ஹல்லோ மை டியர் ராங் நம்பர்...

 உங்களுக்கு தவறான எண் அழைப்பு..  அதாங்க ராங் நம்பர் கால் வந்தால் என்ன செய்வீர்கள்?  பெரும்பாலும் 'நீங்கள் தேடும் ஆள் நான் இல்லை' என்று சொல்லி உடனே வைத்து விடுவீர்கள்.  சில சமயம் மறுபடி மறுபடி அதே நபர் உங்களை தொந்தரவு செய்யவும் கூடும்.  சில சமயம் நம்பாமல் இருக்கவும் கூடும் (என் அனுபவங்களில் ஒன்று..  முன்னர் எழுதி இருக்கிறேன்)

சில பிஸினஸ் கால்கள் தொந்தரவு செய்யும்போது சிலர் இஸ்த்து இஸ்த்து..  அதாங்க இழுத்து இழுத்து விளையாடுவதும் உண்டு.  ஹிஹிஹி... நானும் விளையாடி இருக்கிறேன், பதிவும் போட்டு சொல்லியிருக்கிறேன்.

பையனுக்கு பெண் தேடும் அனுபவங்களை வைத்து நிறைய எழுதலாம்.  விதம் விதமான, வித்தியாசமான சுவாரஸ்யமான எரிச்சலூட்டும், அலுப்பூட்டும் கோபப்படுத்தும் சிரிக்க வைக்கும்,  என்று நவரசங்களிலும் அனுபவங்கள் உண்டு.  அதுவும் ஒவ்வொரு சாம்பாரிலும், மன்னிக்கவும் ரசத்திலும் ஒன்றல்ல ரெண்டல்ல அதற்கும் மேற்பட்ட அனுபவங்களே உண்டு.   

கீழே உள்ளது மேலே சொன்ன வகைகளில் எந்த வகை என்று நீங்களே முடிவு செய்து கொள்ளுங்கள்.

ஒன்றரை வருடங்களாய் (கால அளவு மாற்றப்பட்டுள்ளது) பேசிப்பேசி பல இடங்களில் நேரடியாக சுய அறிமுகத்துக்கு வந்து விடுவது வழக்கமாகி இருந்தது.

"ஹலோ..."

"ஹலோ..."

"குப்புசாமிங்களா?"  (பெயர் மாற்றப்பட்டுள்ளது!)

"ஹலோ..."

"ஹலோ...  கேக்குதுங்களா?  குப்புசாமிங்களா?" 

"ஹலோ.."

"ஹலோ...  ஹலோ...  கேக்குதுங்களா?  குப்புசாமிங்களா?  ஹலோ...  ஹலோ..." 

"நீங்க யாரு?"

"கல்யாண விஷயமா பேசணும்.."

"யார் கல்யாணம்?"

"என் பெரிய பையனுக்கு அலையன்ஸ் பார்க்கறோம்.." 

"சரி..."

"அவன் இன்னார் அண்ட் சொன்னார் (பெயர் மாற்றப்பட்டுள்ளது) கம்பெனியில் வேலை பார்க்கிறான்...  மல்ட்டி அனலைசர், டீம் லீடராய் இருக்கிறான்" (வேலை மாற்றப்பட்டுள்ளது)

"சந்தோஷம்..  ஆனா..."

"அஞ்சு லட்சம் சம்பளம்...  (சம்பளம் மாற்றப்பட்டுளளது)"

"இருங்க...   உங்களுக்கு யார் இந்த நம்பர் கொடுத்தார்?"

"மேட்ரிமோனியலில் இருந்தது..."

"நான் ரியல் எஸ்டேட் செய்கிறேன்.."

"சரி.." (நீ என்ன செய்தால் என்ன..  பெண் பற்றிய விவரங்கள்தானே எங்களுக்கு வேண்டும்? - மைண்ட் வாய்ஸ்)

"எந்த மேட்ரிமோனியல்?"

"மாய் மங்களா" (பெயர் மாற்றப்பட்டுள்ளது)

"நான் கொடுக்கவே இல்லையே..."

"அப்படியா..  (மனதுக்குள் சங்கடம்..  பெண் பற்றி சொல்வாரா மாட்டாரா..  கொடுப்பாரா மாட்டாரா..  ஒருவேளை திருமணம் ஆகிவிட்டதோ..  அதையாவது சொல்லலாமே..)..  யு ஸீ ஸார்..  நாம் வேறெங்காவது நம் பற்றிய டீட்டெயில்ஸ் கொடுத்தால் கூட யாராவது எடுத்து பல இடங்களில் ஷேர் செய்து விடுகிறார்கள்..."

"ஆனால் நான் எங்கேயுமே கொடுக்கவே இல்லையே..."

"பொண்ணுக்கு கல்யாணம் ஆகிட்டதுங்களா..."

"பொண்ணா?  நான் நம்பரே கொடுக்கவில்லை என்கிறேன்...."

"பின்னே எப்படி..?"

"அதுதான் பார்க்கிறேன்.  ஃபோன் நம்பரை சரியா பார்த்தீர்களா?"

"பார்த்துதானே டயல் செய்தேன்.. " 

எனக்கும் சந்தேகம் இப்போதுதான் வந்தது.  உரையாடலை ஸ்பீக்கரில் போட்டு விட்டு, விவரங்களைத் தேடி, செல்லை புரட்டினேன்.  அவர் குரல் தொடர்ந்தது...)  

"அப்படியே கொடுத்தாலும் நானும் பெண் வேண்டும் என்றுதானே கொடுப்பேன்..  எனக்கெதற்கு உங்கள் மகன்?  ஆனால்..."

"அப்போ உங்களுக்கு மகள் யாரும் இல்லைன்னு...  ஆனால்?  ஆனால்ன்னு என்னவோ சொல்ல வந்தீங்களே..  சொல்லுங்க.."

"ஆனால் அதற்கும் என் மனைவி சம்மதம் வேணும்ல...   எனக்கு ஒரே ஒரு மகன்தான்..  நாலாவது படிக்கிறான்...  யு ஸீ மிஸ்டர்...  இவ்வளவு பேசியுமா இது ராங் நம்பர்னு தெரியலை?"

அதே சமயம் என் கைகள் செல்லில் அந்த நம்பரை எடுத்து விட்டிருக்க,  கடைசி இரண்டு எண்களை புரட்டி முன்பின்னாக டயலியிருக்கிறேன் என்று தெரிந்தது..  அதைக் காட்டிக்கொள்ள ரோஷமாக இருந்தது...  

"நீங்களாவது முதலிலேயே சொல்லி இருக்கலாமே..."

"எங்கே சொல்ல விட்டீங்க...  இன்னும் அட்ரஸ் மட்டும்தான் சொல்லவில்லை" - நல்லவேளை!

"ஸாரி ஸார்..  ஏதாவது நம்பரை தப்பு தப்பா கொடுத்திடறாங்க..  அவஸ்தைப் பட வேண்டியதாயிருக்கு..  வச்சுடறேன்."

வைக்கும் முன் "நீங்க சரியா பார்க்கலைன்னு சொல்லுங்க" என்று எதிர்முனை சொன்னது என் காதில் விழவில்லை!

'இப்படித்தானே நீ இஸ்த்து இஸ்த்து பேசி விளையாடியபோது அந்தந்த எதிர்முனைக்கு இருந்திருக்கும்' என்கிற எண்ணம் என் மனதில் எழவில்லை!!

நானாவது திரும்பத்திரும்ப அந்த எதிர்முனை தொந்தரவு செய்தால்தான் இப்படி செய்வேன்.  இவர் முதல் முறையிலேயே இப்படி இழுத்து விட்டார்.

சரி..  விடுங்க...   அடுத்த நம்பர் என்ன...   9.....8.....4....

==================================================================================================

மேலே இருக்கும் வியாசத்தை திடீர் என ஏற்பட்ட கதைப் பஞ்சத்தால் செவ்வாயில் போட ஒரு கதை அமைப்பில் புதிதாய் எழுதி வைத்திருந்தேன்.  இப்போது அடுத்த ஆறேழு வாரங்களுக்கு கவலை இல்லை என்பதால் டிங்கரிங் செய்ததை நீக்கி  வியாழன் பதிவாய் மாற்றி விட்டேன்!

இந்த வாரம் பொக்கிஷம் இப்படி ஆங்காங்கே துண்டு துண்டாய் வரும்!  சிறு மாற்றம்!

====================================================================================================

மூன்று நாட்களுக்கு முன் பதினொன்றாம் தேதி பாரதியாரின் நினைவு நாள் கடந்து போனது...

மேலே உள்ள அர்ஜுனன் யானை பற்றிய விவரத்துக்கு திரு காலச்சக்கரம் நரசிம்மாவும் இன்னொரு அன்பரும் திருத்தம் சொல்லி இருந்தார்கள்.  யானை கிருஷ்ணராஜ வோடேயாரால் வழங்கப்பட்டது என்றும் வேறு பெயர் என்றும்...

======================================================================================================

நியூஸ் ரூம் 

பானுமதி வெங்கடேஸ்வரன் 

செய்திகள் 14.9.2023

உலக அளவில் தேங்காய் உற்பத்தியில் இந்தியா முதலிடம்.

பாங்காக்கிலிருந்து சரக்கு விமானத்தில் கடத்தி வரப்பட்ட 55 மலைப்பாம்பு கள் உட்பட 78 வன விலங்குகள் பறிமுதல் செய்யப்பட்டன.

அமெரிக்காவின் விண்வெளி ஆராய்ச்சி மையமான நாசாவின் சந்திரன், செவ்வாய் கிரக ஆராய்ச்சி திட்டத்திற்கு இந்திய வம்சாவளியினரான ஷாக்ட்ரியா தலைவராகியுள்ளார்.

அதிகரிக்கும் குடும்ப வன்முறை. தம்பதிகள் பிரிய செல்போன்கள் முக்கிய காரணமாக விளங்குகின்றன. உயர்நீதிமன்றம் வருத்தம்.

கொரோனா காலத்தில் வீட்டிலிருந்தபடியே கல்வி பயின்ற மாணவர்கள் முறையான வகுப்புகள் தொடங்கி பள்ளி செல்ல துவங்கிய பிறகு தாங்கள் அடிப்படையில் மிகவும் பின்தங்கி இருப்பதை உணர்ந்திருக்கிறார்கள். இதன் பயனாக பெங்களூர் டியூஷன் சென்டர்கள் நிரம்பி வழிகின்றனவாம்.

இயற்கை நீர்நிலைகளில் விநாயகர் சிலை கரைப்பை தவிர்க்க தீர்ப்பாயம் உத்தரவு.

கார்களில் பயணிப்பவர்களின் பாதுகாப்பிற்காக அனைத்து எம்.1 ரக கார்களில் ஆறு ஏர் பேகுகள்(air bags) கட்டாயமாக்கப்படும் எனும் திட்டத்தை அமல்படுத்துவதில் தாமதம்.

====================================================================================================

இறைவன் 

மனிதனைப் படைத்தானாம் 

இறைவனைப் படைத்த 

மனிதர்கள் 

சொல்லிக் கொண்டிருக்கிறார்கள் 

உணவுக்கும் உடைக்கும் 

மாற்று கண்டுபிடித்து 

பழகியவர்கள் 

எல்லோரும் தொழும் இறைவனிலும் 

அலுப்புக்கொண்டு 

மாற்று கண்டுபிடிக்கிறார்கள்.

இறைவன் 

மனிதனைப் படைத்தான் 

மாற்றங்கள் தேடி 

அலுத்துப்போன மனிதன் 

இறைவனை

 புதிது புதிதாக 

படைக்கத்தொடங்கினான் 

==================================================================================================

எது நடுநிலை?   வேதாளக் கேள்வி...

ஆனந்த விகடனில் முப்பது ஆண்டுகளுக்கும் மேல் பணியாற்றியவர்  மதன். கார்ட்டூனிஸ்டாக நுழைந்து, எஸ். பாலசுப்பிரமணியன் ஆசிரியராக இருந்த காலகட்டத்தில், விகடன் குழும இதழ்களின் இணை ஆசிரியராக உயர்ந்தவர் மதன். அந்த பத்திரிகைகளில் மதன் எழுதிய தொடர்கள், கேள்வி பதில்கள் அவரை கார்ட்டூனிஸ்டிலிருந்து 

எழுத்தாளராக உயர்த்தின.

ஆனால் ஒரு கட்டத்தில், விகடனுக்கு வெளியிலும் பணியாற்ற முனைந்தார் மதன். அன்றைக்கு விஜய் மல்லையா நிர்வாகத்தில் இருந்த விஜய் டிவியில் இவர் நிகழ்ச்சிகள் செய்தார். மேலும் சினிமா படங்களுக்கும் வசனம் எழுத ஆரம்பித்தார். இந் நிலையில் விகடன் நிர்வாகத்துக்கும் அவருக்கும் பிரச்சனை வெடிக்க, ‘golden hand shake’ என்ற முறையில் விகடனை மதன் சுமூகமாகவே பிரிந்தார். ஆனாலும் மதனின் கார்ட்டூன்கள் மற்றும் கேள்வி பதில் பகுதி மட்டும் தொடர்ந்து இடம்பெறும் என விகடன் அறிவித்திருந்தது. இந்த நிலையில், 2.5.2012 விகட னில் மதன் கேள்வி பதில்கள் பகுதியில் வெளியான ஒரு புகைப்படம் விகடனிலிருந்தே மதனை வெளியேற்றியது.  அந்தக் கேள்வியும் அதற்கு மதன் பதிலும்: 

கேள்வி: உலகில் உள்ள உயிரினங்களில் ஒன்று மற்றொன்றின் காலில் விழுந்ததாக வரலாறு இல்லை. ஆனால், மனிதன் மட்டும் இதற்கு விதிவிலக்காக இருப்பது ஏன்? இதைத் தொடங்கி 

வைத்தது யார்?

பதில்: ஆதி மனிதன்தான். திடீர் என்று தெருவில் குண்டு வெடிக்கிறது. உடனே என்ன செய்கிறீர்கள்? தரையோடு படுத்துக் கொள்கிறீர்கள். காரணம், அதில்தான் ஆபத்து ரொம்பக் குறைவு. ஆதி மனிதனும் திடீர் என இடி இடித்தாலோ, பெரிய மின்னல் தோன்றினாலோ தனக்கு ஆபத்து ஏற்படாமல் இருக்கத் தரையில் நடுங்கிப் படுத்துக் கொண்டான். பிறகு, சூரியன் போன்ற இயற்கை விஷயங்களின் முன்பு ‘எனக்கு எந்த ஆபத்தும் ஏற்படுத்தாதே’ என்பதை விளக்க, குப்புறப்படுத்தான். பிறகு, அரசர்கள் முன்பு, இன்று தலைவர்கள் காலடியில் (‘பதவி ஏதாவது தந்து என்னைக் காப்பாற்றுங்கள்’ என்று அர்த்தம்!). விலங்குகளும் தத்தம் தலைவன் முன்பு அடிபணிகின்றன. ‘நான் உனக்கு அடங்கிப் போகிறேன்!’ என்கிற ஓர் அர்த்தம்தான் அதற்கு உண்டு! 

மேற்கண்ட கேள்வி- பதி லுக்குப் பொருத்தமாக, இன்றைய முதல்வர் ஜெயலலிதா காலில், ஒரு அமைச்சர் சாஷ்டாங்கமாக விழுந்து கும்பிடும் படம் இடம் பெற்றிருந்தது. இந்தப் படத்துக்கு எதிர்ப்பு

தெரிவித்து விகடன் நிர்வாக இயக்குனருக்கு மதன் ஒரு கடிதம் அனுப்பியிருந்தார். அதில், “பல ஆண்டுகளாக விகடனில் நான் எழுதி வரும் ‘ஹாய் மதன்’ பகுதியில் வரும் என் பதில்கள் பொது அறிவு பற்றியது என்பது தங்களுக்குத் தெரியும். ஆயிரக்கணக்கான விகடன் வாசகர்கள்- வரலாறு, விஞ்ஞானம், மருத்துவம், மனித இயல், விலங்கியல் சம்பந்தப்பட்ட கேள்விகளைத்தான் எனக்கு எழுதி அனுப்புகிறார்கள். அரசியலையும் சினிமாவையும் நான் அநேகமாகத் தொடுவதில்லை. 2.5.2012 இதழில் ‘காலில் விழுந்து வணங்குவது’ பற்றிய மனித இயல் (Anthro pology) பற்றிய ஒரு கேள்விக்கு, ஆதி மனிதன் எப்படி அதை 

ஆரம்பித்திருக்கக் கூடும் என்று விளக்கி, பொதுவான ஒரு பதில் எழுதியிருந்தேன்.

ஆனால், அந்தப் பதிலுக்கான படம் என்று, தமிழக முதல்வர் 

ஜெயலலிதாவின் காலில் ஒருவர் விழுவது போன்ற பெரிய புகைப்படம் வெளியிடப்பட்டு இருக்கிறது. இது எனக்கு மிகவும் அதிர்ச்சியையும் வருத்தத்தையும் அளித்தது.

ஆதிகாலத்திய சம்பிரதாயம் பற்றிய பொது அறிவுப் பதில் தான். அதுவேயன்றி, குறிப்பிட்ட ஒருவரைப் பற்றிய பதிலே அல்ல அது! ஜெயா டி.வியில் நான் சினிமா விமர்சனம் செய்து வருகிறேன். இந்நிலையில், அவர்கள் அந்தப் புகைப்படத்தை ஹாய் மதன் பகுதியில் 

வெளியிட்டதற்கு நான்தான் காரணமோ என்று தவறாக நினைத்துக் கொள்ளமாட்டார்களா? என்னிடம் ஜெயா டி.வியின் தலைமை அது பற்றி விளக்கம் கேட்டால், ‘அந்த புகைப்படம் வெளி வந்ததற்கு நான் காரணமல்ல’ என்று இதன் பின்னணியை விவரமாக விளக்க வேண்டி வராதா? அந்த தர்ம சங்கடம் எனக்குத் தேவைதானா? முப்பதாண்டு காலம் விகடன் நிறுவனத்துக்காக உழைத்த எனக்கு இப்படியொரு பிரச்னையை ஏற்படுத்துவது நேர்மையான, 

நியாயமான செயல்தானா என்பதை தாங்கள் சிந்திக்க வேண்டும். முக்கியமான பிரச்சனைகள் எத்தனையோ சந்தித்துக் கொண்டிருக்கும் தமிழக முதல்வரிடம் இதற்காக அப்பாயின்ட்மென்ட் கேட்டு, அவரைச் சந்தித்து, நான் செய்யாத தவறுக்கு விளக்கம் தந்து 

கொண்டிருக்க வேண்டிய சூழ்நிலையை எனக்கு ஏற்படுத்துவது முறையா என்று சிந்திக்க வேண்டுகிறேன். …வரும் இதழிலேயே ‘புகைப் படங்கள், லே- அவுட்டுக்கு மதன் பொறுப்பல்ல’ என்ற விளக்கத்தையாவது 

வெளியிட்டால், நியாயம் காப்பாற்றப்படும். அதை 

வரவிருக்கும் இதழிலேயே செய்வீர்கள் என்று நான் உறுதியாக நம்புகிறேன்,” என்று கூறியிருந்தார் மதன் தனது கடிதத்தில்.

மதன் கேள்வி- விகடனின் அதிரடி பதில்… இந்தக் கடிதத்துக்கு விளக்கம் அளித்து அதன் ஆசிரியர் கொடுத்துள்ள விளக்கமான பதில் இது…மதன் நமக்கு எழுதியிருக்கும் இந்தக் கடிதம், தவிர்க்க முடியாத சில நெருக்கடிகளுக்கும்

நிர்பந்தங்களுக்கும் அவர் 

சமீபகாலமாக ஆளாகி இருக்கிறார் என்பதையே காட்டுகிறது.

‘ஹாய் மதன்’ பகுதியில் வாசகர்கள் கேட்ட கேள்வியிலோ, மதன் அளித்த பதிலிலோ நேரடி வார்த்தைகளில் இடம் பெறாத- அதே சமயம், அந்தக் கேள்வி- பதிலுக்கு மேலும் வலிமையும் சுவாரஸ்யமும் சேர்க்கக்கூடிய படங்களை இதற்கு முன் ஏராளமான சந்தர்ப்பங்களில் ஆசிரியர் குழு சேர்த்துள்ளது. அப்போதெல்லாம், எந்தக் காரணங்களைக் காட்டியும் ஒரு போதும் எந்த ஆட்சேபமும் அவர் தெரிவித்ததே இல்லை.

அதேபோல், ‘இது பொது அறிவுப் பகுதி மட்டுமே’ என்று இப்போது மதன் குறிப்பிடும் ‘ஹாய் மதன்’ பகுதியில் அரசியல் மற்றும் சினிமா பற்றிய நேரடியான, காரசாரமான பதில்களை அவர் தொடர்ந்து இதழ் தவறாமல் அளித்திருப்பதை வாசகர்களும் நன்கு அறிவார்கள். இப்போது திடீரெனத் தன் நிலைப்பாட்டை அவர் மாற்றிக் கொள்வதற்கான காரணம், அவருடைய கடிதத்திலேயே உள்ளது. நடுநிலை இல்லை… இதையெல்லாம் பார்க்கும்போது… தற்போது அவர் இருக்கின்ற சூழ்நிலையில், ‘ஹாய் மதன்’ பகுதியை மட்டும் அல்ல… கார்ட்டூன்களையும் கூட நடுநிலையோடு படைப்பது அவருக்குச் சாத்தியம் ஆகாது என்ற முடிவுக்கே வர வேண்டியிருக்கிறது.

குறிப்பிட்ட ஒரு தரப்பைப்பற்றிய நியாயமான விமர்சனங்களையோ, புகைப்படங்களையோ தவிர்த்துவிட்டு… செய்திகளையும் கருத்துக்களையும் நீர்க்கச் செய்வது வாசகர்களுக்குச் செய்யும் மிகப் பெரிய துரோகம் என்றே விகடன் கருதுகிறது. எனவே, இந்த இதழ் முதல் திரு. மதனின் கேள்வி- பதில் பகுதியும் அவருடைய கார்ட்டூன்களும் விகடனில் இடம் பெறாது என்பதைத் தெரிவித்துக் கொள்கிறோம்,” என்று 

கூறினார் விகடன் ஆசிரியர்.

இதன் மூலம் விகடனில் 30 ஆண்டுகளுக்கும் மேலாக நீடித்து வந்த மதன், முற்றாக நீக்கப்பட்டார்.

நன்றி – ஆனந்தன் பி. ஆனந்தன், முகநூல்

இணையத்தில் இருந்து எடுத்தது  நன்றி R கந்தசாமி ஸார்.

================================================================================================

இப்படி கட்டத்துக்குள் போட்டால் ஜோக் என்றுதான் அர்த்தம்.

டூ ஸ்மார்ட்...  ஸோ ச்வீட்...

"முன்னால எல்லாம் ரயில்வே ஸ்டேஷன் போனால் கூலிகள் என்று ஒரு இனத்தைப் பார்த்திருப்பீர்கள்...    இப்போது இல்லை...  ஏனென்று யோசித்துப் பாருங்கள்...  முதல் காரணம் பெட்டிகளில் சக்கரம் வைத்து வந்ததும், பின்னர் தள்ளு வண்டிகள் வந்து விட்டதும்தான் காரணம்.."  இப்படி சமீபத்தில் யாரோ பேசக் கேட்டேன்.  விஞானக் கண்டுபிடிப்புகள் எப்படி ஒரு சாரார் பிழைப்பை காலி செய்கின்றன பாருங்கள் என்பது அவர் பேச்சின் சாராம்சம்.

என்ன அர்த்தமோ...  என்ன அனர்த்தமோ....  நேக்கு ஒண்ணும் புரியலை கேட்டேளா?