வானார்ந்த பொதியின்மிசை ...

 எச்சரிக்கை :  நான் ஏற்கெனவே ஃபேஸ்புக்கில் படித்து விட்டேன் என்று சொல்பவர்களுக்கு  :  அங்கு படித்ததன் கூட வேறு சில பகுதிகளும் இங்கு சேர்க்கப்பட்டிருக்கின்றன!

மேலே ஏறி உள்ளே செல்கையில் அந்தக் காட்சி என்னை நிறுத்தியது.  இலவச புத்தகங்களா?  ஆ..

ஆனால் அருகில் சென்றதும் போத்தீஸில் பர்ச்சேஸ் செய்த பில் வேண்டும் என்று போட்டிருப்பதைப் படித்ததும் விளங்கியது.

சமீப காலத்தில் போத்தீஸ் பக்கம் சென்றதில்லை.  அன்று க்ரோம்பேட் போத்தீஸ் செல்ல வேண்டிய சந்தர்ப்பம் ஏற்பட்டது.  அப்போதுதான் இதைப் பார்த்தேன்.  எல்லா கிளைகளிலும் இப்படி புத்தக ஆஃபர் வைத்திருக்கிறார்களா என்று தெரியவில்லை.  

உண்மையிலேயே பிரம்மாண்டமாய் கட்டி வைத்திருக்கிறார்கள்.  வழக்கம் போல ஒவ்வொரு மாடியிலும் ஒவ்வொரு ரகம் என்று வைத்து, ஒவ்வொரு மாடிக்கு செல்ல நான்கு பக்கமும் ட்ரான்ஸ்பரண்ட் கண்ணாடியாலான மின்தூக்கி, மற்றும்  உங்கள் முழு உருவம் தெரியும் கண்ணாடிக்கு அருகே ஏறும்படி எஸ்கலேட்டர் வைத்திருக்கிறார்கள்.  ஒவ்வொரு மாடியிலும் ஏராள கலெக்ஷன் என்பது மட்டுமல்லாமல் ஆர்ப்பாட்டமான அலங்காரம் செய்திருக்கிறார்கள்.  மக்கள் அனைவரும் ஜவுளி வாங்குகிறார்களோ இல்லையோ, செல்ஃபோன் கேமிராவை ஆன் செய்தே அலைகிறார்கள்! நம்மை நாம் முழுவதும் பார்க்கும் பெரிய கண்ணாடிகள் ஒரு அட்ராக்ஷன்.

உள்ளேயே நாம் பொருள் வாங்கிய பில்லை காட்டினால் ஒவ்வொரு மூலையிலும் அமர்ந்திருக்கும் பெண்மணி கையில் மெஹந்தி வைத்து விடுகிறார்.

காசிருந்தால் என்ன வேண்டுமானாலும் செய்யலாம்!  நான் அந்தக் கடைக்கு செல்வதற்கு முதல் நாள்தான் 2,000 ரூபாய் நோட்டு செயலிழந்திருந்தது.  இருக்கும் நேரத்தில் அதைக் கொடுத்துச் செலவழிக்க மக்கள் கிளம்பி  சாரி சாரியாய் வந்து விட்டார்கள் போல...  நல்ல கூட்டம்.  யார் சொன்னார்கள், இந்தியா ஏழை நாடு என்று!

புடைவை செக்ஷனில் கைக்குட்டை போல மடித்து வைத்திருக்கும் புடைவையை எதையாவது கைகாட்டினால் அதை எடுத்து விசிறி மடிப்பு பிரிப்பது போல சர்ரென்று விசிறி ஒரு முழு புடைவையாக காட்டுகிறார்கள்.

GRT உட்பட நிறைய கடைகளில் இத்தனை ரூபாய்க்கு மேல் வாங்கினால் பரிசு என்று சொல்லி சின்னச்சின்ன குண்டு சட்டிகள் கொடுப்பார்கள்! அதுவும் நீங்கள் கூகுள் பே செய்தால்தான்! இவர்கள் காசை எப்படி கொடுத்திருந்தாலும் பில் சரிபார்த்து டோக்கன் வழங்கி புத்தகங்கள் கொடுக்கிறார்கள்.

நீங்கள் வாங்கும் மதிப்புக்கு தக்கவாறு A1 முதல் E வரிசை வரை...  வெளியே வரும்போது உங்கள் பில்களை சரிபார்த்துவிட்டு இந்த வரிசையில் ஏதாவது ஒன்று அச்சிட்ட டோக்கனை கையில் கொடுத்து விட்டால் நீங்கள் அங்கே போய் அந்த வரிசையில் இருக்கும் உங்களுக்குத் பிடித்த ஒரு புத்தகம் தெரிவு செய்து கொள்ளலாம்.  எனக்கு D2 வந்தது. 

என்ன நீங்கள் விரும்பும் புத்தகங்கள் வாங்க முடியாது.  அங்கிருப்பவவற்றில் பார்த்து தெரிவு செய்து கொள்ள வேண்டியதுதான்.  முன்னரே வந்து மற்ற நல்ல புத்தகங்களை லாவிக் கொண்டு சென்று விட்டார்களா என்றும் தெரியவில்லை.  அதாவது நான் அந்த D2 வரிசையில் இருப்பவற்றில் மட்டும்தான் செலெக்ட் செய்யலாம்.  நிறைய உதவாத புத்தகங்கள்தான் கண்ணில் பட்டன என்றாலும் நல்ல முயற்சி.  

நான் என்ன புத்தகம் தெரிவு செய்திருப்பேன்?.

படத்தில் வலது கோடியில் ஒரு கறுப்புப்பெண் நிற்கிறார் அல்லவா,  அவர் உள்நாடா, வெளிநாடா தெரியவில்லை.  அவர் தலையில் கிரீடம் போல ஒரு வளையம் வைத்திருக்கிறார் பாருங்கள்..  அதை வாங்க அவர் சுமார் ஒரு மணிநேரம் எடுத்துக் கொண்டார்.

பாஸ் உறவினர்களுடன் அவர்கள் விசேஷத்துக்கு புடைவைகள் எடுக்க வந்திருந்தார்.  நானும் கூட வந்திருந்தேன். 

இவர்கள் புடைவை வாங்கும்போது அங்கு ஓரமாய் உட்கார்ந்து வேடிக்கை பார்த்துக் கொண்டிருந்தபோது இந்தப் பெண் ஒரு கோடியிலிருந்து ஒவ்வொரு வளையமாக எடுத்துக் கொண்டு இந்தக் கோடிக்கு வந்து - இங்குதான் முழு உயர கண்ணாடி இருந்தது - தலையில் வைத்து அழகு பார்த்து சென்றார்.  கடையில் உள்ளவர்களும் அவரை வேடிக்கை பார்க்க, அவர் கவலைப் படாமல் அவர்களை பார்த்து ஒவ்வொரு முறையும் களுக்கென்று ஒரு சிரிப்பு சிரித்தபடி தன் வேலையில் மும்முரமாக இருந்தார்.  அப்புறம் அவரை இங்குதான் பார்த்தேன்.  எப்போது எடுத்தாரோ...

வாசலில் அட்டையால் செய்த சில பொருட்களை விற்றுக் கொண்டிருந்த சுமார் பத்து வயதுச் சிறுவன், நடுநடுவே ஓய்வெடுக்கும்போது அங்கு வந்து விளையாடிக் கொண்டிருக்கும் தன்னொத்த குழந்தைகளை பார்த்தபடி இருந்தது வருத்தமாக இருந்தது.  வாழ்க்கையின் விளையாட்டு.  சற்றே நிழலில் அமர்ந்திருந்த அந்த ஏழைத்தாய் மகனை விற்பனைக்குச் செல்ல சத்தம் கொடுத்துக் கொண்டே இன்னும் சில அட்டைகள் தயாரிப்பதில் ஈடுபட்டிருந்தார்.  அவர் மடியில் சில மாத வயதுடைய குழந்தை ஒன்று..  அப்பன் எந்த டாஸ்மாக்கில் கிடக்கிறானோ...

காரை எடுத்து வந்து தரும் நபருக்கு கொடுக்கும் பத்து ரூபாயை இந்தப் பையனுக்கு கொடுக்கலாம் என்று பார்த்தால்.  பையன் வாங்க மறுத்து விட்டான்.  தாயைப் பார்த்தால் அவரும் 'வேண்டாங்க' என்று மறுத்து விட்டார்.  ஏழ்மையில் நேர்மை.  உழைப்பின் மேன்மை.

வாலெட் பார்க்கிங்கில் காரைக் கொடுத்து விட்டு வேலை முடிந்து வந்து ஹைடிராலிக்சில் அது வரிசையில் வந்து இறங்கும் வரை காத்திருப்பது ஒரு Bore.

சரி, இப்போது நான் தெரிவு செய்த புத்தகம் இது..  உங்களில் ஒருவன் என்று ஒரு புத்தகம் இருந்தது.  அதை எடுக்கப் பிடிக்கவில்லை.  கல்கி, ஜெயகாந்தன் என்னிடம் ஏற்கெனவே இருக்கின்றன.  எனவே இதை செலெக்ட் செய்தேன்.

இதை வாங்கி கொண்டு கிளம்பும்போது அவர்களாக அழைத்துக் கொடுத்தது..

இதில் தலாய்லாமாவும் என்னிடம் ஏற்கெனவே இருக்கிறது.  அதற்கு பதில் அவர்கள் வேறு எதுவும் தரமாட்டேன் என்று சொல்லி விட்டார்கள்!

================================================================================================

ராமலக்ஷ்மி அவர்களின் 'முத்துச்சரம்' பக்கத்தில் வெளியிட்ட ஒரு கருத்துரையே கவிதையாய் இந்த வாரம்....

சில எதிர்பார்ப்புகள் 

ஏமாற்றமேற்படுத்தலாம்.

சில நிதர்சனங்கள் 

சலிப்பேற்படுத்தலாம் 

அந்த நிமிட அற்புத உணர்வோடு 

அப்பால் நகர்ந்துவிட்டால் 

நினைவுகளாவது 

சாசுவதமான இருக்கும் 

இனிமையாய் 

================================================================================================

நடிகர் திலகம் சிவாஜி கணேசனை 1967 ம் ஆண்டு பொம்மை சினிமா இதழுக்காக, அன்றைய முன்னணி நாயகி ஜெயலலிதா ஒரு நேர்காணல் செய்துள்ளார். ஒரு தேர்ந்த பத்திரிகையாளரைப் போல ஜெயலலிதா எழுப்பிய கேள்விகளுக்கு, தனக்கே உரிய பாணியில் பதிலளித்துள்ளார் நடிகர் திலகம்.

சுவாரஸ்யமான அந்தப் பேட்டி...

ஜெயலலிதா: உங்க பெயருக்கு முன்னாலே சிவா‌ஜின்னு ஒரு பட்டம் சேர்ந்திருக்கிறதே, அது எப்படி வந்தது?

சிவா‌ஜி: அதுதான் ஊர் அறிஞ்சதாச்சே.

ஜெயலலிதா: எனக்குத் தெ‌ரியாதே. அதனாலே...

சிவா‌ஜி: அப்போ ச‌ரி. சொல்லிட வேண்டியதுதான். ஏழாவது சுயம‌ரியாதை மகாநாட்லே சத்ரபதி சிவா‌ஜி நாடகம் நடந்தது. பெ‌ரியார் அவர்கள் மகாநாட்டுக்கு தலைமை வகிச்சாங்க. நாடகத்திலே சிவா‌ஜியாக நடிச்ச என்னைப் பார்த்து பாராட்டிவிட்டு, சிவா‌ஜிங்கிற பட்டத்தையும் கொடுத்தாங்க. அன்னேலேர்ந்து சிவா‌ஜி கணேசனாயிட்டேன்.

ஜெயலலிதா: லைலா - ம‌ஜ்னு, ரோமியோ - ஜுலியட் போன்ற இலக்கியங்கள்ளே வரும் காதலர்களைப் பற்றி படிச்சிருப்பீங்க. அந்த மாதியான காதலருங்க இருந்திருப்பாங்கன்னு நீங்க நினைக்கறீங்களா?

சிவா‌ஜி: காதலிச்சா அந்த மாதி‌ரி காதலிக்கணும் என்கிறதுக்காகத்தான் எழுதியிருக்காங்க. கொஞ்ச நாள் காதலிச்சிட்டு, கைவிட்டுட்டுப் போகக் கூடாது. காதல் என்பது கடைசிவரைக்கும், உயிர் போனா கூட இருக்கணும்னு சொல்றதுக்காகதான் இது. நாடகமும், சினிமாவும், இந்த மாதி‌ரி கதைகளும் வெறுமே படிச்சிட்டு விடறதுக்காக இல்லே.

ஜெயலலிதா: அம்மாதி‌ரியான காதலர்களை இப்போதுள்ள உலகத்திலே காண முடியும்னு நம்பறீங்களா?

சிவா‌ஜி: நான் காதலிச்சது கிடையாது. இப்போ நீ தனி ஆள். இனிமேதான் நீ காதலிக்கப் போறே. நீதான் சொல்லணும்.

ஜெயலலிதா: வேறு வழியே கிடையாது என்ற நிலைக்கு வரும்போது, தற்கொலையைத் தவிர, வேறு நிலை இல்லை என்ற சூழ்நிலைக்கு வரும் போது ஒருவர் தற்கொலை செய்து கொள்றது பற்றி என்ன சொல்லுறீங்க?

சிவா‌ஜி: தற்கொலை கோழைத்தனம் மட்டும் இல்லே, அது பெ‌ரிய தவறும்பேன்.

ஜெயலலிதா: நான்தான் வேறு வழியே இல்லேன்னு சொல்லிட்டேனே. உதாரணமா ஒரு பெண் இருக்கா. அவ கணவனால் கைவிடப்பட்டு விடறா... அவளுக்கு படிப்பும் கிடையாது, என்ன செய்வாள்?

சிவா‌ஜி: பாத்திரம் தேய்க்கிறது, மூட்டைத் தூக்கறது, ஏதாவது நாணயமா வேலை செஞ்சு பிழைக்கிறது. வேலை இல்லாதவங்க, படிக்காதவங்க எல்லாரும் செத்தாப் போயிட்டாங்க?

ஜெயலலிதா: சின்ன வயசிலே நீங்க நாடக மேடையில் நடிக்க ஆரம்பிச்சீங்க-இல்லையா?அப்போ ஏதாவது நினைச்சதுண்டா.அதாவது எதிர்காலத்தை பற்றி.இப்படி ஒரு நடிகரா வருவோம்னு நினைச்சதுண்டா?

சிவாஜி: இப்படி ஒரு நடிகனாகிவிடுவேன்னு கனவுகூட கண்டதில்லை. நடிக்க வேண்டும்கிற ஒரே ஆர்வம் தான் என்னை மேடைக்கு துரத்திச்சு. தவிர, வருங்காலத்தைப் பற்றியோ,எதிர்காலத்தைப் பற்றியோ நினைக்க முடியாத நிலை. அப்போது அடுத்தவேளை சோத்துக்கே என்ன செய்யறது? எங்கே போறது என்ற நிலையில் எதிர்காலத்தைப் பற்றி நான் நினைக்கலே. அதுக்கு நேரமே கிடைக்கலேன்னு சொல்வேன்.

ஜெயலலிதா: தமிழ் படங்கள் இப்போ முன்னேறியிருப்பதா நினைக்கிறீங்களா?அல்லது தரம் குறைந்து விட்டதாக எண்ணுகிறீர்களா?

சிவாஜி: எல்லாத் துறையிலும் நிச்சயமாக முன்னேற்றம் அடைஞ்சிருக்கு. அதேசமயம் சில படங்கள் மக்களது ரசனையை குறைச்சிடும் போலிருக்கு. இந்த மாதிரிப் படங்கள் நூற்றுக்கு இருபத்தஞ்சு இருக்கும்.ஆக நாம் மேலே ஏறினால்,இந்தப் படங்கள் கொஞ்சம் நம்மை கிழே இழுத்து விட்டுடுது.

ஜெயலலிதா: எப்படி?

சிவா‌ஜி: இப்ப நீங்கள்ளாம் கால் சராய் போட்டு நடிக்க வந்துட்டதனாலேதான்.

ஜெயலலிதா: தயா‌ரிப்பாளர்கள் அப்படி போடச் சொல்றாங்களே.

சிவா‌ஜி: ஜனங்களோட வீக்னஸை தயா‌ரிப்பாளர்கள் பயன்படுத்திக்கிறாங்க. நீங்க இன்னும் கொஞ்சம் பிகு வாக இருக்கலாம்.

ஜெயலலிதா: பிகுவாக இருந்தால், நீங்க வேண்டாம்னு சொல்லிவிடுவீங்களே. புதுசா வரும் நடிகைங்க என்ன செய்வாங்க? எதிர்க்க முடியுமா?

சிவா‌ஜி: தப்பு. கால்சராய் போட மாட்டோம்னு சொன்னோம். வேண்டாம்னு தயா‌ரிப்பாளர் சொல்லிட்டாருன்னு வெளியே தெ‌ரிஞ்சா, தயா‌ரிப்பாளரைத்தான் திட்டுவாங்க.

ஜெயலலிதா: மிகுந்த திறமைசாலிகளுக்கும் சிலசமயம் அவங்க மேற்கொண்டு இருக்கும் தொழிலிலேயே சவாலாக சில விசயங்கள் முளைச்சிடும். அதுபோல சிறந்த நடிகரான உங்களுக்கே,சவாலா இருந்த வேஷம் எது?

சிவாஜி: நல்ல கேள்வி. கப்பலோட்டிய தமிழனாக நடிச்சேனே, அதுதான் உண்மையிலேயே எனக்கு சவாலாக இருந்த வேடம். ஏன்னா கப்பலோட்டிய அந்த பெருமகனாரை நேரில் பார்த்த பலர் இன்னைக்கும் நம்மோடயே இருந்துக்கிட்டிருக் காங்க. கதைக்குள்ள வரும் பாத்திரங்களை ஏற்று நடிப்பது சுலபமான காரியம். ஆனால் நமது வாழ்க்கையில் சந்தித்த, அதுவும் சமீப காலம் வரைக்கும் இருந்த ஒரு பெரிய மனிதரைப் போல நடிக்கிறோம் என்று சொல்றபோது, அந்த நடிப்பை எல்லோரும் ஏத்துக்கணும். அதிலே மாறுபாடு எழக்கூடாது. பெரியார் அவங்களைப் போல நடிக்கிறோம் என்றால், பாக்கிறவங்க 'பெரியாரைப் பார்ப்பதுபோலவே இருந்ததுன்னு சொல்லணும். அப்போதான் நடிப்பு பூரணத்துவம் பெறும். அந்த மாதிரியான ஒண்ணுதான் இந்தக் கப்பலோட்டிய தமிழன் வேஷம். இதில் நான் நடிச்சதைப் பார்த்துட்டு, அந்தப் பெரியவர் வ.உ.சி.யின் மகன் 'என் அப்பாவை நேரில் பார்த்ததுபோல இருந்தது' என்று சொன்னார். ஒரு வெற்றியாகத்தான் நான் இதைக் கருதுகிறேன்.

ஜெயலலிதா: சில நாவல்கள் படிக்கிறோம், கதைகளைக் கேட்கிறோம். ஆஹா!அந்த மாதிரி வேஷம் நமக்கு வரக் கூடாதா? கிடைக்காதா? என்று நினைக்கிறோம். அந்த மாதிரி நீங்க எதிர்பார்த்து நடிச்ச வேஷம் ஏதேனும் இருக்கா?

சிவாஜி: கட்டபொம்மன் வேஷம் அப்படிப்பட்டது. கட்டபொம்மன் கதையை தெருக்கூத்தா நான் பார்த்தேன். நான் வீட்டை விட்டு நாடகத்தில் போய்ச்சேர தூண்டுதலாக இருந்ததே இந்த கட்டபொம்மன் கதைதான்.

ஜெயலலிதா: இப்போ புதுசா ஒரு பிரச்சினை தலை தூக்கியிருக்கு.முத்தக் காட்சிகளை அனுமதிப்பதா இல்லையான்னு? நீங்க என்ன சொல்றீங்க?

சிவாஜி: சே..சே..வெட்கக்கேடு. முத்தம் கொடுக்கிறதை காட்டவே கூடாது. முத்தம் கொடுக்கிறது மாதிரி நடிக்கணும். மூடிக்காட்டுவதுதான் கலை. பச்சையா உள்ளதை அப்படியே காட்டினா அது கலையாகாது. அதனால் முத்தம் கொடுப்பதையெல்லாம் திரையிலே காட்டக்கூடாது என்பதுதான் என்னுடைய தாழ்மையான வேண்டுகோள்.

ஜெயலலிதா: உங்களுக்கு எவ்வளவோ விசிறிகள் இருக்காங்க.நீங்க யாருக்காவது விசிறியாக இருந்ததுண்டா?

சிவாஜி: ஓ!இப்பவும் நான் விசிறியாக இருக்கேன். பி.ஆர்.பந்துலு மேடையில் நடிச்சு வந்தபோது, நான் அவருடைய விசிறிகளில் ஒருவன். ஹிந்தி நடிகை நர்கீஸின் விசிறி நான். சார்லஸ் போயர் (Charles Boyer) ரசிகன் நான்.

ஜெயலலிதா: உங்களுக்கு லதாவின் பாட்டு என்றால் ரொம்பவும் பிடிக்கும் போலிருக்கே?

சிவாஜி: என் தங்கையாச்சே.. பிடிக்காம இருக்குமா. அது மட்டுமா? சமீபத்திலே நான் ஒரு நியூஸ் கேள்விபட்டேன். இண்டர்நேஷனல் லெவல்லே உலகம் பூராவும் ஒலிபரப்பப்படட பாடகர்களின் வரிசையில், லதாவின் பாட்டுக்கள் நாள் ஒன்றுக்கு இருபது மணிக்கும் மேலே ஒலிபரப்பாகுதுன்னு சொன்னாங்க. உலகிலேயே எந்தப் பாடகிக்கும் இல்லாத தனி கவுரவம் என் தங்கச்சிக்கு இருக்கு.

ஜெயலலிதா: நீங்க நாடகங்களிலே நடித்து வந்த காலத்தில் சினிமாவுக்கு அடிக்கடி போவதுண்டா?

சிவாஜி: அப்ப மட்டும் என்ன?இப்பவும்ந்தான். மெட்ராஸ் சிட்டியிலே நான் பார்க்காம படமே ஓடாது. நேத்து ராத்திரிகூட ஒரு குப்பை படத்துக்கு நான் போயிட்டு வந்தேன்.

ஜெயலலிதா: அந்த மாதிரியான நாளிலே நீங்க ரொம்ப விரும்பி பலமுறை பார்த்த படம் எது?

சிவாஜி: ருடால்ப் வாலண்டினோ நடித்த 'தி ஷீக்' என்ற படம்.

ஜெயலலிதா: ஒவ்வொருவருடைய வாழ்க்கையிலும் சில சம்பவங்கள் மறக்கமுடியாததாக அமைந்துவிடும். அந்த மாதிரி உங்க வாழ்க்கையிலே ஏதாவது நடந்திருக்கா?

சிவாஜி: எகிப்தின் தலைநகரான கெய்ரோவில் ஆசிய ஆப்பிரிக்க படவிழாவின் போது நடந்தது. அன்னிக்கு விழாவுக்கு வந்த படங்களின் ரிசல்ட் சொல்றாங்க. நான் பின்னாலே உட்கார்ந்திருந்தேன். அங்கிருந்தவங்க எல்லாம் என்னை ஏதோ டெக்னீசியனு நினைச்சிருந்தாங்க. அங்கே வந்திருந்தவங்களெல்லாம் பெரியவங்க, உயரத்திலும் ஏழடி. அங்கே பல பெரிய நாடுகளிலிருந்து பல கலைஞர்கள் கூடியிருந்தாங்க. நீதிபதிகள் எல்லோரும் வந்தாங்க. கட்டபொம்மன்தான் சிறந்த படம். கட்டபொம்மனா நடிச்ச நான்தான் சிறந்த நடிகன்னு சொன்னாங்க. என் பேரைச் சொல்லி கூப்பிட்டாங்க. நான் எழுந்து நின்னேன். வாழ்க்கையில் நான் எதற்கும் சாதாரணமா மசிஞ்சு கொடுக்காதவன். நடுக்காட்டில் புலி துரத்தி வந்தபோதுகூட அசையாமல் இருந்தவன். ஆனா அன்னிக்கு கெய்ரோவில் நடந்த அந்த சம்பவம் என்னை அசத்திட்டது. என் பக்கத்தில் உட்கார்ந்திருந்த பத்மினி என்னை தாங்கிப் பிடிச்சிட்டாங்க. இல்லாட்டி நான் நிச்சயம் விழுந்திருப்பேன். நான் என்னையே மறந்து உணர்ச்சி வசப்பட்டது அந்த ஒரு நாள்தான்.

நன்றி இணையம்.

=============================================================================================

இணையத்தில் ரசித்த படங்கள் இரண்டு..

==============================================================================================

நியூஸ் ரூம்

பானுமதி வெங்கடேஸ்வரன்

வெளிநாடு வாழ் இந்தியர்கள் அனுமதிக்கப்பட்ட அளவு தங்கத்தை விட அதிகமாக எடுத்து வந்து கோவிலுக்கு செல்வதற்காக எடுத்து வந்திருக்கிறோம் என்று சொல்வது அதிகரித்திருக்கிறது - சென்னை விமான நிலைய சுங்கத்துறை அதிகாரிகள் தகவல்.

நள்ளிரவில் நடுரோட்டில் பட்டா கத்தியால் கேக் வெட்டி பிறந்த நாளை கொண்டாடிய ரவுடிகள், வழி விடச் சொல்லி கேட்ட ஆட்டோக்காரரையும், அவரது சகோதரரையும் வெட்டிக் கொலை.

விருதுநகரில்​ டாஸ்மாக்கில் கொள்ளையடித்தவர்கள் கஞ்சா விற்பனையில் மாட்டிக் கொண்டனர்.

பீகார்ல ஒரு கிராமத்துல கடந்த ஒரு வாரகாலமா தினமும் ராத்திரி குறிப்பிட்ட நேரத்துல தொடங்கி பலமணி நேரத்துக்கு மின்தடை ஏற்பட்டதாம்.  பொறுத்துப் பொறுத்துப் பார்த்து மக்கள் ஒரு குழு அமைச்சு தேடினப்ப சந்தேகப்படும்படி சிக்கின ஒருத்தனைப் பிடிச்சு உதைச்சா, 'அடிக்காதீங்க... அவன..  அவர  அடிக்காதீங்க..  யானே கள்வன்... ச்சே கள்வி" ன்னு ஒரு பொண்ணு வந்துச்சாம்...  அந்த கிராமத்துப் பொண்ணுதான்.  காதலனை ரகசியமா சந்திக்க இப்படி ஒரு ஏற்பாடாம்...  காலம்டா சாமி!

போன வாரம் ஒரு தக்காளி நியூஸ் சுட்டிக் காமிச்சேனா...   இந்த வாரம் ஒண்ணு...  இந்த காலகட்டத்தில் இந்த வருடம் தக்காளி விலை உயரும்ன்னு அஞ்சாங்கத்துலயே போட்டிருக்காம்...    ஆற்காடு சீதாராமையர் பஞ்சாங்கம்தான் அது.  கேட்டா என்னமா விளக்கம் சொல்றாங்கன்னு போய்ப்படிச்சுப் பாருங்களேன்...

பிரம்மோஸ் ஏவுகணையை தாக்குப்பிடிக்க முடியலைன்னு உக்ரைன் ராணுவம் சொல்லி இருக்காம்.  ரஷ்யா - உக்ரைன் போர்ல ரஷ்ய-இந்திய கூட்டுத்தயாரிப்பான பிரமோஸ் (ரஷியால அதற்கு வேறு பெயர்) உபயோகபப்டுத்தியபோது நடந்ததைச் சொல்லி இருக்காங்க...  உண்மைல இந்தியா கிட்ட அதைவிட அதிக தூரம் பாயக்கூடிய பிரமோஸ் இருக்காம்...

==================================================================================================

பள்ளி வயதில் மனப்பாடப்பகுதி! இதைப் பார்த்ததும் பள்ளி நாட்கள் நினைவுக்கு வந்தது!

====================================================================================

பொக்கிஷம் :-

பீரங்கி மூக்கர்!

கேக்கிலேயே எறும்பா?

என்னவாம்?

ஹிஹிஹி....

ஹா.. ஹா.. ஹா...