கொடுத்த படத்திற்கான சிறுகதை :: ஹனிமூன் - நெல்லைத் தமிழன்

 

என்னாச்சு உங்க எல்லாருக்கும்? வெளில பரத் உம்முனு ‘வாங்க ஆன்டி’ என்றுகூடச் சொல்லாமல் உட்கார்ந்திருக்கான். நீங்க ரெண்டுபேரும் ஹால்ல கன்னத்துல கையை வச்சுக்கிட்டு இருக்கீங்க. என்ன நடந்தது?

வாடீ பத்மா. என்னத்தச் சொல்ல? கல்யாணமாகி ரெண்டுபேரும் ஹனிமூன் போறோம்னு சிக்கிமுக்குப் போயிருக்காங்க. மூணு நாளாச்சு.. பேசவே இல்லை. நாங்களும் கூப்பிட்டால் நாட் ரீச்சபிள்னு வருது. காலைலேர்ந்து இதே கவலை.

ஏம்மா.. ஹனிமூன் போன ஜோடியை அர்ஜண்ட்டா கூப்பிட என்ன தேவையிருக்கு? ஒரு வாரம் நிம்மதியா, அவங்க ரெண்டுபேரும் ஒருத்தரை ஒருத்தர் புரிஞ்சுக்கலாம், எஞ்சாய் பண்ணலாம்னு போயிருக்காங்க. அதுக்குள்ள எதுக்கு உங்களுக்கு விசாரம்?

உனக்கென்ன நீ சுலபமாச் சொல்லிட்ட. ரெண்டு வாரமா மேகாலயாக்கு ஹனிமூன் போன ஜோடியைக் காணலை, அப்புறம் தங்கின இடத்துலேர்ந்து 20 கிலோ மீட்டர் தள்ளி மாப்பிள்ளையோட உடல் கிடைச்சது, பொண்ணை இன்னமும் தேடிட்டிருக்காங்கன்னுலாம் ஊரே அல்லோலகல்லோலப்படுது. அந்தப் பக்கம்தான் போயிருக்குற தீபக்குக்கும் மேகாவுக்கும் என்னாச்சுன்னு நாங்களான்னா நேத்துலேர்ந்து கவலைப்பட்டுக்கிட்டுருக்கோம்.

இந்தக் கவலைலதான் நியூஸ் பார்க்கலையா? அந்தப் பொண்ணைத்தான் உத்திரப் பிரதேசத்துல கண்டுபிடிச்சுட்டாங்களே.

அதெல்லாம் பார்த்தோம். இப்போ எங்க கவலையெல்லாம், நம்ம மேகா முழு மனசோடத்தான் இந்தக் கல்யாணத்துக்கு ஒத்துக்கிட்டாளா, கல்யாணத்துக்கு முன்ன அவளுக்கு யாரும் பாய் பிரண்ட் இருந்தானாங்கறதையெல்லாம் கேட்க விட்டுட்டோமே. இந்த தீபக்கும், மேகாவோட அன்பா இருப்பானா, இல்லை அவள்ட ஆரம்பத்திலேயே கோபமா நடந்துக்கிட்டான்னா அவளுக்குப் பிடிக்காமல் போய், பின்னால ரொம்ப பிரச்சனையாயிடுமேங்கறதை எல்லாம் நினைச்சு ரொம்பவே கவலைப்பட்டுக்கிட்டிருக்கோம்.

ரெண்டு பேருக்கும் விருப்பமில்லாமலா இந்தத் திருமணம் நடந்திருக்கும்? அவங்கதான் மூணு மாசமா, எவ்ளோ ஆசையா மண்டபம், அலங்காரம், டிரெஸ், கேடரர் என்று ஒவ்வொண்ணுலயும் எப்படி சேர்ந்து முடிவு செஞ்சாங்க. எங்க ஹனிமூன் போகணும்னு முதல்லயே ப்ளான் பண்ணி, டிக்கெட்லாம் புக் பண்ணிப் போயிருக்காங்க. இதெல்லாம் தெரிஞ்சிருந்தும் உங்களுக்கு சந்தேகமா?

இந்தக் காலத்துப் பெண்கள் மனசுல என்ன இருக்குன்னு யாருக்குத் தெரியும்?… இந்த மேகாலயா கேஸ் போல ஏதேனும் ஆச்சுன்னா, பெரிய பிரச்சனை ஆயிடுமே. இல்லை போன இடத்தில் ஏதேனும் அசம்பாவிதம் ஆனால், போலீஸ் வீட்டுக்கு வந்துடுமே.. அடுத்து பத்திரிகையில் எங்க பேரப் போட்டு நாறடிச்சுடுவானேன்னு ஒரே கவலையா இருக்கு. ஹனிமூனை பக்கத்துல இருக்கற ஊர்ல கொண்டாடினா என்னவாம்? இல்லை மாடீலயே இருந்தால் என்னவாம்? வேளாவேளைக்கு என்ன வேணுமோ அதை நானே பண்ணிக்கொடுத்துடுவேனே.

எப்போதும் நியூஸ் பார்த்துக்கிட்டே இருக்காதீங்கன்னு சொன்னா யார் கேட்கிறா?. எல்லாரும் சீரியல்களிலேயே மூழ்கினால் நியூஸ் சேனல் எப்படி நடத்துவதுன்னு யோசிச்சு, இந்த மாதிரி எக்குத் தப்பான செய்திகளை மசாலாலாம் சேர்த்து தெனமும் ஒளிபரப்பிடறான். சரி சரி உங்களுக்குத்தான் கவலை. இந்த பரத்துக்கென்ன. அவனுக்குத் தெரியாதா அவங்களைப் பத்தி?

டேய் பரத்.. இங்க வாடா.

ஆன்டீ..

மண்டபத்துல ரெண்டு பேருக்கும் நீதான உதவிலாம் செஞ்ச. இந்த டிக்கெட் புக் பண்ணினது, ஹோட்டல் புக் பண்றதுலாம் உன்கிட்டத்தானே சொன்னாங்க. அப்புறம் என்ன? நீ ஏன் மூஞ்சியை உம்முனு வச்சிருக்க?

இல்லை ஆன்டீ… இந்த மேகாலயா ஜோடியைப் பத்தின நியூசை பேப்பரில் தினம் தினம் படிச்சு எனக்கு தூக்கமே வரலை. டிவிலயும் வித விதமாச் சொல்றாங்க. ஒருவேளை தீபக்குக்கும் மேகாவுக்கும் ஏதாவது ஆயிருந்ததுன்னா என்ன பண்ணறது? அப்புறம்….

அப்புறம் என்னடா? ஏதேனும் ரகசியமா?  பரத் பக்கத்தில் சென்று கேட்டாள்.

ஆன்டீ.. அம்மாக்குத் தெரிய வேண்டாம். நான் மேகா தங்கச்சி நேகாட்ட இன்னும் ‘ஐ லவ் யூ’ சொல்லலையேன்னு கவலையா இருக்கு. அண்ணனும் அண்ணியும் பத்திரமா வந்தாத்தானே அடுத்து என் லவ்வை ஆரம்பிக்கலாம்?

கதைக்கு ஆதாரமான செய்தி

சமீப வாரங்களில் உத்திரப்பிரதேசத்தைச் சேர்ந்த சோனம் ரகுவன்ஷி மற்றும் ராஜா ரகுவன்ஷி, மே 11ம் தேதி திருமணத்திற்குப் பிறகு தேனிலவுக்காக மேகாலயா சென்றதும், (மே 21), பிறகு மே 23லிருந்து இவர்கள் இருவரையும் காணாததையும், இதற்குக் காரணம் பெண் கடத்தலா இல்லை கொள்ளையடிப்பா என்று மேகாலயா போலீஸ் தலையைப் பிய்த்துக்கொண்டதும் பெரிய செய்தியாகி பேப்பரில், தொலைக்காட்சிகளில் வந்ததைப் பார்த்திருப்பீர்கள். தீவிர தேடுதல் வேட்டைக்குப் பிறகு ஜூன் 2ம் தேதி, ராஜாவின் சிதைந்த உடலைக் கண்டுபிடித்தார்கள். சோனமை ஒருவேளை கடத்தியிருப்பார்களா என்ற சந்தேகம் வந்தது. ஆனால் அந்த ஏரியாவில் இருந்த ஒருவன், இந்த இருவரையும் இன்னும் மூன்று பேர்களோடு, நீர்வீழ்ச்சிக்குச் செல்லும் பாதையில் மே 23ல் பார்த்ததாகத் தகவல் சொல்லவும், மேகாலயா போலீஸ் உத்திரப் பிரதேசத்திற்கு வரவும், ஜூன் 9ம் தேதி சோனம் சரணடையவுமான நிகழ்வுகள் நடந்தன., இன்னும் என்ன நடந்தது என்று மேகாலயா போலீஸ் முழுமையாகக் கண்டுபிடிக்கவில்லை. இப்போதைக்கு சோனம், மூன்று ஆட்களை ஏற்பாடு செய்து கணவனை மேகாலயாவில் கொன்றார் என்று சொல்கின்றனர். இதற்கிடையில், சோனம் நடத்திக்கொண்டிருந்த பிஸினெஸில் வேலை பார்த்த ராஜ் குஷ்வாஹா என்பவனுக்கும் சோனத்திற்கும் முன்பே பழக்கம் இருந்ததாகவும், இந்த மாதிரி கொலை செய்ய அவன் திட்டம் போட்டுக் கொடுத்ததாகவும் கிளைக்கதை ஒன்று ஓடுகிறது.

சோனா ரகுவன்ஷி, ராஜா ரகுவன்ஷி.   அடுத்த படத்தில் கைது செய்யப்பட்ட பிறகு.

அது சரி. இந்தச் செய்தியில் எனக்கு என்ன ஆர்வம் என்று யோசிப்பவர்களுக்காக. நான் ஓரிரு மாதங்கள் முன்பு இந்த இடத்திற்கெல்லாம் சென்று வந்திருக்கிறேன். ஒரு சில இடங்களைப் பார்க்க முடியாததால் (சுற்றுலாவை நடத்தியவருக்கும் பங்குகொண்டிருந்த பலருக்கும் அவற்றில் ஆர்வம் இல்லாததால்), நான் என் மனைவியை அழைத்துக்கொண்டு இந்த இடங்களுக்கு மீண்டும் செல்லவேண்டும் என்று நினைத்திருக்கிறேன். இதற்கிடையில் இந்தச் செய்தி ஓடவும், தனியாக இப்படி டிராவல் ஏஜெண்டுகளை நம்பிச் செல்லலாமா என்று மனதில் தயக்கம் ஏற்பட்டது. இப்போது இந்தச் செய்தி ஓரளவு சுபமாக முடிந்துவிட்டதால் (ஹா ஹா ஹா. பிரச்சனை மேகாலயாவில் இல்லை. திருமணத் தம்பதிகளிடையே என்று ஓரளவு தெரிந்துவிட்டதால்) வரும் ஜனவரி/ஃபெப்ருவரியில் அசாம், மேகாலயாவிற்கு மீண்டும் செல்லலாம் என்று நினைத்திருக்கிறேன்.

சிரபுஞ்சி அருகே உள்ள ஒரு நீர்வீழ்ச்சி.

நாங்க போயிருந்த நேரம் பனிமூட்டம். அதனால அரை மணி நேரம் காத்திருந்தும் நீர்வீழ்ச்சியைப் பார்க்க முடியலை. அன்றைக்கு நாங்கள் மூன்று வெவ்வேறு நீர்வீழ்ச்சிகளுக்குப் போயிருந்தோம். முதல் நீர்வீழ்ச்சியில் மெல்லியதாக நீர் வந்துகொண்டிருந்த து. சிரபுஞ்சியில் இந்த நீர்வீழ்ச்சியைப் பார்க்க முடியவில்லை. இதற்கு அடுத்துச் சென்ற நீர்வீழ்ச்சிக்கு நுழையும்போது அங்கேயும் இதே பனிமூட்டம். அதனால் எதற்கு 50 ரூபாய் டிக்கெட் வெட்டிச் செலவு என்று நாங்கள் உள்ளே நுழையவில்லை. டிக்கெட் கவுண்டரில் இருந்தவர், சிறிது நேரம் காத்திருந்தால் பனிமூட்டம் விலகிவிடும் நீர்வீழ்ச்சியைக் காணலாம் என்று சொன்னாலும் எங்களுக்கு நம்பிக்கை இல்லை.

= = = = = = = = =