நான் தரிசனம் செய்த கோவில்கள்:: அஹோபில நவ நரசிம்ஹர் யாத்திரை:: நெல்லைத்தமிழன்

 

அஹோபில நவ நரசிம்ஹர் யாத்திரை– பகுதி 15

கடப்பா அருகிலுள்ள ஒண்டிமிட்டா கோதண்டராமர் கோவிலில் உள்ள சிற்பங்களை நாம் பார்த்துக்கொண்டு வந்தோம். அதன் தொடர்ச்சியாக இந்த வாரம்.

நான் கோவிலை மாத்திரம்தான் படம் பிடித்தேன். கோவிலுக்கு வெளியே 200 மீட்டர் தொலைவில் திருக்குளம் உள்ளது. அதற்குச் சிறிது தள்ளி Rest rooms. இடையில் உள்ள இடங்களெல்லாம் பூங்கா என்று மிக அழகாகத் திட்டமிட்டு அமைத்திருக்கிறார்கள் (இதெல்லாம் சமீப கால அமைப்பு). அந்த இடங்களை, கொஞ்சம் இருட்டில் நான் படம் எடுக்கவில்லை (Rest room இருக்கும் திசையைப் பார்த்து கேமராவைக் காட்டினால் அடிவாங்குவது யார்?)

(இதுபோன்று, பாரீஸ் லூவர் மியூசியத்தில், அழகான பஞ்சணையில் படுத்திருப்பவரை ஒரு புறத்திலிருந்து பார்த்தால் அழகிய ஆணாகவும், இன்னொரு புறத்திலிருந்து பார்த்தால் அழகிய பெண்ணாகவும் தெரியும். அந்தப் பஞ்சணை, நிஜமான மெத்தையா என்று தொட்டுப் பார்த்தேன்..அவ்வளவு அழகு. பளிங்கில் செய்தது. அதை எங்கள் பிளாக்கில் பகிரணும் என்று எனக்கு எண்ணம். அதுபோல, பலவிதமான சரித்திரச் சிற்பங்கள்/பளிங்குச் சிலைகள் அந்த மியூசியத்தில் உண்டு. ஏராளமான ஓவியங்கள். ஆனால் nudity என்பது இயல்பாக இருக்கிறது.  ‘கலைக்கண்’ பலருக்கு இல்லை, அதனால் கூடாது என்று கௌதமன் சார் சொல்லிவிட்டார். அதற்காக சில பாகங்களை blur பண்ணினால், மொத்த artன் அழகு குறைந்துவிடும். Artஐ ரசிப்பதற்குப் பதிலாக, blur செய்த இடத்தில் என்ன இருந்திருக்கும் என்பதில்தான் நம் கவனம் செல்லும். ஆமாம் ‘கலைக்கண்’ எங்கு கிடைக்கும்?)

கோவிலை நன்றாகச் சுத்திப் பார்த்தேன். அதற்கு முன்பு கோதண்டராமர் சன்னிதியில் தரிசனம். 

ஒற்றைக்கல்லில் செய்த இராம சீதா லக்ஷ்மண விக்ரஹங்கள். மூலவர் சந்நிதி.

கோவிலில் சில பல இடங்களில் நான் நின்றுகொண்டு சில புகைப்படங்கள் எடுத்துக்கொண்டேன். ஆஞ்சநேயர் கோவில் அருகில் உள்ள இடத்தில், இரவு உணவாக புளியோதரை, வடகம் மற்றும் தயிர்சாதம், எலுமிச்சை ஊறுகாய் கொடுத்தார்கள். எனக்கு புளியோதரை, பயணத்தின்போது ஒத்துக்கொள்ளாது என்பதால் தயிர்சாதம் மாத்திரம் சாப்பிட்டேன்.

பிறகு யாத்திரை நடத்தியவர், தன் குழுவினருக்கு அவர்களுக்கான ஊதியத்தையும், எல்லோர் முன்னிலையில் பாராட்டையும் வழங்கினார் (ஒவ்வொருவருக்குமான அன்பளிப்பை, யாத்திரைக்கு வந்தவர்களில் முக்கியமானவர்களைக் கூப்பிட்டுக் கொடுக்கச் சொன்னார்).  பிறகு எந்த எந்த இடங்களையெல்லாம் தரிசித்தோம் என்று மீண்டும் நினைவுகூறும் விதமாக விளக்கமாகச் சொன்னார். நான் கேட்டுக்கொண்டதற்கிணங்க, அங்கு வெளிச்சம் நன்றாக இருந்ததால், அனைவரும் குழு புகைப்படம் எடுத்துக்கொண்டோம்.

இரவு 9 மணி வாக்கில் ஒண்டிமிட்டாவிலிருந்து சென்னையை நோக்கிக் கிளம்பினோம். அசதி, குளிர்சாதன வசதியுள்ள பேருந்து…ஓரளவு நன்றாகத் தூங்கினோம். அதிகாலை 3 மணிக்கு, அசோக் நகர் உதயம் தியேட்டர் பக்கம் நாங்கள் இறங்கிக்கொண்டோம். உறவினர் இடத்திற்கு ஆட்டோவில் சென்றோம். (ஆட்டோக்காரர்களின் அநியாயத்தை ஸ்ரீராம் ஏற்கனவே எழுதியிருக்கிறார். சென்னை ஆட்டோக்கொள்ளையர்கள்….sorry தட்டச்சுப் பிழை.. ஆட்டோக்காரர்கள் Ola, Uber etc system எல்லாவற்றையும் ஏய்த்து, வாடிக்கையாளர்களிடம் அடாவடி செய்து தொழில் பண்ணுபவர்கள் ஆயிற்றே). எனக்கு காலையில் 7:40க்கு பெங்களூருக்கு சதாப்தி இரயிலில் டிக்கெட். ஒரு மணி நேரம் தூங்கியபிறகு, வேறு வழியில்லாமல் எழுந்து, குளித்துத் தயாராகி, காலை 6 ½ மணிக்கு ஆட்டோவில் சென்டிரல் இரயில் நிலையத்துக்குப் போனேன். தமிழ்நாட்டு சாம்பார் மீதான காதலால், A2Bயில் இரண்டு சாதா தோசை சாப்பிட்டேன். மிகுந்த திருப்தியுடன், ஸ்டேஷனிலேயே இருக்கும் புடவைக் கடையில் (இது சில மாதங்களாக இருக்கிறது. 10க்குப் 10 அடிக்கும் குறைவான கடை. அழகிய புடவைகள், ரொம்ப அதிக விலையில்லை), மனைவிக்கு ஒரு புடவை வாங்கினேன். அதன் அருகில் மெட்ராஸ் காஃபி (?) கடையில் பன்/பட்டர்/ஜாம் ஒன்று 55 ரூபாய்க்கு வாங்கிக்கொண்டேன். சுகமான இரயில் பிரயாணம். மெஜெஸ்டிக்கில் மதியம் 2 ½ மணிக்கு இறங்கி வீடு வந்து சேர்ந்தேன்.

அஹோபில யாத்திரை இவ்விதமாக மிகவும் நன்றாக அமைந்தது. கிருஷ்ணாபுரம் கோவில் சிற்பங்கள் ஞாயிறு பதிவுக்குப் பிறகு வேறு என்ன எழுதலாம் என்று யோசித்தேன். எழுத, பகிர்ந்துகொள்ள விஷயங்களோ இல்லை படங்களோ இல்லையா என்ன? என் நெடிய பயணத்தில் ஏகப்பட்ட விஷயங்களை, பயணங்களை, படங்களைப் பகிருமளவு நினைவுப் பெட்டகத்தில் மற்றும் ஹார்ட்டிஸ்கில் சேமித்து வைத்துள்ளேன். முதலில், தற்போது சென்றுவந்த அஹோபில யாத்திரையைப் பதிவாகப் பகிர்வோம் என்று தோன்றியது.

வெளியிட்ட எங்கள் பிளாக்குக்கும், பொறுமையாகப் படித்துக் கருத்திட்ட உங்களுக்கும் என் நன்றிகள். அஹோபில நரசிம்ஹர் நம் எல்லோரையும் காக்கட்டும். மீண்டும் வேறு ஒரு பதிவில்  சந்திப்போம்.

= = = = = = = = = = =