பங்குச்சந்தையில் பணத்தை இழந்தது உண்டா?

 

ஜெயகுமார் சந்திரசேகரன் : 

1. உருசியா, உக்ரைன் போர் எப்போது முடிவுக்கு வரும்?

# யாருக்குத் தெரியும் ? மீண்டும் ஒரு  வியட்நாம் போர் ?

& மார்ச் முதல் வாரத்தில் அறிவிப்பு வெளியாக உள்ளது என்று சில நாட்களுக்கு முன் படித்தேன். பார்ப்போம். 

2. சீனா ஏன் பலூன் விட்டு வேவு பார்க்கிறது? அதனால் என்ன லாபம்? 

# எட்டிப் பார்த்தால் என்ன தகவல் கிடைக்குமோ அது எல்லாம் கிடைக்குமே. 

& இந்த பலூன் டெக்னாலஜி என்ன என்று எனக்குப் பிடிபடவில்லை. பலூன் வழியாக பார்த்தால் எல்லாம் கலங்களாக அல்லவா தெரியும்? மேலும் பலூனை, டிரோன் போல இயக்க இயலுமா? 

3. அண்டை நாடுகள் ஸ்ரீலங்கா, மற்றும் பாகிஸ்தான் பொருளாதார நெருக்கடியில் தவிக்கின்றனவே. இது கர்மவினை என்று கொள்ளலாமா? 

#  சிறிய நாடுகளில் ஊழலின் தீமை விரைவில் வெளிப்பட்டு விட்டது.  இது கூட கர்ம வினைதான்.  நம் ஊழல் இப்போதுதான் உச்சத்தை நோக்கி விரைகிறது. விளைவுகள் விரைவில் வெளிவந்து நம் சாயமும் வெளுத்துப் போகலாம். அற்பப் பதவிகளில் உள்ள அரசியல் புள்ளிகள் அச்சம் இன்றி நூற்றுக் கணக்கான கோடிகளை குவித்திருப்பதைப் பார்த்தால் ஃப்ரெஞ்ச் புரட்சி மாதிரி ஒன்று இங்கும் நிகழ்ந்து விடுமோ என்னும் அச்சம் தோன்றவில்லையா ?

4. உங்களுக்கு வருமான வரி கணக்கீட்டில் புதிய முறை (கிழிவுகள் இல்லாதது) லாபமா, அல்லது பழைய முறை லாபமா? அப்படி உங்களது வருமானத்தையும் கண்டு பிடிக்கலாம் அல்லவா? 

# எனக்கு கிட்டத் தட்ட இரண்டுமே ஒன்றுதான்.  என் வருமானம் எவ்வளவு என்று தெரிந்திருக்க வாய்ப்பில்லயே  ! 

& என்னுடைய வருமான வரி எல்லாமே TDS (Tax deducted at source) மூலமாகத்தான் அரசுக்கு செல்கிறது. நான் எதையும் கணக்கிடுவது இல்லை அல்லது திரும்பக் கொடுக்கவேண்டும் என்று கேட்பதும் இல்லை. 

5. பங்குச்சந்தையில் பணத்தை இழந்தது உண்டா? நான் கொஞ்சம் கையைச் சுட்டுக்கொண்டது உண்டு. 

# பங்குச் சந்தையில் 5% பேர் மட்டுமே லாபம் பார்க்கிறார்களாம்.

& முன்பு இழந்தது அதிகம். அந்த அனுபவங்கள் மூலம் பாடம் கற்றுக்கொண்டு, இந்த ஆண்டில்தான் பங்குச் சந்தையில் லாபம் பார்க்க ஆரம்பித்துள்ளேன். சில சோதனை ஓட்டங்கள் நடந்துகொண்டு இருக்கின்றன. இன்னமும் கற்றுக்கொள்ள வேண்டியவை நிறைய இருக்கின்றன. பார்ப்போம். 

6. மக்கள் வாழ்க்கைத்தரம் வளர்ச்சி அடைய அடைய கழிவுகளும் அதிகம் உண்டாகின்றன. கழிவுகள் இல்லாத வளர்ச்சி உண்டா? எப்படி?

# ஒரு 70 ஆண்டு முன் வரை கழிவுகள் அதிகம் பிரச்சனை ஏற்படுத்தாத  வளர்ச்சி இருந்திருக்கிறது. காரணம் குறைந்த உற்பத்தி, குறைந்த கழிவு. இப்போது நிலையே வேறு. விகிதம் எக்குத் தப்பாக ஆகாத வரை, வளர்ச்சியும் கழிவும் நிர்வகிக்கக் கூடியவையாக இருக்கும். 

நெல்லைத்தமிழன் : 

இவர் செத்தார், மக்கள் அதிர்ச்சி,  அரசின் இந்த அறிவிப்பைக் கண்டு மக்கள் உற்சாகம், இந்த நடிகை மறைந்தார்  திரையுலகத்தினர் சோகம் என்றெல்லாம் எழுதறாங்களே. இப்படி எப்படி கூசாம பொய் சொல்லமுடிகிறது இந்தப் பத்திரிகைகளால்?

# வாணிஜெயராம் மறைந்த போது, "சோகம்" வெளிப்பட்ட மாதிரி இதெல்லாம் ஒரு சடங்கு. இப்படியெல்லாம் பதிவிடுவது சம்பிரதாயம். பக்கம் நிரப்ப packing straw.

= = = = = 

கேள்வி பதில் பகுதியை கொஞ்சம் வித்தியாசமாக கொண்டு செல்லலாம் என்று யோசித்தோம். 'எங்கள் Blog ஆசிரியர்கள் மற்றும் வாசகர்கள்' என்னும் வாட்ஸ் அப் குழுவில் இருக்கும் உறுப்பினர்கள் சிலருக்கு வெவ்வேறு கேள்வி அனுப்பி அவர்கள் சொல்லும் பதிலை இங்கே பகிர்வது என்று ஒரு யோசனை கிடைத்தது. 

அதன் படி அவ்வப்போது கேள்வி கேட்டு, பதில் பெற்று, இங்கே ஒவ்வொரு வாரமும் வெளியிட உள்ளோம். 

படித்துப் பார்த்து உங்கள் கருத்துகளைப் பதியுங்கள். 

= = = = 

எங்கள் கேள்வி : 

' கோலம் அரிசி ' என்று அமேசான் பக்கத்தில் பார்த்தபோது, கோலம் போடுவதற்கு வேண்டிய கோலமாவு தயாரிக்கும் அரிசி என்று நினைத்திருந்தேன். அப்படி இல்லையா?

இந்தக் கேள்வியை, 'நெல்லைத்தமிழன்' அவர்களுக்கு அனுப்பினோம். 

அவருடைய பதில் : 

நல்லவேளை மைசூர்பாக் என்பது மைசூரில் கிடைக்கும் பாக்கு என்று சின்ன வயதில் நினைத்திருந்தேன் என்று சொல்லாமலிருந்தீர்களே. என் நண்பன் ராஜேந்திரன், Blood sugarரினால் 25 வயதிலிருந்தே, இன்ஸுலின் எடுத்துக்கொண்டிருந்தான். டயபடிக்ஸினால், காரில்கூட அவன் சாக்லேட் வைத்திருப்பான். அவன் பிற்பாடு கோலம் அரிசி மாத்திரமே உபயோகித்தான். அவனிடம் காரணம் கேட்டதற்கு, அது டயபடீஸுக்கும் மற்றும் அதனால் கிட்னி பிரச்சனை வராமலிருக்கவும் உபயோகம் என்றான். பஹ்ரைனுக்கு அவன் (கடைசியாக) வந்திருந்தபோது என் வீட்டில் அவனுக்கு சமையல் செய்தேன். அவன் சொன்ன நேரத்திற்கு பதினைந்து நிமிடங்கள் முன்பு வந்துவிட்டான். அவனிடம் சிறிது நேரம் காத்திருந்தால் வெண்டைக்காய் கறி செய்துவிடுவேன். மற்ற எல்லாமே தயார் என்றேன். அதற்கு அவன், வெண்டைக்காயில் பொட்டாஷியம் அதிகம். அதுவும் தன் உடலுக்கு நல்லதில்லை என்பதால் அதனை விட்டுவிட்டதாகக் கூறினான். அவன் எப்போது கோலம் அரிசி உபயோகிக்கிறேன் என்று சொன்னானோ அப்போதிலிருந்து நானும் அதனையே வாங்கி உபயோகிக்கத் தொடங்கினேன். (நிறைய எழுதவேண்டியிருக்கிறது.... ஆனால் ஒரு கேள்விதானப்பா கேட்டேன்...அதுக்கே இவ்வளவா என்ற குரல் எனக்குக் கேட்பதால் நிறுத்திக்கொள்கிறேன்)

நான் பஹ்ரைன் சென்றதிலிருந்து மேங்கோ பிராண்ட் பாஸ்மதி அரிசி (பாகிஸ்தான்) மாத்திரம்தான் உபயோகித்துக்கொண்டிருந்தேன். காரணம் சல்லிசான விலையில், அதாவது 40 ரூ கிலோ, விலையில் பாஸ்மதி கிடைத்ததுதான். பிறகு எங்கள் கம்பெனி டிஸ்டிரிபியூட் செய்துகொண்டிருந்த இந்திய பாஸ்மதி அரிசியை (டில்டா) விலை அதிகமென்றாலும் அவ்வப்போது வாங்குவேன். பிறகு பாஸ்மதி அரிசி உடல் நலத்துக்கு நல்லதில்லை என்று பலரும் சொன்னதால் தஞ்சை பொன்னி அரிசி அல்லது சோனா மசூரிக்கு மாறிவிட்டேன்.  இந்தியா வந்த பிறகு சோனா மசூரி, கோலம் அரிசி என்று வாங்கிக்கொண்டிருந்தேன். இப்போ பையனுக்கு ப்ரௌன் அரிசி (தீட்டாத சோனா மசூரி), எனக்கு கோலம் அரிசி, சோனா மசூரி புழுங்கலரிசி, இராஜமுந்திரி அரிசி என்று சொல்லப்படும் அரிசி போன்றவற்றை வாங்குகிறேன். நாங்கள் அதிக அரிசி நுகர்வதில்லை என்பதால், விலையைப் பற்றி ரொம்பவே அலட்டிக்கொள்வதில்லை. இப்போது கைக்குத்தல் அரிசி ட்ரை பண்ணலாமா என்று தோன்றுகிறது. பையன் ப்ரௌன் அரிசி தவிர வேறு சாப்பிடுவதில்லை.  எல்லாப் பயலுவளும் டயட் என்று இருப்பதாலும், மனைவி எப்போதுமே எல்லாவற்றையும் சிறிது சிறிது அளவே சாப்பிடுவதாலும் வாங்கும் பழங்கள் போன்றவற்றை நானே சாப்பிட்டு என் எடை அதிகரிக்கின்றது.

எங்கள் கேள்வி : 

சிவராத்திரி கொண்டாட்டங்களுக்கு சமீப காலமாக அதிக அளவு விளம்பரங்கள், ஆரவாரங்கள் உள்ளனவே இது பற்றி உங்கள் கருத்து என்ன?

இந்தக் கேள்வியை திருமதி கீதா சாம்பசிவம் அவர்களுக்கு அனுப்பினோம். 

அவருடைய பதில் : 

சிவராத்திரி மட்டுமல்ல எல்லாமே இக்காலகட்டத்தில் விளம்பரங்களும் ஆடம்பரமும் நிறைந்தே காணப்படுகின்றன. இதற்குக் காரணம் சொல்லுவது கஷ்டம் தான். பக்திக்குக் கூட விளம்பரமும் ஆடம்பரமும் இல்லாமல் செய்ய முடியலை. ஒரு சிலர் சொல்லும் காரணம் இந்துக்கள் ஒற்றுமை இல்லை என்பதே! மற்ற மதங்களில் இருப்பது போல் ஒருமித்த சிந்தனையோ, அல்லது ஒன்றாய்க் கூடிக் கொண்டாடுவதோ நம்மிடம் இல்லை என்பது உண்மைதான். ஏனெனில் நமக்கு இறைவனைக் கும்பிட்டே ஆகவேண்டும் என்ற கட்டாயம் இல்லை. முடிஞ்சால் வணங்கலாம். இல்லைனா வணங்காமலும் இருக்கலாம். அதுக்காக இறைவன் தண்டிப்பது என்பதெல்லாம் இல்லை. ஆனால் மற்ற மதத்தவர்கள் கட்டாயமாய் அவங்க கோயிலுக்குப் போவது இறைவனை வணங்குவதுனு வைச்சிருக்காங்க. இப்படி இருக்கையில் இளைஞர்களையும் இறை நம்பிக்கை இல்லாதவர்களையும் இறை சக்தியின் பால் இழுக்க வேண்டி இப்படியான ஆடம்பரக் கொண்டாட்டங்கள், விளம்பரங்கள் உதவுகின்றன. அனைவரையும் ஒருங்கிணைத்து இறைவன் நெருங்கக் கூடியவனே! நம்மில் ஒருவனே! என இளைஞர் சமுதாயத்துக்கு எடுத்துக் காட்டவெனவும் ஏற்பட்டிருக்கலாம். எல்லோரும் ஒன்றாகக் கூடி இறைவனை வணங்கும்போது ஏற்படும் நல்ல அதிர்வலைகள் மனதைத் தூய்மைப் படுத்தும் சக்தி கொண்டது.   பொதுவாக சந்நியாசிகளும், அகோரிகளும், கடுமையான சிவ பக்தி கொண்ட சாமியார்களும் வணங்கி வந்த இறைவனை சகலருக்கும் இணக்கமானவனாக மாற்றியது இதன் மூலம் கிடைத்த வெற்றி எனலாம்.

எங்கள் கேள்வி : 

சமீபத்தில் நீங்கள் பார்த்த / படித்த / கேள்விப்பட்ட வித்தியாசமான செய்தி எது?

இந்தக் கேள்வியை திரு அப்பாதுரை அவர்களுக்கு அனுப்பினோம். 

அவர் அனுப்பிய பதில் :

திருநாள் திருடன்

தினம் நிறைய செய்திகள் வாசிக்கிறேன்.. பார்க்கிறேன்.. கேள்விப்படுகிறேன். சில சப்பையானவை (பீகாரில் வெள்ளம் சென்னை வெயில் உக்கிரம் வகை) சில வித்தியாசமானவை (மோடி தமிழ் பேசி பாரதியை மேற்கோள் காட்டினார் வகை - ஹிஹி). அந்த வகையில் வித்தியாசமென்று தோன்றியது இது.  

ஈஸ்டர் திருநாளின் அடையாளம் எதுவென்றால் சாக்லெட் முட்டை என்று பெரும்பாலோர் சொல்வர் (நவராத்திரியின் அடையாளம் சுண்டல் என்கிற மாதிரி).

அந்த அடையாளத்தை அழித்து விட்டால்? பூனை கண்ணை மூடினாற் போல் என்றாலும் பூனையைப் பொறுத்த மட்டில் உலகம் இருளும் தானே? 

இங்கிலாந்தின் டெல்பர்ட் நகரத்தில் ஜோபி என்பவர் அந்த ஊர் கடைகளுக்கு வர வேண்டிய அத்தனை ஈஸ்டர் சாக்லெட் முட்டைகளையும் வழிப்பறி செய்து திருடிப் பதுக்கிவிட்டார். ஈஸ்டர் கொண்டாட்டத்தை நிறுத்திவிடும் எண்ணத்தில். 

கிட்டத்தட்ட இரண்டு லட்சம் சாக்லெட் முட்டைகளை அபேஸ் பண்ணிக் கொண்டு ஊரை விட்டு ஓடுகையில் பிடிபட்டார்.  

ஐம்பதாயிரம் பவுண்ட் அபராதம் கட்டி ஒரு வாரம் சிறை சென்றார்.

திருட்டு முட்டைகள் சேர வேண்டிய கடை விவரம் தெரியாததால் இரண்டு லட்சம் சாக்லெட் முட்டைகளை போலீசார் அந்த ஊர் சுற்றுவட்டார வீட்டுப் பிள்ளைகளுக்கு வாரி வழங்கினர்.

திருநாளைத் திருட முடியுமா என்று உள்ளூர் பாதிரிகள் எல்லாம் வல்லவரைத் துதிக்க, 'Eggstravagant' என்றார் உள்ளூர் பள்ளிக்கூட முதல்வர்.

இது போன வாரச் செய்தி.

(எனக்கென்னவோ இதில் உள்ளூர் பல் வைத்தியர்கள் உடந்தை என்று தோன்றுகிறது)

அடுத்த வாரம் மீண்டும் சந்திப்போம்.