நான் தரிசனம் செய்த கோயில்கள் – ஐந்து துவாரகைகள் யாத்திரை – பகுதி 29 : நெல்லைத்தமிழன்

 ஷாஜஹான் காலத்தில் கட்டப்பட்ட வெள்ளைப் பளிங்கு மாளிகைப் பகுதியைப் பார்க்க ஆரம்பித்த நாம், ஷாஜஹானின் அரண்மனையைப் பார்க்காமலா விடப்போகிறோம்?  அதிசயத்தால் அரச பதவிக்கு வந்து, தன் வீரத்தால் தக்கவைத்துக்கொண்ட ஷாஜஹானையும் விதி சும்மா விட்டுவைக்குமா? என்ன ஆனது என்பதை வரும் வாரங்களில் பார்ப்போம். என்று சென்ற வாரம் முடித்திருந்தேன்.

அதை நோக்கிச் செல்லும்போது, முகலாயர்களின் அரண்மனை கஜானா எங்கிருந்தது என்று வழிகாட்டி சொன்னார். அதனைத் தொடர்ந்து ஷாஜஹான் அரண்மனையை நோக்கிய நடை தொடர்ந்தது.

அக்பர், இந்த மாளிகைக்குக் கீழே (அதாவது அவரது அரண்மனைக்கு அருகில்) கிட்ட த்தட்ட 5000 பெண்கள் (வேலைக்காரிகள் உட்பட) இருக்கும் அறைகள் இருந்தனவாம். அங்கிருந்து ஏணிகள் மற்றும் வழிகள் மூலம் அரண்மனையின் எல்லா அறைகளுக்கும் செல்ல முடியுமாம். இவர்களில் அனேகமானவர்கள் அக்பருக்காக வேவும் பார்த்தவர்களாம். இவர்கள் இருந்த பகுதிக்குக் கீழே இருந்த பாதாள அறையில் முகலாய அரசின் பொக்கிஷங்களின் பெரும்பகுதி (நாணயங்கள் தங்கம், வெள்ளி, ஆபரணங்கள் முதலியவை) பாதுகாப்பாக இருந்தனவாம். தற்போது இந்த இரண்டு பகுதிகளும் பாதுகாப்புக் காரணங்களுக்காக முழுவதுமாக மூடப்பட்டிருக்கின்றன.

சின்னச் சின்ன பிறைகள் போல் இருக்கும் இடத்தில் என்ன இருந்திருக்கும்? சுவர் அலங்காரங்கள் மிக அழகாக இருக்கின்றன

விதானத்தின் டிசைன்கள் எவ்வளவு அழகாக இருக்கிறது பாருங்கள்

ஷாஜஹானின் அரண்மனை

ஷாஜஹானின் மூத்த மகள் ஜஹானாராவின் அரண்மனையை ஒட்டி ஷாஜஹான் அரண்மனை அமைந்துள்ளது. இது அறுகோண அமைப்பில் உள்ள அரண்மனை.

ஜஹானாராவின் அரண்மனையை ஒட்டி உள்ள பகுதியில்தான், அரசர் வெளிப்புறமாக நின்று (யமுனை ஆற்றின் பகுதி) காலையில் தரிசனம் தருவார். இது பல காலமாக நடக்கும் ஒரு நிகழ்வு. பொதுமக்கள் (குறிப்பாக பிராமணர்கள்-இப்படித்தான் வரலாற்றில் எழுதியிருக்கிறது) காலையில் குளித்த பிறகு அரச தரிசனம் செய்ய அந்தக் கரையில் வருவார்கள். அரசரைப் பார்ப்பது கடவுளைப் பார்ப்பது போல என்பது ஐதீகம்.  இது ஔரங்கசீப் காலத்தில்தான், சுத்த பைத்தியக்காரத்தனமான ஐதீகம் என்று சொல்லி நிறுத்தப்பட்டது. அது நிகழ்ந்த இடம் முதல் படம்.  அதை ஒட்டித்தான் அறுகோண வடிவில் வெள்ளைப் பளிங்கில் ஷாஜஹான் அரண்மனை உள்ளது. அதன் வெளிப்புறம் பால்கனி போல, பளிங்குத் தூண்களுடன் உள்ளதை இரண்டாவது படத்தில் காணலாம். அங்கு நின்றுகொண்டு பார்த்தால் தாஜ்மஹல் தூரத்தில் தெரியும்.

என் கண்ணுக்குத் தெரியும் தாஜ்மஹல் உங்கள் கண்ணிற்குத் தெரிகிறதா? அகழி, அதனை அடுத்து சாலை, அதனை அடுத்து மரங்களடர்ந்த பகுதி (தற்போது அதன் பல இடங்கள் வயல்களாக உள்ளன. அந்தக் காலத்திலும் இருந்திருக்கலாம்), அதன் பின்னர் தாஜ்மஹல், அதனை ஒட்டி யமுனை நதி.

ஷாஜஹான் அரண்மனை மற்றும் கஸ் மஹல் (இரு மகள்களின் அரண்மனைக்கு நடுவே இருப்பது) இரண்டும் 1900களில் எடுக்கப்பட்ட புகைப்படத்தில்

ஷாஜஹானின் அரண்மனை (வீடு என்று சொல்வது பொருத்தம்)

வீட்டின் பகுதியாக, வீட்டின் முன் அறையில் நீரூற்று (இதெல்லாம் எப்படியிருந்திருக்கும்?)

இந்தப் பால்கனி வழியாகத்தான் அவரால் வெகுதூரமுள்ள தாஜ்மஹலைப் பார்க்க முடியும். அவரது கடைசி 8 வருடங்கள் அவர் வீட்டுச் சிறையில் வைக்கப்பட்டிருந்தார் (ஔரங்கசீப், அவரது அரண்மனைக்கு எதிரே இருந்த பரந்த வெளி அறைகளில், ஷாஜஹானுடைய நூற்றுக்கணக்கான ஆசை நாயகிகளையும் வைத்துக்கொள்ள அனுமதி தந்தாராம். (ஒற்றை மனைவியை வைத்துக்கொண்டு நாங்கள் படும் பாடு…. என்று ஆண்கள் மனதுக்குள் எண்ணுவது எனக்குக் கேட்கிறது)

பால்கனியின் தோற்றம். அதன் அலங்காரங்கள்

காற்றுக்கு ஒரு குறைவும் இருந்திருக்காத மாளிகை அது.

ஷாஜஹானின் அரண்மனை முழுவதுமாகத் தெரிகிறதா? (இவங்களுக்கெல்லாம் சாப்பாடு எப்படி தயார் செய்திருப்பார்கள், எப்படிக் கொண்டுவந்திருப்பார்கள், வழியில் விஷம் கலக்காமல் எப்படிப் பார்த்துக்கொண்டிருப்பார்கள்? யோசிக்க யோசிக்க, அரசர்களை எப்படியெல்லாம் பாதுகாத்திருப்பார்கள் என்று வியக்கிறேன்)

முதம்மன் பர்ஜ் என்று சொல்லப்பட்ட மாளிகை (அறுகோண  கோபுரம்/மாளிகை)

இந்தப் படத்தில் ஷாஜஹானின் அரண்மனை, கோட்டைச் சுவர்கள், சிறிது தூரத்திலேயே பரந்து விரிந்த யமுனை ஆறு தெரியும். இந்த ஆற்றிலிருந்துதான் தண்ணீர், அரண்மனைக்கு வந்தது.  நீரை மேல் தொட்டியில் ஏற்றி, அங்கிருந்து தாமிரம் மற்றும்  ஒழுகாத களிமண் பைப்புகள் வழியாக பல அறைகளின் சுவற்றின் வழியே பாய்ந்ததாம். இந்த system மிகவும் நவீனமானது என்று வரலாற்று ஆசிரியர்கள் குறிப்பிடுகின்றனர்.

பளிங்குக் கல்லில் பலவித அலங்காரங்கள்.

வீட்டின் அலங்காரங்கள் மிக அழகாக இருக்கிறது அல்லவா? அவர் பாரத தேசம் முழுவதையும் இந்த வீட்டிலிருந்துதான் கட்டி ஆண்டார்.

தங்கக் கூண்டாக இருந்தால் என்ன? வீட்டுச் சிறை வீட்டுச் சிறைதானே

ஆமாம் இவ்வளவு அழகான மாளிகையில் ஷாஜஹான் ஏன் சிறை வைக்கப்பட்டார்?  யாரிடமாவது போரில் தோற்றுவிட்டாரா?

நாம் நம் குழந்தையிடம் தோற்றுவிட்டால், அதனை வெற்றி என்றுதான் நினைப்போம். ஆனா பாருங்க… அரசருக்கான சட்டங்கள் நியாயங்கள் வேறு அல்லவா? பதவியில் அமர்ந்துவிட்டால், அந்தப் பதவியிலிருந்து வெளியேறுவது என்பது அரசர்களுக்கு இயலாத ஒன்று. அதனை அடுத்த வாரம் பார்க்கலாமா?

(தொடரும்)