"திங்க"க்கிழமை _ அடை - JKC ரெஸிப்பி

 

ஆனியன் அடை 

(J K)

 

வேண்டிய உபகரணங்கள் : கிரைண்டர் அல்லது மிக்ஸி, பழகிய தோசைக்கல்

வேண்டிய பொருட்கள்:  இட்லி அரிசி, கடலைப்  பருப்பு அல்லது பட்டாணிப் பருப்பு என்று சொல்லப்படும் வடை பருப்பு. (அரிசி பருப்பு விகிதம் இங்கு எடுத்துக்கொண்டது 2: 1 ) வெங்காயம், வற்றல் மிளகாய், உப்பு, மணத்திற்கு சீரகம் வேண்டுமென்றால் சேர்த்துக் கொள்ளலாம்.

அரிசியைத் தனியாக, பருப்பைத்  தனியாக முதல் நாள் இரவே ஊற வைத்துக்கொள்ளுங்கள்.

பருப்பில் கண்ணுக்குத் தெரியாத பூச்சிகள் இருக்கலாம். ஊறும் பொது வெளியே வந்து விடும்.  தனியாக ஊறவைத்தால் எளிதில் கழுவி எடுக்கலாம். 

அரிசி பருப்பு இரண்டையும் நன்றாகக் கழுவி மிளகாய் மற்றும் உப்புடன் மிக்ஸியில் அல்லது கிரைண்டரில் அரைத்துக் கொள்ளவும். இத்துடன் பொடியாக அரிந்த வெங்காயத்தைச் சேர்த்து கலக்கிக் கொள்ளவும். (படங்கள் கீழே)

தோசைக்கல்லை அடுப்பில் வைத்து கல் சூடானதும் கொஞ்சம் எண்ணெய் விட்டு வார்த்து இரு பக்கமும் வேக வைத்து எடுக்கவும்.

(அடைக்கு வாய் மூக்கு கண் இருப்பதைப்பாருங்கள். பாஸின் கைவண்ணம். )

இதற்குத் தொட்டுக்கொள்ள இங்கு சர்க்கரை என்ற பெயரில் கிடைக்கும் கருப்பு வெல்லமும், முந்தைய நாள் பொங்கலுக்கு செய்த கொஸ்துவும் வைத்து சாப்பிட்டேன். இந்தக் கருப்பு வெல்லம் (கருப்பட்டி அல்ல) தான் அடைப் பிரதமன், உன்னி அப்பம், அரவணை போன்றவைக்கு  உப்யோகிக்கப்படுவது.

இந்த அடையில் என்ன புதுமை என்கிறீர்களா? ஒன்னும் இல்லாததற்கு ஒரு அடை. (கார அடையான் நோன்பிற்கும் இந்த அடைக்கும் சம்பந்தம் இல்லை)

பிற்சேர்க்கை.

அடைக்கு மாவு அரைத்தால் அடை உடனே சுடவேண்டும். மாவை ஒருமணி நேரம் இரண்டு மணி நேரம் வைத்திருப்பதோ புளிக்க வைப்பதோ கூடாது. சுடப்போகும் முன்  அரைத்தால் போதும்.