தேனொழுகும் தீந்தமிழே !

 

பானுமதி வெங்கடேஸ்வரன்: 

பிரின்ஸஸ் டயானா, ஜெயலலிதா - ஒப்பிடுக.

(சமீபத்தில் வாஸந்தி எழுதிய  'ஜெயலலிதா மனமும் மாயையும்' என்னும்  புத்தகம் படித்தேன். இன்று 'Crown' சீரிஸின் இறுதி பாகத்தின் முதல் பகுதியை பார்த்து முடித்தேன். அதன் விளைவு இந்த கேள்வி.) 

# ஒருவர் அளவுக்கு மீறி ஊழல் மற்றவர் ஊழல் செய்ததில்லை. இருவருமே பிரபலம். ஒருவர் உலகளாவிய பிரபலம். மற்றவர் பேட்டை பயில்வான். என் கருத்தில் ஒருவர் நல்ல அழகு.  அடுத்தவர் அழகியாக (ஏனோ எப்படியோ) பெயர் பெற்றவர். ஒருவரை மணந்தது கணவரின் பெரிய வெற்றியாக ஆரம்பத்தில் சொல்லப் பட்டது.  அடுத்தவர் வாழ்க்கைத் துணை விஷயத்தில் சிக்கலும் மர்மமும் இருந்தது. ஒருவர் சமூக சேவையில் அக்கறை காட்டியவர்.  மற்றவர் சமூகத்தை பயன் படுத்தி லாபம் சம்பாதித்தவர். இருவரது மரணமும் மர்மம் நிறைந்ததாக காணப்பட்டது. ஒருவர் இளம் வயதில் விபத்தில் மாண்டார்.  ஆனால் மற்றவர் தன் மோசமான ஆரோக்கியத்தை மீறிய அவபத்தியம் காரணமாக நோயில் விழுந்தவர். இருவருக்கிடையே ஒப்பிட நிறைய இல்லை.

இருவரும் தன் "சினேகத்தால்" பலியானவர்கள்.

& 

 டயானா பிறந்த ஊர் : Sandringham. 

ஜெயலலிதா பதவி இழந்தபோது Srirangam MLA

 

Diana = ஐந்து எழுத்துகள். 

ஜெயலலிதா = ஐந்து எழுத்துகள். 

= = = = = = =

சென்ற வாரம் வேறு யாரும் எங்களை கேள்விகள் கேட்கவில்லை. அதனால நாங்க உங்களைக் கேள்வி கேட்கிறோம். 

எங்கள் கேள்விகள் : 

சமையல் கேள்விகள் திங்கக் கிழமையில் கேட்கப்பட்டு - அதற்கு பதில்களும் அன்றைய பதிவில் வெளியாகியுள்ளன. 

1) நீங்கள் முதலில் பார்த்த பிறமொழி திரைப்படம் எது? 

2) தமிழ் ஆங்கிலப்படம் தவிர மற்ற மொழி படங்களில் உங்களுக்குப் பிடித்த படம் எது? பிடித்த பிறமொழி நடிகர், நடிகை யார்? 

3) சமீபத்தில் நீங்கள் சென்ற புதிய ஊர் / புதிய இடம் எது? 

= = = = = =

KGG பக்கம் : 

நாகப்பட்டினம் - தமிழ் - இரண்டையும் ஒருங்கே நினைத்துப் பார்த்தால் - நாகையில் நான் பயின்ற தமிழ் குறித்துத்தான் - எண்ணத் தோன்றுகிறது. எட்டாம் வகுப்புக்குப்பின் - ஆங்கில மொழிக் கல்விக்கு (JTS) தடம் மாறிவிட்டதால், அதுவரை தமிழை ஒரு பாடமாக - நினைத்து தேர்ச்சி பெற வேண்டிய அளவுக்கு, மதிப்பெண் எடுக்க , என்று படித்த காலம் போய், தமிழை, தமிழுக்காக படித்த காலம் ஆரம்பமானது. இலக்கணம் கிடையாது, கட்டுரை, துணைப் பாடம் இத்யாதிகள் கிடையாது. 

அந்தக் காலத்தில் எங்களுக்கு தமிழ் சொல்லிக் கொடுக்க பன்னீர்செல்வம் என்று ஓர் ஆசிரியர் வந்தார். ஆசிரியப் பணி அரை மணி - அரட்டை மற்றும் அக்கப்போர் - அரை மணி என்று வகுப்பு நடத்துவார். (பொன்னியின் செல்வன் படித்துவிட்டு - நாகப்பட்டினம் புவியியல் குறித்து அவர் அவிழ்த்துவிட்ட அரை டஜன் 'டுப்'புகள் இப்பொழுதும் எனக்கு கனவில் வருகின்றன என்றால் பார்த்துக் கொள்ளுங்கள் - எவ்வளவு பலமான தாக்கம் என்று!) 

அப்பொழுது பதவியைப் பிடித்த ஒரு மூன்றெழுத்துக் கட்சி மீதும், அதற்கு பெரும் பங்கு காரணமாயிருந்த ஒரு மூன்றெழுத்து நடிகர் மீதும் அவருக்கு நிறைய பக்தி. ஒரு கிறித்துவப் பாதிரியாரின் மகனாக இருந்ததால், வாய்ப்பு வாய்க்கும்போதெல்லாம் இந்துக் கடவுள்களை ஜாடை மாடையாக கிண்டல் செய்வார். ஆனால் எல்லை மீறியதில்லை.

மாணவர்களிடம் அவர் ஒரு முறை தேர்வு எழுதப் பின்பற்ற வேண்டிய யுக்திகள் குறித்து சொல்லும்பொழுது - விடைத் தாளில் பிள்ளையார் சுழி போடாமல் - மாணவர்கள் கீழ்க் கண்ட வரிகளில் ஏதேனும் இரண்டு வரிகளை எழுதி, பிறகு தமிழ்த தேர்வு எழுதினால் - விடைத்தாள் திருத்துபவரைக் கவரலாம் என்று கூறினார்.

அவற்றில் சில இதோ:

தேனொழுகும் தீந்தமிழே - நீ கனி, நான் கிளி

வேறென்ன வேண்டும் இனி!

இறக்கின்ற நிலையினிலும் - இன்பத தமிழே உன்னை

மறக்காது நான் ஓத வேண்டும்.

இதுமாதிரி - அவர் பத்து இருவரிக் கவிதைகள் எழுதிப் போட்டார் - கரும்பலகையில். மாணவச் செல்வங்கள் - அதை எல்லாவற்றையும் தங்கள் நோட்டில் பக்தி சிரத்தையுடன் எழுதிக் கொண்டனர்.

அந்த ஆண்டு - (எஸ் எஸ் எல் சி) தமிழ்ப் புத்தகத்தில் பாடம் முடிவில் - கேள்விகள் இருக்காது -- கேள்விகளையும், அவற்றிற்கான பதில்களையும் மட்டும் மனப்பாடம் செய்து - அதை அப்படியே தேர்வில் எழுதி - மதிப்பெண் பெறுவது என்ற மனோபாவத்தில் வளர்ந்த பல மாணவர்கள் அந்த காலக்கட்டத்தில் மிகவும் திணறிப் போய்விட்டார்கள். 

காலாண்டுத் தேர்வில் - அந்தத் தமிழ் ஆசிரியர் - கேள்விகளை -- மிகவும் கடினத் தமிழில் -- உதாரணமாக " பொய்யா விளக்கு பற்றி ஆசிரியர் புகலுவதைப் புகலுக ", "வரைந்தவைகளை வரைக", "அறைந்தவைகளை அறைக ", "விளக்குபவைகளை விளக்குக " என்றெல்லாம் அமைத்து - தன புலமையைக் காட்டியிருந்தார்.

அந்தக் காலாண்டுத் தேர்வில் மாணவர்கள் எழுதியிருந்த விடைத் தாள்களை -- திருத்தி, மதிபெண்களுடன் திருப்பிக் கொடுக்கும் நாளில் - அந்த ஆசிரியர் எவ்வளவு திண்டாடிப் போயிருப்பார் என்று தெரிந்தது.

பல மாணவர்கள் அவர் எழுதிப் போட்ட - எல்லா இரு வரிகளையும் பக்தியோடு எழுதி, வேறு விடைகள் எதுவும் எழுதாமல் விட்டிருந்தனர். விடைகளுக்கு பதிலாக - அந்த இரு(பது) வரிகள் போதும் என்று நினைத்திருந்தனர் போலிருக்கிறது.

ஒரு மாணவர் இரண்டே வரிகள்தான் எழுதியிருந்தார்.

" இறக்கின்ற நிலையில் இருக்கும் இன்பத் தமிழே

நீ கிளி - வேறென்ன வேண்டும் இனி?"

= = = = = = = = 

அப்பாதுரை பக்கம் : 

தூங்கு தம்பி தூங்கு

முப்பத்து வயதைக் கடந்தபின், வார நாட்களில் காலை நாலரை மணிக்கு எழுவது ஓரளவுக்கு இயல்பாகிப் போனது.  அதிகாலையின் அமைதியில் குடும்பத்தார் தொல்லையில்லாமல் சிந்திக்க வசதியாக இருந்தது. அலுவலக வேலையோ, சொந்தப் பிரச்சினையோ, கதையெழுதவோ, படிக்கவோ, நண்பர்களுடன் ஓடவோ, பிரிய பைரவருடன் பனிபடர் தெருக்களில் நடக்கவோ, வெட்டியாக வானத்தைப் பார்த்தபடி உட்காரவோ.. காரணமே தேவையிருக்கவில்லை. உறக்கம் துறந்த உணர்வும் ஏற்படவில்லை.

முப்பது வயது நாற்பதாகி ஐம்பதாகி அறுபதைத் தொட.. விழிப்பதும் நாலரை நழுவி அடிக்கடி மூன்றரையாகி சமீபத்தில் இரண்டரையானது கொஞ்சம் திடுக்கிட வைத்துள்ளது. இப்போதெல்லாம் இரண்டு மணிக்கு விழிப்பு வருகிறது.  நாலரைக்கு எழுவதைப் பொருட்படுத்தாத மனம் இரண்டரைக்கு எழுந்தால் பதைக்கிறது.  திரும்பத் தூங்க முடியாமல், எழுந்து ஏதாவது செய்யவும் துணியாமல், பிசைந்த மாவுபோல் கிடக்கும் உணர்வு பிடிக்கவேயில்லை.

ஏதாவது வியாதியில் விடப்போகிறது என்ற அச்சத்தில் பழகிய மருத்துவரை அணுகினேன்.  அச்சத்தில் மருத்துவரை அணுகுவதே ஒரு வியாதி என்பதை அனுபவத்தில் சொல்லிக்கொண்டு தொடர்கிறேன்.

பாசெம் பழகிய மருத்துவர். பின் வீட்டுக்காரர்.  ஒரு ஞாயிறு காலை (மணி ஐந்தாகவில்லை) மருத்துவர் வீட்டுப் பின்கட்டில் விளக்கெரிவதையும் அவர் வீட்டு ஜூலியன் பலமாகக் குரைப்பதையும் கவனித்தேன். முன்னிரவு என் வீட்டில் செய்த வாழைப்பழ ரொட்டி அரை பாகம் வெட்டி எடுத்துக்கொண்டு பின்வேலிப் பொதுக்கதவைத் திறந்து சட்டென்று அவர் வீட்டுக்குள்  நுழைந்தேன்.  "ஹலோ" என்றேன். "ஹலோ" என்றார் பாசெம் பாயாமல். "வள்" என்றது ஜூலியன் பாய்ந்து. 

"காரணமில்லாமல் இரண்டு மணிக்கெல்லாம் அடிக்கடி விழித்துக் கொள்கிறேன்.  சில சமயம் பத்து நிமிடங்களில் தூக்கம் திரும்புகிறது. பல சமயம் நாலு ஐந்து மணி வரை தூக்கம் திரும்பாமல் தவித்து எழுந்து கொள்கிறேன்" என்றேன். 

"இதைச் சொல்ல நல்ல நேரம் கிடைச்சுதாய்யா உனக்கு ?" என்றபடி நான் நீட்டிய ரொட்டியைப் பிடுங்கிக் கொண்டார் பாசெம். "இது ஒரு வியாதியின் தொடக்கமாக இருக்கலாம்" என்று அவர் தொடங்கினார்.  "பிஎஸ்சில இதை நிறைய ஆய்வு செஞ்சிருக்கோம்" என்றார். 

"அப்படியா!" என்றேன். 

"பெட்டர் ஸ்லீப் கவுன்ஸில்" என்றார். 

"ஓஹோ" என்றேன். 

அவர் பிஎஸ்சில நிர்வாகியா இருந்தவராம். "படுக்கைப் பழக்கங்களை நிறைய கவனித்து ஆராய்ந்து.." என்று அவர் தொடர,  இதென்ன.. ராவெல்லாம் ராங்காகுதேனு நான் சொன்னதை வேறே மாதிரி புரிஞ்சுகிட்டாரா என்று பதைத்தேன். "இருங்க பாசெம்" தடுத்தேன். "நான் கேட்டது என் தூக்கம் போனது ஹெல்த் மேட்டரா இருக்குமானு.." என்றேன். "நானும் அதைத்தான் சொல்றேன்.. கவனமா கேளு யூ பெர்வர்ட்" என்றார். ரொட்டியைத் துண்டு துண்டாக தன் வாயிலும் ஜூலியன் வாயிலும் எறிந்தார். எனக்கு ஒரு துண்டு கூட ஈயவில்லை. எல்லாம் செவிக்குணவு.

லட்சம் பேர் பங்கு கொண்ட உலகளாவிய கணிப்பாய்வில் அறிந்தது:

- ஆண்களில் 53% பேர் தேவையான அளவு தூங்குவதில்லையாம். 

- பெண்களில் 76% இதே கேசாம். (யாரு தான் தூங்கறாங்க அப்ப?)

- 40% பேர் படுக்கையில் வாட்சப் யுட்யூப் டிக்டாக் பார்த்து தூங்கும் நேரம் கடத்தி தூக்கத்தை தொலைக்கிறார்களாம். இந்த கும்பலில் பதினாறிலிருந்து முப்பது வயதுக்குட்பட்டவர்கள் 75%க்கும் அதிகமாம். (இப்படை தோற்கின் எப்படை வெல்லும்?!)

- ஐம்பது வயதுக்கு மேற்பட்டவர்கள் அதிகம் சொல்லும் காரணம்: பிள்ளைகள் அல்லது பணம் பற்றிய இறுக்கம். 

- ஐம்பது வயதுக்குக் குறைவானவர்கள் அதிகம் சொல்லும் காரணம்: உடல் வலி (ஆச்சரியம்! இவர்கள்தான் பணம் பற்றிக் கவலைப்படுவார்கள் என்று நினைத்தேன். ஐம்பது வயதுக்குள் உடல்வலிக் கவலை வேறா?)

- பதினெட்டு வயதுக்கும் இளைய பிள்ளைகள் உள்ள வீட்டில் (பெற்றோர் உள்பட) 50% பேர் இரவில் ஐந்து மணி நேரத்துக்கு மேல் தூங்குவதில்லையாம். 

- ஜப்பானில் 22% பேர் படுக்கையில் தினம் நாய் பூனை என்று செல்லப் பிராணிகளோடு தூங்குவதால் அடிக்கடி விழித்துக் கொள்கிறார்களாம். (நாய் பூனை வளர்ப்பவர்கள் கண்டிப்பாக அவற்றைத் தனியாகப் படுக்க வைக்க வேண்டும் இல்லையெனில் நாளடைவில் நிறைய மனவியாதிகளைக் கொண்டு வருமாம். என் பெண்னிடம் சொன்னால் அடிக்க வருவாள்)

- 66% பேர் செல்போனைத் தலையடியிலோ காதருகிலோ வைத்துப் படுப்பதால் அடிக்கடி விழித்துக் கொள்கிறார்களாம் (பாசெம் இந்த வழக்கத்தை வன்மையாகக் கண்டித்தார். மாறிவிட்ட சமுதாயம் பற்றிப் பொருமினார். வணிகத்தனம் என்பதை கெட்ட வார்த்தை போல் சொன்னார். நிற்க, இன்னொரு முக்கிய செய்தியில் செல்போன் போன்ற செயலி ஒன்றை மனித மூளையுடன் பொருத்திப் பரிசோதன செய்ய மஸ்கின் ந்யூரலிங்க் நிறுவனத்துக்கு அனுமதி கிடைத்துள்ளது. பலே பாண்டியா।)

- கீழை மற்றும் சில ஆப்பிரிக்க நாடுகளில் திறந்த வெளியிலும் தரையிலும் படுப்பவர்களில் 90% பேர் தினம் எட்டு மணி நேரம் தூங்குகிறார்களாம்.

- ந்யூஸீலாந்து நாட்டில் தான் உலகிலேயே அதிகம் பேர் (79%) தினம் ஆறு மணி நேரமாவது தூங்குகிறார்களாம் (அரையிறுதி ஆட்டத்துக்குப் பிறகு இந்தக் கணக்கில் பத்து பேராவது குறைந்திருக்கும் என்று நினைக்கிறேன்)

- அறுபது வயதுக்கு மேல் தினம் பத்து மணி நேரமாவது தூங்குவதே பெரிய நோய் தடுப்பாகுமாம் (பொற்காலம் பற்றிப் புலம்பும், தற்காலம் பற்றிக் குறை சொல்லும், நேரம் குறையும்)

-  50% பேர் படுக்குமுன் தினம் சுடுநீரில் குளித்துப் படுத்தால் இரவில் அமைதியாக உறங்கலாம் என்றார்கள். 

- சாப்பிட்ட பின் நாலு மணி நேரமாவது பொறுத்து உறங்கப்போனால் ஆறு மணி நேரத் தூக்கம் உத்தரவாதம் என்பது 53% பேர் கணிப்பு (இந்தியாவின் இளைஞர் கூட்டம் தினம் இரவில் பத்து மணிக்கு மேல் சாப்பிடுவதை பல முறை நொந்திருக்கிறேன்)

- தூக்கத் தொந்தரவுகளுக்கு உணவே காரணமென்று 88% பேர் அடித்துச் சொன்னார்களாம்

- மனைவி, கர்ல் ப்ரண்ட் தொந்தரவே காரணம் என்று ஆண்களும் உல்டாவாகப் பெண்களும் சம அளவில் - 60% பேர் - கணித்துள்ளனர். (இதெல்லாம் ஒரு மேட்டரா?)

- தினம் படுக்கு முன் ஐந்து நிமிடம் மனதை அமைதிப்படுத்தும் விதத்தில் ஏதாவது செய்தால் நாளடைவில் உறக்கம் செம்மைப்படும் (தியானம், நல்ல செய்தி படித்தல், மூச்சுப் பயிற்சி வகையறா) 

- அறுபது வயதுக்கு மேற்பட்டு நன்றாக உறங்குவோரில் 50% பேர் துணையிழந்து வாழ்கிறார்கள் (அட!), 33% பேர் தினம் கடுமையான உடற்பயிற்சி செய்கிறார்கள் (அடேங்கப்பா!), 20% பேர் மதிய உணவோடு சரி (அச்சச்சோ!), 40% ஏதாவது தன்னார்வு செயலில் ஈடுபடுகிறார்கள் (ஆகா!), 70% பேர் கடவுள் வழிபாட்டில் இரண்டு மணி நேரம் செலவழிக்கிறார்கள் (ஓஹோ!), 50% பேர் டிவி சினிமா பார்ப்பதில்லை (பேஷ்,பேஷ்!)

விவரம் சொல்லி முடிக்கவும் கீழ்வானம் சிவக்கவும் சரியாக இருந்தது. "உபயோகமான தகவல்கள் பாசெம்.. விவரம் தெரிஞ்சு இருக்கறதால உங்களால நல்ல தூக்க பழக்கங்களை கடைபிடிக்க முடியுது" என்றேன்.

"அட போயா। நானும் ஒரு மணிக்கெல்லாம் முழிச்சிக்கிட்டேன்... ஏதோ நீ வந்தே.. ரெண்டு மணி நேரம் பொழுது போச்சு" என்றார். உள்ளிருந்து பத்து வேலியம் கொண்டுவந்து கொடுத்தார்.

= = = = = = = =