நான் தரிசனம் செய்த கோவில்கள்: நெல்லைத்தமிழன் : வைரமுடி யாத்திரை 22

 

வைரமுடி யாத்திரை – மேல்கோட்டை வைரமுடி, ராஜமுடி தரிசனம் – பகுதி 22

உற்சவர் செல்வப்பிள்ளைக்கு வைரமுடியை அணிவித்த பிறகு, உபய நாச்சிமார்களுடன், தங்க கருட வாகனத்தில் அமரவைக்கிறார்கள். இந்த தங்க கருட வாகனத்தின் பிரபை, இருபுறமும் யாளிகளைக் கொண்டது (படங்களில் தெளிவாகத் தெரியும்). பல்லக்கில் ஒருவர் அமர்ந்துகொள்ள (கற்பூர ஹார த்தி காண்பிக்க), பல்லக்கின் முன்பாக ஒருவர் சாமரம் வீச, பல்லக்கை இருபுறமும் பலர் சுமந்துகொண்டு வர, ஊர்வலம் நடக்கிறது. கூட்டம் மிக மிக அதிகம் என்பதால், நிறைய காவலர்களும் டியூட்டியில் இருப்பார்கள். பல்லக்கின் இரண்டு புறங்களிலும் மற்றும் பின்புறமும் இரும்பால் ஆன நகரும் தடுப்புகளை அமைத்துக்கொண்டே வருவார்கள். பல்லக்கு தெருவின் ஒரு புறம் திரும்பி அங்கு இருக்கும் பக்தர்களுக்கு பெருமாள் தரிசனம் தருவார் (சுமார் 1-2 நிமிடங்கள்) பிறகு பல்லக்கு தெருவின் மறுபுறம் திரும்பும். அதே நிலையில் இன்னொரு 2 நிமிடங்கள். அப்போது தெருவின் இருபுறமும் இருப்பவர்களுக்கு பல்லக்கில் பெருமாளின் முன்னழகும் பிறகு பின்னழகும் தெளிவாகத் தெரியும். பிறகு தெருவைப் பார்த்துக்கொண்டு ஒரு நிமிடம்.  அப்புறம் இன்னுமொரு 15-20 அடிகள் முன்னேறும்.  இப்படி நத்தை வேகத்தில் தான் ஊர்வலம் இருக்கும். பெருமாளின் வெகு அருகில் பக்தர்கள் செல்ல இயலாது. ஆனால் வைரமுடி தரிசனம் எனக்குக் கிடைக்கவில்லை என்று ஒரு பக்தரும் சொல்வதற்கு வாய்ப்பே இல்லை.

ஆனால் தெருவின் இருபுறமும் இருந்த இடத்தை விட்டுவிட்டு, பல்லக்கை நோக்கி முன்னேறினால் கூட்டம் நெருக்கித் தள்ளும். கொஞ்சம் ஆபத்துதான்.

நான்கு மாட வீதிகளும் செவ்வக வடிவத்தில் இருக்கிறது. நீண்ட பகுதி 300 மீட்டர் இருக்கும் என்று நினைக்கிறேன். இந்த 300 மீட்டரைக் கடக்க சுமார் 1 ½ - 2 மணி நேரமாகும். இரவு 10 மணிக்கு புறப்பாடு ஆரம்பித்தால், பல்லக்கு திரும்பவும் கோவிலுக்கு வரும்போது அதிகாலை 4 மணி ஆகிவிடும். ஊர்வலம் முழுவதும் தெருக்களின் முனையில் உள்ள பெரிய திரையில் ஒளிபரப்பாகும். அதனால் பல்லக்கு எங்கு இருக்கின்றது என்பது தெளிவாகத் தெரியும். தேவையில்லாமல் பல்லக்கின் அருகில் சென்று தரிசனம் செய்கிறேன் என்று நினைத்தால், தடுப்புக்காகப் போடப்படும் நகரும் தடுப்புகள், காவலர்கள் அவற்றை நகர்த்தும்போது நம் கால்களைப் பதம் பார்க்கும், நெருக்கும் பக்தர் கூட்டமும் stampedeக்கு வழிவகுக்கும்.

இரண்டு வருடங்களிலும் எனக்கு மிக நிறைவான தரிசனம் வாய்த்த து. ஒரு சிலரின் உதவியால், பல்லக்கின் இடையில் சென்று பெருமாளை மிக அருகில் ஓரிரு நிமிடங்கள் தரிசனம் செய்ய முடிந்தது.

வைரமுடியின் closeups

பல நேரங்களில், நாமும் அங்கிருந்தோம், செல்வப் பிள்ளையைப் படம் எடுத்தோம் என்ற ஆர்வம் பக்தர்களிடையே அதிகரித்துவிடுகிறது. அந்தக் கூட்டத்திலும் பெருமாளை செல்ஃபோன் திரை மூலமாகக் காண்பதில் மகிழ்ச்சி.

பிரபையில் இரட்டை யாளி தெரிகிறதா?

மிக மெதுவாக தெருவின் இரு புறமும் திரும்பி, அந்த நிலையிலேயே ஓரிரு நிமிடங்கள் தரிசனம் தருவதால், தரிசனம் தெளிவாக இல்லை என்று யாருமே குறை சொல்ல இயலாது. எங்கெங்கிருந்தோ இந்த தரிசனத்திற்காகப் பயணம் செய்து வரும் பக்தர்களுக்கு இதைவிட வேறு என்ன வேண்டும்? கூட்டத்தின் அடர்த்தி இந்தப் படங்களில் தெளிவாகத் தெரிகிறதல்லவா?

வைரமுடியுடன் அதற்குரிய கருட வாகனத்தில் செல்வப்பிள்ளையின் வீதிப்புறப்பாடு

கருட வாகனத்தில் வைரமுடியுடன் செல்வப்பிள்ளை

வைரமுடி மற்றும் வைரமுடியுடன் செல்வப்பிள்ளை

காலை 5 மணி. முந்தின இரவு கண்முழித்து வைரமுடி தரிசனம் கண்டபிறகு மக்கள் ஆங்காங்கே தெருக்களில் படுத்து உறங்குகிறார்கள். மறுநாள் காலை குளித்துவிட்டு அப்படியே அவரவர் ஊர்களுக்குச் சென்றுவிடுவார்கள். 

வைரமுடியுடன் கூடிய பல்லாக்கு ஊர்வலம் காலை 4 மணி வாக்கில் நிறைவு பெறும். பல்லக்கு கோவிலுக்கு எதிரே உள்ள பெரிய மண்டப த்திற்குச் சென்றுவிடும். முழுவதுமாக கதவைச் சாத்திய பிறகு வைரமுடி களையப்பட்டு, பாதுகாப்பு வேனுக்கு எடுத்துச் செல்லப்படும். பிறகு உற்சவருக்கு மாற்று அலங்காரம் செய்யப்பட்டு, ராஜ முடி அணிவித்துத் தயாரான பிறகு மண்டபத்திலிருந்து வெளியே வருவார்.

காலை 4 மணிக்கு கோவில் கோபுரங்கள் விளக்கு வெளிச்சத்தில் அழகுறக் காட்சியளிக்கிறது

ராஜமுடி வாஹனமண்டபத்துக்குச் செல்கிறது. ராஜமுடி அணிவித்தபிறகு, வைரமுடி கோவிலுக்குக் கொண்டுவரப்படுகிறது (இது இரண்டும் இட்லி பானையில்தான் துணிகள் சுற்றி வைத்திருப்பார்கள். அந்தக் காலத்தில் இருந்த நடைமுறை இப்போதும் பின்பற்றப்படுகிறது). இதற்குப் பிறகு வாஹன மண்டபத்திலிருந்து செல்வப்பிள்ளை ராஜமுடியுடன் கோவிலுக்கு எழுந்தருளுவார்.

ராஜமுடியுடன் காலையில் 5 ½ மணிக்கு கோவிலுக்கு முன்பு தரிசனம். 300-500 பேர் இந்தத் தரிசனத்துக்காக காத்திருப்பார்கள். வாஹன மண்டபத்திலிருந்து (கோவிலுக்கு எதிரே உள்ளது) கோவில் வாசலுக்கு 80 அடி தூரம்தான் என்றாலும், மெதுவாக ஒவ்வொரு பக்கமும் திரும்பி எல்லோரும் இறைவனை ராஜமுடியுடன் தரிசிக்க வேண்டும் என்று நிறுத்தி நிறுத்தி தரிசனம் பெறவைப்பார்கள். ஆனால் இவ்வளவும் 10 நிமிடங்களுக்குள் முடிந்துவிடும்.

ராஜமுடியுடன் செல்வப்பிள்ளையின் பின்னழகு அலங்காரம்

ராஜமுடியுடன் செல்வநாராயணர் உபய நாச்சிமார்களுடன்

திருவாய்மொழியின் கீழே உள்ள பாசுரங்கள் திருநாராயணபுரம் பெருமாளைப் பற்றியது என்று பெரியோர்கள் சொல்வர், நேரடியாக ஊர் பெயர் குறிப்பிடப்படாத போதிலும்.

ஒரு நாயகமாய்* ஓட உலகுடன் ஆண்டவர்,*

கருநாய் கவர்ந்த காலர்* சிதைகிய பானையர்,*

பெருநாடு காண* இம்மையிலே பிச்சை தாம் கொள்வர்,*

திரு நாரணன் தாள்* காலம் பெறச் சிந்தித்து உய்ம்மினோ.

உலகை ஆட்சி செய்த அரசனானாலும், ஒரு நேரத்தில் தரித்திரர்களாக இந்தப் பிறவியிலேயே கஷ்டமுறும் நிலையை அடைவார்கள். அதனால் நேரம் இருக்கும்போதே நாராயணனின் தாள்களைப் பற்றிக்கொள்ளுங்கள்.

வாழ்ந்தார்கள் வாழ்ந்தது* மாமழை மொக்குளின் மாய்ந்து மாய்ந்து,*

ஆழ்ந்தார் என்றல்லால்* அன்று முதல் இன்றறுதியா,*

வாழ்ந்தார்கள் வாழ்ந்தே நிற்பர்* என்பதில்லை நிற்குறில்,*

ஆழ்ந்தார் கடல் பள்ளி* அண்ணல் அடியவர் ஆமினோ

இந்த உலகத்தில் எப்போதும் ராஜபோகமாக நன்றாக வாழ்ந்தவர்கள் இல்லை. வாழ்க்கை என்பது நீர்க்குமிழி போன்றது. நிலையான வாழ்வு கிடைக்க அந்த இறைவனைச் சரண் அடையுங்கள்

சென்ற வருடம் இரவு முழுவதும் முழித்திருந்து வைரமுடி மற்றும் ராஜமுடி தரிசங்களைக் கண்டேன். இந்த முறை, வைரமுடியுடன் செல்வப்பிள்ளையின் தரிசனம் முடிந்ததும், 4 மணிக்கு அலாரம் வைத்துக்கொண்டு தூங்கிவிட்டேன். காலையில் எழுந்து கோவிலுக்குச் சென்று காத்திருந்து ராஜமுடி தரிசனம் பெற்றேன். பிறகு, காபி முடிந்தபின், எல்லோரையும் கல்யாணி திருக்குளத்தில் குளித்துவிட்டு பெட்டி படுக்கைகளோடு தயாராக இருக்கும்படியும், பேருந்து வந்ததும், லக்கேஜ்களை ஏற்றிவிட்டு, பெங்களூர் நோக்கி 7 மணிக்குக் கிளம்பவேண்டியதுதான் என்று யாத்திரை நடத்துபவர் சொன்னார். அனேகமாக குழுவில் எல்லோரும் சென்னைக்கு 2 ¼ மணி இரயிலில் பெங்களூர் மெஜெஸ்டிக் இரயில் நிலையத்தில் ஏறணும். செல்லும் வழியில் இரண்டு கோவில்கள் தரிசனம் வேறு இருக்கிறது.  நான் கல்யாணி திருக்குளத்துக்குச் சென்று குளித்துவிட்டு, என்னுடன் தங்கியிருந்தவர்களோடு திரும்பினேன். வழியில், எதுக்கு மேல்கோட்டை வந்துவிட்டு விடுவானேன் என்று மெஸ்ஸில் தட்டை இட்லி சாப்பிட்டேன். மற்றவர்களும் இட்லி, தோசை என்று சாப்பிட்டனர் (10 ½ மணிக்கு செல்லும் வழியில் உள்ள கோவிலில் உணவு கொடுப்பார்கள். இருந்தாலும் ஆசை யாரை விட்டது?)

அதிகாலை கல்யாணி திருக்குளம் மற்றும் மலைமேல் யோக நரசிம்மர் ஆலயத் தோற்றம்.

சொன்ன நேரத்திற்குள் நாங்கள் எல்லோரும் குளித்து உடை மாற்றிக்கொண்டு, பெட்டி படுக்கைகளைத் தயாராக எடுத்துக்கொண்டு 7 மணிக்கு பேருந்திற்காகக் காத்திருந்தோம். யாத்திரையின் நிறைவுப் பகுதியை அடுத்த வாரம் காணலாம்.

(தொடரும்)