சிறுகதை - பொங்கும் பூம்புனல் - துரை செல்வராஜூ

 பொங்கும் பூம்புனல்

துரை செல்வராஜூ 

*** *** *** *** *** *** ***

வானம் மூடி மூடித் திறந்து கொண்டிருந்தது.. 

மாசி மகம் வரைக்கும் இப்படித்தான்.. பங்குனிக்கு இன்னும் பத்து நாள்.. அதுக்கு அப்புறந்தான் சூரியன் அவன் வேலையக் காட்டுவான்..

இந்த ஊர்.. ல இருந்து நாலு மைல் மாயவரம்.. மாயவரத்துக்குப் போற தார் ரோடு தான் இது.. மழை வர்றதுக்கு முந்தியே போட்டாயிற்று.. அதுக்கு முன்னால செம்மண்ணும் ஜல்லிக் கல்லும்... 

இந்த வருசம் தாளடிப் பட்டம் பிந்திப் போச்சு..  அறுவடை பதினைஞ்சு நாளாத் தான் .. அறுவடை முடிஞ்சதும் பயறு உளுந்து விதைச்சு -  ரெண்டு பக்கமும் பச்சைப் பசேல்ன்னு பார்க்கவே  அழகா இருக்கு.. 

மத்தியான வெயிலுக்கு முன்னாலேயே குருவி எல்லாம் மரங்கள்.. ல வந்து அடைஞ்சாச்சு.. சாகுபடி வேலை முடிஞ்சு போனதால 

ஜனங்க நடமாட்டம் இல்லாம கிடக்குது ரோடு..

தார் ரோட்டுல நடக்குறதே சுகம்..  கல்லுங் கரடும் புரண்டு வராம ரோடு நல்லாவே இருக்குது.. 

இருந்தாலும், பார வண்டிகள் கரகர.. ன்னு ஏறி இறங்கறதால ரோடு நெடுக ரெண்டு பக்க ஓரமும் நொறுங்கி இருக்கு.. 

இந்த ரோட்டுல தான் கும்மோணம் எஸ்ஸார் வியெஸ் ரெண்டு தடவையும் தஞ்சாவூர் எஸ்ஸெம்ட்டி ரெண்டு தடவையும் ஓடிக்கிட்டு இருக்கு..

இப்படியான மகத்துவம் மிக்க ரோட்டுல -  வேகு.. வேகு.. ன்னு மூனு சைக்கிள்.. மூனு சைக்கிள்.. லயும் மொத்தமா ஏழு பசங்க.. இன்னைக்கு ஞாயித்துக்கிழமை..

மாயவரத்துக்குப் பயணம்..  சுந்தரத்துல எம்ஜியார் படம்..  பாக்குறதுக்கு போய்க்கிட்டு இருக்கோம்..

அந்தப் பக்கம் அழகப்பா.. அதுல சிவாஜி படம்.. அந்தப்  படமா.. இந்தப் படமா?.. பூவா தலையா போட்டுப் பார்த்ததில தல எம்ஜியார்.. ன்னு வந்தது..  அவ்வளவு தான்.. ஜாலியா கெளம்பியாச்சு..

அதிலயும் சைக்கிள்.. ல பறக்குறது.. ன்னாலே தனி சுகந்தான்.. 

வடுகநாதன் வாட்டசாட்டமா இருப்பான்.. அவனோட மாரிமுத்தும் குமாரும்.. என்னோட சைக்கிள்..ல சுந்தரம்.. இன்னொன்னு ல மணியும் மாணிக்கமும்...

எல்லாரும் ஒரே வகுப்பு.. இந்த வருசம் எஸ்ஸெல்சி.. இன்னும் மூனு நாலு மாசத்துல ஸ்கூல் படிப்பு முடியப் போகுது.. பெரிய பரிட்சை நெருங்குது..

' இந்த நேரத்துல கழுதைகளுக்கு சினிமாவா கேக்குது?.. ' - ன்னு, நீங்க கேக்குறது புரியுது..

' நாங்கள்ளாம் யார் சொல்லி கேட்டிருக்கோம்?.. அதுக்காக மோசமான பசங்களும் இல்லே!.. "

" நல்லா படிக்கணும்.. நல்லா படிக்கணும்!.. " - ன்னு விஸ்வநாதன் சார்   சொல்லிக்கிட்டே இருப்பார்.. 

நல்லா படித்தால் பேனா, பென்சில், நோட் என்று வாங்கிக் கொடுப்பார்.. மாதாந்திரத் தேர்வுகளில் முட்டை என்றால் எண்ணெய் சட்டியில்லாமல் பொரித்து எடுத்து விடுவார்..

நாற்பது மார்க் எடுத்துட்டு ரெட்டை ஜடையை ஆட்டிக்கிட்டு ஒரு கோஷ்டி அந்தப் பக்கமா சிரிச்சுக்கிட்டு இருக்கும்.. 

பசங்களுக்கோ பின்னால அரை டிராயர் கிழிஞ்சு போயிருக்கும்.. 

" வீட்ல அந்தப் புள்ளைங்க  வேலையும் பார்த்துட்டு பாடத்தையும் படிச்சு பாஸ் மார்க் எடுக்கறதே பெரிய விஷயம்.. கோயில் மாடு மாதிரி சுத்தி வர்ற உங்களுக்கு என்னடா கேடு?.. " - ன்னு கேட்டுக்கிட்டே வெளுத்து எடுக்கறப்போ ஒன்னு ரெண்டு.  உச்.. சத்தம் கேட்கும்.. 

அந்த உச்.. சத்தத்துக்காகவே படிக்கலாம்.. ன்னு சாயங்காலம் உட்கார்ந்தா - புத்தகத்துல எழுத்தே தெரியாது...  

' உச்.. உச்.. ன்னது யாரு?.. சந்திராவா, சரோஜாவா வசந்தியா  இல்லே கஸ்தூரியா.. ' ன்னு மனசுக்குள்ள ஒரு குரங்கு வந்து குதிக்கும்.. 

' அதுக்கு மேல மனசுக்குள்ள படிப்பு எங்கேருந்து வர்றது?.. '

எல்லாப் பொண்ணுங்களுமே நல்ல அழகா இருந்தாலும்

கஸ்தூரிக்காக மனசு தவங் கிடக்கும்..

அதுங்களும் சும்மாவே வர்றது இல்லை.. கண்ணுல மையப் பூசிக்கிட்டு அந்த குண்டு மல்லிகய ஒத்தப் பூவா காது ஓரம் வச்சிக்கிட்டு பார்த்தும் பார்க்காத மாதிரி போறதும் வர்றதும்!... 

எப்பவும் கைவசம் நெல்லிக்காய் வத்தல், எலந்தப் பழம், கொடுக்காப் புளி.. ன்னு  வச்சிருப்பாங்க.. நமக்கு வாய் ஊறிப் போய் கேட்டால் -  கஸ்தூரி  மட்டும் எங்கிட்ட கையை நீட்டுவாள்.. 

" நீயே எடுத்துக்கோ!.. " என்று.

உள்ளங்கை நிறைய நெல்லி வத்தல் இருக்கும்.. 

கஸ்தூரியின் உள்ளங்கையில் விரல்கள் படாமல் ஒன்றிரண்டு வத்தலைப் பொறுக்கிக் கொண்டு,  " உங்கையில் சுக்கிர மேடு நல்லா இருக்கே!.." - என்று தைரியமாகச் சொல்வதற்கு ரொம்பவே பிடிக்கும்..

அதே சமயம் -  " உனக்கு கைரேகை பார்க்கத் தெரியுமா சேகர்?.. " - என்று கேட்கும் போது, கஸ்தூரியின் கண்களை நிமிர்ந்து பார்ப்பதற்கான தைரியம் காணாமல் போயிருக்கும்...

கஸ்தூரியின் அருகாமையை விரும்புகின்ற மனம், அவளுடன் பேசிக் கொண்டிருக்கவும் விரும்பும்..

அதே விநாடி - ' யாரும் பார்த்து விட்டால்?.. வீட்டில் போய் சொல்லி விட்டால்?...'  - என்றும் நடுங்கும்.. 

" யம்மா.. அண்ணன் படிக்காம மோட்டு வளையப் பார்த்துக் கிட்டு இருக்கான்... "

" இருக்கட்டும்.. இருக்கட்டும்.. உங்க அப்பா கிட்ட ரெண்டு வளையல கழட்டிக் கொடுத்தா மாடு வாங்கிக்கிட்டு  வந்துடப் போறாரு!.." 

புகை மண்டிக் கிடக்கும் பின்கட்டில் இருந்து அம்மாவின் குரல் கேட்கும்..

இந்த லச்சணத்தில் ' வாத்தியார் அடிக்கிறார்.. ' - ன்னு வீட்ல போய் சொன்னா, " நல்லதா போச்சு.. படிப்புச் செலவு மிச்சம்.. நாளைக்கே நாலு மாடு வாங்கித் தர்றேன்.. " -  ன்னு சொல்லிட்டு சந்தைக்குப்  போகிற மாதிரி  அப்பாவும் கிளம்புவார்.. ஆனா மாடும் வராது.. கன்றும் வராது.. சும்மாச்சுக்கும் மிரட்டி வைக்கிறது!.. 

நாலு மாடு வாங்கற அளவுக்கெல்லாம்  ஐயா கையில காசு பணம் ஏது!.. 

ஆனாலும், பெத்தவங்கள நம்பவே கூடாது.. இப்படித்தான் நம்ம ராம்சாமி அவங்க வீட்ல பூச்சி காட்டப்போக அவங்க அப்பா நெசமாலுமே நாலு ஆட்டுக் குட்டிய வாங்கிக்கிட்டு வந்து விட்டார்.. 

மாடு மேய்க்கிறத விட ரொம்பக் கஷ்டம்  - ஆடு மேய்க்கிறது.. மெரண்டு போய்ட்டான் ராம்சாமி..

கண்ணீரும் கம்பலையுமா கால்ல விழுந்து அழுதுட்டு ' தப்பிச்சோம்.. பொழச்சோம்.. ' - ன்னு மறுநாளே ஸ்கூலுக்கு ஓடியாந்துட்டான்..

வந்ததுமே - ' திருக்குறள் தெரியலை.. ' - என்று விஸ்வநாதன் சாரிடம் தான் முதல் மண்டகப்படி..

விஸ்வநாதன் சார் என்று நினைப்பு வந்ததும் அடிவயிற்றில் ' திக் ' என்று வலித்தது.. அவர் மாயவரத்துக்காரர்.. எங்களை அங்கே சினிமா தியேட்டர் வாசலில் பார்த்து விட்டார் என்றால் நாளைக்கு ஸ்கூலில் உங்க வீட்டு அடி..  எங்க வீட்டு அடி தான்.. உரித்து எடுத்து விடுவார்..

விஸ்வநாதன் சாருடைய நினைப்பு வந்த வேளையில் - சாலை ஓரத்தில் வீர முனியாண்டவர்.. 

ரோட்டுக்கு மேற்கால வெட்டவெளியில் நாலடி மேடை..  ஒட்டு மொத்தமா ஏழடி உயரம்.. அவருக்கு முன்பாகவே ரோட்டில் இறங்கியாயிற்று.. 

முனியாண்டவர் பீடத்தைச் சுற்றிலும் அறுவடையின்  போது வைக்கப்பட்ட கதிர் முடிச்சுகள்..  குருவிக் கூட்டங்கள் தின்னட்டும் என்று!..

உயர்த்தி முடியப்பட்ட ஜடாமுடியும் உருட்டி விழித்த விழிகளும் முறுக்கிய மீசையும் கடித்த பற்களும்.. அடேங்கப்பா!..

முனியாண்டவர் வலது கையில் வெட்டுங்கத்தி இருக்க இடது கையில் குறுந்தடி..

வலது காலுக்குக் கீழ் அசுரனின் தலை..  அவன் நல்லவனா.. கெட்டவனா?.. இந்த ஆராய்ச்சிக்கெல்லாம் இப்போது நேரம் இல்லை..

எல்லாருமாக அருகில் சென்று முனியாண்டவர் காலைத் தொட்டுக் கும்பிட்டு விட்டு அருகில் இருந்த சம்படத்தைத் துழாவி நெற்றியில் பூசிக் கொண்டோம்... 

மற்றவர்கள் மனதில் என்ன என்னவோ.. தெரியாது..

என் மனதில் மட்டும்,  ' கஸ்தூரியுடன் நானும் பாஸாகி விட வேண்டும்!..' - என்று தோன்றியது..

மறுபடியும் முனியாண்டவருக்கு ஒரு கும்பிடு போட்டு விட்டு சைக்கிளை நகர்த்திய போது எதிரில், பாம்.. - என்ற சத்தத்துடன் எஸ்ஸார்வியெஸ்.. கைக்கடிகாரங்கள் கைக்கு எட்டாதிருந்த சூழ்நிலையில் இப்படி பஸ் தான் நேரம் காட்டும்...

" டேய்... மணி ஒன்ரை ஆச்சுடா.. ரெண்டு மணிக்கெல்லாம் படம் போட்டுடுவான்!.. "

அவ்வளவு தான்.. சிட்டாகப் பறந்த சைக்கிள்கள் மாயவரம் கடைத்தெருவுக்குள் நுழைந்த போது கிளிங் என்ற சத்தத்துடன் மணியின் சைக்கிள் செயின் கழன்று கொண்டது.. 

" சை... "

சைக்கிள்கள் நின்றன..

நாலு பேர் பேசிக் கொண்டே சென்றார்கள்...

" வாத்யார் படம் ரிலீஸ்.. சரியான கூட்டம்!.. போலீஸ் வந்துடுச்சி.. ஹவுஸ் புல்.. ஒன்ரைக்கெல்லாம் படத்தைப் போட்டுட்டான்.. இன்னும் ஐநூறு பேர் வெயில் ல காஞ்சு போய் உட்கார்ந்து இருக்கானுங்க.. சாயங்கால ஆட்டம் பார்க்கணும்..ன்னு.. ஊரு விளங்குன மாதிரி தான்!.. "

முகத்தில் வியர்வையைத் துடைத்துக் கொண்டோம்.. 

" இப்ப  என்னடா செய்றது.. அழகப்பாவுக்குப் போலாமா?.. "

" வேணாம் டா.. இங்கே டிக்கெட் கிடைக்கலே.. ன்னு பாதிப்பேர் அங்கே போயிருப்பாங்க..  அடிதடி இருக்காதே தவிர அங்கேயும் கூட்டமாத்தான் இருக்கும்.. கையில இருக்கிற காசுக்கு நல்ல மாதிரியா சாப்பிடுவோம்..  துலாக்கட்டம் போய்ட்டு - சாயங்காலமா வீட்டுக்குப் போவோம்... "

வடுகநாதன்  தான் பேசினான்.. 

முழுச் சாப்பாடு ஒன்றரை ரூபாய் என்று எதிரில் இருந்த உணவகத்தில் எழுதப்பட்டிருந்தது..

***