திங்கக்கிழமை 170605 : ஸ்வீட் இடியாப்பம் /Lavariya - ஏஞ்சல் ரெஸிப்பி

ஸ்வீட் இடியாப்பம் /Lavariya 

==========================

இது இனிப்பு பிரியர்களுக்கான :)  ஸ்பெஷல்..

இதில் பூரணமாக பாசிப்பருப்பு இனிப்பு பூரணம் அல்லது  தேங்காய் வெல்லப்பூரணம்  இரண்டையுமே வைத்து செய்யலாம் ..

பல வருடங்கள் முன்பு கணவரின் நண்பர் மனைவி  எனக்கு செய்து தந்தார்கள் .அவர்கள் கொழும்பு பகுதி இலங்கையர்கள் ..

இதன் பெயர் லவரியா ..   சமையல் குறிப்பை கேட்டு வைத்து கொண்டதோடு செய்து பார்க்கவில்லை ..

பல வருடங்களுக்குப்பின் அதுவும் இரண்டு நாட்களுக்கு முன் புது இடியாப்ப அச்சு வாங்கினதும் செய்தேன் ..முதல் முறையே மிகவும் அழகாக இடியாப்பம் வந்தது :)


 எப்பவுமே  அரி பத்திரி செய்யப்போனா புட்டாகும் இல்லைனா புட்டுக்கு பிசைந்தா  அது ஓவரா குழைந்து இடியாப்பமாகவும் மாறும் இம்முறை அந்த கஷ்டம் ஏதும் கொடுக்கவில்லை நிரப்பரா கேரளா இடியாப்ப மாவு :)

மாவை பிசைந்து இடியாப்ப அச்சில் இட்டு பிழிந்து அதில் பூரணத்தை இட்டு அரை மூன் வடிவில் மூடி  ஆவியில் 5-7 நிமிடங்கள் வேகவைத்து எடுத்தால் லவரியா தயார் :)

பூரணத்துக்கான அளவுகள்  வெல்லத்தின் தன்மையை பொறுத்து மாறுபடலாம் ..நான்  பயன்படுத்தியது Natco பிராண்ட் jaggery gur ..இது இயல்பிலேயே நீர்த்தன்மையா  இருக்கும் ..அதனால் தண்ணீர் சிறிதளவு போதும் தேங்காயும் வெல்லமும்  சேர்ந்து சூடாகும்போது சீக்கிரம் இளகி விடும் . 

முதலில் பூரணத்துக்கு தேவையான பொருட்கள் 

---------------------------------------------------------------------------------------------

துருவிய தேங்காய் ---- 1 கப்

துருவிய வெல்லம்   ---- 1/2 கப்

ஏலக்காய் தோல் நீக்கி  இடித்து வைத்தது சிறிதளவு

தண்ணீர்                   ------ 1 ஸ்பூன் .

இடியாப்பம் செய்ய மாவு ,தண்ணீர் ,  உப்பு  சிறிதளவு ,இடியாப்ப அச்சு ,இடியாப்பத்தட்டுக்கள்

மற்றும் பிளாஸ்டிக் பிரீஸர் பைகள் ..வாழை இலை கிடைத்தால் அதிலும் இட்டு மடிக்கலாம் .

அடிகனமான வாணலியை அடுப்பில் வைத்து அதில் ஒரு சிறு கரண்டி தண்ணீர் ஊற்றி கொதிக்கும்போது 

அதில் துருவிய வெல்லத்தை சேர்க்கவும் அதில் பொடித்த ஏலக்காய் சேர்க்கவும் , வெல்லம் சூட்டுக்கு இளகி  

கரைந்து வரும்போது துருவிய தேங்காயை சேர்த்து கிளறவும் ,கைய எடுக்காமல் கிளறவும் அடிபிடிக்காமல் இருக்கணும் .

.ஐந்து நிமிடத்தில் படத்தில் உள்ளதுபோல உருட்டும்  பதத்துக்கு வந்ததும் அடுப்பு ஸ்விட்சை  அணைத்து  :)  பூரணத்தை சிறு கிண்ணம் ஒன்றில் எடுத்து வைக்கவும் .இப்போ பூரணம் தயார் ..

அடுத்து இடியாப்பத்துக்கு நீர் உப்பு சேர்த்து  மாவு பிசைந்து இடியாப்ப அச்சிலிட்டு சற்று பெரிய  இடியாப்பமாக பிளாஸ்டிக் கவரில்  பிழிந்து ,நடுவில் ஒரு தேக்கரண்டி அளவு பூரணத்தை இட்டு அப்படியே அந்த பிளாஸ்டிக் கவரின் ஒரு முனையை  மடித்து  ஒரு பக்கம் மூடவும் .ஒரு செகண்ட் கழித்து பிளாஸ்டிக் கவரை பழையபடி திறந்தால் இடியாப்பம்  சோமாஸ் வடிவத்துக்கு வந்திருக்கும் ..இப்போ இடியாப்பத்தை இடியாப்ப தட்டுகளில் வைத்து அடுக்கி ஆவியில் 5-7 நிமிடங்கள் வேக வைத்து எடுக்கவும் ..

ருசியான இனிப்பு பூரண இடியாப்பம் தயார்.

 இங்கே  எங்களுக்கு சின்ன குட்டி Freezer bags இங்கு கிடைக்கும் அதை பயன்படுத்தி சோமாஸ் வடிவம் வர வைச்சேன் .

இதே போல காரத்திலும் செய்து பார்க்கணும் ..என்ன பூரணம் நல்லா இருக்கும்  கார இடியாப்பத்துக்கு என்று சொல்லுங்க அதையும் செஞ்சுடலாம் .




தமிழ்மணத்தில் வாக்களிக்க க்ளிக் செய்யவேண்டிய இடம்... 




[ புதுசு புதுசா செய்யறீங்கப்பா..  உள்ளூரில் இருந்தாலும் சாம்பிள் அனுப்புங்கன்னு கேட்கலாம்!  ஹூம்....!  எனக்கு எந்தப் படத்தை எங்கே இணைப்பது ன்று கூடத் தெரியவில்லை!  புதன் புதிர் மாதிரி படம் பார்த்துக் கொள்ளுங்கள் மக்களே...!  சரியாகத்தான் இணைச்சிருக்கேன்னு நம்பறேன்.   


லவேரியா என்று படித்ததும் எனக்கு "ராஜு பன்கயா ஜென்டில்மேன்" படப்பாடல் நினைவுக்கு வருகிறது! - ஸ்ரீராம். ]