"திங்க"க்கிழமை : தஞ்சாவூர் தயிர் பச்சடி - துரை செல்வராஜூ ரெஸிப்பி

 தஞ்சாவூர் தயிர் பச்சடி..

*****

மாதுளம் பழம் ஒன்று

வெள்ளரிப்பிஞ்சு 2

கேரட் 2

நடுத்தர பல்லாரி வெங்காயம் -  1

பச்சை மிளகாய் - 3 கொத்துமல்லித் தழை, புதினா - சிறிதளவு

கல் உப்பு தேவைக்கேற்ப

(விரும்பினால்)

சீரகப் பொடி அரை tsp

ஒரு லிட்டர் தரமான பாலைக் காய்ச்சி உறைக்கு ஊற்றினால் 700 கிராம் கட்டித் தயிர் கிடைக்கலாம்..

இப்படி இயற்கையான தயிர் முக்கியம்..

தேவையான கல் உப்பினை நுணுக்கிக் கொள்ளவும்..

மாதுளம் பழத்திலிருந்து முத்துக்களை உதிர்த்து  உள்ளங்கையளவு எடுத்துக் கொள்ளவும்..

வெள்ளரிப் பிஞ்சு கேரட்  - இவற்றை சன்னமாக துருவிக் கொண்டு பல்லாரி வெங்காயத்தை மெல்லியதாக நறுக்கிக் கொள்ளவும்..

கொத்துமல்லித் தழை, புதினா இவற்றையும் சன்னமாக நறுக்கிக் கொள்ளவும்..

பச்சை மிளகாய்களை மட்டும் காம்பினை நீக்கி விட்டு நீளவாக்கில் கீறிக் கொள்ளவும்.. மெல்லிய துகள்களாக நறுக்கி கலந்து விட்டால் ஆவலுடன் உண்ணும் குழந்தைகளிடம் களேபரத்தை உண்டாக்கி விடலாம்..

" அட.. தயிரு எவ்வளவு..ன்னு சொல்லாம சுத்தி வளைக்கிறியே!.. "

தயிர் 200 கிராம் ..

(நமது செய்முறைகளுக்கு வீட்டில் தயாரிக்கப்பட்ட  புதிய தயிர் மட்டுமே.. இதற்கு  மாற்று வேறு எதுவும் இல்லை..)

தயிரை மெல்லிய துணியில் வடிகட்டி எடுக்கவும்.. 

வடிகட்டி எடுத்த தயிருடன் உதிர்த்தும் துருவியும் நறுக்கியும் வைக்கப்பட்டுள்ள அனைத்தையும் நன்றாகக் கலந்து  சாப்பிடுவதற்கு சிறிது முன்பாக சீரகப் பொடியையும் நுணுக்கி வைத்துள்ள கல் உப்பினையும்  போட்டு நன்றாகக் கலந்து கொள்ளவும்..

இவ்வளவு தான்.. பாரம்பரிய தஞ்சாவூர் தயிர்ப் பச்சடி தயார்..

முன்னதாகவே உப்பிட்டு விட்டால் பச்சடி நீர்த்துப் போய் இருக்கும்..

இங்கே சொல்லப்பட்டிருப்பது இரண்டு பேர் தாராளமாகச் சாப்பிடக் கூடிய அளவு... 

மேற்கொண்டு தாங்களே கணக்கிட்டுக் கொள்ளவும்..

இந்தத் தயிர்ப் பச்சடி பகல் உணவுக்கு மட்டுமே ஏற்றது..  பசு நெய்யுடன் தயாரிக்கப்பட்ட - காய்கறி கலவை  சாதத்திற்கும் தேங்காய்ப் பால் சாதத்திற்கும் ஏற்றது.. 

இந்தத் தயிர்ப் பச்சடியை மதிய உணவின் போது  ஆற அமர சாப்பிடலாம்..

அல்லது மதிய உணவிற்கு முன்னதாகவே பத்தரை மணியளவில் வெளுத்துக் கட்டி விடலாம்!..

அது உங்கள் சாமர்த்தியம்!..

***