அடக்கு... இல்லையேல் அடங்கு!

 மனைவியிடம் கூட எப்படி பேசுவது என்பதில் இப்போதெல்லாம் வரைமுறை பார்க்க வேண்டி இருக்கிறது...

சிலருக்கு அவர்களை பாராட்டிக் கொண்டே இருக்க வேண்டும்.  குறையாக ஏதாவது சொன்னால் போச்..  முகம் சுருங்கி விடும்.  அல்லது விலகி நிற்பார் சில காலமாவது    மனதளவில்!

அதனால் சிலரது குறைகள் தெரிந்தாலும் வெளிப்படையாக சொல்ல முடியாத நிலை வரும்.  சம்பந்தப்பட்டவரைத் தவிர மற்றவர்களுக்கு அது தெரியும்.  பூனைக்கு யாரும் மணி கட்டமாட்டார்கள்.

சிலசமயம் சில போலிப் பேச்சுகளில் அதற்கான போலி செயல்களில் மயங்கி நின்று விடவும் கூடாது.  அப்படி நின்று விட்டால் அப்புறமான உண்மை நிகழ்வுகளில் சலிப்பாகலாம்.  ஆனால் இதுபோன்றவர்கள் அந்த போலி பேச்சைதான் விரும்புவார்கள், ரசிப்பார்கள்.

நல்லவேளை எனக்கு இந்த போலி பேச்சுகளும், அனாவசிய அதட்டல் அரட்டல் உருட்டல்களும் பழகவில்லை.  என்றாவது உண்மை முகம் வெளிப்படும்போது நம் நிலை என்ன ஆகும் என்று முதலிலேயே தோன்றி விடும்.  

ஆனால் அதற்கெல்லாம் கவலைப்படாமல் தன் அக்கற்பனை உலகத்திலேயே வாழும் மனிதர்களை எனக்குத் தெரியும்.  நீங்களும் பார்த்திருக்கலாம்.

அபூர்வ சகோதரர்கள் படத்தில் ஒரு காட்சி நினைவுக்கு வருகிறது.  அம்மாவான ஸ்ரீவித்யா தன் மகனான குள்ள அப்பு பற்றி குள்ளம் என்பதைக் குறிப்பிட்டு பேசுவதைக் கேட்கும் அப்பு தற்கொலை செய்து கொள்ளும் அந்த அல்டிமேட் முடிவுக்கு போவார்.  

இந்தக் குறைகளை ஒரே மாதிரி வரிசைப்படுத்த முடியாது.  தவறாக நினைப்பது ஒருவகை என்றால், வேறொரு வகையில் தவறாக நினைத்து ஆர்ப்பாட்டம் செய்வது ஒரு வகை.

பணியில் திடீரென அடுத்த நிலை பதவி உயர்வு கிடைத்த நண்பன்.  பதவி உயர்வு கிடைக்கப் போகிறது என்ற நிலைவரை கூட சரியாய்ப் பேசிக்கொண்டிருந்தவன் அந்த அடுத்த சீட்டில் அமர்ந்ததும் மாறிப்போனான்! 

சிரிப்பதா, சீறுவதா என்று தெரியாத நிலை எனக்கு.  என்னையும் சேர்த்தே படுத்தினான்.  அவனுக்கு தனக்கு வானளாவிய அதிகாரம் கைக்கு வந்தது போன்ற ஒரு உணர்வு.  அதுவரை அந்தப் பதவியில் இருந்தவர்களை பற்றி இதே போல சொல்லிக் கொண்டிருந்தவன், தானே அப்படி மாறிப்போனான்.  அதுவரை நாங்கள் எல்லோரும் ஒரே கேடரில் ஒருவரோடொருவர் பணியாற்றிக் கொண்டிருந்த நிலை மாறி அவன் ஒரு கிரேடு உயர்ந்ததும் அவனுக்கு கீழே அவன் சொல் கேட்டு நடக்க பத்து பேர் என்ற நிலை வந்தபோது தலையில் கனம் வந்து விட்டது.

இந்தப் பதவிக்கே இவ்வளவு கனம் தலைக்கு ஏறினால், அரசியல்வாதிகள் ஏன் ஆடமாட்டார்கள்?  ஏன் இவர்களால் இந்த கனத்தையே தாங்க முடியவில்லை?

குரலை உயர்த்தி ஆர்ப்பாட்டமாக அடக்கிப் பேசுவதுதான் மற்றவர்களுக்கு பயத்தைக் கொடுக்கும் என்று எண்ணிக்கொண்டான்.  தன்னைப் பார்த்து அனைவரும் நடுங்க வேண்டும் என்று எதிர்பார்த்தான்.  நடுங்குகிறார்கள் என்று நம்பினான்.  சிறுசிறு எதிர்ப்புகள் வந்தபோது மட்டமான பிளாக்மெயில் வேலைகளில் இறங்கினான்.  அவனைப் பற்றி மற்ற அனைவருக்கும் என்ன அபிப்ராயம் என்று எனக்கு அல்லது எங்களுக்குத் தெரியும்.  அவன் அதை உணர முடியாத நிலையில்,  தான் உயரத்தில் இருப்பதாக நம்பினான்.  அவனிடம் உண்மையை உரைக்க முடியாத நிலை.  உரைத்தாலும் தேவையற்ற வியாக்யானங்களும், விளக்கங்களும், தற்பெருமைகளும்தான் பதிலாய்க் கிடைத்தன.

இன்டெர்ன்ஷிப் ட்ரைனிங் வந்தவர்களிடம் அராஜகமான நடந்து கொண்டான்.  கைநீட்டும் அளவு இறங்கினான்.  புகார் வந்துவிடுமோ என்று பயந்து உயர் அதிகாரிகளிடம் போய் அந்த வளர வேண்டிய மாணவர்கள் பற்றி குறை கூறினான்.  உங்கள் வாழ்க்கையைக் கெடுத்து விடுவேன் என்று பச்சையாக அவர்களை மிரட்டினான்.

எனக்கு இது போன்றவர்கள்தான் பாடமாய் அமைகின்றனர்.  நாம் எப்படி மற்றவர்களிடம் நடந்துகொள்ள வேண்டும் என்று மறைமுகப் பாடம் நடத்துகிறார்கள்.  மற்றவர்கள் நம்மைப் போற்ற வேண்டாம்.  தூற்றாமல் இருந்தால் போதும்.  மற்றவர்கள் வாயில் விழாமல், வயிற்றெரிச்சலைக் கொட்டிக் கொள்ளாமல் இருந்தால் போதும்.  உங்கள் நண்பனுக்கு அல்லது நம்மிடையே இருப்பவர்களுக்கு - அது நட்பாய் இருந்தாலும் சரி, உறவாய் இருந்தாலும் சரி - பயப்படாமல் உண்மையை உரைக்கும் நிலை இருந்தால்தான் உண்மையான நட்பு நிலவும்.  குறை நிறைகளை உரிமையாய் சுட்டிக் காட்டும் நிலை இருக்க வேண்டும்...... அதுவே நம் குறைகளை நாம் உண்மையாக உணரும் நிலையைக் கொடுக்கும்.    (அடுத்த வாரம்...)

=======================================================================================================

படித்ததிலிருந்து...

​சென்னை அமைந்த கரையில் தான் நிறுவியிருக்கும் ஹண்டே மருத்துவமனைக்கு நேரம் தவறாமல் பணிக்கு செல்வதை வழக்கமாகக் கொண்ட டாக்டர் ஹண்டே, 95 வயது, வாழும் முறை குறித்து சொல்கிறார். சத்தான உணவு, முறையான உடற்பயிற்சி, எளிமையான வாழ்க்கை முறை இந்த மூன்றும் தான் நம் வாழ்க்கை தரத்தையும் ஆயுளையும் அதிகப்படுத்தும்.

T  கேசவலு என்று ஒரு வாத்தியார் காலையில் 7:30 மணிக்கு எல்லாம் பள்ளிக்கு வரச் சொல்லி விடுவார், தெருவில் நடந்து போகும்போது வழியில் இருக்கும் வீட்டில் உள்ள பசங்களுக்கு எல்லாம் குரல் கொடுத்துக்கிட்டே போவோம். 50 பேர் ஒண்ணா சேருவோம்.

பள்ளி வளாகத்தில் கொஞ்ச நேரம் ஓடிட்டு பஸ்கி, தண்டால் எடுக்கச் சொல்வார். அன்னைக்கு அப்படி எடுத்த பயிற்சிகள் தான் இன்னைக்கும் என்னை யார் தயவும் இல்லாமல் நடக்க வைக்கிறது. அடுத்து ஆசனங்கள். பலவித ஆசன பயிற்சிகள்.

சிரசாசனம் செய்வதற்கு முதலில் கஷ்டப்பட்டாலும் பின் பழகிக் கொண்டேன். அந்த சிரசாசனத்தால் தான் இன்றைக்கும் என் மூளை நன்றாக வேலை செய்கிறது என்று நினைக்கிறேன்.

சென்னை, கீழ்ப்பாக்கம் மருத்துவக் கல்லூரியில் படித்தபோது அரும்பாக்கத்தில் குடியிருந்தோம். அங்கிருந்து நடந்தே கல்லூரிக்கு வந்து விடுவேன். அதற்குப்பின் டியூட்டராக இருந்தபோது சைக்கிளில் வருவேன்.

சைக்கிள் ஓட்டுவதும் நல்ல உடற்பயிற்சி தான். 1958 ல் மெடிக்கல் பிராக்டிஸ் செய்யத் துவங்கினேன். குறிப்பிட்ட இடத்துக்கு சரியான நேரத்தில் செல்ல வேண்டும் என்பதற்காக 1960 இல் கார் வாங்கினேன்.

'மினிஸ்டரா'க இருந்தபோது குறிப்பிட்ட நேரத்தில் குறிப்பிட்ட இடத்திற்கு 'வாக்கிங்' போவேன்னு தெரிஞ்சுகிட்டு நிறைய பேர் என்னோட நடந்துக்கிட்டே வந்து அவங்களோட தேவைகளை சொல்லுவாங்க..

முக்கியமாக நிறைய படிப்பேன். அதுதான் இன்றைக்கும் மூளையை சுறுசுறுப்பாக வைத்திருக்கிறேன். இளைஞர்களுக்கு மட்டுமல்ல, எல்லாருக்கும் நான் ஒன்று சொல்ல நினைக்கிறேன். நிறைய படிங்க; குறுகிய வட்டத்துக்குள்ளே இருக்காதீங்க; முக்கியமாக யாரைப் பார்த்தும் பொறாமை படாதீர்கள்.

நம்மாலே வளர்ந்த ஆளு இன்னைக்கு நம்மளை திரும்பி கூட பார்த்ததில்லை என்று நான் என்னிக்குமே நினைச்சதில்லை. அவனுடைய சாமர் த்தியம் சம்பாதிக்கிறான், வளர்ந்துட்டான் என்று தான் நினைப்பேன்.

அதேபோல எதுக்கும் கோபப்பட மாட்டேன். சட்டுன்னு வார்த்தைகளை விட்டு விட மாட்டேன். வயசான காலத்தில் இயலாமையால் கோபம் வரத்தான் செய்யும். அதை அடக்க பழகிக் கொள்ளுங்கள்.

ரயிலில் பயணம் செய்யும்பொழுது, சீட் நல்லா இருக்கா, தூங்குறதுக்கு வசதியாக இருக்குமானுதான் நினைப்போம். இறங்கும் இடம் வந்தால் இறங்க வேண்டியதுதான். இப்படித்தான் வாழ்க்கையும். எதையும் எடுத்துக்கிட்டு போகப்போறதில்லை. இதை புரிஞ்சுகிட்டு வாழப்பழகினால் பிரச்சனையே இல்லை.

டாக்டர் ஹண்டே

===============================================================================================

​The finest, ultimate advice to a husband is being submissive to his better half.

ஒரு இலக்கியக் கழகத்தில், முத்தமிழ்க் காவலர் கி.ஆ.பெ.விசுவநாதம் உரையாற்றிய போது கூறிய நகைச்சுவை சம்பவம்...

நான் ஒரு திருமணத்தை நடத்தி வைத்தேன். மூன்று மாதங்கள் கழித்து அந்த மாப்பிள்ளையிடமிருந்து ஒரு கடிதம் எனக்கு வந்தது. அதில் தன் மனைவி தன்னை மதிப்பதில்லை என்றும், மிகவும் அதிகாரத் தோரணையில் நடந்து கொள்வதாகவும், தன்னால் அவளோடு ஒத்துப்போக முடியவில்லை என்றும், தக்க அறிவுரை தர வேண்டும் என்றும் எழுதிக் கேட்டிருந்தார்.

நான் உடனே எட்டு எழுத்துக்கள் கொண்ட ஓர் அறிவுரையை அவருக்கு எழுதி அனுப்பினேன். அவர் அந்த அறிவுரை வேலை செய்யவில்லை என்று பதில் எழுதி அனுப்பினார். நான் உடனே ஏழு எழுத்துக்கள் அடங்கிய ஓர் அறிவுரையை எழுதி அனுப்பினேன். அதுவும் பயனில்லை என்று அவர் மறுமொழி எழுதி அனுப்பினார்.

சரி, வேறு வழியில்லை என கடைசியாக ஆறு எழுத்துக்கள் அடங்கிய ஓர் அறிவுரையை எழுதி அனுப்பினேன்.

"ஆஹா... இது பிரமாதமான அறிவுரை அய்யா...இப்போது அதைத்தான் கடைப்பிடித்து வருகிறேன். இப்போது எங்களிடையே எந்தப் பிரச்சினையும் இல்லை" என்று மகிழ்ச்சியாக அந்த மாப்பிள்ளை பதில் அனுப்பி இருந்தார்.

சரி, அந்த அறிவுரைகள் என்னென்ன என்று அறிந்து கொள்ள ஆவலாய் இருப்பீர்கள்! அந்த எட்டு எழுத்து அறிவுரை என்பது "அரவணைத்துப் போ", ஏழு எழுத்து அறிவுரை என்பது "அடக்கிக் பார்". இந்த இரண்டும் தான் பயன்படவில்லையே ! மூன்றாவதாய் அனுப்பிய அறிவுரை "அடங்கிப் போ" இதுதான் உள்ளபடியே பிரச்சினையை தீர்த்த அறிவுரை!

(அரங்கில் கரவொலி அடங்க வெகு நேரமானதாம்!)

Face Book ல் திரு.பரதன் வெங்கட் அவர்கள் செய்த பதிவு.

==========================================================================================

வெளிப்படையாய் எங்கும் பேசி 

வென்றவர் 

எவரையும் நான் கண்டதில்லை.

நட்பில் மட்டுமல்ல 

உறவிலும்.. 

ஒப்புக்கு வெளியே பேசி 

எதிராளி பற்றிய எண்ணங்களை 

ஒன்றிரண்டாக உள்ளே மறைத்த 

உண்மைகள் யாவும் 

இத்தனை வருடங்களில் 

மனம் நிரம்பி 

ரத்தத்திலும் நரம்பிலுமாய் 

ஓடி 

உடம்பே ஊதிப் போனமாதிரி 

உணர்வாயிருக்கிறது 

என்றைக்கு எவர்முன் 

அது வெடித்து வழியுமோ...

================================================================================================

நியூஸ் ரூம் 

வடநாட்டில் ஒரு எட்டு  வயதுச் சிறுவன் தன் பாட்டியை தன்  மனைவி என்றும், தாய் மாமன்களை தனது மகன்கள் என்றும் சொல்கிறானாம்.  அதாவது அவன் பிறப்பதற்கு சில நாட்கள் முன்பு இறந்துபோன தாத்தாவின் மறுஜென்மம் அவன் என்று சொல்கிறார்கள்.

ஆனால் யாருடைய  மறுஜென்மம் செய்தியில் இடம்பெற்ற இந்த எலி  என்று தெரியவில்லை.  திருப்பூரில் ஒரு பழக்கடைக்காரர் தினமும் கல்லாவில் வைக்கும் பணம் காணாமல் போய்க்கொண்டிருக்க, சிசி டிவி வைத்துப் பார்த்ததில் ஒரு எலி தினமும் கல்லா பெட்டியிலிருந்து பணம் கவ்விச் செல்வது தெரிந்தது.  அது போகும் வழி பார்த்து அதன் வலையை அகழ்ந்து பார்த்தபோது சேதாரமுமின்றி இதுநாள் வரை காணாமல் போன ரூபாய் நோட்டுகள் அங்கு இருந்ததாம்!

ராக்கி சாவந்த் எனும் பாலிவுட் நடிகை தன் இரண்டாவது கணவரிடமிருந்து தனக்கு விவாகரத்து கிடைத்ததை பார்ட்டி வைத்துக் கொண்டாடினாராம்.  பிரேக்கப் ஆனதில் அவ்வளவு சந்தோஷம்.

டைட்டானிக்தான் மாயம் ஆனது என்றால் அதைப் பார்க்கச் சென்ற நீர்மூழ்கி கப்பலும் மாயமாகி விட்டது.  ஐந்து தொழிலதிபர்கள் டைட்டானிக்கைப் பார்த்து வர அந்த நீர்மூழ்கியில் புறப்பட்டவர்கள் என்ன ஆனார்கள் என்று உலகம் தேடுகிறது.  இவர்கள் சென்ற கப்பலின் பெயர் டைட்டன். அதில் ஒருவர் பெயர் தாவூத் என்று தெரிகிறது.

பயணிகளுக்கு கிச்சுகிச்சு மூட்டி சோதனை செய்யும் முறை விரைவில் முடிவுக்கு வருகிறது.  பயணிகள் உடலை மில்லி மீட்டர் மில்லி மீட்டராக சோதனை செய்யும் ஸ்கேனர் கருவிகள் விரைவில் நிறுவப்பட உள்ளனவாம்.  முதலில் டெல்லியில்.

கடலுக்கடியில் பதிக்கப்படும் கேபிள்கள் உதவியால் பிற நாடுகளுடனும், உள் நாட்டிலும் தகவல் தொழில் நுட்பம் சேவை விரிவடைவதால், அதற்கான பாதுகாப்பு ஏற்பாடுகள், சர்விஸ் வசதிகளை பலப்படுத்த வேண்டும்,  என்று டிராய் கேட்டுக் கொண்டிருக்கிறது.  கடலுக்கடியில் பதிக்கப்படும் கேபிள்கள் மற்றும் கடலில் கேபிள்கள் உள்ள மையங்களை முக்கிய சொத்தாக கருதி, இதை பாதுகாக்கவும், மேம்படுத்தவும் மற்றும் முன்னுரிமை அளிக்கும் வகையிலும், இந்திய தொலைதொடர்பு மசோதா 2022 ன் ஒரு பிரிவில் இதைச் சேர்க்க வேண்டும். மேலும், இச்சேவைகளை தேசிய முக்கிய தகவல் உள்கட்டமைப்பு பாதுகாப்பு மையத்துடன் ஒருங்கிணைத்து, முக்கிய தகவல் உள்கட்டமைப்பாக அறிவிக்க வேண்டும் என்றும் டிராய் மத்திய அரசுக்கு கோரிக்கை வைத்துள்ளது.  கடலில் பேனா வைப்பதற்கு இது தேவலாம் என்கிறார் கடற்கரையில் வாக்கிங் செல்லும் ஒருவர்!

ஊட்டியில் இரண்டு நாட்களுக்குமுன் ஏற்பட்ட மழை காரணமான நிலச்சரில் ஏற்பட்ட மண் சரிவை போக்குவரத்து போலீசார் சரி செய்து வரும் நேரத்தில் அங்கு பல வீடுகள் அந்தரத்தில் தொங்கி கொண்டிருக்கின்றனவாம்.  மக்கள் அச்சமடைந்திருப்பதாக தகவல்!

=================================================================================================================================

இணையத்தில் ரசித்தது...  இது ரொம்பப் பழசு..  ஆனால் பார்க்கும்போது இப்போதும் காலில் குறுகுறு என்றும் முதுகுத்தண்டில் சில்லென்றும் இருக்கும்!

இது சமீபத்தைய பழசு...  சுவாரஸ்யம்!

======================================================================================================

என்ன செய்வார்கள்?  எப்படி செய்வார்கள்?!

============================================================================================================

பொக்கிஷம் 

ஹிஹிஹி..  கேள்விக்கான பதிலை அவர்கள் முகத்தில் படிக்கலாம்!

ஹிஹிஹி  பதிலுக்கான விளைவை பின்னால் திரும்பி அவர் முகத்தில் படிக்கலாம்!

ஷாம்பு போட லட்ச ரூபாய் வேணுமா..   பெட்டரா யோசிச்சிருக்கலாமோ!

ஹிஹிஹி..  கம்ப்ளெயின்ட்டுக்கான பதிலை.....

டகால்ட்டி ஸ்பெஷாலிட்டி ஹாஸ்பிடல்!