நான் தரிசனம் செய்த கோவில்கள்:: அஹோபில நவ நரசிம்ஹர் யாத்திரை:: நெல்லைத்தமிழன்

 

அஹோபில நவ நரசிம்ஹர் யாத்திரை– பகுதி 14

ஒண்டிமிட்டா என்ற இடம், கடப்பாவிலிருந்து (ஆந்திரா) 25 கிமீ தூரத்தில் இருக்கிறது. இங்கிருக்கும் கோதண்டராமர் கோவில் மிகவும் புகழ்பெற்றது.  தாளப்பாக்க அன்னமாச்சார்யா என்ற புகழ் பெற்ற கவிஞர், இந்த ராமரைப் பற்றி பல கீர்த்தனங்கள் பாடியிருக்கிறார். (திருப்பதி கோவிலில் தாளப்பாக்கம் அன்னமாச்சார்யா கீர்த்தனைகள்தாம் ஒலிக்கின்றன, எம்.எஸ். பாடிய கேசட்டுகளின் வடிவில். தெலுங்கு தேச மக்களுக்கு தாளப்பாக்கம் அன்னமாச்சார்யா, நம் பஞ்சரத்ன கீர்த்தனைகள் இயற்றிய தியாகராஜர் போன்றவர்.)

இந்தக் கோவிலை, முதலில் கொள்ளையர்களாக இருந்த வொண்டுடு மற்றும் மிட்டுடு என்ற இருவர், மனம் திருந்தி, இராம பக்தி கொண்டு, கட்டினார்களாம். இந்தக் கோவில் அமைந்திருக்கும் (அதாவது முழு வட்டாரமுமே) முந்தைய காலத்தில் கிஷ்கிந்தா எனப்பட்ட இடமாக இருந்த தாம். அதாவது, கிஷ்கிந்தா காண்டம் முழுவதுமே இந்த regionல்தான் நடைபெற்றதாம்.  இந்தக் கோவிலின் மூலவர், இராமர், சீதை, லக்ஷ்மணன், ஒரே கல்லினால் செய்த விக்ரஹங்கள். 16ம் நூற்றாண்டில் விஜயநகர கட்டிடக் கலையின் வடிவமாக சீர்படுத்தப்பட்டது இந்தக் கோவில்.

எங்களை ஆஞ்சநேயரைச் சேவித்துவிட்டு பிறகு கோதண்டராமர் கோவிலுக்குச் சென்றுவிட்டு அரை மணி நேரத்தில் சாப்பிட வரச் சொன்னார்கள். எல்லோரும் கோதண்டராமர் கோவிலை நோக்கிச் சென்றோம்.

நுழைவாயிலுக்குச் செல்வதற்கே 20 படிகளுக்கு மேல் ஏறிச் செல்லவேண்டும். பிரம்மாண்டமான அமைப்பு. மிகப்பெரும் நுழைவாயில் (20 அடிகளுக்கு மேல் உயரம்) நுழைவாயிலைக் கடந்து, த்வஜஸ்தம்பம் உள்ளது. அதைத் தாண்டி ரங்கமண்டபம் இருக்கிறது. 32 கற்றூண்களைக் கொண்ட இந்த மண்டபத்தில் அழகிய சிற்பங்கள் பல உள்ளன. இதில் அவ்வப்போது ராமகாதையை தெலுங்கில் பாடுவது, ப்ரவசனம் செய்வது போன்ற நிகழ்வுகள் நடக்கின்றன. இந்த மண்டபத்தைத் தாண்டி, கர்பக்ரஹத்துக்கு முன்பு இன்னொரு மண்டபம் உள்ளது (அர்த்த மண்டபம் அல்லது அந்தராலயம்). அதிலும் சிற்பங்கள் இருப்பதாகச் சொல்கின்றனர். அவற்றை முழுவதுமாகக் கவனிக்கும் அவகாசம் இல்லை, ஏனென்றால் மூலவர் தரிசனத்துக்காக இந்த இடத்தில் பக்தர்களின் வரிசை நெருக்கமாக இருந்தது.  திருப்பதி தேவஸ்தானம் 2021ல் நிர்வாகத்தை கவனிக்க ஆரம்பித்ததிலிருந்து, நிறைய மின்சார விளக்குகளை பிரகாரத்தில் ஏற்றி, கோவிலையும் மிகவும் சுத்தமாக வைத்திருக்கிறார்கள்.

எல்லா இடங்களிலும் இருப்பதுபோல, கோதண்ட ராமர் சன்னிதியைப் பார்த்தவாறு, கோவிலுக்கு எதிர்புறத்தில் சஞ்சீவராயர் கோவில் என்று ஆஞ்சநேயர் கோவில் உள்ளது (எந்த ஊரில் நீங்கள் ஆஞ்சநேயர் கோவிலோ இல்லை இராமர் கோவிலோ பார்த்தால், அதன் எதிரில் இராமர் சன்னிதியோ இல்லை ஆஞ்சநேயர் சன்னிதியோ இருக்கும்)

கர்பக்ரஹத்தின் அருகில் மூலவரைச் சேவிக்க 25 ரூபாய் வாங்குகின்றனர். அதன் காரணம், கோவில் சம்பந்தப்பட்ட பணிகளுக்குத் தேவையான பணம் சிறிது கிடைக்கும் என்பதுதான்.

விஜயநகரப் பேரரசின் காலத்தில் நிறைய கட்டுமானங்கள் நடைபெற்றிருக்கின்றன. சிற்பக்கலை உச்சத்தில் இருந்தது என்று நிச்சயம் சொல்லலாம். நிறைய சிற்பங்களைப் பார்த்துவிட்டோம். அடுத்த வாரம் யாத்திரைத் தொடரின் இறுதிப்பகுதி. 

= = = = = =