"திங்க"க்கிழமை : கூலா கறி - மனோ சாமிநாதன் ரெஸிப்பி

 இதற்கு ஏன் இந்தப்பெயர் வந்ததென்று தெரியவில்லை. ஆனால் மிகவும் சுவையாக இருக்குமென்பதற்கு மட்டும் உத்தரவாதம் தர முடியும். யாரிடம் இந்தக் கறியை செய்யக் கற்றுக்கொண்டேன் என்பதும் நினைவில்லை. ஆனால் 40 வருடங்களுக்கு மேல் சாம்பாருக்கும் ரசம் சாதத்துக்கும் குருமாவிற்கும் இதை பக்கத்துணையாக செய்து வருகிறேன். நெய் சாதத்துக்கும் இது பக்கத்துணையாக மிகவும் சுவையாக இருக்கும். காய்கறிகள் அறவே இல்லாமல் இருக்கும் சமயத்தில் இது மிகவும் பயன்படும்.

கூலா கறி

தேவைப்படும் பொருள்கள்::

கடலை மாவு-4 கப்

பச்சைக் கொத்துமல்லி இலை- 2 கைப்பிடி

இஞ்சித்துருவல்-1 மேசைக்கரண்டி

பச்சை மிளகாய் காரமானதாக இருந்தால் 3 அல்லது 4

சோம்பு- 1 ஸ்பூன்

நெய்- 3 மேசைக்கரண்டி

உப்பும் எண்ணெயும் தேவையான அளவு

பெரிய வெங்காயம்- நீளமாக மெல்லியதாக அரிந்தது-2

தக்காளி பொடியாக நறுக்கியது-3

மஞ்சள் தூள்-அரை ஸ்பூன்

கரம் மசாலா- அரை ஸ்பூன்

மிளகாய்த்தூள்- அரை ஸ்பூன்

இஞ்சி பூண்டு விழுது- 1 ஸ்பூன் [ விருப்பம் இருந்தால் மட்டும் ]

பொடியாக அரிந்த கறிவேப்பிலை, கொத்தமல்லி சிறிது

செய்முறை:

2 கைப்பிடி கொத்தமல்லி இலை, இஞ்சி, பச்சை மிளகாய் மூன்றையும் நன்கு கெட்டியாக அரைத்து கடலை மாவில் கொட்டவும்.

அதில் மஞ்சள் தூள், நெய் 2 மேசைக்கரண்டி, உப்பு சேர்த்து நன்கு கெட்டியாக பிசையவும்.

பிசைந்த மாவை எண்ணெயைத்தொட்டுக்கொண்டு சிலிண்டர் வடிவத்தில் உருட்டி அனைத்தையும் எண்ணெய் தடவிய இட்லி தட்டில் வைத்து 10 நிமிடங்களுக்கு ஆவியில் வேக வைக்கவும்.

அவை ஆறியதும் வட்ட வடிவில் துண்டுகள் போடவும்.

வாணலியில் எண்ணெய் ஊற்றி மிதமான தீயில் அவைகளை பொன்னிறமாகப் பொறித்தெடுக்கவும்.

மறுபடியும் வாணலியில் மீதமிருக்கும் எண்ணெயை சூடு பண்ணவும்.

தேவையென்றால் சிறிது கூட எண்ணெய் சேர்த்துக்கொள்ளலாம்.

வெங்காயத்தைப்போட்டு நன்கு வதக்கவும்.

அத்துடன் இஞ்சி பூண்டு விழுது சேர்த்து சிறிது நேரம் வதக்கவும்.

இப்போது தக்காளித்துண்டுகள், மஞ்சள் தூள் சேர்த்து குழைய வதக்கவும்.

மேலே எண்ணெய் தெளிந்து வரும்போது பொரித்த கூலா துண்டுகளைப்போட்டு, சிறிது நீர் தெளித்து மிதமான தீயில் சுருள வதக்கவும்.

தூள்களை சேர்த்து மேலும் கிளறவும்.

நன்கு கறி சேர்ந்து வந்ததும் மல்லி, கறிவேப்பிலை சேர்த்து கிளறி பாக்கியுள்ள 1 மேசைக்கரண்டி நெய் சேர்த்து கிளறி இறக்கவும்.