"திங்க"க்கிழமை : வாழைப்பூ போண்டா - மனோ சாமிநாதன் ரெஸிப்பி

 சில மாதங்களுக்கு முன் 105 வயதாகும் என் அம்மாவிடம் பேசிக்கொண்டிருந்தபோது, வாழைப்பூ வடை செய்து கொடுத்தேன். 

அதை சுவைத்தவாறே, ‘ நீ வாழைப்பூ போண்டா செய்திருக்கிறாயா?’ என்று கேட்டார்.

அதோடு வாழைப்பூ போண்டா செய்யும் விதம் பற்றியும் சொன்னார். 

அவ்வப்போது சிறிதளவில் நினைவு தப்புவதும் மறதியுமாக இருப்பதால் அவர்கள் சொல்லச் சொல்ல முடிந்தவரையில் தொகுத்து அந்த செய்முறையை செய்தும் பார்த்து அவர்களுக்கும் வாழைப்பூ போண்டா உடனேயே செய்தும் கொடுத்தேன். அவர்களுக்கு மிகவும் சந்தோஷம்!! அந்த செய்முறையைத்தான் இங்கே எழுதியிருக்கிறேன்.

வாழைப்பூ போண்டா:

தேவையானவை:

முழு உளுத்தம்பருப்பு- 1 கப்

ஆய்ந்த வாழைப்பூ- 3 கைப்பிடி

நீளமாக, மெல்லியதாக அரிந்த பெரிய வெங்காயம்-2

பொடியாக அரிந்த பச்சை மிளகாய்-2

பொடியாக அரிந்த மல்லியிலை- 2 மேசைக்கரண்டி

கறிவேப்பிலை- 2 கொத்து

மிளகு- 1 ஸ்பூன்

சோம்பு [ பெருஞ்சீரகம்]- 1 ஸ்பூன்

தேங்காய்த்துருவல்- கால் கப்

தேவையான உப்பும் எண்ணெயும்

செய்முறை:

ஒரு பாத்திரத்தில் தண்ணீர் ஊற்றி அது கொதிக்க ஆரம்பிக்கும்போது வாழைப்பூக்களை சிறிது உப்புடன் போட்டு 2 கொதி வந்ததும் வடிகட்டி வாழைப்பூக்களை ஒரு தட்டில் கொட்டி ஆற வைக்கவும்.

உளுந்தை ஒரு மணி நேரம் ஊறவைத்து உப்பு சேர்த்து வடைக்கு அரைப்பது போல பந்தாக அரைத்துக்கொள்ளவும்.

மாவை வழித்தெடுக்கும்போது வாழைப்பூக்களை அரிந்து அதில் போட்டு கூடவே மிளகு, சோம்பு போட்டு ஒரு சுற்று சுற்றியெடுக்கவும். அதிகம் அரைத்து விட வேண்டாம்.

இந்த மாவில் வெங்காயம், பச்சை மிளகாய், கொத்தமல்லி, கறிவேப்பிலை சேர்த்து கலந்து கொள்ளவும்.

எண்ணெயை சுட வைத்து மீடியம் தீயில் போண்டாக்களாக உருட்டிப் போட்டு பொன்னிறமாக பொரித்தெடுக்கவும். சுவையான வாழைப்பூ போண்டாக்கள் தயார்!!!

பின்குறிப்பு:

நான் அவசரத்துக்கு மிக்ஸியில் உளுந்தை அரைத்து செய்தேன். கிரைண்டரில் அரைத்து செய்தால் மாவு இன்னும் கெட்டியாக இருக்கும். அதிகமாகவும் காணும். அதோடு இன்னும் மெதுவாக இருக்கும்.