"திங்க"க்கிழமை : பால் வாழைக்காய் - மனோ சாமிநாதன் ரெஸிப்பி

 பால் வாழைக்காய்

வாழைக்காயில் வறுவல், பொரியல், பொடிமாஸ், பஜ்ஜி எல்லாம் பொதுவாக செய்வதுண்டு. நல்ல கனமான கச்சல் இல்லாத வாழைக்காயை புளிக்குழம்பில் சேர்த்தால் மிகவும் சுவையாக இருக்கும். இப்போது வாழைக்காய் கோளா, கட்லட் என்று நவீனக்குறிப்புகளும் வந்து விட்டன. என் அம்மா பால் வாழைக்காய் என்ற ஒரு பக்குவம் செய்வார்கள். தேங்காய்ப்பால் சேர்த்து மிகவும் ருசியாக இருக்கும். ஒரு முறை 2005ம் வருடம் என்று நினைக்கிறேன், நானும் திருமதி ரேவதி ஷண்முகமும், திருமதி கலைவாணி சொக்கலிங்கமும் நடுவர்களாக இருந்த ஒரு சமையல் போட்டியில் அதே பால் வாழைக்காய் குறிப்பைப்பார்த்த போது ஆச்சரியமாக இருந்தது. கிட்டத்தட்ட நானும் இப்படியே தான் செய்வேன். இந்தக்குறிப்பிற்கு இரண்டாம் பரிசு கொடுத்தோம்.

நல்ல வாழைக்காயும் தரமான தேங்காயும் கிடைத்து விட்டால் இதன் ருசி அபாரமாக இருக்கும்.

தேவை:

வாழைக்காய்-3

சிறிய தேங்காய்-1

சின்ன வெங்காயம்-8

மிளகு- 1 ஸ்பூன்

சீரகம்- 1 ஸ்பூன்

வற்றல் மிளகாய்-2

நல்லெண்ணெய்-கால் கப்

கறிவேப்பிலை

கடுகு- 1 ஸ்பூன்

தேவையான உப்பு

செய்முறை:

தேங்காயைத்துருவி முதல் பால், இரண்டாம் பால் எடுக்கவும். வாழைக்காய்களை சிறு துண்டுகளாய் அரிந்து இரண்டாம் பாலில் மெதுவான தீயில் வேக வைக்கவும். மிளகு, சீரகம், மிளகாய் வற்றல், 4 சின்ன வெங்காயங்கள் அனைத்தையும் மசிய அரைக்கவும். வாழைக்காய் பாதியளவு வெந்ததும் அரைத்த விழுது, முதலாம் தேங்காய்ப்பால், உப்பு சேர்த்து கிளறி வேகவைக்கவும். காய் வெந்ததும் 2 ஸ்பூன் நல்லெண்ணெயில் கடுகு கறிவேப்பிலை தாளித்துக்கொட்டி கிளறி தீயை அணைக்கவும். பாக்கி நல்லெண்ணெயை காயில் பரவலாகக் கொட்டி கிளறாமல் மூடி வைக்கவும். பரிமாறும்போது நன்கு கிளறி உபயோகிக்கவும். கூட்டு போல இந்த கறி சற்று தளர இருக்க வேண்டும். புளிக்குழம்பு, ரசம் சாதத்திற்குத் தொட்டுக்கொள்ள மிகவும் ருசியாக இருக்கும்.