"திங்க"க்கிழமை : தக்காளி Sauce - துரை செல்வராஜூ ரெஸிப்பி

 தக்காளி Sauce 

தக்காளிப் பழம் 250 கிராம்

நாட்டுச் சர்க்கரை - 2 tbsp

மிளகாய்த்தூள் -  1 tbsp

சின்ன வெங்காயம் 100 கிராம்

பூண்டு - 3 பல்

இஞ்சி - சிறு துண்டு

பட்டைத்தூள் - 1/4 tsp

கிராம்புத்தூள் - 1/4 tsp

எலுமிச்சைச் சாறு - 2 tbsp

உப்பு - 1/2 tbsp

நல்ல தக்காளியாக வாங்கிக் கொள்ளவும். பழுத்தது தான் ஆனால் கனிந்திருக்கக் கூடாது..

அப்போதுதான் சாஸ்  நன்றாக இருக்கும். 

வீட்டில் அரைத்த மிளகாய்த் தூள் எனில் சாலச் சிறந்தது..

பட்டை கிராம்பு இவற்றை உலர்த்தி நாமே அரைத்து வீட்டில் வைத்திருப்பதும் நல்லது..

இனி செய்முறை:

ஒரு பாத்திரத்தில் நீரைக் கொதிக்க வைக்கவும்.. தண்ணீர் கொதித்ததும் அதில்  தக்காளிகளை இட்டு மூடி அடுப்பையும் நிறுத்தி விடவும்..

வெங்காயம், பூண்டு, இஞ்சியைக் கழுவி தோல் நீக்கி  மெலிதாக நறுக்கிக் கொள்ளவும். 

கொதி நீரில் இருந்து தக்காளிகளைத் தனியே எடுத்து தோலை உரித்து விடவும். 

தக்காளியுடன் மிளகாய்த் தூள், உப்பு, சர்க்கரை, இஞ்சி, பூண்டு,  பட்டை, கிராம்பு தூள் எல்லாவற்றையும் சேர்த்து  மிக்ஸியில் இட்டு நன்றாக அரைத்து வடிகட்டியில்  வடித்து எடுத்துக் கொள்ளவும். 

வடிகட்டிய தக்காளி விழுதுடன் எலுமிச்சைச் சாறு சேர்த்து கலக்கி -

வேறொரு பாத்திரத்தில் ஊற்றி  அடுப்பில் மிதமான சூட்டில் வைத்து நன்றாகக் கிளறவும். இந்த விழுது நீர்க்க இருக்கக் கூடாது. 

பதமாக வந்தவுடன்  அடுப்பிலிருந்து இறக்கி  ஆறியதும் சுத்தமான கண்ணாடி பாட்டிலில் ஊற்றி மூடி வைத்துக் கொள்ளவும். 

Fried Rice, Noodles, Macaroni,

Spaghetti, Cauliflower Manchurian,

Potato Wedges ஆகிய எல்லாவற்றுக்கும் இது கூட்டாளி ஆகிவிடும்..

ரசாயனக் கலப்பற்ற இது இருவருக்கானது.. இரண்டு நாட்கள் அறை வெப்ப நிலையில் வைத்துக் கொள்ளலாம்..

நம்முடைய நலம் நம்முடைய கையில்!..

***