"திங்க"க்கிழமை : தேங்காய்ப் பால் தட்டை - துரை செல்வராஜூ ரெசிப்பி

 தேங்காய்ப் பால் தட்டை..

மறுபடியும் கொல்லர் தெருவில் கோணி ஊசி விற்பதற்கு வந்திருக்கின்றேன்..

இன்று தேங்காய்ப் பால் தட்டை செய்வது எப்படி என்று பார்க்கலாம்.. 

தேவையான பொருட்கள்:   

பச்சரிசி மாவு - 200  கி

பயற்றம் பருப்பு - 50 கி 

பொட்டுக் கடலை 50 கி

எள்  - 2 tsp 

கறிவேப்பிலை - 2 இணுக்கு 

கல் உப்பு - தேவையான அளவு 

வெண்ணெய் - 2 tsp 

கடலெண்ணெய் - தேவையான அளவு 

கவனத்துடன் எல்லாவற்றையும் செய்யவும்..

முதலில் எள்ளை சுத்தம் செய்து கொள்ளவும்..

அதான் தெரியுமே!..

(இந்த  - அதான் தெரியுமே!.. எல்லாவற்றையும் தட்டை பொரித்தெடுத்த பின் சொல்லிக் கொள்ளலாம்..)

எள்ளிற்கு மாற்றாக சீரகம் அல்லது ஓமம் சேர்த்துக் கொள்ளலாம்.. 

(ஆர்வக் கோளாறினால் எல்லாவற்றையும் ஒன்றாகப் போட்டு விடாதீர்கள்.. பதார்த்த குணோபேதம் ஆகி விடும்)

கறிவேப்பிலையை அலசி விட்டு அப்படியே உருவி எடுத்து இரண்டாகக் கிள்ளி தனியே வைத்து விடவும்..

கல் உப்பினை நன்றாக தூளாக்கிக் கொள்ளவும்.. 

(இந்த டொக்கு டொக்கு வேலைக்கு அயோடைஸ்டு சால்ட்டு வாங்கிடலாமே என்று நினைத்தால - கல் உப்பு தான்  சிறந்தது..)

பயற்றம் பருப்பை மிதமான தீயில் சிவக்க வறுத்தெடுத்து ஆறியதும் மிக்ஸியில் இட்டு மிருதுவாக அரைத்துக் கொள்ளவும் ..

கையோடு கையாக பொட்டுக் கடலையையும் மிருதுவாக அரைத்துக் கொள்ளவும் ..

அப்படியே பச்சரிசி மாவினை சற்று வறுத்துக் கொள்ளவும்..

தேங்காயைத் துருவி மிக்ஸியில இட்டு அரைத்து  150 மிலி., அளவுக்கு - பால் பிழிந்து கொள்ளவும்..

சற்று அகலமான பாத்திரத்தில் பச்சரிசி மாவு, பயற்றம் பருப்பு மாவு, பொட்டுக் கடலை மாவு, எள், கறிவேப்பிலை,  வெண்ணெய்  மற்றும் உப்புத் தூள் அனைத்தையும் போட்டு நன்றாகக் கலந்து, சிறிது சிறிதாக தேங்காய்ப் பாலை ஊற்றி - ரொம்பவும் இறுக்கமாக இல்லாமல் ஓரளவு தளர்வாகப் பிசைந்து - மாவினை பத்து நிமிடங்கள் அப்படியே வைத்து விடவும்..

கை அகல வாழை இலையில் எண்ணெய் தடவி,  நெல்லிக் காய் அளவு மாவை எடுத்து, இலையில் வைத்து தட்டையாக  தட்டிக் கொள்ள வேண்டும்.  

தட்டிக் கொள்ள  - என்றதும் டமார் டமார் என்பதாக  அர்த்தம் செய்து கொள்ள மாட்டீர்கள் என்று நிர்வாகக் குழு நம்புகின்றது (வேற வழி!..)

வாணலியை அடுப்பில் வைத்து, அதில்  தேவையான அளவு கடலெண்ணெய் ஊற்றி காய்ந்ததும், 

அதில் தட்டி வைத்துள்ள தட்டைகளை இட்டு இரு புறமும் புரட்டி விட்டு எண்ணெயின் சொட சொட சத்தம் அடங்கியதும்  எடுக்க வேண்டும். 

பிசைந்து வைத்த மாவினை தட்டைகளாக்கி முடித்ததும் பூஜை மாடத்தில் வைத்து நிவேதித்த பின்னர் - நிவேதித்த பின்னர்

உங்களுக்குத் தான் தெரியுமே!..

பக்கத்து வீடுகள் ராசியாக இருந்தால் பகிர்ந்து கொள்ளவும்.. இல்லையேல் இருக்கவே இருக்கின்றது சுத்தமான Es டப்பா!..

இப்போது தாராளமாக சொல்லிக் கொள்ளலாம் - 

அதான் எனக்குத் தெரியுமே!..