"திங்க"க்கிழமை :: வாழைப்பூ ரசம் - ஏஞ்சல் ரெஸிப்பி

வாழைப்பூ ரசம் .. 

================  

வாழைத்தண்டு சூப் வாழைப்பூ சூப் வகையில் இது வாழைப்பூ ரசம் ..  மற்ற ரசங்களுக்கும் இதற்கும் செய்முறையில் வித்தியாசமில்லை.   செய்முறை அதேதான்.   ஆனால் சுவை மிகவும் அருமையாக வந்தது ..

அப்புறம் இந்த ரசத்தில் நான் வெள்ளை மிளகு ப்ளஸ் கருப்பு மிளகு இரண்டையும்  சேர்த்து அரைத்து செய்தேன் ..

வெள்ளை மிளகு கருப்பு மிளகை விட கொஞ்சம் காரம் அதிகம் ..வெள்ளை மிளகு ஆன்டி பாக்டீரியல் குணமுள்ளது ..

யாரது அங்கே அப்போ கருப்பு மிளகுக்கு அங்கிள் பாக்டீரியா குணமான்னு கேட்பது :))) ..

எங்க வீட்ல ஒரு ரசப்பிரியை இருக்கா //பிறந்தநாளுக்கு கூட ரசம் ரைஸ் தாங்கம்மா// எனும் அளவுக்கு அவ்வளவு ஆசை மகளுக்கு ..

அதனாலேயே என்னவோ எங்க வீட்ல குழம்பு பொரியல் சாம்பார் குருமா என்ன செய்தாலும் தினமும் சுடசுட ரசமும் இருக்கும் ..

மேலும் நான் ரசப்பொடி அரைத்து வைத்து பயன்படுத்துவதில்லை அப்போவே தேவைக்கு சின்ன மிக்சி ஜாரில் அரைத்து தாளித்து சமைப்பேன் ..

தேவையான பொருட்கள்

=========================

வேகவைக்க 

-------------------------

சுத்தம் செய்து நறுக்கிய  வாழைப்பூ  .....3 கைப்பிடி அளவு 

ஊறவைத்த துவரம்பருப்பு                     ......1 ஸ்பூன் 

துவரம்பருப்பு சேர்ப்பது அவரவர் விருப்பம் ..  பருப்பு சேர்க்காமலும் ரசம் மிக ருசியாக வந்தது 

வேகவைக்கும்போது சேர்க்க உப்பு மஞ்சள்தூள் பெருங்காயத்தூள் ..தேவையான அளவு தண்ணீர் ...........  3 கோப்பைகள் 

ரசப்பொடி ..  இன்ஸ்டன்ட் பொடி  வீட்டில் வைத்திருப்போர் அதனை சேர்த்துக்கொள்ளலாம் ..

இல்லாவிடில் இதுதான் நான்  சேர்க்கும் அளவு ..

     

கொத்தமல்லி விதைகள் ---------------  2 தேக்கரண்டிகள் 

வெள்ளை மிளகு                ---------------  1 தேக்கரண்டி 

கருப்பு மிளகு                       ---------------  1 தேக்கரண்டி 

சீரகம்                                     ---------------- 1 1/2 தேக்கரண்டி 

வற்றல் மிளகாய்                 ---------------- 1/2 

தேங்காய்                              ----------------- 1 சிறு துண்டு 

இவற்றை லேசாக சட்டியிலோ வாணலியிலோ வறுத்து வைக்கவும் 

பூண்டு  ----- 3 பற்கள் 

தக்காளி ---- 1 

புளி --------------நெல்லிக்காயளவு ..நீரில் ஊறவைத்தது 

உப்பு ------------ தேவையான அளவு 

சாம்பார் பொடி ....1 தேக்கரண்டி (விரும்பினால் )

நான் சேர்க்கவில்லை 

பெருங்காயத்தூள் ......தேவையான அளவு 

தாளித்து சேர்க்க 

கடுகு ---------1 தேக்கரண்டி 

வற்றல் மிளகாய் ---1 

கொத்தமல்லி இலைகள் 

கறிவேப்பிலை இலைகள் 

வெல்லம் ..சிறு துண்டு 

முதலில் சுத்தம் செய்து நறுக்கிய வாழைப்பூக்களை ஒரு ஸ்பூன் துவரம்பருப்பு ,மஞ்சள்தூள் உப்பு 3 கோப்பை நீர்     சேர்த்து மூன்று விசில் வரும்வரை வேகவைக்கவும்..

விசில் அடங்கியதும் சிறிது நேரம் கழித்து குக்கரை திறந்து உருளைக்கிழங்கு மசிக்க வைத்திருக்கும் உபகரணத்தால் நன்கு பருப்பையும் வெந்த வாழைப்பூக்களையும் மசிக்கவும் .இப்போ எல்லாம் கலந்து வந்திருக்கும் அதை அப்படியே வடிகட்டி வைக்கவும் ..விருப்பமானால் அதில் ஒரு ஸ்பூன் அளவு வெந்த கலவை மட்டும் வடிகட்டிய நீரில் சேர்த்துக்கொள்ளலாம் ..

இப்போ அடுத்தது வறுத்து  வைத்துள்ள மிளகு சீரக தனியாவை மிக்சியில் ஒரு சுற்று அரைத்து அத்துடன் தக்காளியில் பாதியையும் ஒரு சுற்று சுற்றவிட்டு அரைத்து எடுத்து வைத்துக்கொள்ளவும் .

இந்த தக்காளி அரைக்கிறது எதுக்கு என்றால் இங்கே நம்மூர் நாட்டு தக்காளி கிடைக்காது எல்லாமே ஜாம் செய்யும் வகை லேசில் அழுகாது ஆனால் கையால் நசுக்கி விடவும் முடியாது அதனாலேயே பலர் தோலை வெட்டி கூட்டு குழம்பு சட்னிகளுக்கு சேர்ப்பாங்க 

அடி  கனமான பாத்திரத்தை அடுப்பில் வைத்து அடுப்பை மெதுவாக சிம் இல்  எரியவிட்டு   தாளிக்க எண்ணெய் ஊற்றி  கடுகு ,வற்றல் மிளகாய்  கறிவேப்பிலை தாளித்து அதில் அரைத்த ரசப்பொடியை சேர்த்து லேசாக வதக்கவும் ..மூன்று பற்கள் பூண்டையும் தட்டி சேர்க்கவும் ,பெருங்காயத்தூள் சேர்த்து மீதி வெட்டி வைத்த தக்காளியும் சேர்த்து மிதமான சூட்டில் வதக்கி அத்துடன் சாம்பார்பொடி வேகவைத்த வாழைப்பூ நீர் இந்த (வாழைப்பூ நீரே 3 கோப்பைகள் அளவுக்கு  வரும் அதனால் தனியாக நீர் சேர்க்க அவசியமில்லை ரொம்ப சுண்டிவிட்டது என்றால் ஒரு கோப்பை நீர் தனியாக புளிநீருடன் சேர்க்கலாம் ),பிறகு புளி தண்ணீர் எல்லாம் சேர்க்கவும் ..உப்பு சரி பார்க்கவும் .

எல்லாம் நுரை கட்டி  வரும் போது அந்த குட்டியூண்டு துண்டு வெல்லத்தையும் கொத்தமல்லி இலைகளையும் சேர்த்து இறக்கவும் ...அடுப்பை கண்டிப்பா அணைக்கணும் இது நியூ ஜெர்சிக்காரருக்கு மட்டுமே :) 

இந்த வெல்லம் சேர்க்கும் பழக்கம் ஒருமுறை  டிவி ப்ரோக்ராம் ஒன்றில் மறைந்த எழுத்தாளர் அனுராதா ரமணன் அவர்கள் சொன்னது ..அப்போதிலருந்து சேர்க்கிறேன் சுவையும் நல்லாவே இருக்கு ..

எல்லாருக்கும் ஒவ்வொரு பழக்கம் இருப்பதுபோல எனக்கு சுட சுட ரசத்தை காபி கோப்பையில் ஊற்றி அதில் பொரித்த அப்பளத்துண்டுகளை உடைத்து போட்டு சாப்பிட பிடிக்கும் :)