"திங்க"க்கிழமை : மாங்கா பருப்பு - கீதா ரெங்கன் ரெஸிப்பி

 

மாங்கா பருப்பு

வணக்கம்! நமஸ்காரா! ரொம்ப நாளாச்சில்ல வந்து? 

கடவுளே! இன்று கீதாவின் செய்முறையா? தலைப்பு ஓகேதான் ஆனா வித்தியாசம்னுட்டு ஏதாச்சும் புச்சா எத்னாச்சும் கொண்டாந்துறப் போறாளேன்னு ஹாஹாஹாஹா. கொஞ்சம் இங்கிட்டுப் பாருங்க. உங்க எல்லாருக்கும் தெரிஞ்ச நீங்களும் வீட்டில் செய்யும் ஒரு செய்முறைதான் இது.

செய்முறை ரொம்ப எளிமையானது. டக்குனு செய்துடலாம். Bachelor செய்முறைன்னும் கூடச் சொல்லலாம்.

அப்படியே செய்முறைக்குப் போய் விடுகிறேன். (கடவுளே எனக்கு 48 மணி நேரம் பகல் நேரமா கொடுக்கறியா!!  நேரம் கிடைப்பதும்  ரொம்பக் கஷ்டமா இருக்கு, கிடைத்தாலும் நான் Slow ஆகிவிட்டதால் ஒன்று எழுதுவதற்குள் முடிப்பதற்குள் ஹப்பாடா என்று ரிலாக்ஸ் செய்யணும் போல இருக்கு. அதான் இங்கும் கதைக்கவில்லை!!)

நல்ல புளிப்பு மாங்கானா சின்னதா இருந்தா ரெண்டு எடுத்துக்கோங்க. புளிப்பு கம்மினா 3. இங்க படத்துல மூணு இருக்கும் ஆனா புளிப்பு கூடுதலாவே இருந்ததால் ரெண்டு எடுத்துக்கொண்டேன். பெரிய மாங்கானா புளிப்புக்கு ஏற்ப முழுசாவோ அல்லது முக்கால் பாகமோ எடுத்துக்கோங்க உங்க வீட்டுக்குத் தேவையான புளிப்புக்கு ஏற்ப.

துவரம் பருப்பு – ¼ கோப்பை (பாசிப்பருப்பிலும் செய்யலாம் நன்றாக இருக்கும்)

பச்சை மிளகாய் – 3

மிளகாய் வற்றல் – 4

வெந்தயம் – 1 மேசைக்கரண்டி

பெருங்காயம் பொடி – ஒரு தேக்கரண்டி 

மஞ்சள் பொடி – ½ தேக்கரண்டி

உப்பு – தேவையான அளவு

கறிவேப்பிலை – கொஞ்சம்

கடுகு – 1 தேக்கரண்டி

நல்லெண்ணை – 2 1/2 தேக்கரண்டி

பருப்பை ¼ தேக்கரண்டி மஞ்சள் தூள், ½ தேக்கரண்டி நல்லெண்ணை விட்டு நன்றாக குழையும் அளவு  வேக வைச்சுக்கோங்க.

மாங்காயில் தோலை நீக்கிவிட்டு படத்தில் உள்ளது போல் பெரிய துண்டங்களாச் சீவிக் கொள்ளுங்கள் இல்லைனா துண்டங்களாகக் கூடப் போட்டுக் கொள்ளலாம். இதெல்லாம் உங்கள் விருப்பம்.

வாணலியில் 1 தேக்கரண்டி நல்லெண்ணை விட்டு வெந்தயம், வர மிளகாய், போட்டு சிறிது சிவந்து வரும் போது பச்சை மிளகாய், கறிவேப்பிலை போட்டு பிரட்டிவிட்டு கடைசியாகப் பெருங்காயப் பொடியை போட்டு – பொடி என்பதால் டக்கென்று பொரிந்துவிடும். (கட்டிப் பெருங்காயம் என்றால் இரண்டு புளியங்கொட்டை அளவு சேர்த்து லைட்டா பொரிச்சுக்கோங்க) அதனால அதை சும்மா மேலே போட்டுப் பிரட்டி விட்டு, மாங்காய் துண்டங்களுடன் சேர்த்து மூழ்கும் அளவு தண்ணீர்  விட்டு மிதமான தீயில் கொதிக்க வைக்க வேண்டும். தேவையான உப்பை போட்டுக்கோங்க. மஞ்சள் பொடியும் போட்டுக்கோங்க.

5 நிமிடத்தில் துண்டங்கள் வெந்துவிடும். வெந்ததும், வேக வைத்த பருப்பை நன்றாக மசித்து வெந்த மாங்காய்த் துண்டங்களுடன் சேர்த்து, ரொம்ப கெட்டியாக இருந்தால் கொஞ்சம் தண்ணீர் சேர்த்து கொதிக்க விடவும். 

1 தேக்கரண்டி நல்லெண்ணையில் கடுகு தாளித்துச் சேர்க்கவும்.

குறிப்புகள் -

மாங்காய் துண்டங்களாக இல்லாமல் மசிந்து இருக்க வேண்டும் என்றால் கூடக் கொஞ்சம் ஒரு 5 நிமிடம் கொதிக்க விடலாம். கரண்டியால் மசித்துக் கொள்ளலாம். நான் இந்த முறை அப்படித்தான் செய்தேன்.

Bachelorகளுக்கு – அதென்ன அவங்களுக்கு மட்டும், நமக்குமே செய்யலாம்தான் - எளிதாகச் செய்யணும்னா, துவரம் பருப்பை ½ மணி நேரம் ஊற வைத்துவிடுங்க. cooker pan ல் நல்லெண்ணை 2 ஸ்பூன் விட்டு கடுகு, வெந்தயம், மிவ, ப மி, கறிவேப்பிலை எல்லாம் தாளித்து, ஊற வைத்த பருப்பு, மாங்காய் துண்டங்கள் சேர்த்து உப்பு, பெருங்காயப் பொடி, மஞ்சள் பொடியும் சேர்த்து, இரண்டு விசில் விட்டால் மாங்காய் பருப்பு ரெடி.  

சுவை ரொம்ப நன்றாக இருக்கும். இங்கு ஒரு சின்ன காணொளி கொடுத்திருக்கிறேன். என் தங்கை பெண்ணிற்காக எடுத்தேன். எங்கள் யுட்யூபில் shorts ல் போட்டுவிடலாமே என்றும். ஆனால் அங்கு இன்னும் வெளியிடவில்லை. இங்கு வெளியான பிறகு அங்கு வெளியிடலாம் என்று.