"திங்கக்கிழமை : மோர் ரசம் - கீதா ரெங்கன் ரெஸிப்பி

மோர் ரசம்

மோர் ரசம் உங்கள் எல்லோருக்கும் தெரிந்த ஒன்றாகத்தான் இருக்கும். இந்த வகை மோர் ரசம் என் மாமியாரிடம் கற்றுக் கொண்டது. என் பிறந்த வீட்டுக் குறிப்பு அதிலும் என் அப்பா வழிப் பாட்டி செய்வது வேறு வகை. அது மற்றொரு நாள் சொல்கிறேன். என் அம்மா வழிப்பாட்டி ஏனோ மோர் ரசம் செய்ததில்லை.

இது ரொம்ப சிம்பிள் ரெசிப்பிதான். சுவையானதும், ஆரோக்கியமானதும் கூட. இதற்கான பொடியை நாம் தயாரித்து நல்ல டைட்டா மூடி உள்ள பாட்டில் அல்லது எவர்சில்வர் டப்பாவில் போட்டு குளிர்சாதனப் பெட்டியில் வைத்துக் கொள்ளலாம். வைத்துக் கொண்டால் எப்போது வேண்டுமானாலும் எளிதாகச் செய்துவிடலாம். என் மகனுக்குச் செய்துக் கொடுத்துவிட்டேன். 

நான் தயாரித்து வைத்துக் கொள்வதில்லை. அப்பப்ப செய்யறது வழக்கமாகிடுச்சு. ஏஞ்சலுக்குக் கண்டிப்பா இது பிடிக்கும்னு நினைக்கிறேன். பிக்காஸ் அவங்க ஹெல்த் கான்ஷியஸ்! பூஸார்க்குப் புகை வர!

சரி ரெசிப்பி இதோ...

துவரம்பருப்பு : ½ டேபிள் ஸ்பூன்

மிளகு         : 1 டீஸ்பூன்

ஜீரகம்         : 1 டீஸ்பூன்

வெந்தயம்     : ¾ டீஸ்பூன்

கொத்தமல்லி விரை : ¼ டீஸ்பூன் இது வாசனை இருந்தால் போதும். டாமினேட் செய்ய வேண்டாம்.

உப்பு            : உங்கள் தேவைக்கேற்ப

வேப்பம் பூ    : உங்கள் தேவைக்கேற்ப.

இதில் வெந்தயம் தவிர மற்ற அனைத்தையும், அடுப்பை ஏற்றி, வாணலியில் ட்ரையாக வறுத்துக் கொள்ளவும். வேண்டுமென்றால் கொஞ்சம் நெய் விட்டும் வறுக்கலாம். வெந்தயத்தை நான் எப்போதுமே தனியாக வறுப்பது வழக்கம். எனவே அதையும் தனியாகச் சிவக்க வறுத்துக்கோங்க. 

வறுத்து வைத்திருக்கும் மற்றவற்றோடு, வெந்தயத்தையும் சேர்த்து ஆறியதும் ட்ரையாகப் பொடி செய்து வைச்சுக்கோங்க.

கடையில் வாங்கிய வேப்பம் பூ ஒரு சில கடைகளில் மட்டுமே நல்ல சுத்தமாகக் கிடைக்கிறது. சில கடைகளில் கொஞ்சம் இலை, குச்சியோடுதான் கிடைக்கும். எனவே, வேப்பம் பூ உங்கள் தேவைக்கேற்ப எடுத்து (நான் கொஞ்சம் அதிகம் எடுத்துக் கொள்வேன்.) தூசி, தும்பு ஏதேனும் இருக்கானு பார்த்து நீக்கிச் சுத்தப்படுத்தியதை நெய்யில் நன்றாக டார்க் ப்ரௌன் நிறத்துக்கு வறுத்து வைச்சுக்கோங்க.

எங்க மாமியார் வீட்டுல வேப்பமரம் இருக்கறதுனால, தரையை நல்லா சுத்தப் படுத்திட்டு வெள்ளைத் துணி அல்லது வேஷ்டி விரிச்சு அதுல விழும் வேப்பம் பூவை சேகரிப்பது செய்வது வழக்கம். அப்படியும் அதில் தூசு விழும் என்பதால் அதையும் ஆராய்ந்து, காயவைத்து வைச்சுருவோம். மரத்தில் கொத்தாக உதிரும் பருவத்தில் இருந்தால் அதையும் அப்படியே எடுப்பதும் வழக்கம்.

நான் எடுத்துக் கொண்ட ¾ கப் தயிர் + அதை நீர்க்கச் செய்ய தயிரின் திக்னெஸ் பொறுத்து தண்ணீர். தயிர் கொஞ்சம் புளித்திருக்க வேண்டும். (படத்தில் 1/2 கப் + 1/4 கப்.) நான் ஒன்றரை கப் தண்ணீர் சேர்த்து கடைந்து வைத்துக் கொண்டேன். தயிர் இன்னும் திக்காக இருந்தால் இன்னும் கொஞ்சம் தண்ணீர் சேர்த்துக் கொள்ளலாம். தேவையான உப்பும் சேர்த்துக்கோங்க.

கவனிக்க : நீர் மோர் போலவும் இருக்கக் கூடாது. ரொம்பத் திக் மோராகவும் இருக்கக் கூடாது. 

கரைத்து வைத்திருக்கும் மோரில் பொடித்து வைத்திருக்கும் பொடியைச் சேர்த்து நல்லா கரைச்சுக்கோங்க. அடுப்பை ஏற்றி, அதுல வாணலில கொஞ்சம் நெய் விட்டு அது சூடானதும், கடுகு, கறிவேப்பிலை போட்டுத் தாளிச்சு மோர்ல போட்டுக் கலக்கவும். (நான் கொஞ்சம் வெந்தயமும் வறுத்து தாளிப்பேன்)

அவ்வளவுதான் மோர் ரசம். சூடான சாதத்தில் நெய் விட்டு அதில் வறுத்து வைச்சுருக்கற வேப்பம் பூவைக் கொஞ்சம் போட்டு நல்லா பிசைந்துவிட்டு அதில் மோர் ரசத்தை சாதாரண ரசம் போல நிறைய ஊற்றிக் கலந்து சாப்பிட வேண்டியதுதான். வேப்பம் பூவைத் தனியாகவே வைச்சுக்கோங்க. யாருக்கு வேண்டுமோ அவங்க, சாப்பிடும் போது சேர்த்துக்கலாம். சிலர் வேப்பம் பூ இல்லாம இந்த ரசத்தை மட்டும் ஊற்றி சாப்பிடுவாங்க.

வேப்பம் பூ வறுத்து வைச்சிருக்கறதுல கொஞ்சம் போல எடுத்துச் சூடான சாதத்தில் நெய் விட்டு, கொஞ்சம் உப்பு தூவிக் கலந்து சாப்பிட்டுப் பாருங்க, பிடிக்கும் என்றால். ரொம்ப நல்லாருக்கும். நான் அப்படி முதலில் கொஞ்சம் சாப்பிட்டுவிட்டு அப்புறம் அதில் மோர் ரசம் ஊற்றிச் சாப்பிடுவேன்.

இது என்னாது? ஹூம் ஏதோ ஊத்தி வைச்சுருக்காங்க. நல்லாருக்குமா? பயமாருக்கே!! 

(வேப்பம்பூவுடன் மணத்தக்காளி வத்தலும் வறுத்து வைத்துக் கொண்டு சாதத்தில் கலந்து கொள்ளலாமே.....)