நான் தரிசனம் செய்த கோயில்கள் – ஐந்து துவாரகைகள் யாத்திரை – பகுதி 14 : நெல்லைத்தமிழன்

 

நான் தரிசனம் செய்த கோயில்கள் – நெல்லைத்தமிழன்

ஐந்து துவாரகைகள் யாத்திரை – பகுதி 14

நாம் இன்னும் அஹமதாபாத் ஸ்வாமி நாராயணன் கோவிலிலேயே இருக்கிறோம். முந்தைய பயணத்தில் இங்கு தங்கிக் குளித்துவிட்டு, கோவிலுக்குச் சென்று தரிசனம் செய்த பிறகு மற்ற கோவில்களுக்கு பேருந்தில் சென்றோம். அடுத்த முறை, ஸ்வாமி நாராயணன் கோவிலில் விசேஷம். அதனால் அங்கு கட்டுக்கடங்காத கூட்டம் வரும் என்பதால் தங்குவதற்கு மற்றும் சமைப்பதற்கான வசதி கிடைக்காது என்பதால், நகரின் இன்னொரு பகுதியில் மஹாராஜா ஹோட்டல் என்ற ஹோட்டலில் தங்கினோம்.  அன்று சாயந்திரம் ஸ்வாமி நாராயணன் கோவில் தரிசனத்துக்குச் சென்றபோது வளாகமே ஒளிவெள்ளத்தில் இருந்தது. அப்போது எடுத்த படங்களும் இந்த வாரம், ஸ்வாமி நாராயணன் கோவில் என்ற பகுதியில் இடம் பெறுகின்றன.  அதனால், ஒரே யாத்திரை, வெவ்வேறு சமயங்களில் மேற்கொள்ளும்போது ஏற்படும் மாறுதல்கள், தரிசிக்கும் இடங்களில் மாற்றம் தவிர்க்க முடியாது. அதே சமயம், யாத்திரையின் நோக்கமான முக்கியக் கோவில்கள் தரிசனம் எதுவும் விட்டுப்போகாது.

ஸ்வாமி நாராயணர் கோவில் கட்டிடக் கலை.

வெளிப்புறச் சுவற்றில் இருந்த அழகிய சிற்பங்கள்.

வளாகத்தில் இருந்த புறாக் கூட்டம். சுவாதீனமாக கையில் அமர்ந்துகொண்டு, தானியங்களைக் கொத்தித் தின்கின்றன.  (துபாயில் கையில் தோல் கையுறை அணிந்துகொண்டு, கழுகை கையில் நிற்குமாறு செய்து எடுத்த புகைப்படம் நினைவுக்கு வருகிறது. அதன் கண்ணைத் திரையிட்டு மறைத்திருப்பார்கள்)

கோவிலில் ஆஞ்சநேயர் சன்னிதியும், லக்ஷ்மி நாராயணர் சன்னிதியும்.

லக்ஷ்மி நாராயணர் மற்றும் ராதே கோபாலன் சன்னிதி

இரவில் ஒளி வெள்ளத்தில் கோவில் மண்டபம்

கோவிலில் விளக்கு அலங்காரம் கண்ணைப் பறித்தது. 

10 மணிக்கு காலை உணவுக்குச் சென்றோம். குடமிளகாய் சாம்பார், பீன்ஸ் கறியமுது, பச்சைத் தக்காளிக் கூட்டு, ரவா கீர், மிளகாய் பஜ்ஜி, ரசம் தயிர் என்று காலை உணவு. சாப்பிட்டு முடித்த பிறகு (அதாவது நாளின் முதல் உணவு. இரண்டாவது உணவு இரவுதான்), நாங்கள் எல்லோரும் பேருந்தில் கிளம்பி, அஹமதாபாத் பாலாஜி கோவிலுக்குச் சென்றோம்.  (15 கிமீ தூரம், 40 நிமிடங்கள்). திருப்பதி தேவஸ்தானம் பல இடங்களில் பாலாஜி கோவில்களை நிர்மாணித்திருக்கிறது. அதில் ஒன்று அஹமதாபாத்திலும் இருக்கிறது. அவங்க கோவில்கள்ல அதே புனிதத்தை (செல்போன் உபயோகிக்கக் கூடாது, தூர இருந்து தரிசனம் என்றெல்லாம்) நடைமுறைப்படுத்துகிறார்கள். 

இந்த வளாகத்தினுள்ளே, கோவிலுடன், திருமண மண்டபமும் வைத்திருக்கிறார்கள். 

கோவில் கோபுரம்

த்வஜஸ்தம்பத்திற்கு அப்பால் புகைப்படம் எடுக்கக்கூடாது என்று நடைமுறை வைத்திருக்கிறார்கள். அதனால் கோபுரத்திற்கு உள் எடுத்தது இந்த ஒரு படம்தான்.

கோபுரத்தின் முன்பு, அஞ்சனை மைந்தனும், கருடனும்

கோவிலுக்கு முன்பிருந்த அழகிய பாதை. 

பாதையின் ஒரு பகுதியில் விஷ்ணுவின் பத்து அவதாரங்களையும் குறிக்கும் சிற்பங்கள்

கோவிலின் உள், திருப்பதி வெங்கடாசலபதி மூலவர். மிகவும் திருப்தியான தரிசனம். அதுபோல வளாகம் முழுவதுமே மிகவும் சுத்தமாகவும் புனிதத்தை வெளிப்படுத்தும் விதமாகவும், இருந்தது. கோவில் தென்னிந்திய பாணியில் அமைந்திருந்தது.  

திருப்பதி பாலாஜி தரிசனத்திற்குப் பிறகு அருகிலிருந்த மா வைஷ்ணவிதேவி என்ற கோவிலுக்குச் சென்றோம்.

அதனைப் பற்றி வரும் வாரத்தில் காண்போம். 

(தொடரும்)