தீ, சின்மயி யாருடைய முத்த மழையை ரசித்தீர்கள்?

 

ஜெயகுமார் சந்திரசேகரன்: 

நெல்லையைத் தவிர மற்றவர்கள் கேள்வி கேட்பதை விட்டு விலகி விட்டார்களே! ஏன்?

& அடுத்த கேள்வியைப் பாருங்க! (மேலும் கேள்விகள் கேட்பவர்களுக்கு நாங்கள் எந்தத் தடையும் போட்டது இல்லை. யார் வேண்டுமானாலும் என்ன வேண்டுமானாலும், எப்போது வேண்டுமானாலும் - கிண்டலோ - சீரியஸ் கேள்விகளோ  கேட்கலாம். )

கேள்விகள் கேட்காத வாசகர்களுக்கு ஒரு இனிய தண்டனை : கேள்வி & பதில் வடிவில் இருக்கும் சினிமா பாடல்களை கருத்துரை பகுதியில் பதியவும். 

பானுமதி வெங்கடேஸ்வரன்: 

தீ, சின்மயி யாருடைய முத்த மழையை ரசித்தீர்கள்?(நான் தக் லைஃப் படப்பாடலைப் பற்றி கேட்டேன்)

# பார்க்கவில்லை - கேட்கவுமில்லை.

& சின்மயி பாடியது நன்றாக உள்ளது என்று  facebook விமரிசகர்கள் அதிகம் பேர் எழுதிவருகிறார்கள். அதை மட்டும் படித்தேன். தீ யார் என்பதோ அவர் குரல்  எப்படி இருக்கும் என்பதோ எனக்குத் தெரியாது. 

நெல்லைத்தமிழன் : 

தோசை மெஷின்னு வந்திருக்கிறதே..அது பயனுள்ளதா? தோசை வார்ப்பது அவ்வளவு கடினமா என்ன?       

# ஒருவேளை ஓட்டல்களுக்கு பயன் தரலாம்.‌

& என்னுடைய அனுபவத்தில், மெல்லிய, வட்டமான தோசை வார்ப்பது மிகவும் கடினம். அப்படியே வார்த்துவிட்டாலும் அதை பங்கம் இல்லாமல் திருப்பிப் போடுவது இன்னும் கடினம். 

என்னுடைய சில தோசை அனுபவங்கள், இன்றைய படமும் வரிகளும் பகுதியில் கண்டு களியுங்கள்! (சிரிங்க !!) 

எதனால் பசங்களுக்கு கலந்த சாதம், டிபன் பாக்சில் வைப்பது பிடிப்பதில்லை? ரொம்ப சுலபம் என்று அடிக்கடி அதனைச் செய்துகொடுத்துவிடுவதாலா? (உப்புமா போல)

# கலந்த சாதம் நேரம் கழித்து உண்டால் சுவைக்காது என்பது என் கருத்து.

& நான் படித்த காலத்தில், கிட்டத்தட்ட எல்லா நாட்களிலும் என்னுடைய டிஃபன் பாக்ஸில் தயிர் சாதம் & உப்பு நார்த்தங்காய் மட்டுமே அம்மா வைத்துக் கொடுப்பார்கள். எனக்கு இட்லி பிடிக்காது. வேறு எந்த டிஃபன் சாப்பிட்டாலும் பசி அடங்காது ! 

என்னுடைய குழந்தைகளுக்கு அவர்களின் அம்மா என்ன வைத்துக் கொடுத்தாலும் அவர்கள் அதை ரசித்துச் சாப்பிடுவார்கள். 

முன்பெல்லாம் யூடியூப் வீடியோக்கள் நிறைய வந்துகொண்டிருந்தது. இப்போ பலர், ஷார்ட்ஸ்தான் நிறைய வியூ கிடைக்கிறது, பலரும் நெடிய வீடியோக்களைக் காண விரும்புவதில்லை என்று சொல்கிறார்கள். மக்கள் அவ்வளவு சோம்பேறிகளாக ஆகிக்கொண்டிருக்கிறார்களா என்ன?

# வசதிகள் பெருகப் பெருக சோம்பல் அதிகரிக்கும்.‌

ஓடிடி என்று ஒன்று இல்லை என்றால், டூரிஸ்ட் ஃபேமிலி, ஜோ போன்ற நல்ல படங்களைக் காணும் வாய்ப்பு கிடைக்குமா?

# என்வரை ஓ டி டி இல்லை என்றால் சினிமா இல்லை.‌ ஜோ பார்க்கவில்லை.  (அது பற்றிக் காதில் விழவில்லை)

& நேரம் கிடைத்தால் பார்க்கிறேன். 

முதலில் மசூர் தால், துவரம்பருப்பை விட சத்தானது, குறைந்த விலை என்றார்கள். பிறகு மசூர்தாலினால் உடலுக்கு பிரச்சனை வரும் என்றார்கள். இதுபோலவே பாமாலினையும் முன்பு நல்லது என்றார்கள், பிறகு மூட்டுப்பிரச்சனை வரும் என்கிறார்கள். மைக்ரோவேவ் அவனால் (இந்த 'அவன்' என்று எழுதுவதால் 'ஆணாதிக்கம்' என்று எண்ணி கீதா ரங்கன், 'ஓவன்' என்று எழுதச் சொல்கிறார். அவனில்லாவிட்டால் சமையலேது?) கேன்சர் வரலாம் என்று சொல்லி ஜப்பானில் மைக்ரோவேவ் அவனை உபயோகப்படுத்துவதில்லை என்கிறார்கள். யுகம் யுகமா குக்கர் உபயோகித்தது போய், இப்போ குக்கரில் சாதம் வடித்தாலோ இல்லை காய்கறிகளை வேகவைத்தாலோ ஒரு புண்ணியமும் இல்லை, சத்துக்குறைவு, பிரச்சனைகள் வரும் என்கிறார்கள். போகிற போக்கில் நம்மை விறகடுப்பில் அல்லது குமுட்டியில் மண் பாத்திரத்தில் சாதம், குழம்பு பண்ணச் சொல்லிவிடுவார்களோ?

# விஞ்ஞான வளர்ச்சி என்று இப்படி முரணான தகவல்கள் வருவது வழக்கம்தான். என்ன செய்வது ? புறம் தள்ளவியலாத நெருக்கடிதான்.‌

வழிபாட்டுத் தலங்களில் (அது வீடோ, கோயிலோ அல்லது எந்த இடமானாலும்) ஏன் பாடல்கள்/கீர்த்தனைகள் போன்றவைகளை ரொம்பவே சத்தமாகப் பாடுகிறார்கள் (இதுபோல் டோலக் மிருதங்கம் போன்றவற்றையும்)?  தங்களுக்காவது கேட்கவேண்டும் என்பதற்காகவா,  இல்லை கடவுளுக்கு நன்றாகக் கேட்கவேண்டும் என்பதற்காகவா இல்லை இடத்தைச் சுற்றி இருப்பவர்களிடம் தங்கள் பெருமையைப் பறைசாற்றிக்கொள்ளவா?

# " கடவுளர் வழிபாடு எனும் நல்ல காரியம் நடக்கிறது ! வந்து கலந்து கொள்ளுங்கள் "  என்று அக்கம்பக்கத் தவர்களுக்குச் சொல்வதற்கு வசதியாக, அந்தக் காலத்தில் சற்று ஓசை அதிகமாகவே பஜனை  செய்வார்கள். பூஜையைப் பொருத்தமட்டில் அதிகம் சப்தம் செய்வது வழக்கம் இல்லை. ஆனால் பல பேர் கூடி செய்யும் ஐயப்ப பூஜை பிரபலமாக  ஆனதன் பின்பு  பூஜைகளும் சப்தம் மிகுந்தவை ஆகிவிட்டன. கேரளாவில்  கோவில் நிகழ்ச்சிகளில் செண்டை எக்காளம் போன்றவைகளைக் கொண்டு மிக அதிக ஒலி எழுப்புவதைக் கவனித்திருக்கலாம்.

ஆடம்பரமாக பூஜை பஜனை இவை செய்யப்படும் போது ஒலியின் அளவு மிக அதிகமாக இருக்கும்.

எல்லார் கவனமும் கவரப்பட வேண்டும் என்பது மட்டுமே ஒரே காரணம் என்பது என் கருத்து. 

ஸ்ரீராம்: 

கப்பல் கவிழ்ந்தால் கன்னத்தில் கை வைக்க வேண்டும் என்கிற விதியை உருவாக்கியது யார்?!!

& ' கப்பல் கவிழ்ந்தாலும் கன்னத்தில் கை வைக்காதே' என்பதுதான் அந்த முதுமொழியின் முழு வடிவம். 

அந்தக் காலத்தில் (ரயில், விமானம் எல்லாம் இல்லாத நாட்களில்) பெரிய பணக்காரர்கள் தங்களுடைய உற்பத்திப் பொருட்களை பெரும் அளவில் அயல் நாடுகளுக்கு கப்பல் மூலம் அனுப்பி, அங்கு விற்பனை செய்து பெரிய லாபம் ஈட்டி வந்தார்கள். சிறிய வியாபாரிகள், உள்ளூர் வர்த்தகம் மூலம் பொருள் ஈட்டி வந்தார்கள். 

பெரிய வியாபாரிகளின் கப்பல்கள் சில சமயங்களில் கடலில் புயலில் சிக்கி கவிழ்ந்து விட்டால், அந்த வியாபாரிகள் பெருத்த நஷ்டம் அடைவார்கள். அந்தக் காலத்தில் வருமானத்திற்கு வேறு வழியில்லாதவர்கள் கொள்ளை அடிப்பதை / திருடுவதை ஒரு தொழிலாக செய்து வந்தனர். கன்னக்கோல் என்பது அந்தக் காலத்து திருடர்கள் பயன்படுத்திய சுவர்களில் துவாரம் போட உதவிய ஒரு கருவி. 

(கண்ணனுக்கும் கள்வனுக்கும் பேதமில்லை தோழி!

அவன் கன்னம் வைத்து திருடி வந்த கதைகள் பலகோடி!) 

பெருத்த நஷ்டம் வந்தாலும் வியாபாரிகள் கன்னக்கோலில் (திருடுவதில்) நாட்டம் செலுத்தக் கூடாது என்பதை வலியுறுத்த சொல்லப்பட்டதுதான், 'கப்பல் கவிழ்ந்தாலும் கன்னத்தில் கை வைக்காதே' என்பது. 

= = = = = = = = = =

KGG பக்கம் : 

படமும் அது பற்றி சில வரிகளும் பகுதிக்கு நெல்லைத்தமிழன் அனுப்பியுள்ளது : 

படம் : - 

நாட்டுல மக்களுக்கு பறவைகள், நாய்கள், பூனைகள் பற்றிக் கவலையே இல்லை போலிருக்கு. திருமண மண்டபத்துக்குப் போய்ப் பார்த்தால் இலையெல்லாம் அலம்பினபிறகுதான் வெளீல போடுவாங்க போலிருக்கு. அரை வடை, கொஞ்சம் ஸ்வீட், இல்லைனா பாதி தோசையோட இலையை வெளீல போட்டா என்ன? சரி இந்தப் பசங்களாவது லேஸ் சிப்ஸ் பாக்கெட்ல ஏதேனும் ஒண்ணு ரெண்டு மிச்சம் வச்சு வெளீல போடுவாங்கன்னு பார்த்தா...சுத்தம்...  இவங்கள்லாம் பெரீசான பிறகு, உயிர்களிடத்தில் அன்பு வேண்டும் என்று லெக்சர் அடிக்கப்போறாங்க -   இப்படித்தானே இந்த இரண்டு அண்டங்காக்கைகளும் மனசுல நினைச்சிருக்கும்? - நெல்லைத்தமிழன். 

= = = = = = = = = 

படங்களும், வரிகளும் : (KGG ) 

வட்ட வட்ட தோசைகள் 

வார்த்திட நெஞ்சில் ஆசைகள்! 

வந்த தென்னவோ என்றும் 

விசித்திர  கோணல் வடிவங்கள்! 

= = = = = = = = =