்.

மிளகு சம்பா:

உடலுக்கு சுகத்தை தரும். பசியை உண்டாக்கும். வாதம் போன்ற பல விதமான ரோகத்தை போக்கும்.

மைச்சம்பா:

வாதம், பித்தம் போன்ற கோளாறுகளை குறைக்கும். வாத கோபம்,வாந்தி போன்றவற்றை போக்கும்.

வளைத்தடிச்சம்பா:

வாத, பித்த தொந்தரவு, வயிற்று உப்புசம், வயிற்று இரைச்சல், கரப்பான் ஆகியவற்றை ஏற்படுத்த வாய்ப்பு அதிகம்.

வாலான் அரிசி:

மந்தம், தளர்ச்சி முதலியவை குறையும். உடலுக்கு அழகும், கொழுமையும் உண்டாக்கும்.

மூங்கில் அரிசி:

மூங்கில் மரங்கள் 40 வருடங்களுக்கு ஒரு முறை தான் பூக்கும். இந்த பூவிலிருந்து வரும் காய்கள் தான் நெல், அதாவது மூங்கில் நெல் என்கிறார்கள். மூங்கிலிலிருந்து பெறப்படும் மூங்கிலரிசியைச் சமைத்து உண்டு வர, உடல் திடம் உண்டாகும், உடல் இறுகும், கொடிய நோய்களெல்லாம் நெடுந்தூரம் ஓடிவிடும்.

பழைய அரிசி:

பாலர், முதியோர்களுக்கு மிகவும் உகந்தது. பசியும், உடலுக்கு குளிர்ச்சியும் உண்டாகும். சில நோயும்,கபமும் குறையும்.

இவை அனைத்தும் அரிசியின் பல வகைகளும், அவற்றை உண்பதால் ஏற்படும் நன்மை, தீமைகளும் ஆகும். இதை கொண்டு உடலுக்கு ஆரோக்கியமானஅரிசியை மட்டும் சாப்பிட்டு நோயற்ற ஆரோக்கியமான வாழ்க்கைவாழ்வோம்.

சற்றே சிந்தித்து உங்கள் நண்பர்களுக்கும் பகிருங்கள்...

பொது நலனில் அக்கறை கொண்ட உங்கள் கடலூர் அரங்கநாதன்...

======================================================================================================

நியூஸ் ரூம்

ப்ளஸ் டூ தேர்வில் நடந்தது போல பத்தாம் வகுப்பு பொதுத்தேர்வில் மாணவர்கள் பொதுத்தேர்வுக்கு ஆப்சென்ட் ஆகக் கூடாது என்று பத்தாம் வகுப்பில் பள்ளிக்கு ஒழுங்காக வராத மாணவர்களின் வீடுகளுக்குச் சென்று அவர்களை எப்படியாவது தேர்வு எழுத வரவைக்க வேண்டும் என்று பள்ளிக் கல்வித்துறை உத்தரவிட்டிருக்கிறதாம். அவர்களுக்காக நீங்களே தேர்வு எழுதி விடுங்கள் என்று சொல்லாதவரை சரி.

கர்னாடகாவில் தேர்தல் நெருங்கிக் கொண்டிருப்பதால் ஜோசியர்களுக்கு மவுஸு அதிகரித்துக் கொண்டிருக்கிறது. எந்த தொகுதியில் போட்டியிடலாம்? போட்டியிட்டாலும் வெற்றி பெறுவோமா? வெற்றி பெற்றாலும் அமைச்சர் பதவி கிடைக்குமா? அமைச்சரானாலும் எந்த இலாகா கிடைக்கும்? பிரசாரத்திற்கு செல்லும் பொழுது என்ன கலர் உடையணிந்து செல்ல வேண்டும்? எந்த திசையில் பிரசாரத்தை தொடங்க வேண்டும் என்ற கேள்விகளோடு ஜோசியர்களை முற்றுகையிடுகிறார்களாம்.

ஜம்மு காஷ்மீர் துணைநிலை கவர்னர் மனோஜ் சின்ஹா, “காந்தியிடம் பல்கலைகழக பட்டம் ஒன்று கூட இல்லை” என்று கோரக்பூர் ஐ.ஐ.டி.யின் பட்டமளிப்பு விழாவில் கூறியதற்கு, காந்தியின் கொள்ளுப் பேரன் துஷார் காந்தி மறுப்பு தெரிவிதிருக்கிறார். மனோஜ் சின்ஹாவிற்கு அந்தக் காலத்தில் சட்டப்படிப்பு படிப்பதற்கு பட்டப் படிப்பு படித்திருக்க வேண்டிய அவசியம் இல்லை என்பது தெரியாது என்று நினைக்கிறேன். மோதிலால் நேரு கூட மெட்ரிகுலேஷன் தேர்ச்சி பெற்றதும் சட்டம் படித்தவர்தான். நேருவின் டிஸ்கவரி ஆஃப் இந்தியாவில் இதை குறிப்பிட்டிருப்பார்.

ராகுல் காந்தியின் அரெஸ்ட்டிற்கு எதிர்ப்பு தெரிவித்து காங்கிரஸ் எம்.எல்.ஏ.க்கள் கருப்பு சட்டை அணிந்து சட்டசபைக்கு வர, அன்றைக்கு பார்த்து பா.ஜ.க. எம்.எல்.ஏ.வான வானதி ஸ்ரீநிவாசன் கருப்பு புடவை,சட்டை அணிந்து சட்டசபைக்கு வந்திருக்கிறார். அதைப் பற்றி பத்திரிகையாளர்கள் கேட்டபொழுது, “காங்கிரஸ்காரர்களின் போராட்டம் பற்றி தனக்குத் தெரியாது என்று கூறியிருக்கிறார். என்ன மேடம் இது? நாட்டு நடப்பு தெரிய வேண்டாமா?

டங்க் ஸ்லிப்பாவது சகஜம்தான். சாதாரண மனிதர்களுக்கு அது பிரச்சனை கிடையாது. பெரிய பொறுப்பில் இருப்பவர்களுக்கு டங் ஸ்லிப்பாகும் பொழுது மீம்ஸாகி விடுகிறது. நம் ஊரில் ஒருவர் அதற்கு பிரசித்தம், அமெரிக்க அதிபர் ஜோ பைடன் கனடா சென்ற பொழுது கனடா என்று குறிப்பிட வேண்டிய இடத்தில் சைனா என்று கூறி நகைப்புக்குள்ளாகி இருக்கிறார்.

=======================================================================================================

சென்ற வாரம் 1930 களில், 1940 களில் பெண்ணுரிமை, சட்டம் சொல்வது என்பது பற்றி தியாகபூமி பகிர்வில் படித்தோம். கீழே உள்ளது 2013 ல் தினமணியில் ஓய்வுபெற்ற பெண் நீதியரசர் எழுதிய தொடர் கட்டுரை ஒன்றில் வெளிவந்தது... அந்தக் அக்கட்டுரைத்தொடர் புத்தகமாகக் கிடைக்கிறதா என்று இணையத்தில் தேடிப்பார்த்தேன். கிடைக்கவில்லை.

திருமணமாகி மூன்றே மாதங்களில் கணவன் இறந்து விட, 'அவனே போயாச்சு... நீ எங்களுக்கு யாருமில்லை. உனக்கும் எங்களுக்கும் ஒட்டுமில்லை, உறவுமில்லை' என்று கணவன் வீட்டாரால் வெளியேற்றப் படுகிறாள் அந்தப் பெண்.

பெற்றோர் ஆதரவுடன் மறுபடி இன்னும் கொஞ்சம் படித்து, வேலையில் சேர்ந்து, நல்ல பணமும் வங்கியில் இருக்கும் நிலையில் மரணமடைந்து விடுகிறாள் அந்தப் பெண்.

பெண்ணின் தாயார் அந்தப் பணத்துக்கு உரிமை கோரி, நீதி மன்றத்தை நாடுகிறார். இந்நிலையில் அந்தப் பெண்ணின் நாத்தனாரின் மகனும் (இறந்த கணவனின் தங்கை மகன், இவளை வீட்டை விட்டு உடனடியாகத் துரத்திய புகுந்த வீட்டைச் சேர்ந்த உறவு) அந்தப் பணத்துக்கு உரிமை கோருகிறார்.

தீர்ப்பு என்னவாக இருக்கலாம்? - மார்ச் 2013

கமெண்ட்டில் வெவ்வேறு அபிப்ராயங்கள் வந்திருந்தன. அப்புறம் தினமணியிலிருந்து அதன் தீர்ப்பை எடுத்து இணைத்திருந்தேன். அது..

இன்றைய தினமணியில் வந்துள்ள கட்டுரை இது. நீதியரசர் பிரபா ஸ்ரீதேவன் அவர்கள் எழுதியுள்ள கட்டுரை. 1956-ல் போடப் பட்ட சட்டத்தின் படி பணம் இறந்துபோன கணவனின் தங்கை மகனுக்குத்தான் என்று தீர்ப்பானதாம். சுயமாக (அதிகமாக) பெண்கள் சம்பாதிக்க முடியாத காலத்தில் போடப் பட்ட சட்டம்! சட்டத்துக்கு பரிதாபமோ பச்சாத்தாபமோ, நியாயமோ, தர்மமோ கிடையாதாம். சட்டத்தில் என்ன சொல்லப் பட்டிருக்கிறதோ அதுதானாம். இது ஓம்ப்ரகாஷ் Vs ராதாசரண் (2009(15) எஸ் சி சி பக்கம் 66 என்ற வழக்காகத் தீர்ப்பளிக்கப் பட்டது என்கிறார். 20 ஆம் நூற்றாண்டில் இயற்றப் பட்ட இந்த ஹிந்து வாரிசுரிமைச் சட்டத்தை விட கி பி 600 - 900 வந்த தேவால முனிவர் எழுதிய எழுதியதே தேவலாம் என்கிறார் இவர். அதாவது "பழங்கால சூத்திரங்களில் முற்போக்கான சில கருத்துகள் காண்கிறோம். "பெண்ணின் சொத்தை அவள் அனுமதியின்றி கையாள்பவன் திருடன்' என்கிறது. அவனுக்குத் தகுந்த தண்டனை அளிக்க வேண்டும் என்கிறது. "மக்கள் இல்லாத பெண்ணின் சொத்து அவள் இறந்தபின் இந்த வரிசையில் வாரிசுரிமை வரும்; அந்த வரிசையில் கணவன், தாயார், சகோதரர், தந்தை...

இந்த ரீதியில் நீளமாக எழுதப் பட்டுள்ள இந்தக் கட்டுரை கவனத்தை ஈர்க்கிறது.

========================================================================================

ரசித்த புகைப்படம்...

======================================================================================

மறுபடியும் சுவரில் ஒரு உருவம்...!

"பொறந்து வந்தியா இல்லை செஞ்சு அனுப்பினங்களா?"ன்னு கேட்டதும் ஐடியா வந்திருக்கும் போல... இப்படி ஒரு எலும்புக்கூடு கிடைத்ததாய் எப்போதோ இணையத்தில் படித்த நினைவு!

இந்த ரூபாய் நோட்டில் என்ன விசேஷம்?

இப்படி நாமும் முயற்சிக்கலாம் இல்லை?!

என்ன கடுப்பு பாருங்க சுருட்டு மன்னருக்கு!