பச்சை மட்டை யும் பழுத்த மட்டையும் ....... சிறுகதை :: சியாமளா வெங்கட்ராமன்

 

 

இன்று மாலை மூன்று மணிக்கு அம்புஜம் மாமி போன் செய்து, " ஏண்டி பிரியா எப்போ நீ லட்சுமி பெண் கல்யாணத்துக்கு போக போறே?" என்று கேட்டாள். 

" இதில் என்ன சந்தேகம்? காலை ஏழரை மணிக்கு முகூர்த்தம் அதற்கு போகலாம் என்று எங்க ஆத்துக்காரர் சொன்னார். என்று பிரியா கூறினாள்.அது சரி நீங்க எப்ப போக போறதாக இருக்கேள் ?" 

" அதாண்டி ஒரே குழப்பமா இருக்கு...."   என்று இழுத்தாள் மாமி. 

 இப்படியாக பேச்சு அங்கும் இங்கும் போச்சு. 

" ஆமாம் நேற்று சாயங்காலம் வீடு பூட்டி இருந்தது எங்கே போனீர்கள்?"  என்று மாமியை கேட்க.. " என் தம்பி வீட்டிற்கு போனேன். அங்கு போய் மாச கணக்கா ஆச்சு. அடுத்த வாரம் எனக்கு வெட்டிங் ஆனிவர்சரி அதுக்கு முன்னால போய் நமஸ்காரம் பண்ணிட்டு வரலாம்"  என்று போனேன் என்று மாமி கூறினாள். 

 உடனே பிரியா கலகலவென்று சிரித்தாள். 

" என்னடி சிரிக்கிறே" என்று மாமி கேட்க, "அதானே பார்த்தேன் அம்புஜம் மாமியா கொக்கா ?"  என்றாள். 

மாமி, "என்னடி பொடி வைத்து பேசறே ?"  என கேட்க, அம்மாவிடமிருந்து வெட்டிங் டே சீரை கறந்துண்டு வரப்போயிருப்பேள்" என்று கூறி சிரித்தாள்.

"சரி சரி அம்மா எப்படி இருக்கிறார்கள்?"  என பிரியா கேட்க.... 

" என் அம்மாவுக்கு என்ன? நல்லா இருக்கா" என்று நக்கலாக மாமி கூற,,, " அது சரி,  உங்க அம்மாவுக்கு என்ன வயசு?" என பிரியா கேட்க...

" 94 வயசு ஆகுது.  அதுக்கேத்த பக்குவம்தான் இல்லை"  என்றாள்மாமி

வம்பு ஏதாவது கிடைக்குமா என்று அலைந்து கொண்டிருந்த பிரியாவிற்கு மாமியின் பேச்சு சூடு பிடிக்க, "ஏன் என்ன விஷயம்?" என்று கேட்டாள். 

" அதை ஏன் கேக்கேறே.... என் அம்மா 22,000 ரூபாய்கொடுத்து, +1 என்ற ஆண்ட்ராய்டு போன் வாங்கி  அத்தனை சீரியலையும் விடாம பார்க்கறா"  என்று கூறி பெருமூச்சு விட்டாள் மாமி!!!

" ஏன் டிவி இல்லையா உங்க தம்பி வீட்டில்?" என பிரியா கேட்டாள். 

" ஏன் இல்லாம ? ஒன்றுக்கு மூன்று டிவி இருக்கு..." 

" பின்ன ஏன் போனில் சிரியல்பார்க்கிறா?" 

அதற்கு அம்புஜம் மாமி, "என் தம்பியின் மருமகள் டிவி போட்டால் குழந்தைகள் படிப்பு கெட்டுவிடும் என்று போட மாட்டாள் . ஆனால் என் அம்மா ஒரு சீரியல் கூட விடாம பாக்கணும் என்று அடம் பிடிக்கிறார்" 

" அது சரி இந்த வயதில் எந்த சீரியல் என்று ஞாபகம் இருக்கிறதா? பாக்குறதுக்கு"  என பிரியா கேட்க....... 

" அது ஏன் கேட்கிற! நமக்கு கூட மறந்து போயிடும் - எது எங்க வச்சோம் என்று தெரிய மாட்டேங்குது. நேத்து என்ன சாப்பிட்டோம்னும் மறந்து போறது. ஆனால் என் அம்மா ஒரு அச்சாரம் பிசகாமல் அத்தனையும் ஞாபகமா சொல்றா " என்று சொல்லி பெருமூச்சு விட்டாள் மாமி!

"மாமி அதுக்கு சந்தோஷப்படத்தானே வேணும் நீங்கள் ஏன்அலுத்துக்கிறீர்கள்?"  என்றாள் பிரியா .

" ஆமாண்டி உனக்கு என்ன அவஸ்தை? படறாவாளுக்குத்தானே தெரியும்? என் தம்பிக்கு 74 வயதாகிறது. சொல்லவும் முடியாமல் மெல்லவும் முடியாமல் அவஸ்தை படுகிறான் பாவம்!!! இது மாதிரி எதுக்கு தான் இருக்காளோ? தெரியவில்லை"  என்ன மாமி அலுத்துக் கொண்டாள்.

இதைக் கேட்டதும் பிரியாவிற்கு சுள் என்று கோபம் வந்தது " உங்கள் அம்மா யாருக்கும் தொந்தரவு தராமல் தன்னறையில் youtube இல் பார்க்கிறார்கள். இதில் என்ன தப்பு? அவர்களும் மனிதர்கள்தானே? உங்களை எல்லாம் பெற்று வளர்த்து படிக்க வைத்து கல்யாணம் செய்து கொடுத்திருக்கிறார்கள். பிரசவம் பார்த்திருக்கிறார்கள் அனைத்து கடமைகளையும் செய்துவிட்டு இன்று துணையின்றி தனி மரமாக நிற்கிறார்கள்   அதை மறக்க youtube பார்க்கிறார்கள், நாளைக்கு இதே நிலைதான் உங்களுக்கும் மறக்காதீர்கள்!!! நாம் நினைத்த மாதிரி (இறந்து )போக,  'டி .நகரா' போவதற்கு?" என பிரியா போனில் பொரிந்து தள்ளினாள். 

இதைக் கேட்ட அம்புஜம் மாமி, 'ஏண்டாப்பா சொன்னோம்' என்று  நினைத்துக் கொண்டு, போனை கட் பண்ணுவதற்கு, "சரி சரி யாரோ காலிங் பெல் அடிக்கிறார்கள் நான் போனை வைக்கிறேன்"  என்று கூறி போனை 'அப்பாடா' என்று கட் செய்தாள்!!!

 அப்போதுதான் உள்ளே வந்த ராகவன், " யாரை வெளுத்து வாங்கினாய் போனில்?" என சிரித்துக் கொண்டே கேட்க, "இப்போதெல்லாம் பெற்ற குழந்தைகளே வயதான அம்மா அப்பாவை உதாசீனப்படுத்துவது அதிகமாகிவிட்டது. 

*பழுத்த மட்டையை பார்த்து பச்சை மட்டை சிரித்தது * என்ற பழமொழிக்கு ஏற்ப வயதானவர்களை சிறியவர்கள் கேவலமாக பேசுவது சர்வ சாதாரணமாகிவிட்டது. அவர்களுடைய உணர்ச்சிக்கு மதிப்பு கொடுப்பதில்லை. நாளைக்கு நமக்கும் இதுதான் கதி" என்று கூறி பேச்சை மாற்றினாள். 

= = = = = =