நான் தரிசனம் செய்த கோயில்கள் – ஐந்து துவாரகைகள் யாத்திரை – பகுதி 27 : நெல்லைத்தமிழன்

 

அக்பருக்கு ராஜபுதன இளவரசியான ஜோதா Bபாய்தான் பிடித்த மனைவி. அவளுக்குப் பிறந்தது மூன்று பையன்கள். மூத்தவன் சலீம், அதற்குப் பிறகு முராத், தானியேல். மூவருமே ஓபியம் மது போன்றவற்றை அளவுக்கு அதிகமாக உபயோகித்தவர்கள். அதனால் முராத் மற்றும் தானியேல் வெவ்வேறு சந்தர்ப்பங்களில் இறந்தார்கள். அதனால் சலீமை விட்டால் அக்பருக்கு வேறு வாரிசு கிடையாது. ஆனால் சலீமுக்கோ அடங்கி இருக்கும் பழக்கம் எப்போதும் இருந்ததில்லை. தனக்கு 30 வயது ஆகிவிட்டது ஆனால் தந்தையோ நல்ல ஆரோக்கியத்தோடு இருக்கிறார், என்றுதான் தான் மன்னனாவது என்ற கவலை. தந்தையோ எப்போது பார்த்தாலும் தன்னை வாழ்க்கையை அனுபவிக்க விடாமல், போர், கலவரம் என்று நாட்டின் ஒவ்வொரு புறத்திற்கும் அனுப்புகிறார் என்று தந்தை மீது இடைவிடாத கோபம் வெறுப்பு. அக்பருக்கோ, தான் சொல்வதைக் கேட்காமல் நடந்துகொள்கிறானே, வயதானாலும் பொறுப்பே வரவில்லையே என்று கோபம். 

வங்காளத்தில் அக்பருக்கு எதிராக புரட்சி செய்யக் கிளம்பிய ஆஃப்கானியத் தளபதியை அடக்க, சலீம் தலைமையில் படை கிளம்பட்டும் என்று ஆணையிட (அப்போது அக்பர் தெற்கே படையெடுப்பில் இருந்தார்), அலஹாபாத்தில் படையுடன் இருந்த சலீமோ, இவருக்கு எப்போது பார்த்தாலும் எடுபிடி போல என்னை அனுப்புவதுதான் வேலை என்று சொல்லி வங்காளத்திற்குக் கிளம்பவில்லை. பீஹாரிலிருந்து வந்த வரிப்பணம் முப்பது லட்ச ரூபாயை தானே எடுத்துக்கொண்டு, அதில் தன் பெயரில் நாணயம் அச்சடித்தார். சக்ரவர்த்தியைத் தவிர வேறு யாரும் நாணயம் அடிப்பது பெரும் குற்றம். அக்பர், ஆக்ரா திரும்பியவுடன், அவருக்கே இந்த நாணயத்தை சலீம் அனுப்பினார். அதுவும் தவிர சலீம் தன் படையுடன் அக்பருக்கு எதிராக வருவதாகச் செய்தி கிளம்ப, அக்பருக்கு கடும் கோபம். 

தெற்கே படைத் தளபதியாக இருந்த தன் நம்பிக்கைக்குரிய அப்துல்ஃபஸலுக்கு கடிதம் எழுதி என்ன செய்யலாம் என்று ஆலோசனை கேட்க, அவரோ, மகன் என்றும் பாராமல் சலீமை கைது செய்வதே சரி, பாதுஷா ஆணையிட்டால் தானே அந்தக் கட்டளையை நிறைவேற்றுவதாகச் சொல்ல, உடனே அக்பரும் அப்துல் ஃபஸலை தில்லிக்குப் போகச் சொல்கிறார். அதுமட்டுமல்ல, சலீமை விட, சலீமின் மகன் குஸ்ரூ, இளவரசனாக இருக்கப் பொருத்தமானவர் என்று வேறு சொல்லிவிட்டாராம் அப்துல் ஃபஸல். ஒற்றர் மூலம் இந்தத் தகவல் சலீமுக்கு வந்து சேர, ராஜபுதன சிற்றரசருக்கு அப்துல் ஃபஸலை வஞ்சனையாக கொலை செய்யச் சொல்லிவிடுகிறார். 

அப்துல் ஃபஸல் கொலை செய்யப்பட்டதை அறிந்த அக்பருக்கோ சொல்லவொண்ணாத துக்கம். இதற்குப் பதில் சலீம் என்னைக் கொன்றிருக்கலாமே என்று அரற்றினாராம்.  அவர்களது உறவுமுறையே சீராக இல்லை. அரச பதவிக்குப் பொருத்தமில்லாதவன் என்று அக்பர் சலீமை நினைத்தார். சலீமோ, தன் தந்தை தன்னை எப்போதுமே மரியாதையாக நடத்தவில்லை என்று நினைத்தார். திடுமென்று ஒரு நாள் அக்பர் வயிற்றுவலியால் சிரமப்பட்டு, இரண்டு நாட்களிலேயே இறக்கும் நிலைமைக்கு வந்தபோது, அரண்மனைப் பெரியவர்கள் சலீமை மெதுவாக அக்பர் முன் கொண்டுவர, சலீம் தலை வணங்க, அக்பர், தன் கிரீடத்தை சலீமின் தலையில் வைக்கச் சொன்னாராம், கூடவே பரம்பரையாக வந்த குறுவாளையும் கொடுத்தாராம். சலீம் ஜஹாங்கீராக பட்டம் ஏற்றவுடன் அக்பர் உயிர் பிரிந்தது.

இயற்கையிலேயே ரசனை மிக்க ஜஹாங்கீர், தன் மகன் குஸ்ரூவின் கண்ணைப் பிற்காலத்தில் பறித்ததும்,  ஜஹாங்கீரின் ஆசை மனைவி நூர்ஜஹான், குஸ்ரூவின் தம்பி குர்ரம் (பிற்காலத்தில் ஷாஜஹான்) என்று அவர்கள் இருவரின் அரசியல் விளையாட்டுகளும் சுவாரசியம் நிரம்பியது.

பெரிய மரக்கதவுகள்

அக்பரின் (பிற்பாடு ஜஹாங்கீரின்) அரண்மனை

அக்பர்/ஜஹாங்கீர் அரண்மனை நுழைவாயில். இந்துக்களின் கோலங்கள்.

அரண்மனையின் உட்பகுதி (நடுவில் வெட்டவெளி. சுற்றிவர அறைகள்)

இங்குதான் அக்பரின் மனைவியான ஜோதாபாய் (ராஜபுதன இளவரசி), தனக்குப் பிரியமான கிருஷ்ணன் கோவிலை வைத்திருந்தார். அந்த அறையையும் பார்த்தேன். பிற்காலத்தில் அது அழிந்துபட்டது.

இந்தப் பகுதிதான் ஜோதாபாய் தன்னுடைய இடமாக, சிறிய கிருஷ்ணன் கோவிலை வைத்திருந்தார் என்றார் வழிகாட்டி.

சிவப்புக் கல்லினால் ஆன இந்த அரண்மனைப் பகுதி முழுவதுமே அக்பர் மற்றும் ஜஹாங்கீர் காலத்தையது. ஜஹாங்கீருக்குப் பிறகு ஆட்சிக்கு வந்த ஷாஜஹானுக்கு வெள்ளைப் பளிங்கின் மீதான காதலால், தன்னுடைய அரண்மனைப் பகுதியை முழுவதும் வெள்ளைப் பளிங்கினால் அமைத்துக்கொண்டார். தன்னுடைய இரு மகள்களுக்கான சிறு அரண்மனையையும், தனக்கான சிறிய மசூதி மற்றும் சுற்றுப்புறங்களையும் வெள்ளைப் பளிங்கினால் கட்டிக்கொண்டார்.

மேல் விதானத்தில் இருந்த டிசைன்

நுணுக்கமாகச் செதுக்கப்பட்டிருக்கும் விதானங்கள்

அக்பர் அரண்மனையின் அழகிய கதவுகள்

 

செங்கற்களால் முழுவதும் கட்டப்பட்டது என்பது தெரியும். அதன் மீது சிவப்பு நிறம்.

அலங்காரங்கள் மிக நேர்த்தியாக இருக்கிறது.

உள்ளே சுட்ட செங்கற்கள்.

அக்பர்/ஜஹாங்கீர் அரண்மனை முற்றம். அங்கிருந்த நீரூற்று

ஜஹாங்கீர் அரண்மனை முற்றத்தில் நீரூற்று

நிறைய அரண்மனைப் பகுதிகள், கட்டிடங்கள் அழிந்துபட்டிருக்கலாம்.

 

அரண்மனையின் வடக்குப் பகுதியிலிருந்து பார்த்தால் தூரத்தில் தாஜ்மஹல். எவ்வளவு அழகாகத் தெரிகிறது பாருங்கள்.

இனி நாம் ஷாஜஹானின் அரண்மனைப் பகுதியை நோக்கிச் செல்லப் போகிறோம். அக்பர் பகுதி சிவப்பு நிற அரண்மனைகள்/கட்டிடங்கள் என்றால், ஷாஜஹான் அரண்மனைப் பகுதிகளோ வெள்ளைப் பளிங்குக் கட்டிடங்கள். அதனை அடுத்த வாரம் காண்போம்.

(தொடரும்)