சிறுகதை - பெரியதம்பி - துரை செல்வராஜூ

 பெரியதம்பி

***************

" வாங்க பஞ்சநதம்... "

வாஞ்சை குறையாத வரவேற்பு.. 

பெரிய வீடு என்பதால் சொல்ல வேண்டுவதில்லை..

காவிரிப் பாசனத்தில் ஐம்பது ஏக்கர்.. தொன்று தொட்டு வரும் சாகுபடி. ஒவ்வொரு போகத்துக்கும் சும்மா ரெண்டு தடவை போய் பார்த்து விட்டு வந்தால் போதும்.. மூட்டை மூட்டையாய் நெல்லை வீட்டுக்கு அனுப்பி விடுவாள் தாய் எனும் காவேரி..

ரொம்ப காலமாகவே இதுதான் வழக்கம்.  என்ன ஒரு வித்தியாசம் என்றால்,

அன்றைக்கு உழவு மாடுகளோடு சரிக்கு சரியாக மனிதர்கள்..

இன்றைக்கு விவசாயத்தில் ஆள் பண்ணையம் என்பதே இல்லை..  

எல்லாருக்கும் சுதந்திரம்.. சுதந்திரத்தால் வந்தது எல்லாம் எந்திரம்.. எந்திரத்திற்கு நாலு ஆள் என்பதே அதிகம்.. 

ஏன்..  சனத்தொகை குறைந்து விட்டதா என்றால் சாகுபடி வேலைக்கு மட்டுமே ஆள் வருவதில்லை..

தினசரி ரெண்டு ரயில் பெங்களூருக்கு வழிய வழிய  போகுதே..  திருப்பூருக்கு போற பஸ்ல எல்லாம் கூட்டமான கூட்டம் தானே!..

இங்கே நம்ம பூமிக்கு மட்டும்  முகம் காட்டுறதுன்னா கஷ்டமா இருக்கு.. முன்பெல்லாம்  வெளையாத மண்ணைப் பார்த்து - வானம் பார்த்த பூமின்னு சொல்லுவாங்க.. இப்போ வானம் முகங் காட்டுனாலும் மனுசன் முகங்காட்டுறது இல்லை.. 

ஆத்துல தண்ணி ஓடுனாலும் பாதிக்கு மேல விளைச்சல் இல்லாத பூமின்னு ஆகிட்டது..

ஆதாயம் இல்லாத வேலைன்னு யாரும் மெனக்கெடறது இல்லை.. அதனால  திடலாக்கிப் போட்டு வந்த விலைக்கு வித்து தின்னுட்டுப் போயிடறாங்க

 

மனிதன் காலத்தை மாற்றுகின்ற காலம் இப்போது.. 

இன்றைய சூழலில் இப்படியும் சிலர்..

" வர்றேன்.. பெரியதம்பி!.. " வாசலில் சைக்கிளை நிறுத்தி  அங்கேயே செருப்பையும் கழற்றிப் போட்டு விட்டு கையில் ஒரு பையுடன் வந்த பஞ்சநதம்  திண்ணையில் அமர்ந்தார்..

சுற்றிலும் முப்பது கிலோ மீட்டருக்கு இவர் தான் சமையல் சக்கரவர்த்தி..

பஞ்சநதம் மாதிரி  யாரும் கிடையாது.. சொல்லி அடிக்கிற மாதிரி சாம்பார் ரசம் வத்தக்குழம்பு.. உட்கார்ந்து சாப்பிடுகிற யாருக்கும் எழுந்திருக்க மனம் வராது..

பொண்ணு பார்த்து நிச்சயம் பண்ற போதே இவர் கிட்ட தேதி கேட்டு வாங்கிக் கொள்வது என்றொரு பேச்சும் உண்டு ஊருக்குள்.. அந்த அளவுக்கு பிரசித்தம்..

" நியாயமா நாந்தான் தேடி வந்திருக்கணும்.. உள்ள வந்து உட்காருங்க.. " - என்று அழைத்து முன் கூடத்தில் நாற்காலியில் அமர வைத்தார் பெரிய தம்பி எனப்பட்ட சுவாமிநாதன்..

முகத்தில் மாறாத புன்னகை..

" அதென்ன அப்படி சொல்லிட்டிங்க!..  உங்க குரல கேட்டு ஓடி வர மாட்டேனா.. "

" ஏதோ ஒரு அன்புல பேர் சொல்லிக் கூப்பிடுறேனே தவிர உங்களுக்கு எங்க அப்பா வயசு!.. "

" சிவ சிவா.. அவங்கள்ளாம் தெய்வம் மாதிரி.. மூணு தலைமுறைக்கு மேலா திருவையாத்து பல்லாக்கு பாக்க வர்ற ஜனங்களுக்கு அன்னதான விருந்து பண்ணி வெச்சவங்களாச்சே.. "

பஞ்சநதத்தின் மனத் திரையில் கடந்த காலக் காட்சிகள் விரிந்தன..

நினைவு தெரிஞ்ச நாள்ல இருந்தே - பெரிய வீட்டு வாசல்ல தெருவடைச்ச பந்தல் போட்டு,  வாழை மரம் கட்டி பனையும் பாக்கும் தென்னங்குலையுமா மாவிலைத் தோரணம் ஆடிட்டு இருக்கும்.. 

ஆரவாரத்தோட வர்ற பல்லாக்குகள் கடைக்கால் போட்டு பந்தல்ல நிக்கும்... அரை மணி நேரத்துக்கு மேளக் கச்சேரி.. மண்டகப்படி தீப ஆராதனை முடிஞ்சதும் வீட்டுல உள்ள எல்லாரும் விழுந்து கும்பிடுவாங்க..

ஐயருங்களுக்கும் நாதஸ்வர கோஷ்டியாருக்கும் சம்பாவனை... பல்லக்கு தூக்கும் ஆட்களுக்கும் பாதந் தாங்கிகளுக்கும் வேட்டி துண்டு.. 

அவ்வளவு ஏன்?.. 

பட்டறை  வண்டியை இழுத்துக்கிட்டு வர்ற மாடுகளுக்கும் கொம்புல பரிவட்டம் கட்டி பருத்திக் கொட்டை புண்ணாக்கும் பச்சரிசி தவிடும் வெச்சி கொண்டாடும் குடும்பம் இது.. 

பரம்பரை பாரம்பர்யம் இவங்களை விட்டுட்டு வேற எங்கே போகும்!..

" அது இருக்கட்டும்... இப்போ எதுக்குக் கூப்பிட்டிருக்கேன் தெரியுமா?.. "

நிகழ் காலத்துக்கு மீண்டு வந்தார் பஞ்சநதம்..

" சொல்லுங்க கேட்டுக்கறேன்.. பெரிய குழந்தைக்கு கலியாணம் குறிச்சாச்சா?.. அப்படின்னா நளபாகம் உக்ராணம் பண்றதுக்கு என்னய கூப்பிட்டிருப்பீங்களே!.."

சிரித்தார் பஞ்சநதம்..

" வைகாசிக்கு மேலதான் அந்தப் பேச்சயே எடுக்கணுமாம்.. இது பல்லாக்கு விஷயம்.. திருவையாறு கோயில்ல கொடியேத்த நாள் குறிச்சாச்சு.. இன்னைக்கி சரியா முப்பதாம் நாள் நம்ம ஊருக்கு பல்லாக்கு வருது!.. "

" அடடே... மறந்தே போய்ட்டேன்..  கோட்டை அடுப்பு புகையில நிக்கிறதுல கண்ணு எரிச்சல்.. பேப்பர் பார்க்கறதும் இல்லை.. படிக்கறதும் இல்லை..

அப்போ உத்தேசமா ஆயிரத்து ஐநூறு பேருக்கு சாப்பாடு?.. " - நேராக விஷயத்துக்கு வந்தார் பஞ்சநதம்..

" அந்தக் கணக்கு எல்லாம் யாருக்குத் தெரியும்?..  பல்லாக்கு வந்து இருந்து மறுபடியும் புறப்படற வரைக்கும் வழக்கம் போல தான்.. "

" சரி!.." 

"  மீனாட்சியக்கா வீட்ல வெளியூர்ல இருந்து வர்ற முன்னூறு அடியார்களுக்கு மகேஸ்வர பூஜை..  காலை சாப்பாடு.. இட்லி, பொங்கல், கேசரி காஃபி.. அது தனி..  "

" சரி!.. "

" நம்ம வீட்டுப் பந்தல்ல மத்தியானம் வரைக்கும் நீர் மோர் பானகம்.. பதினோரு மணிக்கு மேல சாப்பாடு. இந்த வருசம் மேஜை போட்டு.. " 

"அப்படியா!.. "

" தஞ்சாவூர்ல இருந்து அவங்களே கொண்டு வந்து போட்டு நிர்வாகம் பண்ணிக்கிறாங்க.."

" நமக்கு ஏத்து கூலி எறக்கு கூலி மிச்சம்!.. " மெல்லிய சிரிப்பு..

" அதுவுமில்லாம குனிஞ்சு நிமிர்ந்து  பரிமாற யாருக்கும் இடுப்புல தெம்பு இல்லே..  தரையில உட்கார்ந்து எழுந்திரிக்க மூட்டுலயும் சத்து இல்லே!... " 

" அதுவும் சரிதான்!.. "

" அது பத்திப் பேசறதுக்குத் தான் உங்கள வரச் சொன்னேன்!.. "

" அப்போ பெரிய பட்டியலா இருக்குமே!.." - பஞ்சநதம் வியந்தார்..

பெரியதம்பி முகத்தில் மலர்ச்சி.. 

" இருக்கட்டும்.. இப்ப கை வசம் பதினைஞ்சு மூட்டை பொன்னி..  நூறு கிலோ துவரம் பருப்பு, அஞ்சு டின் கடலெண்ணெய் இருக்கு.. தேங்காய்க்கு பிரச்சினை இல்லை..  இன்னும் வேணுங்கறதை ஒரு வாரத்துக்கு முன்னால எடுத்துக்கலாம்.. "

" கடலெண்ணெய் தேவைக்கு அதிகம்.. " மெல்லிய குரலில் பஞ்சநதம் சொன்னார்..

" வடை, அப்பளத்துக்கு வேணாமா?.. "

"  பாமாயில் இருக்கே!.. "

" பாமாயில் திருப்தி இல்லை.. பலதரப்பட்டவங்களும் வர்றாங்க. இப்போதான் சின்ன வயசு பசங்களுக்குக் கூட  புதுசு புதுசா பிரச்சனைங்க வந்துக்கிட்டு இருக்கே.. "

"  எல்லாம் கெரகம்.. "

" நாலு காய் போட்டு சாம்பார், வற்றல் குழம்பு, ரசம் மோர்,  கோஸ் பொரியல்,  புடலங்காய் கூட்டு, பட்டாணி உருளைக் கிழங்கு மசாலா , தயிர்ப் பச்சடி, ஊறுகாய், அப்பளம் வடை பாயசம்!.. " - விவரித்தார் பெரியதம்பி..

"தாராளம்.. தாராளம்!.. "

" முக்கியமா ஒரு விஷயம்.. உங்களுக்கு தெரியாதது இல்லை.. உப்பு புளி காரம் மூணும் ஒரு கை கம்மியாவே இருக்கட்டும்.."

" நீங்க சொன்னா சரி..  இதுக்கு மேல வேற என்ன வேணும்.. பகவான் அனுக்ரகம் தான்!.. "

பஞ்சநதம் வானத்தை நோக்கிக் கை கூப்பினார்..

" ஆனா.. அதுல பாருங்க தம்பி!.. " -  ஒரு நிமிடம் பஞ்சநதம் தயங்கினார்..

" சொல்லுங்க.. "

" தோராயமா ஆயிரத்து ஐநூறுன்னு வெச்சுக்குவோம்..  நாலு தடவையா  வடை போட்டு எடுத்துக்கலாம்.. அதுக்கு மேல தேவைன்னா உளுந்தம் பருப்பு ஊற வெச்சு கழுவி எடுத்து அரைக்கணும்.."

" சரி.. " - பெரியதம்பியின் முகத்தில் யோசனை..

" அதுக்கு மேல ஜனங்க கூட்டம் ஜாஸ்தி ஆகிடுச்சின்னா உளுந்து ஊற வெச்சு அரச்சு எடுக்கறது கதைக்கு ஆகாது.. அதனால.. "

" அதனால?.. "

" கைக்கு அவசரமா பஜ்ஜி போட்டுடலாம்.. நாலு சீப்பு மொந்தன் காய் மட்டும் தனியா இருக்கட்டும்.. "

" இருக்கட்டுமே!.. அதெல்லாம் உங்க இஷ்டம்.. நீங்க தீர்மானம் பண்ணிக்குங்க..  கைக்கு எத்தன ஆள் வேணுமோ வச்சிக்குங்க!.. "

" எங்கிட்ட முப்பது பேர் இருக்காங்க.. இன்னும் இருபது பேர சேர்த்துக்குவோம்!.. " - பஞ்சநதம் கணக்கிட்டார்..

" வேலையாளுக்குப் பிரச்னை இல்லை.. தெருக்காரங்களும் ஒத்தாசைக்கு வருவாங்க..  எல்லாம் நல்லபடியா இருக்கணும்.. அவ்வளவு தான்!.. "

" இருக்கும்.. இருக்கும்..  உங்க மனசு போல எல்லாம் நல்லா இருக்கும்.. "

" இன்னைக்கு நாள் நல்லா இருக்கு.. உங்க கையால பிள்ளையார் சுழி போட்டுட்டீங்கன்னா சந்தோஷம்!.. "

" போட்டுடுவோம்!.. " பஞ்சநதத்தின் வார்த்தைகளில் உற்சாகம்..

" செல்வி!.. "

 " என்னப்பா?.. "

மின்னல் என ஓடி வந்து நின்றாள் இளைய மகள்..

" உள்ளேயிருந்து ரெண்டு வெள்ளைத்தாள், பேனா.. எடுத்துக்கிட்டு வாம்மா.. "

" தம்பி.. நான் இந்த வருசம் அறை சாமானுங்களுக்குன்னு  தனி நோட்டு போட்டுட்டேன்.. அரிசி பருப்புல இருந்து அத்தனை மளிகைச் சாமான்களும் இதுல இருக்கு..  மனைப் பலகையில இருந்து  தண்ணி டிரம் ஜமக்காளம் வரைக்கும் சேர்த்து அச்சடிச்சாச்சு.. ஒன்னொண்ணுக்கும் தேவை எழுதிட்டா போதும்!.. "  - என்று சிரித்தபடி கைப் பையைத் திறந்தார் பஞ்சநதம்..

" அப்படியா.. சரி... தாம்பூலத் தட்டு எடுத்துக்கிட்டு  அம்மாவ வரச் சொல்லுமா செல்வி!. "

" ம்.. " என்றபடி அந்தப் பெண் வீட்டுக்குள் ஓடினாள்..

சில விநாடிகளில் பெரிய தம்பியின் இல்லத்தரசி கையில் வெற்றிலை பாக்கு தட்டுடன் வெளிப்பட்டாள்..

அந்தத் தட்டில் மஞ்சள் தடவப்பட்ட தேங்காயுடன்   புத்தம் புதிதாய் ஐம்பது ரூபாய் கட்டுகள் இரண்டு இருந்தன..

"  வாங்கிக்கங்க பஞ்சநதம்!.. "

" ஐயாறா.. ஐயாறா!.. " - என்றபடி தாம்பூலத்தை வாங்கிக் கண்களில் ஒற்றிக் கொண்ட  பஞ்சநதம் கையில் இருந்த நோட்டுப் புத்தகத்தின் முதல் பக்கத்தில் பிள்ளையார் சுழியுடன் எழுத ஆரம்பித்தார்..

அறம் வளர்த்த நாயகி துணை

அன்னதானப் பிரியை நமோ நமஹ..

***

பிற்சேர்க்கை : (24-05-2023) 

இந்தப் படம் சரியாக இருக்கிறதா?