புதுசு வாங்கிட்டா பிரச்னை இல்லை - யாருக்கு?

 கல்யாணக் கதையளத்தலை கொஞ்சம் நிறுத்தி விட்டு இன்று ஒரு கணினிக் கதை.  

கணினிக் கதை என்றால் கணினி எழுதிய கதை இல்லை.  கணினியுடன் என் போராட்டம் பற்றிய கதை.  இன்னமும் கூட என் கணினியில் டிவிடி பிளேயர் வைத்துக் கொண்டிருக்கும் நபர் நான்.  பென் டிரைவில்  நான் விரும்பும் பாடல்களை நான் வைத்திருக்கும் 'சிடி'க்களிலிருந்து சேகரம் செய்ய.  

சில நாட்களாய் கணினி பாயைப் பிறாண்ட ஆரம்பித்தது.  பூட் ஆகி எழுந்திருந்து வராமல் கழுத்தறுக்க, என் கணினி மருத்துவர் 'டிவிடி டிரைவ் பிரைமரி பூட்டிங்கில் இருக்கிறது, அதை எடுத்து விடுவோம்' என்று சொல்லி மாற்றிவிட்டார்.

பிறகு சட்டென பூட் ஆனாலும், மெல்ல மெல்ல ஹேங் ஆக ஆரம்பித்தது.  எனக்குத் தெரிந்த பாட்டி வைத்தியம் எல்லாம் செய்து பார்த்தேன்.  ஊஹூம்.  யு டியூப் திறந்தால் கொஞ்ச நேரத்தில் பிளாக், பேஸ்புக் என்று எல்லாப் பக்கங்களும் ரீல் அறுந்த  தியேட்டர் ஸ்க்ரீன் போல வெண்திரையைக் காட்டத் தொடங்கின.இன்னும் கொஞ்ச நாள் போனதும் தினமலர், தினமணி, தினத்தந்தி செய்தித்தாள்களைத் திறந்தாலும் அதே நிலை.  அதிலும் தினமணி திறந்தால் உடனடி விளைவு.  நான் கொஞ்சநாள்  செய்திகளை மொபைலில் பார்த்து அங்கே காபி செய்து இங்கு சேர்த்துக் கொண்டிருந்தேன்.  என் மாமா KGJயைக் கேட்டபோது  C டிரைவை செக் செய்து Defragment பார்க்கச் சொன்னார்.  ரொம்பப் பழைய முறை.  நான் பார்த்தபோது Windows 10 இல் அந்த ஆப்ஷனே இல்லை என்று தெரிந்தது.அவர் சமீபத்தில்தான் பேஸ்புக்கில் அவர் கணினி செய்த பிரச்னைகள் பற்றியும் அவர் செய்த முயற்சிகள் பற்றியும் அதன் வெற்றிகள் பற்றியும் எழுதி இருந்தார்.  அந்த நேரமெல்லாம் என் கணினியிலும் அதே போல பிரச்னைகள் இருந்தன.

கணினி மருத்துவ இளைஞனை அடிக்கடி அழைத்தேன்.  அவர் வந்து ஒவ்வொன்றாக முயற்சி செய்தார்.  அடிக்கடி "சிஸ்டம் வாங்கி பழசாச்சு ஸார்..   புதுசு வாங்கிடுங்க" என்றே சொல்லத் தொடங்கினார்.  எனக்கும் சபலம் தோன்றியது.  விலை கேட்டேன்.  ஒரு கணக்கு பார்த்துவிட்டு அவர் விலை சொன்னதும் சபலம் மறைந்து விட்டது.

அவர் வந்து சிஸ்டம் ஆன் செய்யும் நேரங்களில் அது சமர்த்தாக வேலை பார்த்தது கடுப்பைக் கொடுத்தது.  ஹேங் ஆகும் நேரம் அவரை 'எனி டெஸ்க்' எடுக்கச் செய்ய நான் எடுத்த முயற்சிகள் நீண்ட நாட்கள் பயனளிக்கவில்லை.  ஒன்று அவர் பயணத்தில் இருப்பார்.  அல்லது அவர் கையில் அந்நேரம் லேப்டாப் இருக்காது.  அப்போதென்று பார்த்துதான் அவர் அக்கா குழந்தைக்கு ஆயுஷ்ஹோமம் வரும்.  அப்புறம் புதிதாகப் பிறந்திருந்த தன் குழந்தையைப் பார்க்க ஒரத்தநாடு சென்று விடுவார்.

வரவர மாமி கழுதை போல் ஆனாளாம் என்பது போல (இந்தப் பழமொழி ஏன் சொல்கிறார்கள், என்ன அர்த்தம் என்று கூட புதன் கேள்வியில் கேட்கலாமோ!) என் சிஸ்டம் ஆன் செய்த அரைமணியிலேயே ஹேங் ஆகி அதுவே அணையத் தொடங்கியது.  எமெர்ஜென்ஸி!  கணினி மருத்துவரை அழைத்தேன்.  வழக்கம்போல அவர் ஒரத்தநாட்டில் இருந்தார்.  அவர் வரும்வரை அவ்வப்போது ஆன் செய்து அரைமணி அரைமணி வேலை செய்தேன்.

பின்னர் வந்த க..ம. 'OS  Re Install' செய்கிறேன் என்றார்.  எனக்கும் அது தீர்வைத்தரும் என்று தோன்றியதால், அவசரமாக என் பாஸ்வேர்டுகளை தேடினேன்.  என்னவென்றே மறந்து போயிருந்தன.  சரி 'மறந்துவிட்டேன் கடவுச்சொல்' சொல்லலாம் என்று காத்திருந்தேன்.

அதற்குமுன் அவரிடம் நான் இந்த சூடு பிரச்னையைப் பார்க்கச் சொன்னேன்.  "ப்ராஸஸர் ஹீட் ஆகிறது என்று சொல்கிறாயே, அந்த சொல்யூஷன் காய்ந்து விட்டதா பார்..  மறுபடி போடணுமோ?" என்றேன்.

"இல்லை சார்.  பார்த்தேன்.  இருக்கிறது"  என்று சொன்னபடியே அந்த இடத்தை ஆராய்ந்தான்.  "ப்ப்பா...  செம சூடு" என்று கையை உதறினான்.  என்னையும் தொட்டுப் பார்கக்ச் சொல்லி சூடு வைத்தான்.

"என்ன செய்யப்போறே?" என்றேன்.

"சொல்யூஷனை துடைத்து விட்டு புதுசா போட்டுப் பார்க்கறேன்" என்றான்.

Fan னை எளிதாகக் கழற்ற வரவில்லை.  "சார்..  கேபினெட் பழசாயிடுச்சு..  எல்லா பார்ட்ஸும் துரு சேர்ந்து அதுவே பிரச்சனை ஆகிறது..  புதுசு வாங்கிடலாம்"  என்றான்.

"இதோ பார் இளா..  உனக்கு ரிப்பேர் பார்க்க நேரமாவுதுன்னு என்னை புதுசு வாங்கச் சொல்லாத..  எல்லா ரிப்பேரும் உனக்குத் தெரிந்திருக்க வேண்டும், பொறுமையும் இருக்கணும்" என்று கடித்தேன்.  இதை நான் அவனிடம் பல நாட்களாகச் சொல்லி வருகிறேன்.  ஏனென்றால் அவன் புதுசுக்கு சொன்ன விலையும் அப்படி!  கொஞ்சம் மாடலை மாற்றினால் இன்னும் ஒரு எட்டாயிரம் குறைக்கலாம் என்றும் சொல்லி இருந்தான்.    வேறு வழி இல்லை என்று நான் செலவு செய்ய மனதளவில் தயாராகிக் கொண்டிருந்தேன்..  புதிய சிஸ்டம்  பார்க்கப்போகிறோம் என்கிற சபலமும் மனதில்...

அப்போதுதான் இளா அந்தத் தகவலைச் சொன்னார்.  "ஸார்..  Fan னோட ரெண்டு லெக் உடைஞ்சிருக்கு..."

"அதனால.."

"சரியா உட்காரலை"

"அதனால"

"அதை மாற்றினால் எல்லாம் சரியாகி விடும்"

கொஞ்ச நேரம் அமைதி.  பிறகு கேட்டேன்.

"கைல வச்சிருக்கியா?"

"இல்ல ஸார்.."

பிறகென்ன, அவன் இரண்டு நாள் நேரம் எடுத்துக்கொண்டு புதிய Fan கொண்டு வந்து மாட்டி இருக்கிறான்.  பயன் இருக்கிறதா என்று இனிவரும் நாட்களில் தெரியும்.  

"புதுசு புதுசு புதுசுன்னு புதுசு  வாங்க வைக்கறதுலயே இருந்தியே...  மெக்கானிக் என்றால் எந்த வித கோளாறையும் அலசி, நான்கு விதமா யோசிச்சு சரிபண்ணத்தெரிய வேண்டாமா?  எங்கள் KGS மாமா எப்படி எல்லாம் யோசிப்பார் தெரியுமா, நான் சொல்லிதான் நீ அந்த ப்ராசஸரை கழற்றினே...   இல்லாட்டா புதுசு வாங்க வச்சிருப்பே" என்றெல்லாம் கடித்ததை நான் இங்கு விவரிக்க விரும்பவில்லை!  

------------------------------------------------------------------------------------------------------------------------------------------------------------------

இவரைத் தெரியுமோ?

தமயந்தி பிரபல எழுத்தாளர்.  இவர் விகடனில் எழுதிய கதை ஒன்றை நான் கூட எடுத்து நம் தளத்தில் விமர்சித்திருந்தேன்.  அந்தப் பதிவுக்கு அவரே வந்து பதில் சொல்லியிருந்த நினைவு   சும்மா அவரைப்பற்றி தெரிந்து கொள்ள...  விக்கியிலிருந்து...

தமயந்தியின் சொற்சிக்கனம் அலாதியானது, தமிழ்க் கதைப் பரப்பில், அவர் அளவுக்குக் குறைவான சொற்களால் பெரிய சித்திரம் தீட்டிக் காட்டும் எழுத்து வன்மை மிகவும் குறைவானவர்களுக்கே சாத்தியப்பட்டிருக்கிறது. பரீட்சார்த்தமான கதை சொல்லல் இந்தத் தொகுப்பில் உள்ளது. அது அந்நியப்பட்டுப் போகாமல், வாசகர்களுக்கு நெருக்கமாகவே இருக்கும்" என்று பிரபஞ்சன் குறிப்பிடுகிறார்.

தமயந்தி எழாம் வகுப்பில் இருக்கும்போது சிறு கவிதைகள் எழுதத் துவங்கினார். ஒன்பதாம் வகுப்பில் படிக்கும்போது சிறுகதைகள் எழுதத் தொடங்கினார். முதலில் வெளிவந்த சிறுகதை 'பொழுது விடியுமென்று' (ஆனந்த விகடன்). 'நிழல்' தாய் இதழில் வெளிவந்தது. 'குளத்தங்கரைப் படிக்கட்டு', 'பொழுது விடியுமென்று' இரு சிறுகதைகளும் விகடன் ஜாக்பாட் பரிசைப் பெற்றன. தமயந்தி கல்லூரியில் படிக்கும் போது அவரது முதல் சிறுகதைத் தொகுப்பு ‘தமயந்தியின் சிறுகதைகள்’ எழுத்தாளர் பிரபஞ்சனால் வெளியிடப்பட்டது. 2002-ல் இரண்டாவது சிறுகதைத் தொகுப்பு ‘அக்கக்கா குருவிகள்’ வெளியாகிப் பரவலாகப் பேசப்பட்டது. இதுவரை மொத்தம் 12-க்கும் மேற்பட்ட சிறுகதைத் தொகுப்புகள் வெளியாகி உள்ளன. கட்டுரைத் தொகுப்புகளும் வெளியாகி உள்ளன. '

தமயந்தியின் முதல் நாவல் 'நிழலிரவு' ,' சிறகுகள்'என்ற இதழில் வெளிவந்தது. இந்நாவலின் காலம் நெருக்கடி நிலை பிரகடனகாலம். கிறிஸ்துவர்கள், அவர்களுள் நாடார்கள் ஆதிக்கம், மதம் மாறிய கிறிஸ்தவர்கள், ஆங்கிலேயர்களின் வாரிசானவர்கள், இவர்களின் முரண்பாடுகளாய் விரிகிறது.

சரிகா ஷா, அருணா ஷான்பாக் போன்ற பல பெண்கள், அவர்கள் சந்திக்கும் அவலங்கள் அநீதிகளைக் குறித்து எழுதப்பட்ட கட்டுரைகளின் தொகுப்பு 'இந்த நதி நனைவதற்கல்ல'.

தமயந்தியின் தேர்ந்தெடுத்த கவிதைகள் 'என பாதங்களில் படரும் நிழல்' என்ற தொகுப்பாக வெளிவந்தன.

மொழியாக்கம்  :  தமயந்தி சில்வியா பிளாத்தின் கவிதைகளை 'அதனினும் சிறப்பான உயிர்த்தெழுதல்' என்ற பெயரில் தமிழில் மொழியாக்கம் செய்தார்.

முதியவர்களின் நிலையைப் பேசும் தமயந்தியின் 'அனல்மின் மனங்கள்' சிறுகதை 'கழுவேற்றம்' என்ற குறும்படமாக உருவானது.

தமயந்தி இதுவரை 7 ஆவணப்படங்கள் இயக்கியுள்ளார். விழித்திரு' திரைப்படத்திற்கு மீரா கதிரவனுடம் இணைந்து வசனம் எழுதினார். தமயந்தி எழுதிய ‘தடயம்’ என்கிற சிறுகதையை அதே தலைப்பில் ஒரு மணி நேரப் படமாக உருவானது. ஒரேயொரு காட்சியிலேயே முழுப் படமும் படமாக்கப்பட்டுள்ளது. முழுக்க முழுக்க ‘கிரவுட் ஃபண்டிங்’ தயாரிப்பில் சுயாதீன திரைப்படமாக உருவாகியது.

'காயல்’ திரைப்படம் தமயந்தியின் கதை, திரைக்கதை, இயக்கத்தில் திரைப்படமாக வெளிவந்தது.

"தமயந்தியின் 'நிழலிரவு' தேவாலய சபை அரசியல், ஆசிரியர் சமூக அரசியல், மதம்மாறி கிறிஸ்தவர்களை ஒதுக்கும் அரசியல் ஆகியவற்றின் மீதான் அதிகாரம் பற்றிய விமர்சனமாக விரிந்துள்ளது. கர்த்தரை கோவிலுக்குள் விற்பது பற்றிய விமர்சனம் வலுவாகவே வைக்கப்படுகிறது.கார்ல்மார்ஸ், ஏசுவின் சந்திப்புகளில் தொழிற்சங்க அரசியல் அதிகாரம், பொதுவுடமைக்கட்சிகளின் மீதான விமர்சனம் மேலிடுகிறது. கிறிஸ்துவ சபை அதிகாரத்தை கேள்விக்குறியாக்கும் தமயந்தி தொடர்ந்து காவல்துறை சார்ந்த அதிகாரத்தை கேள்விக்குறியாக்குவதை சமீபத்தில் வெளிவந்த 'கோட்டை காவல் நிலையம்' போன்ற நிறையக் கதைகளிலும், அவர் பங்கு பெறும் புதிய தலைமுறை தொலைக்காட்சியின் ' ரவுத்தரம் பழகு' போன்ற நிகழ்ச்சிகளிலும். புதிய தலைமுறை பத்திரிக்கையில் அவர் சமீபத்தில் எழுதி முடித்த “'இந்த நதி நனைவதற்கல்ல' தொடரிலும் காணலாம் ." என்று சுப்ரபாரதிமணியன் குறிப்பிடுகிறார்.

படைப்புகள்

• கொன்றோம் அரசியை - பனிக்குடம் பதிப்பகம்
• ஒரு வண்ணத்துப் பூச்சியும் சில மார்புகளும் (சிறுகதை) - கருப்புப் பிரதிகள்
• அக்கக்கா குருவிகள் (சிறுகதை) - போதி
• சாம்பல் கிண்ணம் (சிறுகதை)- போதி
• வாக்குமூலம்(சிறுகதை) - போதி
• முற்பகல் ராஜ்ஜியம் (சிறுகதை) - கவிதா பப்ளிகேஷன்
• தமயந்தியின் சிறுகதைகள் - சுப்ரஜா ஶ்ரீதரனின் பதிப்பகம்
• மனம் என்னும் மாய கண்ணாடி - மின்னம்பலம்
• முட்களின் மேல் சில பட்டாம்பூச்சிகள் - பேட்டிகள் மின்னம்பலம்

நாவல்  :  நிழல் இரவு

கவிதை  :  என் பாதங்களில் படரும் கடல்

கட்டுரைத் தொகுப்பு  :  இந்த நதி நனைவதில்லை,  வல்லமை தாராயோ - மின்னம்பலம் கட்டுரைகள்

ஆவணப்படங்கள்  :  கந்தக பூமி

திரைப்பாடல்கள்  :

• விழித்திரு திரைப்படத்தில் வெள்ளை இரவே (song)
• karichan kuruvi (Movie) - Naan Saami Pulla (song)
• இதமா இதமா, கொல்லாதே -கொலைகாரன் ,
• சிவப்பு பச்சை மஞ்ச- மைலாஞ்சி

அவரது பேட்டி ஒன்று இங்கே....

========================================================================================================

FaceBook ல் பகிர்ந்தது..

ஏதாவது எழுதலாம் என்று உட்கார்நதால் 'அடடா..  நிறைய படிக்க இருக்கிறதே..  நாம் பாட்டுக்கு எழுதிக் கொண்டிருக்கிறோமே' என்று தோன்றுகிறது.  அப்படி என்ன கிழிக்கிறோம் என்பது ஒருபுறமிருக்க, 

சரி அரியர்ஸில் இருக்கும் புத்தகங்களில் எதைப் படிப்பது என்று குழம்பி ஒன்றை எடுத்து ஒருவழியாய் படிக்கப் போனால் 'ஹையோ எழுதுவதற்கு நிறைய இருக்கிறதே..  டைம் வேஸ்ட் செய்கிறோமோ..  எப்போது எழுதுவது' என்ற எண்ணம் ஓடுகிறது.  

ஆக,  மனம் எப்போதும் எதிலிருந்தும் எஸ்கேப் ஆகவே பரபரக்கிறது!  இதை தத்துவ சிநாதனையாக மனம் எல்லாவற்றிலிருந்தும் விடுதலை பெறவே முயற்சிக்கிறது.  ஒரு ஆழ்நிலை தியானத்தை நோக்கியே மனம் செல்கிறது!  

அதாங்க..  தூக்கம்!

====================================================================================================

மிஞ்சிய சோ(ற்)றினிலே

கொஞ்சமாய் நீரூற்றி

பானையிலே மூடிவைத்து

காலையிலே எடுத்து

சிறுவெங்காயம் பச்சை மிளகாய்த்

துணையுடனே

குடித்து வந்தால் 

அக்னியாவது நட்சத்திரமாவது..  

அரிப்பாவது சூடாவது...             2013

===================================================================================

கங்கை கொண்ட சோழபுரம்

யாரைச் சொல்லி இருக்கிறேன் என்று தெரிகிறதா?

இந்தச் செய்தி வினோதமாக இருந்தாலும் நல்ல விஷயம்தான்.

====================================================================================

இணையத்தில் ரசித்தது...

================

\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\

காசா சுப்பாராவ் தெரியுமோ?

=

சுதந்திர போராட்டத்தில் உப்பு சத்தியாகிரகம் உட்பட பல போராட்டங்களில் கலந்து கொண்டு சிறை சென்றவர்  காசா சுப்பாராவ்.  சுதந்திரத்துக்குப்பின் நேரு அரசோடும், அதன் கொள்கைகளோடும் ஒத்துப்போக முடியவில்லை அவரால்.  காங்கிரசில் இருந்தவர், நேரு போன்றவர்களின் நடவடிக்கை பிடிக்காமல் ராஜாஜியின் 'ஸ்வதந்திரா' கட்சியில் சேர்ந்தவர், ஸ்வராஜ்யா இதழைத் தொடங்கி அதற்கு ஆசிரியர் ஆனார்.  அவர் எழுதி இருப்பது....

ராஜாஜியும் நானும் கடற்கரைக்கு உலாவ போனோம்.  என் முகம் வாடி இருந்தது.ராஜாஜி அதற்கு என்ன காரணம் என்று கேட்டார். நான் சொல்லவில்லை. ஆனால் அவரே யூகித்துக் கொண்டார். 

"எனக்குத் தெரியும். இந்த வாரம் ஸ்வராஜ்யாவில் இரண்டு அச்சுப் பிழைகள் நேர்ந்து இருக்கின்றன.ஆனால் அவற்றை கண்டுபிடிக்கும் போது எல்லா பிரதிகளும் அச்சாகி விட்டன. ஒன்றும் செய்ய முடியவில்லை. அதுதானே உன் வருத்தம்?"  என்று கேட்டார்.  நான் தலையை ஆட்டினேன்.

"நடந்து போன விஷயம் என்பது கொட்டிப் போன பாலை போல. இனிமேல் கவனத்துடன் இருக்க வேண்டுமே தவிர, நடந்ததையே எண்ணிக் கொண்டிருக்கக் கூடாது" என்றார் ராஜாஜி.  எனக்கு சற்று தெளிவு உண்டாயிற்று.ஆனால் ராஜாஜியின் முகம் இப்போது வேதனையில் சுருங்கிற்று.  

"பிறருக்கு புத்திமதி சொல்லலாம். அது மிகச் சுலபம். ஆனால் அதன்படி தானே நடப்பது என்பது மிகவும் சிரமம். பல ஆண்டுகளுக்கு முன் நடந்த ஒரு நிகழ்ச்சி. என்னால் இன்றும் மறக்க முடியவில்லை.   நாற்பது ஆண்டுகளுக்கு முன் நடந்தது அது.  என் மனைவி கடுமையாக நோய்வாய் பட்டு இருந்தாள்.  நான் அவளை வெகு ஜாக்கிரதையாக கவனித்துக் கொண்டிருந்தேன்.  அவளால் பாயில் தலைவைத்துப் படுத்துக்கொள்ள கூட முடியவில்லை. அவளுடைய வேதனையை குறைப்பதற்காக,  அவளுடைய தலையை எடுத்து மடிமேல் வைத்துக் கொண்டேன்.  கொஞ்ச நேரத்துக்கு பின் கைகால் மரத்து போய், மெதுவாக அந்த தலையை இறக்கி படுக்கையில் வைத்தேன். அவளுக்கு தன் நிலை புரிந்து விட்டது. 

"நான் அவ்வளவு சுமையாகவா இருக்கிறேன்?  பாவம்!  எவ்வளவு நேரம் தான் என்னை உங்கள் மடியில் வைத்து சுமப்பீர்கள் ? உங்கள் அன்புக்கும் ஓர் எல்லை உண்டு " என்று வேதனையுடன் சொல்லி பெருமூச்சு விட்டாள்.  பத்து நிமிடங்களில் அவள் உயிர் பிரிந்து விட்டது. பத்து நிமிடங்கள் நான் பொறுத்திருக்கக் கூடாதா?  என்னை அறியாமல் அவள் மனத்தை புண்படுத்தி விட்டேனே...  40 ஆண்டுகளாகியும் என்னால் இந்த தவறு தந்த வேதனையை மறக்க முடியவில்லை" என்றார் ராஜாஜி .

- காஸா சுப்பா ராவ்,  Sidelights On Rajaji என்னும் நூலில் 

===================================================================================================

ஜோக்ஸ்...  

கவாஸ்கர் செய்தி மட்டும் படிக்கவும்.

ஜெ பாணியில் மாயா 

படத்தை எடுத்து, அதில் தவறாக  ஆணவங்கள் என்று இருந்ததை ஆவணங்கள் என்று மாற்றி இருக்கிறேன்!