'திங்க'க்கிழமை – கடலைமிட்டாய் - நெல்லைத்தமிழன் ரெஸிபி

 

எனக்கு கடலைமிட்டாய் ரொம்பப் பிடித்தமானது. அதனால் நல்ல கடலைமிட்டாயைப் பார்த்தால் வாங்கி வருவேன். எனக்கு வாங்குவதிலும் ரொம்ப கட்டுப்பாடு கிடையாது.  வாங்கினால் 10 பாக்கெட் என்பது போல வாங்கி வருவேன். முன்னால், அடையாறில் இருந்தபோது, அண்ணாநகரில் தயார் செய்து வரும் ஒரு பிராண்ட் எனக்கு ரொம்பவே பிடித்தமானது. என்னிடம் உள்ள கெட்ட குணம் (என்றுதான் நான் நினைப்பேன்), எப்போதும் தயார் செய்யும் இடத்தில் வாங்க முனைவது. காரணம், இந்த ரீசெல்லர்கள் ஒரு வேலையும் செய்யாமல் (அதாவது அந்த பிராடக்டுக்கு எந்த உதவியும் செய்யாமல்) வெறும்ன விற்பதன் மூலமாக நிறைய கமிஷன் அடிக்கிறார்கள் என்பது என் எண்ணம். அதனால் அடையாறில் அந்த கடலைமிட்டாய் பிராண்டை கடைகளுக்கு சப்ளை செய்யும்போது, அந்த ஆட்கள் நம்பரைப் பிடித்து அவர்களிடம் நேரடியாக வாங்குவேன். (நெல்லையைச் சேர்ந்தவர்கள்தாம்). அவங்க என்னிடம் சொல்வாங்க, சார், கடைகள்னா பலவித பொருட்களையும் கொடுத்துவிடுவோம், மாதம் 5000-10000 ரூ என்று வாங்குவாங்க. ஆனால் உங்களைப் போல கேட்பவர்களுக்குக் கொடுப்பது சரியா வராது என்பார்கள். கும்பகோணத்திலும் ஒரு கடையில்தான் கடலைமிட்டாய் வாங்குவேன், ரொம்ப நல்லா இருக்கும். நெல்லைப்பகுதியில் இரயிலில் விற்பார்கள். அதுபோல சில மாதங்கள் முன்பு தமிழகத்திலிருந்து வடநாட்டுக்கு இரயிலில் பயணித்தபோது, ஆந்திரா பகுதியில் பெரிய கடலைமிட்டாய், அரைகிலோ 140 ரூ என்று விற்பனை செய்தார்கள். அதுவும் நன்றாக இருந்தது. பல நேரங்களில் நான் இவற்றை வாங்கி என்னுடைய மேசை டிராயரில் வைத்திருந்தாலும், இனி இனிப்பைச் சாப்பிட்டு எடையைக் கூட்டக்கூடாது என்று நினைத்து உபயோகிக்காமல் வீணாக்கவும் செய்வேன். எனக்குத் தெரிந்த ஒருவர், பிரபல பிராண்ட் இனிப்பகத்தின் பெரிய பதவியில் இருக்கிறார். அவர் சொல்வார், லட்டு போன்றவை செய்யும்போது நாங்கள் க்ளூகோஸ் உபயோகித்துப் பிடிப்பதால், உடையாமல் பளபளன்னு இருக்கும், ஆனால் அவை உடலுக்கு நல்லதல்ல என்பார்.

பாருங்க..எப்போதும்போல, என்ன செய்முறை என்பதை எழுதுவதற்குப் பதிலாக வளவளவென்று சப்ஜெக்டை விட்டுவிட்டு எழுத ஆரம்பித்துவிட்டேன்.

எங்கள் டவரில் (வளாகத்தில் 5-6 டவர்கள் உண்டு. எங்களது 18 மாடி. சில 32 மாடிகளைக் கொண்டவை) ஒருவர், கோலாப்பூரிலிருந்து வருடத்திற்கு ஒரு முறை அவரது உறவினர் ஃபேக்டரியிலிருந்து வெல்லம் மற்றும் வெல்லப்பொடி கொண்டுவந்து விற்பார். வெல்லம் கிலோ 60, வெல்லப்பொடி 120 ரூ என்று நினைவு. கோலாப்பூர் வெல்லம் எப்போதுமே மிக சுத்தமாக இருக்கும், நல்லா பாகு வரும். இதை எழுதும்போது எனக்கு மூணாறு பயணத்தின்போது நாங்கள் சென்றிருந்த நேரம் மரையூரில் பார்த்த வெல்லம் நினைவுக்கு வருகிறது. அது மிகவும் புகழ்பெற்ற ஒன்று. கிலோ 100 ரூபாய். நான், வருடத்திற்கு எங்கள் டவரிலேயே 8 கிலோ வெல்லம் வாங்கிவிடுவேன். அதனால் எதுக்கு என்று வாங்கவில்லை.

கடலைமிட்டாயை கடையில் வாங்குவதைவிட வீட்டிலேயே செய்தால் என்ன என்று யோசித்தேன். அருகே இருக்கும் மார்க்கெட்டில் வறுத்த கடலை கிடைக்கும் (விலை அதிகமில்லை. கிலோ 140 ரூ). அதனை வாங்கிவந்து, 90 சதம் தோலை எடுத்துவிடுவேன். பிறகு மனைவி மிகுதியை எடுத்து புடைத்து கடலையைத் தயார் செய்துவிடுவாள். பிறகு நான் சென்று கடகடவென கடலைமிட்டாய் செய்துவிடுவேன். அவள் போனால் போகிறதென்னு அவள் தயார் செய்து வைத்திருக்கும் ஏலக்காய் பொடியையும் உபயோகிக்க அனுமதிப்பாள். இந்தக் கடலைமிட்டாயை, எனக்கு இனிப்பு சாப்பிடணும் என்று தோன்றும்போது எடுத்துக்கொள்வேன். இது பிற இனிப்புகளைவிட உடலுக்கு மிக நல்லது என்று நான் நினைக்கிறேன். இனி செய்முறை.

தேவையானவை:

வறுத்த கடலை, நல்ல பாகு வெல்லம், கொஞ்சம் ஏலக்காய் பொடி

அரிசிமாவு கொஞ்சம், கடலைமிட்டாய் கலவையைக் கொட்ட ஒரு தட்டு

அளவு

வறுத்த கடலை கப் 4

வெல்லம் 2 கப் (சில நேரங்களில் நான் 2 ¼, 2 ½ என்று உபயோகிப்பது உண்டு)

செய்முறை

தட்டில் பட்டர் பேப்பரைப் பரத்திவைத்துவிடவும்.

கடாயில் வெல்லத்தை போட்டு, சிறிது தண்ணீர் ஊற்றி கொதிக்கவிடவும்.

வெல்லப்பாகு தக்காளிப் பதம் எட்டும் சமயத்தில், ஒரு ஸ்பூன் ஜீனி போடவும்.

தக்காளிப்பாகு வந்த சிறிது நேரத்தில், எடுத்துவைத்திருக்கும் கடலையைச் சேர்க்கவும்.

நன்கு கிளறி, உடனே தட்டில் பரத்திவிடவும்.

அழுத்தவேண்டும் என்றால் ஒரு டபராவை உபயோகிக்கவும்.

சிறிது நேரம் கழித்து கத்தியால் துண்டம் போடுவதற்காக நன்கு கீறிவிட்டுவிடவும்.

நன்கு ஆறிய பிறகு, நாம் போட்ட கோட்டிலேயே நன்கு கீறி, துண்டங்களை எடுக்கவும்.

படங்கள்:  

சமீபத்தில் செய்த கடலைமிட்டாய்.

இதற்கு முன்பு வெல்லப்பாகு டங்குபதம் வைத்து கடலைமிட்டாய் செய்தபோது

வித்தியாசங்கள்: 

நான் ஒரு தடவை டங்குபதம் (கடைசிப் பதம்) பாகு வைத்து அதில் கடலைமிட்டாய் செய்தேன். மிக அருமையாக வந்தது. ருசி சொல்லி மாளலை. ஆனால் அதைக் கடிக்கும்போது கொஞ்சம் கடினமாக இருந்தது. அதைவிடப் பெரிய பிரச்சனை, பாகு பற்களில் நன்கு பிடித்துக்கொண்டால், பற்கள் கெட்டுப்போகும். எனக்கே கடிக்கும்போது எங்கே ஒரு சில பற்களில் உள்ள கேப் Cap வெளியில் வந்துவிடுமோ என்று பயம் வந்தது. வந்தால் பத்தாயிர ரூபாய் பழுத்துவிடும். இதைப்பற்றிப் பேசிக்கொண்டிருந்தபோது கீதா ரங்கன் அக்கா, வெல்லப் பாகில் சிறிது சீனி சேர்த்தால் இந்தப் பிரச்சனை இருக்காது என்றார். அதன்படி ஒரு முறை செய்தபோது சுலபமாக உடைந்தது.

இந்த வார திங்கள் செய்முறை உங்களுக்குப் பிடித்திருக்கும் என்று நினைக்கிறேன். செய்துபாருங்கள்.

 = = = = = =