எந்த பண்டிகையாக இருந்தாலும் பிரசாதம் நமக்கு முக்கியமாக இருக்கிறதே? என்ன காரணம்?

 

பானுமதி வெங்கடேஸ்வரன்: 

எந்த பண்டிகையாக இருந்தாலும் பிரசாதம் நமக்கு முக்கியமாக இருக்கிறதே? என்ன காரணம்?

# எண் சாண் உடம்புக்கு நாக்கே பிரதானம் - நமக்கு !!

இறைவனின் பிரசாதம் அவன் அருளுக்கு ஓர் அடையாளம் அல்லவா !

& பிரசாதம்தானே நாம் உடனடியாக 'கை மேல் காணும்' பலன்! மீதி பலன்கள் பிறகுதான் கிடைக்கும்! 

நெல்லைத்தமிழன்: 

இப்போதெல்லாம் கடை உணவுகளில் காரம் மிக அதிகமாக இருக்கிறது. இதை நான் சென்னை, கேரளா மற்றும் கர்நாடகாவில் காண்கிறேன். இது மது அதிகமாக உட்கொள்வதால், மக்களுக்கு காரம் அதிகமாகத் தேவையாக இருக்கிறதோ? இல்லை சைட் டிஷ் வியாபாரத்தை எதிர்பார்த்து இதனைச் செய்கிறார்களா?

# மது வணிகம் இன்று நேற்றா வந்தது ? 

அதிகம் வெளியில் சாப்பிடுவதில்லை என்பதால் இது எனக்குப் புது செய்தி.  எனவே pass.

& எனக்கும் அதிக காரமும் ஒத்துக்கொள்ளாது; வெளியிடத்து சாப்பாடும் ஒத்துக்கொள்ளாது. 

எதற்காக முதியோர்களுக்கு இரயில் பயணச் சீட்டில் சலுகை விலையில் டிக்கெட் வழங்கவேண்டும் (40 சதம் விலை குறைவு)?  பாஜக அரசு அதனை நிறுத்தியதில் என்ன தவறு?

# நானும் இம்மாதிரி சலுகைகள் கூடாது என்ற கட்சிதான்.

& நான் ரயில் பயணம் செய்து ஒரு மாமாங்கத்துக்கு மேல் ஆகிவிட்டது. ஒருவேளை முதியவர்கள் வருமானம் இல்லாதவர்கள் என்பதால் சலுகை அறிவிக்கப்பட்டிருக்கலாம்.  எனக்குத் தெரியவில்லை. 

கர்நாடகாவில், காங்கிரஸ் கட்சி, 200 யூனிட் மின்சாரம் இலவசம் மாதம் 2000 ரூபாய் பெண்களுக்கு வழங்கப்படும் (ஒரு ரேஷன் கார்டுக்கு), 20 கிலோ அரிசி இலவசம் என்று சொல்லியிருக்கிறதே.இப்படி இலவசங்கள் வழங்குவேன் என்று சொல்வது லஞ்சமாகாதா?  இது, கர்நாடகா தேர்தலில் வெற்றியை அளித்தால், அடுத்து காங்கிரஸ், மத்தியில் ஆட்சிக்கு அமர்த்தினால் வருமான வரியை 5 சதமாகக் குறைப்பேன் என்றும் டூப் வாக்குறுதி வழங்கிப்பார்க்கலாமே. 

# லஞ்சம் கொடுப்பது போலதான். தி மு க வழியைப் பின்பற்றிச் செய்கிறார்கள். பெண்களுக்கு 1000 , 2000 எல்லாம் மிகத் தவறான திட்டம்.  இம்மாதிரி தவறுகள் தலை எடுத்தால்  களைவது கடினம். பொறுப்பற்ற தந்திரம்.

= = = =

எங்கள் கேள்விகள் : 

1) பள்ளிக்கூட / கல்லூரி நாட்களில் நீங்கள் அதிக மதிப்பெண் பெற்றது எந்தப் பாடத்தில்?

2) இதுவரையில் நீங்கள் அதிக முறைகள் (தியேட்டர் / தொலைக்காட்சி ) பார்த்த திரைப்படம் எது?

3) சிறிய வயதில் நீங்கள் அதிகம் விரும்பி விளையாடிய விளையாட்டு எது?

4) தொலைக்காட்சியில் ஒரு சினிமா பாடல் காட்சி - பிறந்தநாள் கொண்டாடும் ஒரு குழந்தையை சுற்றி சந்தோஷமாக ஆடிப்பாடுகிறார்கள் மற்றவர்கள். உங்கள் கற்பனையில் நீங்கள் பிறந்தநாள் கொண்டாடும் அந்தக் குழந்தையாக இருப்பீர்களா - அல்லது பாடுபவராக இருப்பீர்களா அல்லது ஆடுபவராக இருப்பீர்களா அல்லது வெறும் பார்வையாளராக இருப்பீர்களா? 

 = = = = = =

அப்பாதுரை பக்கம் :

பொன்மகள் வந்தாள்! 

பெண்ணுக்குக் கல்யாணம் என்றவுடன் இத்தனை நகை இத்தனை வரதட்சணை (இன்னும் தருகிறோமா?) இத்தனை பாத்திரம் பண்டம் இத்தனை விருந்து இத்தனை வேட்டி புடவை இத்தனை வழிச்செலவு இத்தனை தட்சணை இத்தனை தாம்பூலம் இத்தனை மொய் என்று செலவு வரவு (?) கணக்கு பார்த்துக் கலங்கிய காலம் பழங்காலமா? 

பட்டணத்து மாப்பிளைக்கு பெங்களுரு பொண்ணு.  பெங்களுரு பொண்ணு கல்யாணத்துக்கு, சரியா படிச்சுக்குங்க, 1500 பேருக்கு அழைப்பு அனுப்பினாங்க பெத்தவங்க. எப்படி? 12 அங்குல ஐபேட்ல அழைப்பு விடியோவை 1500 பேருக்கும் அனுப்பி வச்சாங்க! 

 

அஞ்சு நாள் கல்யாணம். அஞ்சாம 2000 பேர் வந்தாங்களாம். வந்தவங்களுக்கு பெங்களுரு வட்டார நட்சத்திர ஓட்டல்களில் அறைகள். தங்கச் சரிகை எங்கும் பளபளக்கும் உடைகள்.  அத்தனை பேருக்கும் தங்க சங்கிலி. 

மாப்பிள்ளை வீட்டார் அத்தனை பேருக்கும் அரச பாரம்பரிய உடைகள்.  பெண் கட்டிய முகூர்த்தப் புடவை பதினேழு கோடி. (பதினெட்டு கோடிக்குக் கேட்டுப் பாத்திருப்பாங்க. புடவைக் கடைக்காரர் முடியவே முடியாது, கடைசி விலை பதினேழு கோடின்னதும் புலம்பிக்கிட்டே வாங்கியிருப்பாங்க). கல்யாணத்தன்றைக்கு பெண் அணிந்த நகைகள் 90 கோடியாம். ரிசப்ஷன் போது அணிந்த நகைகள் இதெல்லாம் கணக்கு தனி. கல்யாணம் ரிசப்ஷன் இரண்டுக்கும் பெண் மற்றும் தோழியர் ஒப்பனைக்கு செலவு முப்பதே முப்பது கோடி. இதுக்கு மேலே எழுதினா குமட்டுது. விட்டுர்றேன்.

செய்தி: Former Karnataka Minister Janardhana Reddy spent over Rs 500 crores for his daughter's marriage.

வால்:

திருமண நிச்சயப் பத்திரிகை படிக்கும் வாய்ப்பு சமீபத்தில் கிடைத்து. வாழ்விலே முதன் முறை. நான் படித்த சில நிபந்தனைகள் (கல்யாண நிச்சய பத்திரிகையில்!):

- வாரத்தில் மூன்று நாட்களுக்கு மேல் பெண் சமையல் செய்ய மாட்டாள்

- பெண் சம்பளம் எத்தனை உயர்வு எத்தனை போன்ற கேள்விகளை பிள்ளை வீட்டார் கேட்கக் கூடாது

- பெண்ணின் வேலை மும்பையில், பையனின் வேலை பெங்களூரில். பெண் தனக்குப் பிடித்த வேலை பெங்களூரில் கிடைக்கும் வரை மும்பையில் தான் வாசம். இரண்டு மாதத்துக்கு ஒரு முறை பிள்ளையும் பெண்ணும் மும்பை பெங்களுரு என்று மாற்றி மாற்றி வீட்டில் அல்ல ஓட்டலில் வாசம் (கோர்ட்யார்ட் மேரியட் தர ஓட்டல் - பெயர் கூட குறிப்பிட்டு)

படித்த எனக்கு இருந்த சங்கடம் பக்கத்தில் இருந்த பெண் பிள்ளைக்குக் காணோம்.

கொசுறு:

அமெரிக்கால வீட்டுக் கதவை முதலை தட்டுனா நம்ம ஊர் மட்டும் என்ன குறைஞ்சா போயிடும்?

நம்மூரு கேரளால பத்தனம்திட்டானு ஊரு. திட்றாப்ல இருந்தாலும் அதான் பேரு. 

அந்த ஊர் வாசி சோமராஜன். ஒரு நாள் காலைல எழுந்து குளக்கரை போயிட்டு வந்தவர் வீட்டுத் திண்ணைல ஆஜானுபாகுவா உக்காந்திருந்துச்சாம் ஒரு பெரிய புலி.  கிலில ஓட்டம் பிடிச்ச சோமராஜன் பக்கத்து ஊர் மணியார் வனத்துறை அதிகாரி வீட்டு வாசல்ல தான் நின்னாராம். அதிகாரி நிலவரத்தை விசாரிச்சு எல்லாரும் வீட்டுலயே இருங்கனு அறிக்கை விட்டிருக்காராம். பலே.

மார்ச் 10 செய்தி: Police have directed the public to halt rubber tapping works for a week. The attacks of tiger, leopard, boars and bisons have reportedly increased in the high ranges of the southern districts.

வால்:

வீட்டுவாசல்ல புலி இருக்குதுனு தானே நிங்களிடம் அலறியோடி வந்தது? வீட்டுக்குள்ள போனாத்தானே நீங்க சொல்றாப்ல வீட்டுலயெ இருக்க சாத்தியம்? நிங்கள் எந்தா மகாஞானஜோதியோனு போலீசை நல்லா கேக்க வேணாமோ சோமராஜன்?

= = = = =