வோட்டுப் போடுவீங்களா ?

 

பானுமதி வெங்கடேஸ்வரன்: 

இப்போது 55+ இருப்பவர்கள் தங்கள் முந்தய தலைமுறையை விட உடற்பயிற்சியில் அக்கறை காட்டுகின்றனர், ஆனாலும் தங்களுக்கு மூத்த தலைமுறையினரைவிட வியாதியால் பாதிக்கப்படுவதும் அதிகமாக இருக்கறதே?

# பொதுவாக சொல்வதானால் உண்ணுகிற உணவு, குடிநீர், சுவாசிக்கும் காற்று முன் போல இல்லை என்று சொல்லவேண்டும். அதற்கும் மேலாக மன அழுத்தம் அதிகமாக ஆகி இருப்பதுகூட ஒரு காரணம் .  எனது இள வயதில் மன நல மருத்துவர் என்கிற பெயர்ப் பலகை நான் பார்த்ததில்லை.

& முந்தைய தலைமுறையினர் உடற்பயிற்சி என்று தனியாக எதையும் செய்ததில்லை என்றாலும் - அன்றாட வாழ்க்கையில் அதிக தூரம் நடந்தனர். இப்போதைய junk food வகையறாக்கள் அந்தக் காலத்தில் அதிகம் கிடையாது. வீட்டில் சமைக்கப்பட்ட சத்தான உணவுகளை உண்டு வாழ்ந்ததால், அவர்களுக்கு ஆரோக்கிய அச்சுறுத்தல்கள் எதுவும் இல்லை. 

வயதாகி விட்டது என்பதால் உடல்நலம், பொருளாதாரம் சம்பத்தப்பட்ட விஷயங்களில் என்னென்ன எச்சரிக்கைகளை கடை பிடிக்கிறீர்கள்?

# எனது அடிப்படையான கருத்து : உடல் நலம் கிட்டத்தட்ட கடவுள் அருள்.  வேண்டுமானால் dna என்று சொல்லிக்கொள்ளலாம்.  எனினும் நான் கடைப்பிடிப்பது மிக எளிமையான மூச்சுப் பயிற்சி , நடை..  பணவசதியைப் பொருத்தமட்டில் பென்ஷன் இருப்பதால் கவலை இல்லை.  முன்னெச்சரிக்கை என்று ஏதும் எடுப்பதில்லை.  அடுத்த தலைமுறை உதவிக்கு இருப்பதால், பெரிய செலவு எதுவும் என் கணக்கில் இல்லை.  கடவுளுக்கு நன்றி.

& வயதாகிவிட்டதால், உணவில் கட்டுப்பாடுகள் நிறைய கடைபிடிக்கிறேன். junk food தவிர்த்தல், அளவோடு சாப்பிடுதல், நேரத்திற்கு சாப்பிடுதல் என்று சில சமாச்சாரங்கள் உடனடியாக நினைவுக்கு வருபவை. பொருளாதாரம் - என்னுடைய சேமிப்பு, கட்டிய வீட்டிலிருந்து வருகின்ற வாடகை,  + மகன் & மகள் உதவியால் கவலையின்றி காலம் தள்ள  முடிகிறது. 

எங்கள் கேள்விகள் : 

1) நடக்கின்ற எல்லா தேர்தல்களிலும் - ஊரில் இருந்தால், வோட்டுப் போட்டது உண்டா? 

2) வோட்டுப் போடாதவர் என்றால், கீழ்க் கண்டவற்றுள் எது உங்களுக்கு அதிகம் பொருந்துகிற விளக்கம் ?

அ ) எல்லோருமே திருடர்கள் - இதில் யாரைத் தேர்ந்தெடுப்பது !

ஆ ) வோட்டுச் சாவடியில் வரிசையில் / வெயிலில் நிற்கப் பொறுமை இல்லை. 

இ ) என்னுடைய வோட்டு இந்த ஊரிலோ அல்லது பக்கத்தில் இருக்கும் வோட்டுச் சாவடியிலோ இல்லை. 

ஈ ) நான் விரும்பும் வேட்பாளர் இந்தத் தொகுதியில் போட்டியிடவில்லை 

உ ) என்னுடைய ஒரு வோட்டு வேட்பாளரின் வெற்றி / தோல்வியை நிர்ணயிக்கப் போவதில்லை. 

ஊ ) யாரும் துட்டு கொடுக்கவில்லை. எனவே யாருக்கும் வோட்டுப் போடமாட்டேன். 

எ ) வேறு ஏதாவது காரணம் இருந்தால் அதைப் பதியவும். 

= = = = = = = =

KGG பக்கம் : 

பாலிடெக்னிக் படித்த நாட்களில், நான் மறக்காமல் அடிக்கடி நினைவு கூர்ந்த மற்றொரு ஆசிரியர், மெக்கானிக்கல் டிபார்ட்மெண்ட் தலைவராக இருந்து, பின்னர் பிரின்சிபால் ஆக பதவி உயர்வு பெற்ற ஜே கோவிந்தராஜுலு. (சில வருடங்கள் கழித்து, அவர் மேல்மருவத்தூர் ஆதிபராசக்தி இன்ஜினியரிங் கல்லூரியின் பிரின்சிபால் ஆக பதவி வகித்தார்.)

அவர் எங்களுடைய முதல் ஆண்டு வகுப்பிற்கு மெக்கானிக்கல் இன்ஜினியரிங் பாடம் நடத்தினார். 

டூ ஸ்ட்ரோக் இஞ்ஜின் / 4 ஸ்ட்ரோக் இஞ்ஜின் பாடம் நடத்தும்போது வகுப்புக்கு டீசல் இஞ்ஜின் பிஸ்டன், மற்றும் வால்வு ஒன்றைக் கொண்டு வந்து காட்டினார். பாடத்திற்காகப் படம் வரையும்போது நீங்கள் பிஸ்டன் என்று ஒரு செவ்வக வடிவம் வரைவீர்கள்.வால்வு என்று மேலே ஒரு தலைகீழ் T வடிவம் வரைவீர்கள்" 

"ஆனால் அந்த செவ்வகம் மற்றும் தலைகீழ் Tஉண்மையில் இந்த அளவுக்குப் பெரிய பாகம் என்பதைத் தெரிந்துகொள்ளுங்கள் " என்றார். 

பிறகு நான் இரண்டாம் ஆண்டு மற்றும் மூன்றாம் ஆண்டு வகுப்பு படித்தபோது  இன்டஸ்ட்ரியல் மேனேஜ்மெண்ட் பாடம் நடத்தினார். 

பாடம் நடத்தும்போது dais மீது இங்கும் அங்கும் அவர் பேசிக்கொண்டே நடப்பது ( " let us take one industry which is producing tooth paste. ... let us take another industry which is producing tooth brush. ... ) இப்படி வரிசையாக சொல்லிக்கொண்டே மேடையில் அடுத்து அடுத்து நகரந்தவாறு அவர் பேசுவது மிகவும் சுவாரஸ்யமாக இருக்கும். (இந்தக் காலத்து மம்தா பானர்ஜி எப்படி பேசிக்கொண்டே இங்கும் அங்கும் சிங்கம் போல நடக்கிறாரோ - அப்படி!) 

அவர் நடத்தும் பாடம் அப்படியே மனதில் பதியும். பாடம் நடத்தும் போது நோட்டுப் புத்தகத்தில் எதுவும் எழுதிக்கொள்ள வேண்டாம் என்று சொல்லிவிடுவார். பாடம் நடத்தி முடித்த பிறகு அன்றைய அத்தியாயத்தை cyclostyle செய்தது - எல்லோருக்கும் கொடுத்துவிடுவார். அதை நாங்கள் ஃபைல் செய்து வைத்துவிடுவோம். 

அவர் நடத்தும் வகுப்பில் ஒரு முக்கிய விஷயம் என்ன என்றால் - சொல்லிக்கொண்டே வரும்போது திடீரென்று நிறுத்தி ஒரு கேள்வி கேட்பார் - உதாரணமாக production planning and control அத்தியாயம் நடத்திய போது - " today we have discussed about Production planning and ..... " என்று சொல்லி நிறுத்திவிட்டு .. மாணவர்களில் யாரையாவது கை காட்டுவார். அந்த மாணவர் திரு திருவென முழித்தால் - அடுத்த அடுத்த மாணவரைக் கை காட்டுவார். சரியான பதில் ( control என்ற வார்த்தை) யாராவது சொல்லும் வரை கை காட்டிக்கொண்டே வருவார். எனக்குப் பக்கத்து மாணவர் வரை வருகின்ற அவரது கை, என்னைக் காட்டாது எனக்கு அடுத்த மாணவரைக் காட்டும். கடைசியில் வகுப்பில் எல்லோரும் எழுந்து நின்று மௌனம் காத்த பின் என்னை நோக்கிக் கையைக் காட்டுவார். 

நான் எழுந்து " control " என்று சொன்னவுடன், புன்னகையுடன் மற்றவர்களிடம், " கிளாஸ் ல ஒருத்தர்தான் பாடத்தை கவனிக்கிறார்! மீதி எல்லோரும் தண்டம் - இங்கே உட்கார்ந்து பொழுதைக் கழிப்பதற்கு பதில் எங்காவது மாடு மேய்க்கப் போகலாம் " என்பார். 

சில சமயங்களில் அவர் அப்படிக் கேள்வி கேட்டவுடன் என்னுடைய பின் பெஞ்சு மாணவர் என் முதுகில் ஒரு தட்டுத் தட்டி ஒரு பேப்பரை என்னிடம் கொடுப்பார். அதில் நான் ஆசிரியர் எதிர்பார்க்கும் பதிலை எழுதி அந்த மாணவரிடம் கொடுப்பேன். அந்த மாணவன் அவனுடைய முறை வந்ததும் எழுதிக்கொடுத்த பதிலை சொல்லி பாராட்டு பெற்றுக்கொள்வான். 

ஆனால் பாருங்க - ஒரு தடவை கோவிந்தராஜுலு கேட்ட கேள்வியை நான் ஏதோ நினைவில் சரியாக கவனிக்கவில்லை. கேள்வி கேட்கப்பட்டு, பின் வரிசைகள் மாணவர்கள் ஒவ்வொருவராக எழுந்து ' தெரியாது' என்பதுபோல மௌனமாக நின்றார்கள். 

பின்னாலிலிருந்து என் முதுகை சொறிந்த மாணவருக்கு என்ன பதில் சொல்வது என்று கிகைத்தேன். 

அப்புறம் " Sorry I too don't know" என்று எழுதிக் கொடுத்தேன். அதற்குள் அவருடைய முறை வந்துவிட்டது. 

ஆசிரியர் அவரைக் கை காட்டியதும் அவர் அவசரமாக எழுந்து, துண்டுச் சீட்டைப் பார்த்து,  " sorry I too don't know" என்றார்! 

ஆசிரியர் திகைத்தார் ! சிரித்தார்! வகுப்பு முழுவதும் ஒரே சிரிப்பு ! நல்ல வேளை கேள்வி மற்றவர்களுக்குத் தொடராமல், என் பக்கம் வராமல் - ஆசிரியர் திரும்பவும் விளக்கம் அளித்து - என்ன கேள்வி கேட்டார் என்பதையும் கூறினார். எல்லோருக்கும் புரிந்தது.  

கோவிந்தராஜுலு அவருடைய வகுப்பில், அடிக்கடி, டிப்ளோமா படிப்பு மட்டம், டிகிரி படிப்புதான் உயர்ந்தது என்று ஒருபோதும் நினைக்காதீர்கள். இன்று BHEL தலைமைப் பொறுப்பில் இருக்கும் திரு V கிருஷ்ணமூர்த்தி ஒரு டிப்ளோமா ஹோல்டர்தான். விஷயம் இருந்தால் பெரிய படிப்பு எதுவும் அவசியம் இல்லை; யார் வேண்டுமானாலும்  தலைமை பொறுப்பிற்கு வரலாம் என்பார். 

வகுப்பு நடத்திக் கொண்டிருக்கும்போது எந்த வெளி நபர் இடைஞ்சலையும்  அவர் விரும்பமாட்டார். வகுப்பில் வருகைப் பதிவேடு கூட பார்த்து பெயர்களை அழைப்பது, வருகை உறுதி செய்துகொள்வது எல்லாம் கிடையாது. என்னுடைய வகுப்புக்கு வந்தாலும், வராவிட்டாலும் ஃபுல் அட்டெண்டன்ஸ் எல்லோருக்கும் போட்டுவிடுவேன். வராதவர்கள், பிறகு என் அறைக்கு வந்து cyclostyle நோட்ஸ் வாங்கிக் கொள்ளலாம் என்பார். அப்படி நோட்ஸ் வாங்க மறுநாள் அவர் அறைக்கு வருகின்ற மாணவரிடம் 'ஏன் வரவில்லை' என்று கேட்டு காரணம் தெரிந்துகொள்வார்.  

ஒரு தடவை கோவிந்தராஜுலு பாடம் நடத்திக் கொண்டிருக்கும்போது, வகுப்புக்கு வெளியே முந்தைய வருடம் பாஸ் செய்த மாணவர் ஒருவர் வந்து நின்றார்.

முதலில் கோவி அவரைக் கண்டுகொள்ளவில்லை. அவர் சங்கடத்தோடு பார்த்துக் கொண்டிருந்தார். தொண்டையைக் கனைத்துக் கொண்டார். கோவியின் கவனம் கலைந்தது. வாசலில் நின்ற மாணவரைப் பார்த்து, " என்ன வேண்டும்?" என்று கேட்டார். 

அந்த மாணவர் ," சார் - நீங்க உங்களை வந்து பார்க்கச் சொன்னீங்க - ரெகமண்டேஷன் கடிதம் ஒன்று எழுதித் தருவதாகச் சொன்னீர்கள் " என்றார். கோவிக்கு பயங்கரக் கோபம் வந்துவிட்டது. " ஆமாய்யா - சொன்னேன். ஆனால் என்னுடைய அறையில் நான் இருக்கும்போதுதானே நீ வந்து பார்க்கணும்? அதை விட்டுவிட்டு வகுப்பு நடத்திக்கொண்டிருக்கும்போது நடுவில் வந்து இப்படி தொந்தரவு செய்தால் என்னால் என்ன செய்யமுடியும்? எல்லா வேலைகளையும் விட்டுவிட்டு உனக்கு சிபாரிசு கடிதம் எழுதிக் கொடுக்கமுடியுமா? போ ஐயா - வகுப்பு முடிந்தபிறகு, என்னை என்னுடைய அறையில் வந்துபார்." என்று சத்தம் போட்டார். சிபாரிசு கடிதம் கேட்டு வந்த அந்த மாணவர் வேகமாக அங்கிருந்து அகன்றார். 

பிறகு கோவி எங்களிடம் - " மாணவர்களாகிய நீங்கள் தெரிந்துகொள்ள வேண்டிய முக்கியமான விஷயம் இது. யாரையாவது ஒருவரை உங்களுக்கு ஏதாவது சிபாரிசு வேண்டும் / Favour வேண்டும் என்று பார்க்கச் சென்றால் அவரை எங்கே, எப்படி பார்க்கவேண்டும், என்பதை கவனமாகத் தெரிந்துகொண்டு அதற்குரிய முறையில் போய்ப் பாருங்கள். அவரே வரச் சொன்னார் என்றாலும் கூட எந்த நேரத்தில், எப்படி அவரைப் பார்த்துப் பேசவேண்டும் என்பதைத் தெரிந்துகொள்ளுங்கள்" என்றார். 

இந்த அறிவுரையை பிற்காலத்தில் நான் எப்போதும் நினைவில் வைத்திருந்து அதுபோல நடந்துகொண்டு பாராட்டு பெற்றது உண்டு. அது பற்றி பிறகு எப்பொழுதாவது எழுதுகிறேன். 

= = = = = = =