"விளையாட வேற ஆள் கிடைக்கலையா?"

இன்னும் மூன்றாவது சம்பவம் பாக்கி இல்லையா...  வாருங்கள்..

வாருங்கள்..  அப்படியே வெளியில் செல்லலாம்!  வெளியில்தான் அரங்கேறியது அது.

மகனுக்கு லீவு கிடைக்காததால் 'லேட் லாகின்' என்று சொல்லி வைத்து, பதினோரு மணிக்கு விழா அரங்கிலிருந்து கிளம்பி விட்டான்.

ஏப்ரலின் இறுதி வார வெய்யில் மண்டபத்தில் சுழலும் மின்விசிறிகளை மீறி அனலாகத் தகித்தது.  ஏ ஸி க்கள் பலவீனமாக வேலை செய்து கொண்டிருந்தன.  அவ்வளவு பெரிய மண்டபத்தில் அதன் பாச்சா அப்படி ஒன்றும் பலித்ததாக தெரியவில்லை.  ஆங்காங்கே திறந்திருக்கும் கதவுகளை மீறி அதுதான் என்ன செய்யும், பாவம்...

மகனை வழியனுப்ப அவனுடன் கார் வரை வந்தேன்.  காருக்குள்ளும் தகித்துக் கொண்டிருந்தது.  அவன் கிளம்பி தெருமுனை சென்று மறையும் வரை பார்த்துக் கொண்டிருந்து விட்டு எதிர் வரிசையில் இருந்த மெடிக்கல் ஷாப் போக சாலையைக் கடக்க நின்றேன்.  ரோஸுவாஸ்ட், மெட்ஃபார்மின், லிபிகார்ட் வாங்க வேண்டும்..  நேற்றோடு தீர்ந்து விட்டது!

இரண்டு ஆட்டோக்கள் எதிரெதிராய் வழிமறித்தாற் போல நின்று பேரம் பேசிக் கொண்டிருந்தனர்.

அவர்கள் பேசிக் கொண்டிருந்தது எழுபது வயது மதிக்கத்தக்க ஒரு பெண்ணிடம்.  அவரைப் பார்க்கும்போதே ஏழ்மை தெரிந்தது.  தாங்க முடியாத வெயில் காரணமாகவும், தள்ளாமை காரணமாகவும் சக்திக்கு மீறி ஆட்டோவை நாடி இருக்கிறார் என்பது புரிந்தது.

"பக்கம்தானேப்பா...  இதோ அந்த ரோடு திரும்பி ரெண்டாவது தெரு..."

"மினிமம் நூறு ரூவாக்கு குறைஞ்சு ஏத்தறதில்ல...  உனக்காக வேணும்னா எழுபது ரூவா...  வர்ரியா சொல்லு"

எதிர்பக்கமாய்ப் பார்த்து நின்ற ஆட்டோக்காரர் இவரை 'இங்க வாங்க' என்று அழைக்க, முதலிலிருந்து பெண்மணியுடன் பேசிக் கொண்டிருந்தவர் "இட்டுனு போ...  யார் வேணாம்னா?  நாப்பது ரூவா தருமாம் மாமி..." என்றார்.

"நாப்பதா?  இங்கணயே ஏத்தி, ஒரு ரவுண்டு அடிச்சு இறக்கி வுடு நைனா...  பாவம் ஆட்டோக்கு ஆசைப் படுது..." 

பைக்குள் கைவிட்டு ரூபாயை எடுத்தபடி அவர்களை நெருங்கிய சமயம் - 

பெரிதாக சிரித்தபடி இரண்டு ஆட்டோக்களும் எதிரெதிர் திசையில் நகர, மூன்றாவதாய் ஒரு ஆட்டோக்காரர் வந்து "ஏறும்மா." என்றார்.  மாமி தயங்க, "அட, உங்க கையில இருக்கறதைக் கொடுங்கம்மா...  வெய்யில் எல்லோருக்கும்தான்..  எல்லோருக்கும் வயசாகும்" என்றதும் அதில் ஏறிக்கொண்டார் அந்தப் பெண்மணி.  சொல்லாமல் இருக்க முடியவில்லை.  அவர் தலையில் குல்லா வைத்த ஒரு முஸ்லீம்.

நான் மெடிக்கல் ஷாப்பை அடைந்தேன்.  எனக்குத் தேவையான இரண்டு மாத்திரைகளை வாங்கி கொண்டு வெளியே வந்து சாலையைக் கடந்து மண்டபத்துக்குச் செல்ல முயன்றேன்.  கடக்க முடியாமல் வண்டிகள் இங்குமங்கும் பறக்க, என்னை நெருங்கினார் ஒரு ஆட்டோக்காரர்...  

"எங்க சார் போகணும்?  வாங்க..."

அந்தப் பெண்மணியை கிண்டல் அடித்த ஆட்டோக்காரர்.  அவரைப் பார்ப்பதையே தவிர்த்தேன். புறக்கணித்து கடந்து செல்ல முயன்றபோது மறுபடியும் ஆட்டோவை வழிமறித்து நிறுத்தினார் அவர்.  

"ஸார்..  எங்கே போகணும்?"

"வீட்டுக்கு"  என் புத்தி தலை தூக்கியது.  நானாக நாடிச் செல்லவில்லை.

"வாங்க... போகலாம்.  எந்த ஏரியா?"

சொன்னேன்.  "எவ்ளோ தருவீங்க?"

"நீங்களே சொல்லுங்க.."

வெயிலின் மயக்கத்தைத் தோற்கடித்தது அவர் கேட்ட தொகை.  மீறி நடக்க முயற்சிப்பது போல நடந்தேன்.

"எவ்ளோ தருவீங்க?"  சொன்னேன்.

"அதுக்கு டூ வீலர் கூட வரமாட்டான்...   சைக்கிள்காரன்தான் வரணும்.." என்றவர், கொஞ்சம் தொகையைக் குறைத்துச் சொல்லி "வாரீங்களா?" என்றார்.

கொஞ்சம் யோசிப்பது போல நின்றேன்.  "ஆனா அதுக்கு முன்னாடி இன்னொரு இடம் போகணும்"

ஆர்வமானார்.  "எங்கே?"

"ஒரு கல்யாண மண்டபம்.."

"எங்கே இருக்கு..  ஏறுங்க..."

எதிரே கைகாட்டினேன்.  ஏமாற்றம் அவர் முகத்தில் தெரிந்தாலும், எரிச்சலை மறைத்துக் கொண்டு, சரி எப்போ கிளம்புவீங்க?"

கொஞ்சம் கவலையை முகத்தில் காட்டி "Function முடிந்துதான்" என்றேன்.

"ஒன் அவர் ஆகுமா..  டூ அவர்னாலும் இங்கேயே காத்திருக்கேன்"

"இல்லை.  நாளை மாலைதான் முடியும்"

"என்ன..  நக்கல் பண்றீங்களா?  விளையாட வேற ஆள் கிடைக்கலையா?"

"நானா கூப்பிட்டேன்?  விலகிப்போனாலும் நீங்கதானே வந்து தொந்தரவு பண்ணீங்க?  நாற்பது ரூபாய் கேட்ட  அந்த வயசான அம்மா கிட்ட  நீங்க பேசினதை விடவா?"

விலகி திருப்தியாக மண்டபத்துக்குள் வந்து விட்டேன்!

=================================================================================================================

​பக்கிம் சந்திரன் 1882ல் ஆனந்த மடம் என்னும் பெயரில் வங்கமொழியிலே நாவல் ஒன்றை படைத்தார்.  இது 1772 முதல் 1775 வரை வங்காளத்தில் நடைபெற்ற சன்யாசிகள் கலகத்தை அடிப்படையாகக் கொண்டு எழுதப்பட்டது.  வங்காளியர் இடையில் ஒருமைப்பாட்டையும் உரிமையுணர்வையும் ஏற்படுத்தும் வகையில் பக்கிம் சந்திரர் இந்த நாவலை படைத்தார்.  இதிலே வங்க மாதாவை கலகக்கார சன்னியாசிகள் வழிபடும் பாவனையில் 'வந்தே மாதரம்' என்னும் தலைப்பில் பாடல் ஒன்றையும் சேர்த்து வைத்தார்.

 தமிழகமும் தனது பங்குக்கு ஒருமைப்பாட்டு இலக்கியங்களை வழங்கியது.  நிலமற்ற உழுவோருக்கும் நிலம் படைத்த உழுவிப் போருக்கும் இடையிலான வர்க்கப் போராட்டத்தை உருவகப்படுத்திக் காட்டும் வகையில் பௌராணிகரான கோபாலகிருஷ்ண பாரதியார் 'நந்தனார் சரித்திர கீர்த்தனை' என்னும் நாடக இலக்கியத்தை படைத்ததும் இந்த காலத்தில்தான். 

திருத்தொண்டர் புராணத்தில் சேக்கிழார் படைத்த நந்தனார் புராணத்தில் அந்தண மிராசுதாரர் பாத்திரம் இல்லை.  அதிலே வரும் நந்தன் ஏர் பிடித்து உழும் உழவனும் அல்ல. சிவ பக்தனான நந்தனாரை மட்டும் சேக்கிழாரிடமிருந்து பெற்றுக் கொண்டு புதிய நந்தனார் கதையை கோபாலகிருஷ்ண பாரதியார் படைத்தருளினார். 

வங்கத்தில் பக்கிம் சந்திரன் 'ஆனந்தமடம்' நாவலை படைத்து தந்த அதே நேரத்தில் 'பிரதாப முதலியார் சரித்திரம்' என்னும் நவீன நாவல் ஒன்றை மாயூரம் நீதிபதி வேதநாயகனார் தமிழிலே படைத்துள்ளனர்.  இந்த நாவலிலே ஆங்கில மொழியின் ஆதிக்கத்தை எதிர்க்கும் உரையாடல்களை சேர்த்தார்.  இது தமிழுரிமைக் கிளர்ச்சிக்கு அடிகோலிய முதல் நூலாகும்.   சர்வ சமய சமரச கீர்த்தனைகள் என்னும் பெயரில் தேசிய ஒருமைப்பாட்டு பாடல்களையும் வேதநாயகனார் இயற்றி தந்தார். வள்ளல் பெருமானின் வருணாசிரமம் எதிர்ப்பு வறுமை எதிர்ப்பு மத எதிர்ப்பு கருத்துக்களைக் கொண்ட ஆறாம் திருமுறை பாடல் தொகுப்பு 1885 இல் தான் வெளியிடப்பட்டது.

- விடுதலைப் போரில் தமிழகம்' என்ற நூலில் ம பொ சி. -

========================================================================================

இணையத்தில் ரசித்தது ..

===========================================================================================

நியூஸ் ரூம்  

இப்போது தக்காளி விற்கும் விலை தெரியும்தானே? தக்காளி விற்றே ஒரு மாதத்தில் ஒரு விவசாயி கோடீஸ்வரர் ஆகியிருக்கிறார்.  சம்பவம் நடந்திருப்பது புனேயில்!

அம்பது நூறு தொலைச்சாலே எப்படி பதறிப்போவோம்?  எப்படித் தேடுவோம்?  நூறுகோடி பெறுமான  நிலக்கரி இரண்டு வருடங்களாய்க் காணோமாம்..  கவலை இல்லாமல் இலவச திட்டங்களில் மூழ்கி கம்முனு இருக்கிறது அரசு...

ஒரு கேமிரா ஆர்வலர் காஸ்ட்லி லென்ஸ் வாங்க ஆசைப்பட்டு ரூபாய் 90,000 அனுப்பினால் அமேசான் அவருக்கு சீமைத்தினை அனுப்பி மகிழ்ந்திருக்கிறது...

டெல்லிக்காரராம் அவர்!

பூமி சூடாகிக்கொண்டே வருகிறது..  மனித கைங்கர்யம்!  பூமியின் சூடான பத்து நகரங்கள் எவை தெரியுமா?

அமெரிக்கா, ஜப்பான், இத்தாலி என்று எல்லா நாடுகளிலும் வெப்பம் அதிகரித்துக் கொண்டிருக்கிறது.  இன்னும் அதிகமாகும் என்று உலக வானிலை மையம் எச்சரிக்கை விடுத்துள்ளது.  ஆனால் இதை 18 ஆம் நூற்றாண்டிலேயே கண்டித்திருக்கிறார் ஒரு பெண் விஞ்ஞானி.   அவருக்கு கூகுள் மரியாதை செய்திருக்கிறது.

=========================================================================================================

கீழ்க்காணும் கவிதையை நான் ஃபேஸ்புக்கில் பகிர்ந்தபோது கலைமகள் ஆசிரியர் "அழகிய ஹைக்கூ ஐ ஸே.." என்று பாராட்டி இருந்தார்!

வாடியதால்

வாசம் தொலைத்த

மலரொன்று

விழுந்து கிடக்கிறது

வற்றிய குளத்தில்

ஏற்கெனவே

விழுந்து கிடந்த

மஞ்சள் இலைகள்

காற்றில் நகர்ந்து

ஆதுரத்துடன்

அணைத்து மூடுகின்றன

மலரை                                                  SEP  19 2014 

===========================================================================================================

பொக்கிஷம் :   ஜோக்ஸ்...