190417 புதன் :: உங்க டீ, காபியில உப்பு இருக்கா?

ஏஞ்சல் :

1, ஆரோக்கியமான சமூகம் என்றால் என்ன ? 


$ குழந்தைகள் பெண்கள் முதியவர்களின் பாதுகாப்பு பற்றி ஒரு பயமும் இல்லாத சமூகம்.

உதவாவிட்டாலும் பொய் சொல்லி திசை திருப்பாதவர் இல்லா சமூகம்.

உழைப்பையும் திறமையை யம் கொண்டாடும் சமூகம்.

இன்னும்...பக்கம் வளர்ந்துவிடும்.

# நல்ல புரிதலும் ஒருங்கிணைப்பும் சேர்ந்த நாணயமான சமூகம்.

& Life Buoy சோப் உபயோகிக்கும் சமூகமாக இருக்குமோ? லைப் பாய் எவ்விடமோ, ஆரோக்கியம் அவ்விடமே! 

2,மழை அழகா ? இல்லை மூடுபனி அழகா ? முக்கியமாக கவனத்தில் கொள்ளவும் இதற்கு அடாடா மழைடா பாட்டு படத்தை இணைக்க தடா :))))))))))))))))))) 

$ மழை.

#  மூடுபனி அழகு. மழை திருப்தி.

& நான் மழை படம் பார்க்கவில்லை. மூடுபனி படம் பார்த்திருக்கிறேன். ஆஃல்பிரட் ஹிட்ச்காக்கின் Psycho படத்தின் காப்பி.

 'அடாடா மழைடா' அப்படி என்று ஒரு பாடலா! சுத்த மரியாதைக் குறைவான வார்த்தைகள் கொண்ட பாடலாக இருக்கே! ஆனாலும், நெல்லைத்தமிழன் மனசு வருத்தப்படக்கூடாது என்பதற்காக ..... 

 


3, எங்கள் நண்பர் ஒருவர் தனது மறைவுக்கு பின் இப்படித்தான் தனக்கு லாஸ்ட் rituals செய்யணும்னு எழுதி வச்சிட்டன் என்று சொல்றார் .எப்படி இது சிலரால் மட்டும் முடிகிறது ? இதற்கு மனமுதிர்ச்சி காரணமா ? அல்லது வயது காரணமா ?

$ எல்லோராலும் முடியும். எழுதியதை இன்னொருவருக்கு தெரிவிப்பதில்தான் சங்கடம்.

# இது துணிவல்ல அச்சம். மாற்றிச் செய்து விடுவார்களோ அல்லது செய்யாமலே விட்டு விடுவார்களோ இல்லை பணத்தை வாரி இறைப்பார்களோ எனும் அச்சம்.

& பைத்தியங்கள் பலவிதம்; அதில் இவர் ஒரு விதம் போலிருக்கு. 
லாஸ்ட் ரிச்சுவல் பற்றி ஒரு ஜோக் சொல்கிறேன். ஒருவருக்கு வந்த தந்தி: " உங்கள் மாமியார் இறந்துவிட்டார். உடலை எரிப்பதா அல்லது புதைப்பதா?" 
இவரின் பதில் தந்தி: "Take no chances. Do both."

4, சமீப கால திரைப்படங்களில் கோபப்படும் ஹீரோ ,பாட்டிலை உடைக்கும் ஹீரோ தம்மடிக்கும் ஹீரோயின்ஸ் கெட்ட வார்த்தைகள் obscene expression இப்படிலாம் வருதே இதைப்பற்றி உங்கள் கருத்து என்ன ?( ஒண்ணுமில்ல கபீர்சிங் ,அர்ஜூன்ரெட்டி இன்னும் சில படங்களின் ட்ரெய்லர் பார்த்தேன் அதான் கேட்டேன் )

$ ரவுடிகள் வாலறுந்த நரி கதையாக தங்களை உயர்த்திக்கொள்ள ஹீரோக்களை இப்படி எல்லாம் காட்டுகிறார்களோ?

# நெகடிவ் ஹீரோக்கள் வரவு ஒரு துரதிர்ஷ்டம். அத்தகைய படங்கள் வெற்றி பெற்றது அடுத்த துரதிஷ்டம்.

& உத்தம வில்லன்களுக்கு நல்ல ஜோடியான அதம ஹீரோக்கள் போலிருக்கு! 

5,ஒருவரை நல்ல நண்பராக உரு ஆக்குவது எது ? (இவர் நல்லவர் நல்ல நட்பு ) என்று நம்மை நினைக்கவைப்பது எது ?

$ அவர் தரும் ஆலோசனைகள்; அவர் செய்யும் உதவிகள்.

#  சுயநலமில்லாத அன்பு மட்டுமே.

& உடுக்கை இழந்தவன் கைபோல ஆங்கே 

இடுக்கண் களைவதாம் நட்பு.

6,தன் பசி ,வலி மன வேதனை இவற்றை உணரும் மனிதன் பிறரை திட்டும்போது தூற்றும்போது மற்றவர்களுக்கும் அது வலிக்கும்னு உணராதது ஏன் ?

$ கோபம் கண்ணை மறைப்பதுடன் மதியையும் மழுங்கச்செய்யும்.

# அடுத்தவரை நோகடிக்க வேண்டும் என்பதுதான் சினத்தின் இலக்கு. அது மற்றவரைப் புண்படுத்தும் என்று அறிந்தேதான் கோபப்படுகிறோம்.

7,கொட்டும் மழையில் ஐஸ்க்ரீம் சாப்பிடுவதும் கொதிக்கும் வெயிலில் சூடா சாயா குடிப்பதும் பற்றி உங்கள் கருத்து ?

$ சீதோஷ்ண நிலைக்கேற்ப நம் உடலை தயார் நிலையில் வைத்திருக்க ரஷ்யர்கள் இவ்வழியைப் பின்பற்றுவர்.

# எண்சாண் உடம்புக்கு நாவே பிரதானம் என்பதுதான்.

& முழங்காலில் கிழிந்துபோன ஜீன்ஸ் பாண்ட் ஃபாஷன் ஆன சமூகத்தில் இதெல்லாம் சகஜம்தானோ என்னவோ! 😊

8, நிஜ வாழ்வில் இல்லாத டூயட்டை இந்திய சினிமா காதல்களில் முதலில் புகுத்திய அந்த மாமனிதர் யார் ? 

# யாரோ அறியேன் (எல்லாரும்தான்). நிஜ வாழ்வில் வெளிப்படையாக்கக் கடினமான காதலை திரையில் எளிதாக உணர்த்த இசைதான் சிறந்த சாதனம் என்பது புத்திசாலித்தனத்தின் வெளிப்பாடு.

9, தொலைபேசியில் யார் கிட்டயாவது பேசுமுன்னர் என்ன பேசுவதுன்னு மனசுக்குள்ள ஒத்திகை பார்ப்பதுண்டா ?

$ உண்டு அறிமுகம் இல்லாதவருடன் புதிதாய் தொடர்பு கொள்ளும் போது.

#  முக்கியமான விஷயம் என்றால் மனதுக்குள் ஒத்திகை பார்ப்பதுண்டு.

10, சிறப்பு ,மகிழ்ச்சி போன்ற அழகு தமிழ் சொற்களை பிரபலப்படுத்த சினி பிரபலங்கள் தேவைப்படுகிறார்களே என்று வேதனை பட்டதுண்டா ?

$ அப்படிப்பாடம் சொல்லிக்கொடுக்கும் நாயகர்கள் இருந்தால் வரவேற்கிறேன்.

# நன்றாக அறியப் பட்டிருக்கும் சொற்களைப் பயன் படுத்துகிறார்கள் - பிரபலப் படுத்தவில்லை.

வாட்ஸ் அப் கேள்விகள் : 

பானுமதி வெங்கடேஸ்வரன் :

 அப்துல் ஜஃபார், கூத்தபிரான் இவர்களின் கிரிக்கெட் மாட்சுக்கான தமிழ் வர்ணனையை ரசித்திருக்கீர்களா?

$ Oh! மேலும் ராமமூர்த்தி வர்ணனையும். 

# கேட்டிருக்கிறேன் ரசிக்கவில்லை.

& கிரிக்கட் தமிழ் வர்ணனைகளின் ரசிகன் நான். டி வி யில் மாட்ச் பார்த்தால் கூட, டி வி வால்யூமை மியூட் செய்துவிட்டு, ரேடியோ தமிழ் வர்ணனை கேட்டவாறு மாட்ச் பார்த்ததுண்டு. 

மேலும் ஒரு தகவல் :-

ஆயிரத்துத் தொள்ளாயிரத்து எழுபதுகளில், இராணுவ வண்டி ஸ்பெசிபிகேஷன் எழுதும் பொறுப்பு என்னிடம் ஒப்படைக்கப்பட்டது. மார்கெடிங் பிரிவிலிருந்து ஒரு போன் கால். 

" Gouthaman - are you writing the specification for the current army order?"

" Yes, sir. "

" For this order of vehicles, indigenous type of rear tow hook are to be fitted."

" Indigenous type?"

" Gouthaman - do you know Tamil"

" Yes sir, தெரியும் "

" நான் சொல்லும் டோ ஹூக் தமிழ் எழுத்து 'ப' வடிவில் இருக்கும். அதனுடைய ஸ்பெசிபிகேஷன் என்னவோ அதைக் கொடுக்கவேண்டும் "

" சரி சார்!" என்று சொல்லி ஃபோனை வைத்தேன். இந்தக் குரலை எங்கேயோ கேட்டிருக்கிறேனே?.... ஆங் ஞாபகம் வந்துவிட்டது. அப்துல் ஜப்பார், ராமமூர்த்தி ஆகியோரின் வர்ணனையுடன்  சேர்த்து எக்ஸ்பெர்ட் கமெண்ட் வழங்கும் வல்லுநர் கே எஸ் எஸ் மணி அல்லவா! ஆம். அவரேதான். அப்பொழுது அவர் அசோக் லேலண்டு மார்கெடிங் பிரிவில் ராணுவ வண்டி ஆர்டர்கள் ஒருங்கிணைப்பாளர்! 

கிருஷ்ண பட்ச த்ரயோதசி நான்காம் ஜாமத்து சந்திரனை தரிசித்திருக்கிறீர்களா?

 # அதே சந்திரனை வேறு பல நாட்களில் தரிசித்திருக்கிறேன்.

அத்தனை சமர்த்தில்லாத கணவனை அடைந்த மனைவி அல்லது மனைவியை அடைந்த கணவன் இருவரில் யாருக்கு பாதிப்பு அதிகம்?
     

# கருத்து சொல்பவர் ஆணா பெண்ணா என்பதை ப் பொறுத்து பதில் வேறுபடும். எனினும் .. அசட்டுக் கணவன் பிரச்சினையை மனைவி கஷ்டப்பட்டு சமாளித்து விடுவாள்.  மனைவி சாமர்த்தியக் குறைவு என்றால் கணவன்  "இட்டு ரொப்புவது"  கடினம்.

டீ, காபி இவற்றில் ஒரு கல் உப்பு போட்டு குடிப்பார்களாமே...? உங்களுக்கு அனுபவம் உண்டா?

       

 # இல்லை.

 $ நம் வீட்டுக்கிணற்றுத் தண்ணீரில் filter செய்த பின்னும் கரைந்த உப்பு 140 ppm என்பதால் உப்பு சேர்க்காமல் ருசிக்கும்.

& சுமார் பதினைந்து வருடங்களுக்கு முன்பு என் தொண்ணூறு வயது அம்மாவைப் பார்க்க அண்ணனின் வீட்டிற்குச் சென்றிருந்தேன். அம்மா காபி போட்டுக் கொடுத்தார்கள். நான் எப்பவுமே சின்ன டம்ப்ளரில் அரை அளவு காபிதான் குடிப்பேன். அம்மா கொடுத்த காபியை வாங்கிக் குடித்துக்கொண்டு இருந்தேன். சட்டென்று ஏதோ சந்தேகம் வந்த அம்மா, சமையலறைக்குள் சென்று பார்த்துவிட்டு வந்து, "இங்கே கொடு அந்தக் காபியை" என்றார்கள். நான் அதற்குள் அதைக் குடித்து முடித்துவிட்டேன். " ஏன்டா - சர்க்கரை பாட்டிலும் பொடி உப்பு பாட்டிலும் ஒரே மாதிரி இருந்ததால், சர்க்கரைக்கு பதிலாக உப்பைப் போட்டுவிட்டேன், நீ ஒன்றுமே சொல்லாமல் அதைக் குடித்துவிட்டாயே! உனக்கு தேவையா இந்த தண்டனை?" என்று கேட்டார்கள்! அம்மாவின் அளவற்ற அன்பு என்னும் சர்க்கரைக்கு முன் அரை ஸ்பூன் உப்பு எம்மாத்திரம்! 

                     

 ===========

இந்த வாரமும் நாங்க கேள்வி எதுவும் கேட்டு உங்களைக் குழப்பவில்லை. அரசியல்வாதிகள் உங்களை ஏற்கெனவே ஒரு மாத காலம் குழப்பிட்டாங்க. 😁எல்லோரும் குழப்பம் எதுவும் இல்லாமல் நாளை (18-04-19) போய் ஓட்டுப் போட்டுவிட்டு வாங்க. 

===========
நன்றி, மீண்டும் சந்திப்போம்! 🙏🙏🙏