உங்கள் மனதிற்குப் பிடித்த, நீங்கள் செய்ய விரும்பும் பத்து விஷயங்கள் எவையெவை?

 

கீதா சாம்பசிவம் : 

ஆளையே கவிழ்க்கும் அளவுக்குச் சிலர் தப்புச் செய்தாலும் அவங்களை ஏன் யாருமே கண்டுகொள்ளுவதில்லை? சின்னத் தப்புச் செய்தவர் அதிலும் பல சமயங்கள் அறியாமல் செய்தவர்களைத் தண்டிப்பது ஏன்?

& அதுதான் அரசியல் என்று ஆகிவிட்டது. வாக்காளர்களிடம் பெரிய மாற்றம் நிகழ்ந்தால் ஒழிய, இதெல்லாம் மாற வாய்ப்பு இல்லை. 

இப்போதெல்லாம் தினம் யாராவது கணவன், மனைவியையோ மனைவி கணவனையோ கொன்று விட்டதாகவே செய்தி வருகிறது. அதிலும் பல சமயங்கள் ஜோடியாகக் கணவன், மனைவியைக் கொல்கின்றனர். இதற்கெல்லாம் அடிப்படைக் காரணம் என்ன?

& கொலையும் செய்வாள் பத்தினி; கழுத்தையும் நெரிப்பான் கணவன்! என்னைக் கேட்டால் எல்லாம் டீ வி சீரியல்களால் மற்றும் சினிமாவினால் ஏற்படும் விபரீதங்கள். 

மது போதையில் காவல்துறையினரை மிரட்டிய இளைஞர்கள் தான் இந்நாட்டின் எதிர்காலம் என நினைக்கையில் மனதே கொதித்துப் போகிறதே! இந்நிலைக்கு யார் காரணம்? அதுவும் இப்போதுள்ள அரசின் ஆட்சியில் தான் இவை அதிகம் நடைபெறுகின்றன. ஏன்? தமிழகம் மாறவே மாறாதா?

# இப்போது உள்ள அரசு என்று முடிக்கிறீர்கள். சீர்கேடு யார் ஆட்சி செய்கிறார் என்பதைப் பொறுத்து வருவதல்ல.  அதற்கு பல்வேறு காரணங்கள் உள்ளன. 

மேலும் குற்றங்கள் பற்றி செய்திகள் அதிகம் நம் கண்ணில் படுவதும் இந்த மன உளைச்சலுக்கு காரணம் ஆகிறது. 

இதெல்லாம் மாறுமா என்பது -- எல்லாமே மாறும்.  எப்போது யாரை முன்வைத்து என்பது நமக்குத் தெரியாது.

பானுமதி வெங்கடேஸ்வரன் : 

சாலட் போன்றவை சுவையாக இருந்தாலும், பசி அடங்கினாலும் வயிறு நிறைந்த உணர்வு வர மாட்டேனன்கிறதே..?

# வயிறு நிரம்பிவிட்ட உணர்வு வரவேண்டுமானால் மாவுசத்து உட்கொள்ள வேண்டும். இது பழக்கம் காரணமாக மட்டும் இல்லை.  அறிவியல் விளக்கம் என்கிறார்கள்.

& சாலட் போன்றவை ருசிக்காக சாப்பிடப்படுபவை; பசிக்காக  அல்ல ! 

உங்கள் மனதிற்குப் பிடித்த, நீங்கள் செய்ய விரும்பும் பத்து விஷயங்கள் எவையெவை?

# பத்து ரொம்ப அதிகமோ என்று தோன்றுகிறது.  என்றாலும் முயற்சிக்கிறேன்.

1. படிப்பது

2. பதிவு எழுதுவது

3. இசை கேட்பது

4. கீ போர்டில் பாட்டு வாசிக்க முயல்வது.

5. ஆன்மீக சொற்பொழிவு கேட்பது.

6. நகைச்சுவை அல்லது துப்பறியும்  திரைப்படம் பார்ப்பது. 

7. வடமொழி மந்திரங்கள் சொல்லப் பயிற்சி செய்வது

8. சிறு தீனி / நொறுக்குத் தீனி சாப்பிடுவது

9.கணக்கு, பொது அறிவுப் புதிர்கள் விடை தேடுவது

10.குடும்பத்தினர் அல்லது நண்பர்களுடன் அரட்டை. 

11. 56 என்று பெயர் கொண்ட சீட்டாட்டம்.  (இப்போது ஆட்கள் இன்றி நின்று போய் இருக்கிறது.)

12. நடைப் பயிற்சி.

13. படம் பிடிப்பது.  (மலர்கள் குழந்தைகள், இயற்கைக் காட்சி, அழகிகள்.. விருப்பமான "பொருள்" .

14. பயணம்

15. கோயில், சிற்பம் இவற்றை கூர்ந்து கவனித்துப் பார்ப்பது.

16. புது நண்பர்களை அறிமுகம் செய்து கொள்ளுதல். 

17. உறவுகள் கூடும் குடும்ப விழாக்களில் ஆஜர் ஆவது. 

18. தர்க்கம் செய்வது.

& கடந்த காலங்களை நினைவுக்குக் கொண்டுவராமல், இன்றைய நிலையில் என்  மனதுக்குப் பிடித்த, நான் செய்ய விரும்பும் விஷயங்கள் என்று யோசித்தால் .. 

1) படம் வரைவது. - குறிப்பாக எங்கள் Blog கதைகளுக்கு.  

2) புதன் கிழமை பதிவுக்கு என் அந்தக் கால அனுபவங்களை எழுதுவது 

3) நகைச்சுவை படங்கள் பார்ப்பது, நகைச்சுவை பதிவுகள், கதைகள் படிப்பது. 

4) ஸ்வீட் சாப்பிடுவது. (இதை இப்போது எழுதும்போது கூட வாயில் பனங்கல்கண்டு கரைந்துகொண்டு உள்ளது!) 

5) மழையை ரசிப்பது. 

6) தினமும் இல்லை என்றாலும் எப்போதாவது காலையில் மட்டும், கிடைக்கும் நல்ல பில்டர் காபி. 

7) குட்டிப் பேரனுடன் விளையாடுவது. 

8) டீ வி யில் 20 ஓவர் கிரிக்கெட் பார்ப்பது. 

9) வாழைப்பூ வடைகறி & கொத்தவரங்காய் / பீன்ஸ் பருப்புசிலி 

10) அடை. + வெண்ணெய் அல்லது வெல்லம். 

நெல்லைத்தமிழன்: 

பொதுவா வாலிப மற்றும் தெம்பு இருக்கும் வயதில் புறச் சின்னங்களை அணியாமல், வயது ஆகும்போது புறச் சின்னங்களோடு பக்தியும் அந்த மார்கத்தை நாடும் ஆர்வமும் வருவதன் காரணம் என்ன?

# புறச் சின்னங்களைப் பொறுத்தவரை, கவலை, பயம், முன்னேற்பாடு / பாதுகாப்பு மட்டுமே.. மற்றபடி, முதிர்ச்சியில் விவேகம் புரிந்து கொள்ள வேண்டிய ஒன்று.

கவனம் உடல், மூளை இவற்றிலிருந்து மனதை நோக்கித்  திரும்புவது முதிர்ச்சி கனிவு இவற்றின் அடையாளம்.

= = = = = =

KGG பக்கம் : 

ஸ்ரீநிவாசன் 'கதை' 

ஆறாம் வகுப்பு - நீதி போதனை பீரியட் நடந்துகொண்டிருந்தபோது, ஆசிரியரைக் காண யாரோ ஒருவர் வந்தார். அவர் கையில்  ஒரு சிறிய பெட்டி. அதை ஆசிரியரிடம் கொடுத்துவிட்டு சென்றார். முதல் பெஞ்சு மாணவர்களாகிய எங்களுக்கு அந்தப் பெட்டியில் என்ன இருக்கின்றது என்பதைக் காண பேராவல் வந்தது. 

ஆசிரியர் எங்களுக்கு ஏதோ சில கேள்விகள் கொடுத்து விடைகள் எழுதும்படி சொல்லிவிட்டு அந்தப் பெட்டியைத் திறந்தார். 

அவைகள் சினிமா தியேட்டர்களில் இடைவேளை முடிந்ததும் படம் ஆரம்பிக்கும் முன்பு காட்டப்படும் விளம்பர ஸ்லைடுகள். 4 inch சதுர வடிவில் கண்ணாடியில் எழுதப்பட்ட விளம்பர வாசகங்கள். 

அதைக் கண்டதும் என்னுடைய ஆச்சரியம் பன்மடங்கு ஆகியது. அந்தக் காலத்தில் சினிமா பிலிம், சினிமா ஸ்லைடு, சினிமா போஸ்டர் என்று சினிமா சம்பந்தப்பட்டவை எல்லாமே என்னை சுண்டி இழுத்த விஷயங்கள். நான் அந்த ஸ்லைடுகளை ஆர்வத்துடன் பார்ப்பதை கவனித்த ஸ்ரீனி என்னிடம், " இந்த மாதிரி ஸ்லைடு என் வீட்டில் நிறைய இருக்கிறது " என்றான். 

எனக்கு ஆச்சரியம் அதிகமானது. " அப்படியா ! எவ்வளவு இருக்கிறது? யார் கொடுத்தார்கள்? "

" அது இருக்கும் நூறு, நூற்றைம்பது! எல்லாம் என்னுடைய மாமா சிங்கப்பூரிலிருந்து அனுப்பியது"

" உன்னுடைய மாமா சிங்கப்பூரில் இருக்கிறாரா ! இன்னும் என்னவெல்லாம் அனுப்புவார்? "

" எனக்கும் என்னுடைய தங்கைக்கும் நிறைய டிரஸ், சாக்லேட், காமிரா எல்லாம் அனுப்பியிருக்கிறார். " 

" எவ்வளவு காமிரா வெச்சிருக்கே? "

" சிறுசும் பெருசுமாக நாலைந்து காமிரா இருக்கு " 

" டேய் - எனக்கு இரண்டு காமிரா (எனக்கு ஒன்று, என் அண்ணனுக்கு ஒன்று என்று கணக்குப் போட்டேன்) கொஞ்சம் ஸ்லைடு எல்லாம் கொடுடா !" 

" நாளைக்குக் கொண்டுவந்து தருகிறேன்" 

மறுநாள் - ஆவலோடு காத்திருந்த என்னிடம், " அடடா - மறந்துபோய்விட்டேன் - நாளை நிச்சயம் கொண்டுவருகின்றேன்" 

இப்படி ஒவ்வொரு நாளும் ஒவ்வொரு சால்ஜாப்பு சொன்னான். 

பீரோவிலிருந்து எடுக்கப் போனபோது என் சித்தப்பா வந்துவிட்டார். 

ஸ்கூலுக்கு நேரமாகிவிட்டதால் அவசரமாகக் கிளம்பி வந்துவிட்டேன். 

ஹோம் வொர்க் எழுதி முடித்த அவசரத்தில், இதை மறந்தே போனேன். 

ஒருநாள் அவன், " அடுத்த வாரம் - ஒரு வாரம் லீவுல என்னுடைய மாமா சிங்கப்பூரிலிருந்து வரப்போகிறார். உனக்கும் சேர்த்து எல்லாவற்றையும் வாங்கி வரச் சொல்லி லெட்டர் போட்டிருக்கேன். அவர் கொண்டுவந்ததும் நீயே என் வீட்டிற்கு வந்து அவைகளை வாங்கிக்கொள். பள்ளிக்கூடத்திற்கு அவைகளைக் கொண்டுவந்தால் மத்த பசங்க என்னிடமிருந்து எடுத்துக்கொண்டுவிடுவார்கள் " என்றான். 

ஆஹா - சில நாட்களுக்கு கற்பனைக் கனவுகளில் வெள்ளை சட்டை, வெள்ளை டிராயர் அணிந்து வெண்மேகக் கூட்டங்களில் மிதந்து சஞ்சாரம் செய்தேன் ! 

(தொடரும்) 

= = = = =

அப்பாதுரை பக்கம் : 

மனங்கவர் மாந்தர்

சமீபமாக என்னைக் கவர்ந்தவர்களில் மஸ்க் முன்னணியில் இருக்கிறார். பத்திலிருந்து இருபது வயது வரையிலான உலக மக்கள் நடுவே,  யேசுவை விட மஸ்க் பற்றி அறிந்தவர்கள் அதிகம் என்று சதர்ன் கலிபோர்னியா பல்கலை சர்வே ஒன்று தெரிவிக்கிறது. சகப பட்டமளிப்பு விழாவில் கணக்கிட்டு ஐந்து நிமிடங்கள் பேசிய மஸ்க் மாணவர்களுக்கு வலியுறுத்திய நான்கு பழக்கங்களில் ஒன்றைக் கடைபிடிக்கத் தொடங்கியிருக்கிறேன். (யுட்யூபில் பார்க்கலாம்).  

மஸ்க் பற்றி நான் கவனித்த சில:

- முறையான பொறியியல் கல்வி பயிலாமல் கார், விண்வெளி, பாதாளம், கடல், நுகர்பொருள், மென்பொருள், எண்ணை என்று எதையும் விடாமல் ஒரு கை பார்க்கிறார். 

- 2008 வாக்கில் சவடால் என்று இவர் சொன்னதை அலட்சியம் செய்தவர்கள் 2018 வாக்கில் இவரை தீர்க்கதரிசி என்றனர். ரஷியாவிடம் இருந்த உபயோகமற்ற ICBM வாங்கி, குறைந்த செலவில் செயற்கைக்கோள் பறக்கவிடும் முயற்சியில் அவமானப்பட்டு தோல்வியடைந்து அதுவே ஒரு வித்தாகி அவர் தொடங்கிய spacex நிறுவனம் இன்று மகத்தாக விரிவடைந்து செவ்வாயில் குடியிருப்பு என்கிற அளவில் நிற்பது உதாரணம். 

- அவருடைய disruptive thinking அடிக்கடி வியக்க வைக்கிறது. 2012 வாக்கில் மனித மூளையில் துணியளவு பருமனான நரம்பு கடத்திகளை வைத்து மனித-கணிப்பொறி தொடர்பை அசலாக்க முடியும் என்றார். இதைக் கேட்ட எம்ஐடி விஞ்ஞானிகள் பத்து நிமிடங்களுக்குக் குறையாமல் வீரப்பா-ரஜினிகாந்த கலந்த சிரிப்பாய்ச் சிரித்தார்கள்.  2018ல் இதற்காக ஒரு கம்பெனி தொடங்கி நரம்பு கடத்தித் துணி (?) மட்டுமல்ல அதை மூளையில் தைக்கும் கருவியையும் (உஷா தையல் மிஷின்?) கொண்டு வந்து, அமெரிக்க அரசாங்க அனுமதியுடன் நரம்பு செயலிழந்த பத்து பேருக்கு சிகிச்சை வழங்கும் அளவுக்கு வந்துவிட்டார். எம்ஐடி விஞ்ஞானிகள் என்ன செய்கிறார்கள் தெரியவில்லை. ஊசிப்போன மசால்வடை சாப்பிட்டுக் கொண்டிருக்கலாம். 

 - பாதாள போக்குவரத்து பற்றிய அவருடைய எண்ணங்கள் பிரமிக்க வைக்கின்றன. பாபோ எனக்கு மிகவும் பிடித்த துறை. இதில் அதிகம் படிக்கவோ வேலை செய்யவோ முடியாமல் போனது ஒரு வருத்தம்.  மஸ்காக இருந்தால் வருத்தம் போக ஏதாவது துணிச்சலாகச் செய்திருப்பார். அப்பாதுரையாக இருந்ததால் வருத்தம் போக அதிகம் படிக்கப்படாத ஒரு கதை எழுதி அடி வாங்காமல் தப்பித்தேன். இந்தியாவில் மிகப்பெரிய அளவில் சாதிக்கப் போவதாகச் சொல்லும் மஸ்க் (தூபம் சமர்பிப்பது மோடி, ஜெய்சங்கர்) அந்த சாதனைக்கு நாடு தழுவிய பாதாள போக்குவரத்தைத் தேர்ந்தெடுப்பார் என்று நினைக்கிறேன். ஆசைப்படுகிறேன்.  

 - அவருடைய செவ்வாய் குடியேற்றத் திட்டம் ஒரு பொறி. இது புரியாமல் அவர் திட்டத்தை அக்கு ஆணி என்று புரட்டி மிதித்து துப்பியவர்கள்,  இன்றைக்கு விண்வெளியில் ஆக்கிரமிப்பு தொடங்கும் ஏதுவில் அவர் கம்பெனி முன் வரிசை கட்டி நிற்கிறார்கள். இந்தியாவுடன் ஒத்துழைக்கப் போவதாக அவர் சொல்லியிருப்பதை வரவேற்கிறேன்.  (சைனாவுக்கு பயந்து அத்தனை நாடுகளும் இந்தியாவுடனான ஒத்துழைப்பை ரகசியமாக விரும்புகின்றன என்று நம்புகிறேன்).

வால்: 

BA (economics) படித்த என் நண்பர்களை திடீரென்று நிறைய மதிக்கிறேன். Economics படிக்கப் போகும் இந்திய இளைய சமுதாயத்திலிருந்து பதினைந்து மஸ்க் வெளிவர பிரார்த்தனை செய்கிறேன். 

அனுமார் வால்:

"இந்தப் பக்கத்துல எழுத ஒரு வரையோ வரம்போ உண்டா" என்று kgg அவர்களிடம் கேட்டபோது "என்ன வேணா எழுதுங்க" என்றார். 'நானா படிக்கப் போகிறேன்?' என்று அவர் கேட்காதது சுவாரசியம். செய்திகள் பற்றி எழுதினால் போரடிக்கிறது சில நேரம்.  அவசரமாக ஏதாவது எழுதினால் கண்டுபிடித்து விடுகிறார்கள். சாயம் வெளுத்துவிடுகிறது (ஜெயகுமார் அவர்களின் துல்லியம் ஒரு ஆச்சரியம்). ஆன்மிகம் பற்றி என் எண்ணங்களை எழுதத் தூண்டியவர் முரளி, இன்னும் வரும் (பா வெ அவர்கள் கவனிக்கவும்). 

 செல்போன் பற்றிய வாட்ஸப் பரிமாற்றத்தினிடை என்னைக் கவர்ந்த மனிதர்கள் பற்றி எழுத வித்திட்டவர் ஶ்ரீராம் (பிடிக்காதவர்கள் அவருக்கு காரபோளி பார்சல் அனுப்பவும். வேண்டாம் ப்லீஸ். எனக்குக் கொடுத்து விடுவார்).

= = = = = = =