சிங்கப்பூர் மாமா !

 

பானுமதி வெங்கடேஸ்வரன் : 

செல்ஃபோன், மூக்கு கண்ணாடி இந்த இரண்டில் அடிக்கடி எங்கேயாவது வைத்துவிட்டு தேடும் பொருள் எது?

# இரண்டுமேதான். என்றாலும் கண்ணாடி செல் போன் அளவு காணாமல் போவதில்லை.

$ Phone ஐ க்கூப்பிடலாம் . கண்ணாடி செவிடு!

& கண்ணாடி அணிவதில்லை. செல்போன் எப்பொழுதுமே சட்டைப்பையில் இருக்கும். தூங்கும்போது + சார்ஜ் செய்யும்போது கட்டிலில் பக்கத்தில் இருக்கும். எப்பொழுதாவது, வேறு இடங்களில் வைக்க நேரிட்டாலும், டி வி அருகில் அல்லது லேப்டாப் அருகில் இருக்கும். போனைத் தேடுகின்ற சந்தர்ப்பங்கள் மிக மிக அரிது. 

= = = = = = =

எங்கள் கேள்விகள் : 

1) மாமியார் & மருமகள் - இருவரில் யாருக்கு டி வி சீரியல்கள் பார்ப்பதில் ஆர்வம் அதிகம்? 

2) டி வி சீரியல்களால் விளையும் நன்மைகள் என்னென்ன? 

3) Lending Library உறுப்பினராக இருந்தது உண்டா? அங்கேயிருந்து என்ன வகை புத்தகங்கள் எடுத்துப் படித்திருக்கிறீர்கள்? 

4) உங்களை மிகவும் கவர்ந்த மரம் எது? ஏன்? 

= = = = = = = = =

KGG பக்கம் :

ஸ்ரீநிவாசன் வீட்டுக்குச் செல்லவேண்டிய அந்த நந்நாளும் வந்தது. அது ஒரு சனிக்கிழமை மாலை நேரம். என்  வீட்டிலிருந்து அவனுடைய வீட்டுக்குச் செல்ல வழி கேட்டு வைத்துக்கொண்டேன். 

ஸ்ரீநிவாசன் வீட்டுக்குப் புறப்படுவதற்கு முன்பு என் அண்ணனுடன் ஏதோ சிறிய சண்டை. சண்டை முடிவில், வழக்கம் போல அவன் ஜெயித்துவிட்டான். அந்தக் கோபத்தில், மனதுக்குள் ' போ உனக்கும் சேர்த்து காமிரா, சினிமா ஸ்லைடு எல்லாம் ஸ்ரீனி மாமாவிடம் வாங்கிக்கொண்டு வந்து உனக்குக் கொடுக்கலாம் என்று இருந்தேன். உனக்கு எதுவும் கொடுக்கமாட்டேன் - வெவ்வெவ்வே' என்று நினைத்தவாறு கிளம்பினேன். 

அவனுடைய வீட்டை தேடிக் கண்டுபிடித்ததும் முதல் அதிர்ச்சி. மிக மிக சாதாரணமான ஒரு சிறிய வாடகை வீடு. 

வாசலில் தனி ஆளாக பாண்டி ஆடிக்கொண்டிருந்த ஒரு சிறுமியிடம், " ஸ்ரீநிவாசன் வீடு .. " என்று ஆரம்பித்தவுடன், அவள் உள்ளே பார்த்து, " டேய் சீனி உன்னை தேடிக்கிட்டு யாரோ ஒரு பையன் வந்திருக்கான் " என்று சொல்லிவிட்டு தன்னுடைய சோலோ ஆட்டத்தைத் தொடர்ந்தாள். 

வெளியே வந்த அரை டிராயர் ஸ்ரீநிவாசன், " அடேடே! நீயா? திண்ணையில உட்காரு. இதோ வந்துடறேன்" என்று சொல்லிவிட்டு, தன்னுடைய தங்கையிடம், " யேய் லல்லி - உள்ளே போய் விளையாடுடீ "  என்றான். 

அவள் அதற்கு, " நீ போடா - சொஜ்ஜி பகடவா " என்றாள். தொடர்ந்து பாண்டி ஆடிக்கொண்டிருந்தாள். (பகடவா என்றால் அவளுடைய பாஷையில் பக்கோடா என்று பிறகு தெரிந்துகொண்டேன். ) 

ஸ்ரீனி உள்ளே சென்று சட்டை ஒன்றை மாட்டிக்கொண்டு வந்தான். 

என்னிடம், " வா என்னோடு. என்னுடைய மாமாவைப் பார்க்கப் போகலாம்" என்றான்.. 

என் மனது சொல்லியது : ' அதானே பார்த்தேன் - சிங்கப்பூர் மாமாவெல்லாம் இந்த மாதிரி சாதாரண வீட்டில் தங்குவார்களா - பெரிய வீடு அல்லது ஹோட்டலில் அல்லவா தங்குவார்கள்! ' 

அவனுடன் ஆசையாக கிளம்பி சென்றேன். 

அவன் என்னை அழைத்துக்கொண்டு நாகை நாணயக்காரத் தெருவின் மத்தியில் அமைந்திருந்த, 'நள பீம விலாஸ்' என்ற சிறு காபி கிளப்புக்கு உள்ளே சென்றான். 

உள்ளேயிருந்து வந்த அரை வேட்டி + துண்டு அணிந்த  ஒருவர், " வாடா சீனி - இது யாருடா - உன்னுடைய ஃப்ரெண்டா ? " என்று கேட்டார். 

" ஆமாம் மாமா - இவன் என்னுடைய ஃப்ரெண்ட் - பெயர் கௌதமன் " என்றான். 

மாமா ? 

அடப்பாவி - இவர்தான் சிங்கப்பூர் மாமாவா ? இடிந்துபோனேன். 

அவர் ஒரு சிறிய தட்டில் கொஞ்சம் பகடவா(!) கொண்டு வந்து எனக்குக் கொடுத்தார். அல்வா இல்லை - அதைத்தான் ஸ்ரீநிவாசன் எனக்கு கிலோ கிலோவாகக் கொடுத்துவிட்டானே ! 

பிறகு ஸ்ரீநிவாசனிடமிருந்து நான் தெரிந்துக்கொண்ட விஷயங்கள் : 

ஸ்ரீநிவாசனின் அப்பா சில வருடங்கள் முன்பு இறந்துபோய்விட்டார். 

ஸ்ரீநிவாசனின் தாய் மாமாவும், சித்தப்பாவும் சேர்ந்து இந்த சிறிய நளபீம விலாஸ் ஹோட்டல் நடத்தி வருகிறார்கள். ஸ்ரீநிவாசன், அவனுடைய தங்கை, அவனுடைய அம்மா, அம்மாவின் தம்பி குடும்பம், ஸ்ரீநிவாசனின் சித்தப்பா குடும்பம் எல்லோரும் ஒன்றாக ஒரே வீட்டில் வாழ்கிறார்கள். 

அவர்கள் வீட்டை விட்டுக் கிளம்பும் முன்பு  ஸ்ரீநிவாசனிடம் கேட்டேன் - " என்னை ஏண்டா என்னென்னவோ பொய்கள் எல்லாம் சொல்லி ஏமாற்றினாய்? " 

" நான் சொன்னது எல்லாமே டூப்தான்டா  - எல்லாத்தையும் உண்மை என்று நம்பிட்டியா ? " 

" ஏண்டா இவ்வளவு டூப் அடிச்சே? " 

" அதுவா - எங்கள் தெரு நண்பர்களுக்குள் ஒரு போட்டி. யாரு அதிகம் பொய் சொல்லி மற்றவர்களை ஏமாற்றுகிறார்கள் என்று. அதில் நீ வந்து வகையாக மாட்டிக்கொண்டுவிட்டாய் " 

ஸ்ரீநிவாசன் கதைகள் முடிந்தது. 

அடுத்து சிங்காரவேலு! 

= = = = = = =

அப்பாதுரை பக்கம் : 

உயர்ந்த மனிதன். 

ஒரு விஷயம் தெரியுமா? உயரமான ஆண்கள் பிறரை விட அதிகமாக சம்பாதிக்கிறார்கள், பிறரை விட அழகான பெண்களை மணக்கிறார்கள், அதிகம் படிக்கிறார்கள், அதிக மகிழ்ச்சியுடன் வாழ்ந்தத்  திருப்தியில் மண்டையைப் போடுகிறார்கள்.  இந்த விவரங்களை அமெரிக்க சேப்மன் பல்கலை ஆய்வில் கண்டறிந்திருக்கிறார்கள். (அமெரிக்காவில் உருப்படியாக ஏதாவது ஆய்வு செய்கிறார்களா என்று யாராவது ஒரு ஆய்வு செய்ய வேண்டும்).

சேப்மன் ஆய்வைப் படித்ததாலா இல்லை தானாகவே கண்டுபிடித்தாரா தெரியவில்லை, அலெக்ஸ் தன் உயரக்குறைவினால் நொந்து போயிருந்தார். தான் ஐந்தடி ஏழங்குல உயரம் என்பதில் அவருக்கு மிக வருத்தம்.  அதைவிட பக்கத்து வீட்டுக்காரர் ஆறடி ரெண்டங்குலம் என்பதில் இன்னும் வருத்தம். 

இந்த வருத்தம் தீர அலெக்ஸ் என்னிடம் வந்திருக்கலாம். என்னை விட அரையடி  உயர்ந்தவர் என்ற திருப்தி தந்த முனைப்பில் உலக சாதனைகள் பல புரிந்திருக்கலாம். ஆனால் அவர் என்னிடம் வரவில்லை. உலக சாதனைகள் பல புரியப்படாமலே கிடக்கின்றன.  அலெக்ஸ் யாரிடம் சென்றார்? டாக்டர் மகபூபியனிடம்.

யாரிந்த மகபூபியன்?  சிகிச்சை வழியாக உயர்ந்த மனிதர்களை உருவாக்கும் மருத்துவர். அதாவது நூறாயிரம் டாலரும் ஐந்தடி உயரமும் கொண்டு அவரிடம் சென்றால், கையில் ஒரு டாலரும் இல்லாமல் பிடுங்கிக் கொண்டு ஐந்தரை அடி உயரத்தோடு திருப்பி அனுப்பும்  மருத்துவர்.

உயரம் கூட்டும் சிகிச்சையில் என்ன செய்வார்கள் என்பதை வரிசைப்படுத்தி எழுதுக என்ற கேள்விக்கு டாக்டர் மகபூபியன் இப்படி பதில் அளிக்கக்கூடும்:

1. முதலில் சிகிச்சை மேஜையில் படுக்க வைப்பார்கள். (க்க்கும்).  

2. இரண்டு கால்களிலும் தொடை எலும்பை கணிசமாக வெட்டி எடுப்பார்கள். 

3. வெட்டி எடுத்த பகுதியில் ஸ்டீல் அல்லது பைபரினால் ஆன நீளக்கூடிய உருளைகளைப் பொறுத்துவார்கள்.

4. தினம் கொஞ்சம் கொஞ்சமாக ரிமோட் கன்ட்ரோல் வழியாக உருளைகளை நீட்டுவார்கள்

5. உயிர் போகிற வலி, வலிக்கான மருந்துடன் ஆறு வாரம் கிடக்க வைப்பார்கள். 

6. ஆறு வாரங்களில் உருளைகளைச் சுற்றி எலும்பும் சதையும் வளர்ந்து விட்டதை சரிபார்ப்பர்கள்

7. நாலு வாரங்களுக்கு தினம் எழுந்து நடக்கும் பயிற்சி தருவார்கள்

8. நடக்க முடிந்ததும் 'போய்வா உயர்ந்த மனிதா!' என்று விரட்டுவார்கள்

9. மூன்று மாதங்களுக்குப் பிறகு ஒரு வார மீள் சிகிச்சைக்கு வரச் சொல்வார்கள்

10. முதல் நாள் உருளைகளை சிகிச்சை வழியாக உருவியெடுப்பார்கள்

11. ஆறாம் நாள் காயம் ஆறிவிட்டதா என்று பார்ப்பார்கள்

12. ஏழாம் நாள் காயம் ஆறினாலும் ஆறாவிட்டாலும் டிஸ்சார்ஜ் செய்து அனுப்பி விடுவார்கள்.

சிகிச்சை முடிந்து ஒரு வருடமான நிறைவில் அலெக்ஸ்  நிறைய பேட்டி தருகிறார். மகபூபியனுக்கும் மகத்தான வருமானம். நூறாயிரம் டாலர் செலவழித்த திருப்தியில் அலெக்ஸ் பெருமிதத்துடன் உயர்ந்து நிற்கிறார். 

வால்: 

பின் தொண்ணூறுகளில் ஆண்களின் தலை வழுக்கை ஒரு வியாபாரத் தளமாக தொடங்கி முப்பது வருடங்களில் பல பிலியன் டாலர் வருமானத்துக்கு விரிந்திருக்கிறது. தொப்பை குறைப்பு சிகிச்சை ஏனோ அவ்வளவு வேகமாக விரிவடையவில்லை. இப்போது உயரக் கூட்டல் சிகிச்சை.   இந்த வருடம் மட்டும் அமெரிக்காவில் ஐம்பது மிலியன் டாலருக்கு உயரக் கூட்டு சிகிச்சைகள் நடக்குமாம். பெண்களைப் போல் உடலழகு மேம்பாட்டில் ஆண்களுக்கு ஆர்வமில்லை எனறு யார் சொன்னது?

= = = = = = =